သင်ၶၸဝ်ႈ၊ ပီႈၼွင်ႉၵူၼ်းမိူင်း၊ ၸုမ်းတူင်ႉၼိုင်တူင်ႇဝူင်းတႆးလႄႈ ၸုမ်းပႃႇတီႇၵၢၼ်မိူင်း ႁူမ်ႈၵၼ် ပိုတ်ႇႁူင်းႁဵၼ်း ၸိူဝ်ႉၸၢတ်ႈ ၸၼ်ႉဢွၼ်တႆး တီႈဢိူင်ႇႁူဝ်ယ ဝဵင်းမိူင်းယႆ မီးၽူႈၶဝ်ႈႁူမ်ႈပိုတ်ႇပၢင် ႁိမ်း 200 ၵေႃႉ။


ဝၼ်းတီႈ 28/07/2017 ယၢမ်းၵၢင်ၼႂ် 8 မူင်း သင်ၶၸဝ်ႈ တၵ်ႉၵႃႇသတ်ႉထႃး ပီႈၼွင်ႉၵူၼ်းမိူင်း လႄႈ ၸုမ်းဝူင်း မဵတ်ႉတႃႇ၊ ၸုမ်းၵူၼ်းၼုမ်ႇတႆး ႁူဝ်ယ လႄႈ ၸုမ်းပႃႇတီႇႁူဝ်သိူဝ် ႁူမ်ႈၵၼ် ပိုတ်ႇႁူင်းႁဵၼ်းၸိူဝ်ႉၸၢတ်ႈ ၸၼ်ႉ ဢွၼ်တႆး တီႈဝတ်ႉႁူဝ်ယ ဢိူင်ႇႁူဝ်ယ ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ ယိူင်းဢၢၼ်းၶႂ်ႈ ဢဝ်တင်းႁူႉ/ႁၼ် ပွၼ်ႈသွၼ်ပၼ် လုၵ်ႈဢွၼ်ႇ ၸိူဝ်းဢႃယုလဵၵ်ႉ  ႁႂ်ႈလႆႈၽုၵ်ႇၾင်ဝႆႉၼႂ်းဢူၵ်းၼႂ်းၸႂ်ၶဝ် ဝႃႈၼႆ။


ၸၢႆးဢွင်ႇၺုၼ်ႉ ႁူဝ်ပဝ်ႈ ႁူင်းႁဵၼ်းၸိူဝ်ႉၸၢတ်ႈ ၸၼ်ႉဢွၼ်တႆး ဢိူင်ႇႁူဝ်ယ လၢတ်ႈဝႃႈ “ လုၵ်ႈဢွၼ်ႇ ဢၼ်ႁဝ်းၶႃႈ ပူင်သွၼ် ၼႂ်းႁူင်းႁဵၼ်းၼႆႉ တႄႇဢဝ် ဢႃယု 3-5 ပီ။ လုၵ်ႈဢွၼ်ႇ ၸိူဝ်းဢႃယုလဵၵ်ႉၼၼ်ႉ ၶႂ်ႈႁႂ်ႈၶဝ် လႆႈႁပ်ႉတင်း ႁူႉႁၼ် ဢၼ်ၵိုင်ႇတၼ်ႇၶဝ်ၼၼ်ႉ ထႅမ်သႂ်ႇၼႂ်းဢွၵ်းဢေႃၶဝ် ႁႂ်ႈၶဝ်ပေႃး မီးတၢင်းဝူၼ်ႉသၢင်ႈ၊ ႁဵတ်းတႃႇၶိုၼ်ႈယႂ်ႇ မႂ်ႇသုင် ဝၼ်းတႃမိူဝ်းၼႃႈ” ဝႃႈၼႆ။


ႁူင်းႁဵၼ်းၸိူဝ်ႉၸၢတ်ႈ ၸၼ်ႉဢွၼ်တႆးၼႆႉ တေပူင်သွၼ်ပၼ်လုၵ်ႈဢွၼ်ႇ လူၺ်ႈဢမ်ႇလႆႈသဵင်ႈငိုၼ်းၵႃႈသင်၊ တေႃႈလဵဝ် ၽူႈတေပူင်သွၼ်ပၼ်ၵႂႃႇ  မီးဝႆႉသွင်ၵေႃႉ၊ ၽႃသႃ ဢၼ်တေပူင်သွၼ်ပၼ် ဢွၼ်တင်းသမ်ႉ တေပဵၼ်လိၵ်ႈတႆး၊ ၵႂၢမ်းတႆး၊ လုၵ်ႈဢွၼ်ႇ ဢၼ်တေမႃး ၶိုၼ်ႈႁဵၼ်းသွၼ် ၵႂႃႇသမ်ႉ ပဵၼ်လုၵ်ႈဢွၼ်ႇ ၼႂ်းဢိူင်ႇၼွင်မူဝ်၊ ဢိူင်ႇၵွင်းမွင်လႄႈ ဢိူင်ႇႁူဝ်ယ မႃးပၼ်သဵၼ်ႈသၢႆမၢႆဝႆႉ10 ပၢႆယဝ်ႉ ဝႃႈၼႆ။


ၸၢႆးဢွင်ႇၺုၼ်ႉ သိုပ်ႇလၢတ်ႈထႅင်ႈဝႃႈ ႁူင်းႁဵၼ်းၸိူဝ်ႉၸၢတ်ႈတႆး ၸၼ်ႉဢွၼ် တီႈႁူဝ်ယၼႆႉ ႁဝ်းၶႃႈ လႆႈပိုတ်ႇဝႆႉတီႈ ၼႂ်းဝၢင်းဝတ်ႉ/ၵျွင်းႁူဝ်ယဝႆႉ။ ထႅင်ႈဢၼ်ၼိုင်ႈၵေႃႈ ႁဝ်းၶႃႈ ယိူင်းဢၢၼ်းဝႆႉ ၼင်ႇႁိုဝ် တေပဵၼ်မႃး ၸၼ်ႉငဝ်ႈ၊ ၸၼ်ႉၼိုင်ႈ၊ ၸၼ်ႉသွင် ၵႂႃႇၸဵမ်ၸိူဝ်းၼႆႉ မီးၽႅၼ်ၵၢၼ်ဝႆႉယူႇ ဝႃႈၼႆ။


ပူၼ်ႉမႃး ပီ 2016 ၼၼ်ႉ ႁူင်းႁဵၼ်းၸိူဝ်ႉၸၢတ်ႈ ၸၼ်ႉဢွၼ်တႆးၼႆႉ လႆႈပိုတ်ႇဝႆႉတီႈ ဝတ်ႉၵျွင်းသႅင် ၸႄႈဝဵင်း မိူင်းယႆ၊ ထိုင်မႃး ပီ 2017 ၼႆႉသမ်ႉ ပိုတ်ႇထႅင်ႈ တီႈဢိူင်ႇႁူဝ်ယ ဝႃႈၼႆ။


Photo by Sai Hso Awn Mong