ၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network လူင်းပိုၼ်ႉတီႈ ႁူပ်ႉထူပ်း ပီႈၼွင်ႉတႆး ၼႂ်းတိူင်းပႃႇၵိူဝ်၊ ဢုပ်ႇဢူဝ်းႁၢင်ႈႁႅၼ်း တႃႇ ၸတ်းႁဵတ်းပၢင်ၵုမ်ၵူၼ်းၼုမ်ႇတႆးပတ်းပိုၼ်ႉ ပွၵ်ႈၵမ်း 3 ဝႃႈၼႆ။


ဝၼ်းတီႈ 27/07/2017 ယၢမ်းဝၢႆးဝၼ်း 3 မူင်းၶိုင်ႈပၢႆၼၼ်ႉ ႁူဝ်ၼႃႈၵေႃႁူမ်ႈသၢင်ႈၵူၼ်းၼုမ်ႇတႆးလႄႈ ၽူႈပွင်ၵၢၼ် တင်းမူတ်း 6 ၵေႃႉ ၵႂႃႇႁူပ်ႉထူပ်းဢုပ်ႇဢူဝ်း  သပ်းလႅင်းၼႄ လွင်ႈယိူင်းဢၢၼ်း ဢၼ်တေၸတ်းႁဵတ်း ပၢင်ၵုမ်လူင် ၵူၼ်းၼုမ်ႇတႆး ပွၵ်ႈၵမ်း 3 ။

ပၢင်ဢုပ်ႇဢူဝ်းႁူပ်ႉထူပ်းၼႆႉ ၸတ်းႁဵတ်းတီႈ ဝၢၼ်ႈသပေႇတၢၼ်း ၸႄႈဝဵင်းၵျွၵ်ႉတၵႃး တိူင်းပႃႇၵိူဝ်။ လိူဝ်ၼၼ်ႉ ထိုင်မႃး ယၢမ်းၵၢင်ၶမ်ႈ 8 မူင်းသမ်ႉ သိုပ်ႇႁူပ်ႉထူပ်းထႅင်ႈ ၵူၼ်းၼုမ်ႇတႆး ၼႂ်းၸႄႈဝဵင်း တွင်ႇငူႇ၊ ၽိဝ်း၊ ၵျွၵ်ႉၵျီး လႄႈ ၵျွၵ်ႉတၵႃး တႃႇ 4 ၸႄႈဝဵင်းဝႃႈၼႆ။


ၸၢႆးလွႆၶမ်းပၢင်ႇ ၽူႈပွင်ၵၢၼ် ၵေႃႁူမ်ႈသၢင်ႈၵူၼ်းၼုမ်ႇတႆး TYN လၢတ်ႈဝႃႈ “ ဢၼ်ႁဝ်းၶႃႈ မႃးႁူပ်ႉထူပ်း ပီႈၼွင်ႉတႆး ၼႂ်းတိူင်းပႃႇၵိူဝ်ၼႆ ႁဝ်းၶႃႈ မႃးႁူပ်ႉထူပ်းဢုပ်ႇဢူဝ်းဝႆႉလူင်ႈၼႃႈ ႁႂ်ႈပွင်ႇၸႂ်ၼိူဝ်ယိူင်းဢၢၼ်း ဢၼ်တေမႃးၸတ်း ပၢင်ၵုမ်လူင်ၵေႃႁူမ်ႈသၢင်ႈၵူၼ်းၼုမ်ႇတႆး ပွၵ်ႈၵမ်း 3 ၼႆႉ။ ယဝ်ႉၵေႃႈ လွင်ႈၼႆႉ ႁဝ်းၶႃႈ မီးယိူင်းဢၢၼ်းဝႆႉၸဵမ် မိူဝ်ႈပွၵ်ႈၵမ်းသွင်ဝႆႉသေတႃႉ ၵူၺ်းၵႃႈ ဢိင်ၼိူဝ်ငဝ်းလၢႆးၵူႈလွင်ႈလႄႈ ဢမ်ႇပဵၼ်မႃး။ ယွၼ်ႉၼၼ် ပွၵ်ႈၼႆႉ ႁဝ်းၶႃႈ ႁူပ်ႉ ထူပ်းမႃး ၸုမ်းတူင်ႉၼိုင်တူင်ႇဝူင်းတႆး၊ ၽူႈယႂ်ႇၵူၼ်းလူင် ၼႂ်းၸႄႈဝဵင်းသေ ယိူင်းဢၢၼ်းဝႆႉ ပၢင်ၵုမ် ၶွၼ်ႊရၾႅၼ်ႊၵူၼ်းၼုမ်ႇတႆးၼႆႉ တေၸတ်းႁဵတ်းတီႈ ၸႄႈဝဵင်းၵျွၵ်ႉတၵႃး ဝၢၼ်ႈသပေႇတၢၼ်း ” ဝႃႈၼႆ။


မိူဝ်ႈၼႆႉ ဝၼ်းတီႈ 28/07/2017 ယၢမ်းၵၢင်ၼႂ် 9 မူင်း တေသိုပ်ႇၵႂႃႇႁူပ်ႉထူပ်းႁူဝ်ၼႃႈ ၼႂ်းဝၢၼ်ႈၼႂ်းသူၼ်ဢၼ် ႁပ်ႉပုၼ်ႈၽွၼ်း တႃႇတေႁဵတ်း ပၢင်ၵုမ်ၵူၼ်းၼုမ်ႇတႆး ၶွၼ်ႊၾရႅၼ်ႊ ပွၵ်ႈၵမ်း 3 တီႈၸႄႈဝဵင်းတေႃးၵျွႆးဢိၼ်း ဝႃႈၼႆ။


ပၢင်ၵုမ်ၼႆႉ ႁၢင်ႈႁႅၼ်းတႃႇႁႂ်ႈၵူၼ်းၼုမ်ႇတႆး ပတ်းပိုၼ်ႉ ၵွင်ႉၵၢႆႇ ႁူပ်ႉထူပ်းၵၼ်မိုတ်ႈၵိုဝ်းၵၼ် တင်ႇပိင်ႇလႅၵ်ႈ တၢင်းႁူႉၵၼ် ႁူမ်ႈၵၼ် ႁဵတ်း သၢင်ႈတူင်ႉၼိုင် ၵၢၼ်ငၢၼ်းၵူၼ်းၼုမ်ႇၵႂႃႇၸွမ်းၵၼ် ဝႃႈၼႆ။


ပၢင်ၵုမ်ၵူၼ်းၼုမ်ႇမိူင်းႁူမ်ႈတုမ်မိူင်းမၢၼ်ႈပတ်းပိုၼ်ႉ ပွၵ်ႈၵမ်းၼိုင်ႈ ၸတ်းႁဵတ်းၼႂ်းႁၢင်လိူၼ်ၻီႊသႅမ်ႊၿိူဝ်ႊ ပီ 2014 ။ ပွၵ်ႈၵမ်းသွင် ၸတ်းႁဵတ်းၼႂ်းႁၢင်လိူၼ်ၻီႊသႅမ်ႊၿိူဝ်ႊ ပီ 2015 ဢွင်ႈတီႈၸတ်းႁဵတ်း ပဵၼ်တီႈ ဝတ်ႉတႆးမူႇၸေႊ ဝဵင်းလိူဝ်ႇ ဝႃႈၼႆ။


Photo by Loi Kham Pang