ၸုမ်းၵူၼ်းၼုမ်ႇတႆး Tai Youth Organization ဝဵင်းတႃႈၶီႈလဵၵ်း ဢွၼ်ႁူဝ်ၼမ်းၼႃႈသေ ပိုတ်ႇပၢင်သွၼ်ပိုၼ်ႉ ထၢၼ်ၵၢၼ်လဵတ်းတိင်ႇ ပၢႆးမွၼ်း တႃႇႁႂ်ႈၵူၼ်းၼုမ်ႇတႆး ပေႃးတေၸုင်ၸၼ်ၶဝ်ႈဢွၵ်ႇၵၼ်၊ ယုၵ်ႉမုၼ်းၼမ်ႉၵတ်ႉ ၵူၼ်းၼုမ်ႇတႆး။


ဝၼ်းတီႈ 17/07/2017 ယၢမ်းၵၢင်ၼႂ် 9:30 မူင်း ၸုမ်းၵူၼ်းၼုမ်ႇတႆး TYO ၸႄႈဝဵင်းတႃႈၶီႈလဵၵ်း ၸတ်းႁဵတ်းပွႆး ပိုတ်ႇပၢင်သွၼ် လဵတ်းတိင်ႇ ပၢႆးမွၼ်း တီႈလုမ်းၵၢပ်းသၢၼ်ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈ တႆး RCSS/SSA ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ ပၢင်သွၼ်လဵတ်းတိင်ႇ/ပၢႆးမွၼ်းၼႆႉ ယိူင်းဢၢၼ်း ႁႂ်ႈၵူၼ်းၼုမ်ႇတႆးၽွမ်ႉႁူမ်ႈၵၼ်၊ ႁႂ်ႈလႆႈႁပ်ႉႁူႉလွင်ႈၵၢၼ်ပၢႆးမွၼ်းတႆးလႄႈ ႁႂ်ႈမေႃယုၵ်ႉမုၼ်းဝႆႉၵႃႈၶၼ် ၽဵင်း ၵႂၢမ်းတႆး ၸဵမ်ၸိူဝ်းၼႆႉ ဝႃႈၼႆ။

ၸဝ်ႈႁၢၼ်သႅင်လီ ၽူႈၼင်ႈလုမ်းၵပ်းသၢၼ် RCSS/SSA လၢတ်ႈဝႃႈ “ ယိူင်းဢၢၼ်း ဢၼ်လႆႈပိုတ်ႇပၢင်သွၼ် လဵတ်းတိင်ႇငဝ်ႈၶၢမ်ႇပိုၼ်ႉပၢႆးမွၼ်းၼႆႉ ၶႂ်ႈယုၵ်ႉၼမ်ႉၵတ်ႉၵူၼ်းၼုမ်ႇတႆးႁဝ်းၶိုၼ်ႈမႃး၊ ႁႂ်ႈႁူႉၵၢၼ်ပၢႆးမွၼ်း၊ ၵၢၼ်ပၢႆးမွၼ်းဢၼ်ဝႃႈၼၼ်ႉ မၼ်းပဵၼ်သၢႆၸႂ်ၾိင်ႈငႄႈ ၸိူဝ်ႉၸၢတ်ႈမိူင်းတႆးႁဝ်းဢၼ်ၼိုင်ႈ။ ထႅင်ႈဢၼ်ၼိုင်ႈသမ်ႉ ပေႃးႁဝ်းမီးဝူင်းတွႆႇတိုင်ႈၶိုၼ်ႈမႃး၊ ယႃႇႁႂ်ႈပဵၼ်ဝူင်းတွႆႇတိုင်ႈတၢင်းၵျေႃႇလၢႆလၢႆ။ ၶႂ်ႈႁႂ်ႈႁူႉဝႃႈ ၶေႃႈၵႂၢမ်းၶိုၵ်ႉလိုၵ်ႉ မီးၸိူင်ႉႁိုဝ် ႁႂ်ႈပၢႆးမွၼ်းတႆးႁဝ်းပေႃးၶဝ်ႈ ထိုင်ၸၼ်ႉလုမ်ႈၾႃႉ” ဝႃႈၼႆ။


ၽူႈမႃးပူင်သွၼ်ပၼ်တႄႉ ပဵၼ်ၸဝ်ႈပၢႆးမွၼ်း ၸၢႆးလၢဝ်မိူင်း(ယၢဝ်း)၊ ၵူၼ်းၼုမ်ႇမႃးၶဝ်ႈပၢင်လဵပ်ႈႁဵၼ်းဢဝ် မီး 18 ၵေႃႉ၊ ပၢင် သွၼ်ၼႆႉ ပူင်သွၼ်ပၼ်ၵူၼ်းၼုမ်ႇ တႃႇ 20 ဝၼ်း။ ၸုမ်းၵူၼ်းၼုမ်ႇတႆး TYO ၸႄႈဝဵင်းတႃႈၶီႈလဵၵ်း ႁပ်ႉပုၼ်ႈ ၽွၼ်းၶိုင်ႈသၢင်ႈ- ဝႃႈၼႆ။


ပွႆးပိုတ်ႇပၢင်သွၼ် လဵတ်းတိင်ႇၼႆႉ မီးၽူႈယႂ်ႇၵူၼ်းလူင် ၼႂ်းပွၵ်ႉ/ဢိူင်ႇ၊ ပႃႇတီႇၵၢၼ်မိူင်း သိူဝ်ၽိူၵ်ႇ/ ႁူဝ်သိူဝ် ဢိၵ်ႇထႅင်ႈ လၢႆလၢႆၵေႃႉ ၶဝ်ႈႁူမ်ႈမွၵ်ႇလၢတ်ႈၶေႃႈၵႂၢမ်းတိုၵ်းသူၼ်းပၼ်ႁႅင်းၵူၼ်းၼုမ်ႇတႆးၵႂႃႇ ဝႃႈၼႆ။


ၸုမ်းၵူၼ်းၼုမ်ႇတႆး TYO ၸႄႈဝဵင်းတႃႈၶီႈလဵၵ်းၼႆႉ တႄႇၵေႃႇတင်ႈၶိုၼ်ႈမႃး မိူဝ်ႈပီ 2016 လိူၼ်ၻီႊသႅမ်ႊၿိူဝ်ႊ ဝၼ်းတီႈ 18 ။ ႁူဝ်ပဝ်ႈၸုမ်းၵူၼ်းၼုမ်ႇတႆးတႃႈၶီႈလဵၵ်း ပဵၼ်ၸၢႆးဝုၼ်းမႃး ဝႃႈၼႆ။TYO ၼႆႉ ၵမ်ႈၼမ်ႁူႉဝႃႈ ၶွင်ႊသီႊဢဝ်ၶိုၼ်းၸိုင်ႈတႆး RCSS/SSA ၵမ်ႉယၼ်။ ယၢမ်းလဵဝ်မီးၸွတ်ႈတူဝ်ႈ ၵူႈၸႄႈဝဵင်း ၼႂ်းမိူင်းတႆး။