ႁူင်းႁဵၼ်းထမ်းမ ၸႄႈဝဵင်းတၢင်ႉယၢၼ်း ၸတ်းႁဵတ်းပၢင်ႁူပ်ႉထူပ်း ၶူးသွၼ်/မေႃသွၼ် ဢုပ်ႇဢူဝ်းတၢင်ႇလၢတ်ႈၼႄ ၵၢၼ်သွၼ်/ၵၢၼ်ႁဵၼ်း ၼႂ်းဢွင်ႈတီႈၽႂ်မၼ်း လွင်ႈၶိုပ်ႈၼႃႈလႄႈ လွင်ႈယူပ်ႈယွမ်း ၸဵမ်ၸိူဝ်းၼႆႉ။


ဝၼ်းတီႈ 01/07/2017 ယၢမ်းၵၢင်ၼႂ် 09:00 ထိုင် 03:00 မူင်းဝၢႆးဝၼ်း ၸဝ်ႈတူၼ်ၶူးပၺ်ၺႃသႃမိ ႁူဝ်ပဝ်ႈႁူင်း ႁဵၼ်းထမ်းမ တင်း ၽူႈပွင်ၵၢၼ် ၼႂ်းႁူင်းႁဵၼ်း ၼမ်းႁဵတ်းပၢင်ႁူပ်ႉထူပ်း ၶူး/မေႃသွၼ် တီႈဝတ်ႉၶူင်ႈၵူတ်ႇ ဢိူင်ႇမိူင်းၵႅင် ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ယိူင်းဢၢၼ်း ၼင်ႇႁိုဝ် လွင်ႈတူင်ႉ ၼိုင်ၼႂ်းႁူင်းႁဵၼ်းထမ်းမ တူင်ႇဝဵင်းတၢင်ႉယၢၼ်း၊ ယုၵ်ႉယွင်ႈပၼ်ႁႅင်းၼမ်ႉၸႂ် မေႃသွၼ် ႁႂ်ႈႁူႉမေႃလွင်ႈၵွင်ႉသၢၼ် ႁဵတ်းၵၢၼ်လႄႈ တႃႇပၼ်ပိုၼ်ႉႁူႉယုၵ်ႉမုၼ်းၼမ်ႉၵတ်ႉမေႃသွၼ် ၸွႆႈၵၼ်  ပူၵ်းပွင်ပၼ်လုၵ်ႈ ႁဵၼ်းၵႂႃႇဝၼ်းတႃမိူဝ်းၼႃႈ ၸဵမ်ၸိူဝ်းၼႆႉ ဝႃႈၼႆ။

ၸဝ်ႈၶူးပုၺ်ႇၺဝမ်ႇသ ၽူႈၶဝ်ႈႁူမ်ႈပၢင်ႁူပ်ႉထူပ်း လၢတ်ႈဝႃႈ “ ပၢင်ႁူပ်ႉထူပ်းၶူး/မေႃသွၼ် ဢၼ်ၸတ်း ႁဵတ်း ပွၵ်ႈ ၵမ်းၼႆႉ ပဵၼ်ပွၵ်ႈၵမ်း 14 ယဝ်ႉ။ သွင်လိူၼ် 1 ပွၵ်ႈ ႁဝ်းၶႃႈ ၶူး/မေႃသွၼ် 200 ပၢႆ မႃးႁူပ်ႉထူပ်းၵၼ် ဢုပ်ႇလၢတ်ႈတၢင်ႇလၢတ်ႈ ၼႄၵၼ် လွင်ႈၶိုပ်ႈၼႃႈလႄႈ လွင်ႈယူပ်ႈယွမ်းႁူင်းႁဵၼ်းၽႂ်မၼ်း ၸႃႉၵႂႃႇၸဵမ်ၸိူဝ်းၼႆႉ ဝႃႈၼႆ။


ပၢင်ႁူပ်ႉထူပ်းၵမ်းၼႆႉ ၸဝ်ႈတူၼ်ၶူးပၺ်ၺႃသႃမိ ႁူဝ်ပဝ်ႈ ႁူင်းႁဵၼ်းထမ်းမ မွၵ်ႇလၢတ်ႈၶေႃႈ ၵႂၢမ်းပိုတ်ႇပၢင်၊ ၸဝ်ႈၶူးမိၼ်တၵ ၵျွင်းလူင်မူႉ မွၵ်ႇလၢတ်ႈ လွင်ႈၽွၼ်းလီ ၽုၵ်ႇတူၼ်ႈမႆႉ၊ ၸဝ်ႈၶူးဢႃရိယ ၵျွင်းပဵင်းလီ မွၵ်ႇ လၢတ်ႈၼႄ လွင်ႈၵူၼ်းလႄႈတူၼ်ႈမႆႉ မီးၽွၼ်းလီၸိူင်ႉႁိုဝ် ၸဵမ်ၸိူဝ်းၼႆႉ ဝႃႈၼႆ။


လိူဝ်ၼၼ်ႉ ယၢမ်းဝၢႆးဝၼ်း 3 မူင်း ၼႂ်းဝၼ်းတီႈ 1 ၵူၺ်းၼင်ႇၵဝ်ႇ ယူႇတီႈၸဝ်ႈၶူးၸၼ်ႇတိမႃႇ ဝတ်ႉၶူင်ႈၵူတ်ႇ ဢွၼ် ႁူဝ်ၶူး/မေႃသွၼ်သေ ၽုၵ်ႈတူၼ်ႈမႆႉ 1000 တူၼ်ႈပၢႆ။ မိူၼ်ၼင်ႇ တူၼ်ႈမႆႉသၵ်း၊ မႆႉလွၵ်ႈၶၢပ်ႈ၊ မႆႉသေႃႉလႄႈ မႆႉၶီႈလဵၵ်း(မွၵ်ႇၸီႇရီႇ) ၸဵမ်ၸိူဝ်းၼႆႉ ဝႃႈၼႆ။


ႁူင်းႁဵၼ်းထမ်းမ ၸႄႈဝဵင်းတၢင်ႉယၢၼ်းၼႆႉ ပိုတ်ႇပူင်သွၼ်ပၼ်လုၵ်ႈဢွၼ်ႇ ၼႂ်းဝၢၼ်ႈ/ဢိူင်ႇမႃး မီးၶၢဝ်းတၢင်း 4-5 ပီ ယဝ်ႉ။ တင်းမူတ်းႁူင်းႁဵၼ်း ဢၼ်ပိုတ်ႇပူင်သွၼ် မီး 50 ႁူင်းႁဵၼ်းပၢႆ ဝႃႈၼႆ။


လွင်ႈလႆႈပဵၼ်မႃးႁူင်းႁဵၼ်းထမ်းမၼႆႉ လုၵ်ႉမႃးတီႈငဝ်ႈငုၼ်းမုၵ်ႉၸုမ်းလူင် သင်ၶၸဝ်ႈၸိုင်ႈတႆး ဢွၼ်ႁူဝ်တႄႇ တင်ႈ မႃး ၼင်ႇႁိုဝ်ပီႈၼွင်ႉၸၢဝ်းၶိူဝ်း ဢၼ်ယူႇၼႂ်းမိူင်းၸိုင်ႈတႆး၊ ပေႃးတေႁူႉၸၵ်းၵိူဝ်းယမ် ပုတ်ႉထထမ်းမ၊ သင်ၶ ဝတ်ႉ ဝႃးပဵၼ်တီႈပိုင်ႈဢိင် ဝႃႈၼႆ။
မိူဝ်ႈလဵဝ်ၼႆႉ ဝတ်ႉဝႃးလႄႈၵူၼ်းၼုမ်ႇ ႁၢင်ႇၵႆၵၼ်မႃး ၵူႈမိုဝ်ႉၵူႈဝၼ်းလႄႈ ၼင်ႇႁိုဝ်ပေႃး တေၽိူမ်ႉထႅမ်ပၼ်တီႈယူပ်ႈ ယွမ်းၼႆသေ ၸင်ႇသၢင်ႈမႃးႁူင်းႁဵၼ်းထမ်းမၼႆႉ- ဝႃႈၼႆ။


ႁူင်းႁဵၼ်းထမ်းမၼႆႉ ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆးပဵၼ်ငဝ်ႈသေ ၸဝ်ႈၶူးၸိူဝ်းၵႂႃႇႁဵၼ်း ၼွၵ်ႈမိူင်း မိူင်း သီႇႁူဝ်ႇ/မိူင်းထႆး ဢိၵ်ႇလၢႆဝၢၼ်ႈလၢႆမိူင်း ပွၵ်ႈမႃး ပၢၵ်ႈတၢင်း-ၶဵၼ်ႇတႅမ်ႈလၵ်းသုတ်ႇၵၢၼ်ႁဵၼ်း တႄႇ ပူင်သွၼ်မႃး မိူဝ်ႈပီ 2014။ ယၢမ်းလဵဝ် ၶႂ်ႈတူဝ်ႈၸိုင်ႈတႆးယဝ်ႉ ဝႃႈၼႆ။