ၶွမ်ႊမတီႊၸွႆႈထႅမ်ႁႅင်းၵၢၼ် ပိုၼ်ၽၢဝ်ႇထိုင်ႁႅင်းၵၢၼ်တင်းလၢႆဝႃႈ ၸိူဝ်းဢမ်ႇမီးဝတ်းဝႂ် ၽႂ်ၶႂ်ႈပွၵ်ႈ ႁိူၼ်း/ပွၵ်ႈၶိုၼ်းမိူင်းတႆးၸိုင် ႁႂ်ႈလူင်းသဵၼ်ႈမၢႆတင်ႈတႄႇမိူဝ်ႈၼႆႉ01/08/2017 ထိုင် ဝၼ်းတီႈ19 /08/2017။


ဝၼ်းတီႈ 20 /08/2017 ၶွမ်ႊမတီႇၸွႆႈလိူဝ်ႁႅင်းၵၢၼ်ယၢၼ်မိူင်း ၼွၵ်ႈမိူင်းၼႂ်းမိူင်း တေဢွၼ်ၵၼ် ဢွၼ်ဢဝ်ႁႅင်းၵၢၼ်တႆး ဢမ်ႇမီးဝတ်ႉဝႂ်ၸိူဝ်ႉၼၼ်ႉ ၶွၼ်ႈၵၼ်တီႈ ဝတ်ႉမႂ်ႇသေ ဢွၵ်ႇယၢၼ်မိူင်းထႆး ပွၵ်ႈႁိူၼ်းၶိုၼ်း လူၺ်ႈဢမ်ႇမီးၵႃႈၸႂ်ႉၸၢႆႇသင်သေဝၢတ်ႇ ။

ၸၢႆးသႅင်ၸၢႆး ၽူႈၶဝ်ႈပႃးၶွမ်ႊမတီႊ ၸွႆႈႁႅင်းၵၢၼ်လၢတ်ႈဝႃႈ - “ မိူဝ်ႈလဵဝ်ႁႅင်းၵၢၼ်မႃးသႂ်ႇသဵၼ်ႈမၢႆ ပွၵ်ႈမိူင်းတႆးၶိုၼ်း30 – 40 ၵေႃႉယဝ်ႉ ။ ဝၼ်းဢၼ်ႁဝ်းတေမိူဝ်းၼၼ်ႉ ႁဝ်းတေမႃးထူပ်းတီႈဝတ်း မႂ်ႇၵူၺ်း ။ သင်မီးၵူၼ်းတေၵႂႃႇႁပ်ႉထိုင်တီႈ သမ်ႉယွၼ်းငိုၼ်းၸိူဝ်းၼႆႉၸိုင် ယႃႇပေယုမ်ႇလႃးလႃး ယွၼ်ႉဝႃႈၶွမ်ႊမတီႊႁဝးၼႆႉ တိုၼ်းၸွႆႈထႅမ်ပၼ်ပီႈၼွင်ႉႁဝ်းၶႃႈ ဢမ်ႇမီးၵႃႈၸႂ်ႉၸၢႆႇသင်  ” ဝႃႈၼႆ။


ႁႅင်းၵၢၼ်ယၢၼ်မိူင်း ၸိူဝ်းတေပွၵ်ႈမိူဝ်းၼၼ်ႉ ႁႂ်ႈဢွၼ်ၵၼ်ၵႂႃႇလူင်းသဵၼ်ႈမၢႆတႄႇ ဢဝ်ဝၼ်းမိူဝ်ႈၼႆႉ 01/08/2017 ထိုင်ဝၼ်းတီႈ 19 /08/2017 ပေႃးဝၼ်းတီႈ 20 ႁႂ်ႈဢွၼ်ၵၼ်မႃးႁူမ်ႈၵၼ်တီႈဝတ်ႉမႂ်ႇ သဵၼ်ႈတၢင်းသႃထုပရႃၻိတ်ႇ 44/1 မိူင်းၵွၵ်ႇ ၸိုင်ႈထႆး။


မိူဝ်ႈဝၼ်းတီႈ 17 /07/2017 ၼၼ်ႉ ၶွမ်ႊမတီႊၸွႆႈထႅမ်ႁႅင်းၵၢၼ် လႆႈဢွၼ်ဢဝ်ပီႈၼွင်ႉႁႅင်းၵၢၼ် ပွၵ်ႈသူင်ႇတီႈလႅၼ်လိၼ် 33 ၵေႃႉ မီးၸုမ်းပႃႇတီႇၵၢၼ်မိူင်းႁူဝ်သိူဝ် SNLD/ သိူဝ်ၽိူၵ်ႇ SNDP / တပ်ႉသိုၵ်းၸိုင်ႈတႆး SSPP/SSA / RCSS/SSA  ပႂ်ႉႁပ်ႉတွၼ်ႈၸွႆႈထႅမ်ပွၵ်ႈႁိူၼ်းဝႃႈၼႆ။


Photo by မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ