ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း ဢုပ်ႇလၢတ်ႈ ၼႂ်းသၽႃး လွင်ႈၶွမ်ႊပၼီႊၵျွၵ်ႉသဵင်းဢႃးမၢၼ်ႇ (ကျောက်စိမ်းအားမှန်) ဢၼ်ၶုတ်းၶမ်း ၾၢႆႇႁွင်ႇဝၼ်းဢွၵ်ႇ ဝၢၼ်ႈႁူဝ်ပၢႆ ဢိူင်ႇမိူင်းပၢႆ ၸႄႈဝဵင်းလႃႈသဵဝ်ႈ ၼၼ်ႉ ႁဵတ်းႁႂ်ႈသူၼ်ႁႆႈ ၼႃးၵူၼ်းမိူင်းလူႉၵွႆ ဢမ်ႇယွမ်း 100 ဢေႊၶိူဝ်ႊလႄႈ တုၵ်းယွၼ်းႁႂ်ႈၵိုတ်း ဝႃႈၼႆ။


ဝၼ်းတီႈ 28/07/2017 ပၢင်ၵုမ်သၽႃး ၸိူဝ်ႉၸၢတ်ႈ ပွၵ်ႈၵမ်း 2 ၵမ်းထူၼ်ႈ 5 ၽူႈတႅၼ်းသၽႃးၸိူဝ်ႉၸၢတ်ႈ ၸၢႆးဝၼ်းလႅင်းၶမ်း တၢင်ႇထိုင်ၼႂ်းပၢင်ၵုမ်သၽႃး ၼင်ႇႁိုဝ် ၵၢၼ်ၶုတ်းၶမ်း တီႈၾၢႆႇႁွင်ႇဝၼ်းဢွၵ်ႇ ဝၢၼ်ႈႁူဝ်ပၢႆ ဢိူင်ႇမိူင်းပၢႆ ၸႄႈဝဵင်းလႃႈသဵဝ်ႈ တေၵိုတ်းဝႆးဝႆးၼၼ်ႉ  ၶႂ်ႈႁႂ်ႈၽွင်းလူင်ၶဝ် လူင်းမိုဝ်းႁဵတ်းပၼ်ဝႆးဝႆး  ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ လၢတ်ႈဝႃႈ “ တေႃႈလဵဝ်တႄႉ ၽွင်းလူင်လၢတ်ႈဝႃႈ ဢမ်ႇဝႃႈမီး ၵၢၼ်ၶုတ်းၶမ်းၼႆသေတႃႉၵေႃႈ ၵၢၼ်ၶုတ်းၶမ်းၼႆႉ မၼ်းတိုၵ်ႉမီးယူႇ ၸွမ်းၼင်ႇၵူၼ်းမိူင်းပိုၼ်ႉတီႈ ၶဝ်တၢင်ႇလၢတ်ႈ မႃးလႄႈ ၼင်ႇႁိုဝ် တေၵိုတ်းလိုဝ်ႈဝႆးဝႆးၼၼ်ႉ ၶႂ်ႈႁႂ်ႈၽွင်းလူင်ၶဝ် လူင်းၵူတ်ႇထတ်းႁဵတ်းပၼ်ဝႆးဝႆး။ ယွၼ်ႉဝႃႈ သူၼ်ႁႆႈၼႃးၵူၼ်းမိူင်း 100 ဢေႊၶိူဝ်ႊပၢႆ ဢမ်ႇၸၢင်ႈၽုၵ်ႇသွမ်ႈသင်လႆႈ ယွၼ်ႉၶီႈၵူမ်ႇၶီႈငႂ်ႈ လႆၶဝ်ႈၼႂ်းတိူၵ်ႇ ႁႆႈ သူၼ်လွၵ်းၼႃးလူႉၵွႆၼမ် ႁဵတ်းႁႂ်ႈၵူၼ်းမိူင်းထူပ်းတၢင်ႇယၢပ်ႇၽိုတ်ႇ တႃႇၵၢၼ်ႁႃၵိၼ် လဵင်ႉတွင်ႉ၊ ၵူၼ်းမိူင်း” ဝႃႈၼႆ။


ဢူးဢူင်းဝိၼ်း ၽွင်းလူင် ၾၢႆႇသိင်ႇဝႅတ်ႉလွမ်ႉလႄႈ ႁိၼ်ႁႄႈ လၢတ်ႈဝႃႈ “ ဢွင်ႈတီႈၶဝ် ၶုတ်း ၶမ်းၼၼ်ႉ မၼ်းပဵၼ်တီႈ ဢမ်ႇမီးလွင်ႈႁူမ်ႇလူမ်ႈ ပႆႇလႆႈလူင်းၵႂႃႇတူၺ်း။ မိူဝ်ႈၵွၼ်ႇၼႃႈ ပီ 2016 ၼၼ်ႉ လႆႈလူင်း တူၺ်းယဝ်ႉၵမ်းၼိုင်ႈ တၢင်းထုင်ႉမိူင်းပၢႆၼၼ်ႉ ဢမ်ႇမီးၵၢၼ်ၶုတ်းၶမ်း။ ၵွပ်ႈၼၼ်လႄႈ ဢၼ်ၸၢႆး ဝၼ်းလႅင်း လၢတ်ႈမႃးၼႆႉ ႁူႉဝႃႈဢမ်ႇမီးပိူၼ်ႈၶုတ်းၼႆသေ ဢမ်ႇလႆႈလူင်းၵႂႃႇၵူတ်ႇထတ်းတူၺ်းထႅင်ႈ။ ၼွၵ်ႈလိူဝ် ၼၼ်ႉ တေၶွတ်ႇၽွတ်ႈၶွမ်ႊမတီႊတင်းၵူၼ်းမိူင်း၊ ၸဝ်ႈၼႃႈတီႈသေ တေႁူမ်ႈမိုဝ်းပႃး ၸုမ်းပျီႇတူႉၸိတ်ႉ မိူင်းပၢႆသေ တေလူင်းၵႂႃႇၼႂ်းၼႃႈတီႈၼၼ်ႉသေ တေၵူတ်ႇထတ်းတူၺ်း သင်ၸိူဝ်ႉဝႃႈ လႆႈႁူပ်ႉႁၼ်ၺႃး ဢၼ်ၶွမ်ႊ ပၼီႊပူၼ်ႉပႅၼ် လၵ်ႉၶုတ်းၶမ်းလူၺ်ႈၽိတ်းမၢႆမီႈၸိုင် တေၸွႆးတြႃးဢဝ်လိူင်ႈလူၺ်းမၢႆမီႈမတ်ႉတႃ 30 (က)”ဝႃႈၼႆ။


သိုပ်ႇလၢတ်ႈထႅင်ႈဝႃႈ လွင်ႈတႃႇတေၶွတ်ႇၽွတ်ႇၶွမ်ႊမတီႊ တႃႇလူင်းၵူတ်ႇထတ်းၵၢၼ်ၶုတ်းၶမ်းၼႆႉ တေႃႈလဵဝ် ယွၼ်ႉဝႃႈ ပဵၼ်ၶၢဝ်းၾူၼ်ၼႆလႄႈ တေပႆႇပဵၼ်ၶွတ်ႇၽွတ်ႈလူင်းတူၺ်း။ သင်ထိုင်မႃး ၶၢဝ်းႁႅင်ႈၸိုင် တေႁူမ်ႈတင်း လူင်ပွင်ၸိုင်ႈမိူင်းတႆးသေ လူင်းၵူတ်ႇထတ်းပၼ်ၵႂႃႇ ဝႃႈၼႆ။


ၵဵဝ်ႇၵပ်းလွင်ႈၼႆႉသေ သူၼ်ႁႆႈၼႃးၵူၼ်းမိူင်း 100 ဢေႊၶိူဝ်ႊပၢႆ ၸဝ်ႈႁႆႈၸဝ်ႈၼႃး 35 ၵေႃႉ ယၢပ်ႇၽိုတ်ႇတႃႇ ၽုၵ်ႇသွမ်ႈ ၵၢၼ်ႁႃၵိၼ်လဵင်ႉတွင်ႉဝႆႉယူႇ ဝႃႈၼႆ။


မိူဝ်ႈပီ 2016 ပီၵၢႆၼၼ်ႉ ယူႇတီႈၾၢႆႇသိင်ႇဝႅတ်ႉလွမ်ႉလႄႈႁိၼ်ႁႄႈ လႆႈလူင်းၵူတ်ႇ ထတ်း ၼႂ်းတိူင်းတႃႈလိူဝ်ႇ၊ တိူင်းၸႄႈၵႅင်း၊ ၸႄႈမိူင်းၶၢင်၊ မိူင်းတႆး လႄႈၼေႇပျီႇတေႃႇ ႁူမ်ႈၵၼ်တင်းမူတ်း 25 တီႈ၊ မိူဝ်ႈၼၼ်ႉမီး ၶွမ်ႊပၼီႊ ၶုတ်းၶမ်း ဢမ်ႇလႆႈႁပ်ႉဝႂ်ဢၼုၺၢတ်ႈသေ လၵ်ႉလွမ်ၶုတ်းၶမ်းဝႆႉယူႇ ဝႃႈၼႆ။


ယူႇတီႈလူင်ပွင်ၸိုင်ႈမိူင်းႁူမ်ႈတုမ် လႆႈၸတ်းႁဵတ်းပၢင်ၵုမ် မိူဝ်ႈဝၼ်းတီႈ 19/02/2016 ၼၼ်ႉ  ဢွၼ်ၵၼ်တႅပ်း တတ်း ၼႂ်းပၢင်ၵုမ်ဝႃႈ တင်ႈဢဝ်ဝၼ်းတီႈ 26/07/2016 မႃးတေႁႂ်ႈၵိုတ်းပႅတ်ႈမိူင်ၶမ်း/မိူင်ထၢၼ်ႇ မူတ်းမူတ်း ဝႃႈၼႆ။