သင်ၶၸဝ်ႈ ၸုမ်းၵူၼ်းၼုမ်ႇ ၸုမ်းတူင်ႉၼိုင်တူင်ႇဝူင်းၵူၼ်းဢိၵ်ႇလၢႆၸုမ်း ၸႄႈဝဵင်းလၢႆးၶႃႈ ႁူမ်ႈၵၼ် တႅမ်ႈလိၵ်ႈထိုင် ပႃႇတီႇ ႁူဝ်သိူဝ် SNLD ႁႂ်ႈၸွႆႈထႅမ်ပၼ်လွင်ႈၵႂႃႇမႃး ၽွင်းတႆးၸိူဝ်းၵႂႃႇႁဵတ်းၵၢၼ်မိူင်းထႆး ပွၵ်ႈၶိုၼ်းႁိူၼ်းယေး။

ၸၢႆးယွတ်ႈၽိူဝ်ၼုမ်ႇ  ၸုမ်းတူင်ႇဝူင်းပၢႆးမွၼ်းတႆး လၢႆးၶႃႈ လၢတ်ႈဝႃႈ - “ ဢိင်ၼိူဝ်ပၵ်းပိူင်မိူင်းထႆး လႅၵ်ႈလၢႆႈသေ ႁဵတ်းႁႂ်ႈ ၵူၼ်းမိူင်းတႆးၸိူဝ်းၵႂႃႇႁဵတ်းၵၢၼ်မိူင်းထႆး ထူပ်းတၢင်းယၢပ်ႇၽိုတ်ႇ မၢင်ၸိူဝ်းဝတ်းဝႂ်တၢင်းမိူင်းထႆးၵေႃႈဢမ်ႇမီး ဝႂ်ၵပ်းတူဝ် (မၢတ်ႈပုင်ႇတိၼ်ႇမၢၼ်ႈ) ၵေႃႈဢမ်ႇမီးလႄႈ ထူပ်းတၢင်းယၢပ်ႇလွင်ႈၵႂႃႇမႃးလႄႈတီႈယူႇသဝ်း တႄႉတႄႉ ။ မိူဝ်ႈလဵဝ်လူင် ပွင်ၸိုင်ႈထႆး ယွၼ်ႇယၢၼ်းပၼ် 120 ဝၼ်းၼႆသေတႃႉ ဝၢႆးၼၼ်ႉမႃးတေၶိုၼ်းသုၵ်ႉထႅင်ႈၵေႃႈပဵၼ်လႆႈ ၵွပ်ႈၼၼ်လႄႈ ၼင်ႇႁိုဝ် ၾၢႆႇပႃႇတီႇၵၢၼ်မိူင်းတႆး ပေႃးတေႁၢင်ႈႁႅၼ်းလွင်ႈၸွႆႈထႅမ်ႁႂ်ႈတူဝ်ႈတၼ်းဝႆႉလႆႈၼၼ်ႉ ၸင်ႇႁူမ်ႈၵၼ်တႅမ်ႈလိၵ်ႈ တၢင်ႇထိုင် ၶႃႈဢေႃႈ - ဝႃႈၼႆ။


ဝၼ်းတီႈ 02/07/2017 သင်ၶၸဝ်ႈ၊ ၸုမ်းၵူၼ်းၼုမ်ႇ၊ ၸုမ်းတူင်ႇဝူင်းပၢႆးမွၼ်းတႆး၊ ၸုမ်းပၢႆးပၺ်ၺႃ ဢိၵ်ႇၵူၼ်းၼုမ်ႇ ဝဵင်းလၢႆးၶႃႈၸိူဝ်းၼႆႉ ႁူမ်ႈၵၼ်သေ တႅမ်ႈလိၵ်ႈထိုင် ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် SNLD လၢႆးၶႃႈ ႁႂ်ႈၸွႆႈထႅမ်ပၼ် လွင်ႈၵႂႃႇမႃး၊ လွင်ႈတီႈယူႇ၊ လွင်ႈတၢင်းၵိၼ်တၢင်းယမ်ႉ၊ ပီႈၼွင်ႉတႆးၵမ်ႈၽွင်ႈယၢၼ်ၽၢတ်ႇ ၼႂ်းပိုၼ်ႉတီႈပီယၢဝ်းၶၢဝ်းႁိုင်ယဝ်ႉလႄႈႁႂ်ႈပေႃးမႅၼ်ႈၸွမ်းၼင်ႇပိူင်ယူႇၵိၼ်ၼၼ်ႉ ႁႂ်ႈၸွႆႈသပ်းလႅင်း ပၼ်တၢင်းႁူႉ ၶဝ်ၸိူဝ်းၼႆႉ။


ၸၢႆးလဵၵ်ႉ ၽူႈၶၢၼ်ပၢၵ်ႇပႃႇတီႇႁူဝ်သိူဝ် လၢတ်ႈဝႃႈ - “ ဢိင်ၼိူဝ်မိူင်းႁဝ်းဢမ်ႇသၢင်ႇထုၵ်ႇ ပၢင်တိုၵ်းသိုၵ်းသိူဝ်ၼမ်၊ ယႃႈမဝ်း ၵမ်လိူင်ႇ ၵၢၼ်ႁႃၵိၼ်လဵင်ႉတွင်ႉယၢပ်ႇလႄႈ ၵူၼ်းမိူင်းတႆး ဢွၼ်ၵၼ်ၵႂႃႇႁဵတ်းၵၢၼ်မိူင်းထႆး မိူဝ်ႈလဵဝ်ပၵ်းပိူင် ၵပ်ႉၵိၼ်း မႃးလႄႈ ပီႈၼွင်ႉႁဝ်း ဢွၼ်ၵၼ်လႆႈပၢႆႈဝၢႆႇပွၵ်ႇမႃးမိူင်းႁဝ်းၶိုၼ်းၼႆၵေႃႈ ၼင်ႇႁိုဝ်တေဢမ်ႇ မီးတၢင်းယၢပ်ႇၽိုတ်ႇ၊ ၼင်ႇႁိုဝ် တေယူႇငၢႆႈၵိၼ်ငၢႆႈ၊ လုၵ်ႈလၢၼ်ၵေႃႈပေႃးတေလႆႈႁဵၼ်းလိၵ်ႈလၢႆးၼၼ်ႉ ယူႇတီႈပႃႇတီႇလႄႈ ၸုမ်းတူင်ႇဝူင်းၵူၼ်း တေႁူမ်ႈ မိုဝ်းၵၼ် ၶပ်းၶိုင်ၸွႆႈထႅမ်ၵႂႃႇယူႇ ဝႃႈၼႆ။


လူင်ပွင်ၸိုင်ႈမိူင်းထႆး ပိုၼ်ၽၢဝ်ႇ ပၵ်းပိူင်ႁႅင်းၵၢၼ် (ၵူၼ်းၶဝ်ႈႁဵတ်းၵၢၼ်ၼႂ်းမိူင်းထႆး) ၽူႈလႂ်ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီးဝတ်းဝႂ်၊ ႁဵတ်းၵၢၼ် ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် မႂ်ငိုၼ်း 400,000 – 800, 000 ၿၢတ်ႇ တေႃႇၵူၼ်း ႁဵတ်းၵၢၼ် ၼိုင်ႈၵေႃႉ။ ႁဵတ်းႁႂ်ႈပေႃႈလဵင်ႉ/ မႄႈလဵင်ႉ ဢွၼ်ၵၼ်တူၵ်းၸႂ်။


ၼႂ်းမိူင်းထႆးၼႆႉ ၵူၼ်းမိူင်းမၢၼ်ႈ၊ မိူင်းတႆး၊ မိူင်းလၢဝ်း၊ မိူင်းၶႅမ်ႊၿေႃႊတီႊယိူဝ်ႊၶဝ်ႈႁဵတ်းၵၢၼ်ၼပ်ႉလၢၼ်ႉၵေႃႈ ၊ ၵမ်ႈၼမ်မီး ဝႂ်တႃႇယူႇႁဵတ်းၵၢၼ်သေတႃႉ၊ၵမ်ႈၽွင်ႈၸိူဝ်းမႃးမႂ်ႇဢမ်ႇမီး၊ မၢင်ၸိူဝ်းသမ်ႉၽိတ်းတီႈႁဵတ်းၵၢၼ်၊ တီႈႁဵတ်းၵၢၼ်ၸိုဝ်ႈ ပေႃႈလဵင်ႉဢမ်ႇမႅၼ်ႈသေၺႃးတီႉၵေႃႈမီး၊ ယၢမ်းလဵဝ်ၵူၼ်းႁဵတ်းၵၢၼ်ၼပ်ႉမိုၼ်ႇ ပွၵ်ႈမိူဝ်းမိူင်းၽႂ်မၼ်း ၊ ၸိူဝ်းတိုၵ်ႉ ပွၵ်ႈၵေႃႈ မီး ယူႇၵူႈဝၼ်း။


ၸုမ်းၶၢဝ်ႇၽူႈတွႆႇႁွၵ်ႈ/သၢႆမွၵ်ႇႁွမ် / 03/07/2017