ႁႅင်းၵၢၼ်ယၢၼ်မိူင်း ၸိူဝ်းၶဝ်ႈႁဵတ်းၵၢၼ်ၼႂ်းမိူင်းထႆး ဢိင်ၼိူဝ်ပၵ်းပိူင်ၵပ်ႉၵိၼ်းႁႅင်းသေ ဢွၼ်ၵၼ် ပွၵ်ႈၶိုၼ်း ဝၢၼ်ႈၵဝ်ႇမိူင်းၼွၼ်း ၼပ်ႉႁူဝ်မိုၼ်ႇၼၼ်ႉ ႁူဝ်ပၢၵ်ႇ 50 % တေဢမ်ႇၵႂႃႇ ႁဵတ်းၵၢၼ် မိူင်းထႆးထႅင်ႈယဝ်ႉ ဝႃႈၼႆ။

ဝၼ်းတီႈ 03/07/2017 သိုဝ်ႇၶၢဝ်ႇထႆး လၢႆႁွင်ႈၵၢၼ် မိူၼ်ၼင်ႇ ထႆးရတ်ႊ ၊Voice TV ပိုၼ်ၽၢဝ်ႇဝႃႈ - လူင်ပွင် ၸိုင်ႈပိုၼ်ၽၢဝ်ႇ ယွၼ်ႇယၢၼ်းပၼ်ႁႂ်ႈၵိုတ်း ၵၢၼ်ၵူတ်ႇထတ်းတီႉၺွပ်းလႄႈ  ႁႂ်ႈႁႅင်းၵၢၼ်ၸိူဝ်းမီးဝတ်း သေ
ၽိတ်းတီႈႁဵတ်းၵၢၼ်ၽိတ်းၸိုဝ်ႈပေႃႈလဵင်ႉ(ၼႂ်းဝႂ်ပဵၼ်ၵေႃႉၼိုင်ႈ တီႈႁဵတ်းၵၢၼ်ပေႃႈလဵင်ႉပဵၼ်ၵေႃႉၼိုင်ႈ ) ၼၼ်ႉ ႁႂ်ႈဢွၼ်ၵၼ်ၵႂႃႇ ၶပ်းၶိုင်ႁႂ်ႈထုၵ်ႇမႅၼ်ႈ ၼႂ်းၶၢဝ်းတၢင်း 120 ဝၼ်းၼႆ သေတႃႉ ႁႅင်းၵၢၼ်ဢွၼ်ၵၼ် ပွၵ်ႈၶိုၼ်းႁိူၼ်းယူႇၶိူဝ်းယႂ်း။ မိူၼ်ၼင်ႇ ႁႅင်းၵၢၼ်ဢၼ်ဝၢႆႇပွၵ်ႈ မိူဝ်းတၢင်းမႄႈသွတ်ႇ၊ ရၼွင်ႊ၊ ၵဵင်းမႆႇ၊ ၵဵင်းႁၢႆး ၸိူဝ်းၼႆႉမီး ယူႇၵူႈဝၼ်း။ ၶၢဝ်ႇထႆးပိုၼ်ၽၢဝ်ႇဝႃႈ ၵူၼ်းပွၵ်ႈမိူဝ်းမိူင်းႁူမ်ႈတုမ်မၢၼ်ႈၶိုၼ်းမီး 6 မိုၼ်ႇပၢႆ ယဝ်ႉဝႃႈၼႆ။


ၵူဝ်ၵူဝ်ၼၢႆႊ ၸဝ်ႈၼႃႈတီႈၾၢႆႇတူၺ်းလွမ်ႁႅင်းၵၢၼ်ၵူၼ်းမိူင်းႁူမ်ႈတုမ် လၢတ်ႈတီႈ Voice TV ဝႃႈ -“ လူင်ပွင် ၸိုင်ႈပိုၼ်ၽၢဝ်ႇႁႂ်ႈ ၵိုတ်းၵၢၼ် ၵူတ်ႇထတ်းၸူဝ်ႈၶၢဝ်းၼႆသေတႃႉ ယင်းမီးၸဝ်ႈၼႃႈတီႈ ၶဝ်ႈၵူတ်ႇထတ်း
တီႉၺွပ်းယူႇ။ မၢင်တီႈႁႅင်းၵၢၼ်ႁဵတ်းၵၢၼ် 10-15 ဝၼ်း ပေႃႈလဵင်ႉ/ မႄႈလဵင်ႉဢမ်ႇပၼ်ၵႃႈႁႅင်းသေ လိုပ်ႈ ဢွၵ်ႇ ၵၢၼ်ၵေႃႈမီး။ ၵွပ်ႈၼၼ်လႄႈ ႁႅင်းၵၢၼ်ဢၼ်ပွၵ်ႈႁိူၼ်းၵႂႃႇၼၼ်ႉ လႅပ်ႈတေဢမ်ႇပွၵ်ႈမႃးႁဵတ်း ၵၢၼ်တီႈမိူင်း ထႆးယဝ်ႉယွၼ်ႉဝႃႈၵႃႈၸႂ်ႉၸၢႆႇၼမ်ၼႃႇ ၵႃႈယူႇ၊ ၵႃႈၵိၼ်၊ ၵႃႈဝတ်းဝႂ်ၸိူဝ်းၼႆႉ ။ ၵႃႈလၢႆးဝၼ်းသမ်ႉ 310
ၿၢတ်ႇ ၵူၺ်း မၢင်ၵေႃႉၵေႃႈယင်းဢမ်ႇလႆႈ တႃႇတေယူႇၵိၼ်ၵႂႃႇၵေႃႈဢမ်ႇငၢႆႈ ၵွပ်ႈၼၼ်လႄႈ ႁူဝ်ပၢၵ်ႇ 50% ၼႆႉတေ ႁဵတ်းႁႃၵိၼ်ယူႇတီႈ ဝၢၼ်ႈၵိူတ်ႇ မိူင်းၼွၼ်းၵူၺ်းယဝ်ႉ ဢမ်ႇမီးၵၢၼ်ႁဵတ်းၵူႈဝၼ်းသေတႃႉ ဢမ်ႇလႆႈၸႂ်ႉ ၸၢႆႇၼမ်လႄႈ ယူႇၵႂႃႇလႆႈယူႇ” ဝႃႈၼႆ။

ၵူၼ်းဢၼ်ပွၵ်ႈမိူဝ်းတၢင်းမိူင်းႁူမ်ႈတုမ်မၢၼ်ႈ လၢတ်ႈဝႃႈ -“ မီးတၢင်းၸူမ်းသိူဝ်း ဢၼ်လႆႈပွၵ်ႈၶိုၼ်းဝၢၼ်ႈၵဝ်ႇ မိူင်းၼွၼ်း ယူႇမိူင်းထႆးၵေႃႈပၵ်းပိူင်ပိူၼ်ႈၵပ်ႉၵိၼ်းႁႅင်းၼႃႇ ၊ ၵႃႈၸႂ်ႉၸၢႆႇၵေႃႈသုင်၊ ၵႃႈၵိၼ်၊ ၵႃႈယူႇ၊ ၵႃႈဝတ်း ၸိူဝ်းၼႆႉ ၵႃႈလၢႆးဝၼ်းသမ်ႉလႆႈဝၼ်းလႂ် 310 ၵူၺ်း။ တႃႇတေၵႂႃႇႁဵတ်းၵၢၼ်မိူင်းထႆးၶိုၼ်းတႄႉ ဢမ်ႇၶႂ်ႈၵႂႃႇ
ယဝ်ႉ ၊ မိူဝ်ႈလဵဝ်ဝၢၼ်ႈမိူင်းႁဝ်းၵေႃႈ ၶိုၼ်ႈယႂ်ႇမႃးယဝ်ႉ ႁဵတ်းႁႃၵိၼ်မိူင်းႁဝ်းၵေႃႈလႆႈယူႇ” ဝႃႈၼႆ။


ၵဵဝ်ႇလူၺ်ႈလွင်ႈၼႆႉ ၸၢႆးလဵၵ်ႉ ၽူႈၶၢၼ်ပၢၵ်ႇပႃႇတီႇႁူဝ်သိူဝ် လၢတ်ႈဝႃႈ – “ ဢိင်ၼိူဝ်မိူင်းႁဝ်းဢမ်ႇသၢင်ႇထုၵ်ႇ ပၢင်တိုၵ်းသိုၵ်းသိူဝ်ၼမ်၊ ယႃႈမဝ်းၵမ်လိူင်ႇ ၵၢၼ်ႁႃၵိၼ်လဵင်ႉတွင်ႉယၢပ်ႇလႄႈ ၵူၼ်းမိူင်းတႆး ဢွၼ်ၵၼ်ၵႂႃႇ ႁဵတ်းၵၢၼ်မိူင်းထႆး မိူဝ်ႈလဵဝ်ပၵ်းပိူင် ၵပ်ႉၵိၼ်းမႃးလႄႈ ပီႈၼွင်ႉႁဝ်းဢွၼ်ၵၼ်လႆႈပၢႆႈဝၢႆႇပွၵ်ႈမႃး မိူင်းႁဝ်း ၶိုၼ်းၼႆၵေႃႈ ၼင်ႇႁိုဝ်တေဢမ်ႇမီးတၢင်းယၢပ်ႇၽိုတ်ႇ၊ ၼင်ႇႁိုဝ်တေယူႇငၢႆႈၵိၼ်ငၢႆႈ၊ လုၵ်ႈလၢၼ်ၵေႃႈပေႃးတေ လႆႈႁဵၼ်းလိၵ်ႈလၢႆးၼၼ်ႉ ယူႇတီႈပႃႇတီႇလႄႈ ၸုမ်းတူင်ႇဝူင်းၵူၼ်း တေႁူမ်ႈမိုဝ်းၵၼ် ၶပ်းၶိုင်ၸွႆႈ
ထႅမ် ၵႂႃႇယူႇ” ဝႃႈၼႆ။


ႁႅင်းၵၢၼ်ယၢၼ်မိူင်း ဢၼ်လုၵ်ႉတီႈမိူင်းႁူမ်ႈတုမ်မျၢၼ်ႇမႃႇ ၵႂႃႇႁဵတ်းၵၢၼ်ၼႂ်းမိူင်းထႆးတင်းမူတ်း မီး 2.3 လၢၼ်ႉ ၵေႃႉ ၊ ႁႅင်းၵၢၼ် ဢၼ်ထုၵ်ႇမႅၼ်ႈ ၸွမ်းမၢႆမီႈထႆးမီးလၢၼ်ႉပၢႆၵူၺ်းဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/သၢႆမွၵ်ႇႁွမ်
04/07/2017