ယိင်းသၢဝ်တႆး ၼၢင်းမူၺ်ၽွင်းလူင် ထုၵ်ႇလိူၵ်ႈပဵၼ်ၼၢင်းငၢမ်းႁၢင်ႈလီႈ Miss Universe Tachileik 2017 တီႈၸႄႈဝဵင်းတႃႈၶီႈလဵၵ်း ပဵၼ်တူဝ်တႅၼ်းၼႂ်းၸိုင်ႈတႆးပွတ်းဢွၵ်ႇၶူင်း တႃႇၶဝ်ႈၶႄႉၶဵင်ႇထႅင်ႈ တီႈဝဵင်းလူင်တႃႈၵုင်ႈ ဝႃႈၼႆ။

ဝၼ်းတီႈ 02/07/2017 ယၢမ်းၵၢင်ၶမ်ႈ 06:00-10:00 မူင်းၵၢင်ၶိုၼ်း ပၢင်ၶဵင်ႇၼၢင်းႁၢင်ႈလီ Miss Universe Tachileik 2017 ဢၼ်ၸတ်းႁဵတ်း တီႈႁူင်းႁေႃးလ်ၵျွင်းၶႄႇ(ပူင်ႇၵျွင်း) ဝၢၼ်ႈပႃႇလႅင် ပွၵ်ႉယၢၼ်ႇဢွင်ႇမေႇ ၸႄႈဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇၶူင်း။ ၼၢင်းမူၺ်ၽွင်းလူင် ဢႃယု 19 ပီ မၢႆတူဝ် 19 ။ မၼ်းၼၢင်း ယင်းတေလႆႈသိုပ်ႇၵႂႃႇၶႅင်ႇ ၼႂ်းၸၼ်ႉမိူင်းႁူမ်ႈတုမ်ထႅင်ႈ။


ၼၢင်းၽွင်း ၵေႃႉပဵၼ်မႄႈၼၢင်းမူၺ်ၽွင်းလူင် လၢတ်ႈဝႃႈ “တေလႆႈဝႃႈ ၵမ်ၵုသုလ်လုၵ်ႈဢွၼ်ႇၶႃႈယဝ်ႉ ပေႃးဝႃႈမိူဝ်း ၽႅဝ်တီႈတႃႈၵုင်ႈသေ လႆႈထုၵ်ႇလိူၵ်ႈပႃးၵႂႃႇထႅင်ႈၼႆတႄႉၶႅၼ်းၸူမ်းပေႃးဢမ်ႇသုတ်းဢမ်ႇသဵင်ႈလႆႈၶႃႈ။ ၼၢင်း မူၺ်ၽွင်းလူင်ၼႆႉ ပဵၼ်လုၵ်ႈၵေႃႉၵၢင် ၶႃႈလႆႈႁၼ်မၼ်းၼၢင်း ၶတ်းၸႂ် တင်ႈၸႂ် လႆႈပဵၼ်ၼၢင်းငၢမ်းတီႈၼိုင်ႈ ပဵၼ်တူဝ်တႅၼ်း တၢင်းပွတ်းဢွၵ်ႇၶူင်းၼႆလႄႈ ပဵၼ်ဢၼ်ၸူမ်းၸွမ်းပေႃးဢမ်ႇသုတ်းလႆႈ ၶႃႈယဝ်ႉ” ဝႃႈၼႆ။


ၼၢင်းမူၺ်ၽွင်းလူင်ၼႆႉ ၼွၵ်ႈသေလဝ်း ယင်းၶႅၼ်ႇပႃးၵႂၢမ်းလၢတ်ႈ ဢိင်းၵလဵတ်ႈ/မၢၼ်ႈ ၸိူဝ်းၼႆႉ။


Miss Universe Tachileik 2017 ၼၢင်းငၢမ်းဢၼ်ၶဝ်ႈၶဵင်ႇ တင်းမူတ်း မီး 20 ၵေႃႉ ၼႂ်းၼၼ်ႉ ပႃးတႆး 3 ၵေႃႉ၊ ဢၼ်လႆႈတီႈၼိုင်ႈ ပဵၼ်ယိင်းသၢဝ်တႆး ၼၢင်းမူၺ်ၽွင်းလူင် မၢႆတူဝ် 19  ၊ ပီ 2017 ပဵၼ်ၽူႈတၢင်တူဝ် ၼႂ်းၸိုင်ႈတႆး ပွတ်းဢွၵ်ႇၶူင်း တေသိုပ်ႇၶဝ်ႈၶႄႉၶဵင်ႇ ၼႂ်းမိူင်းႁူမ်ႈတုမ်မျၢၼ်ႇမႃႇပတ်းပိုၼ်ႉ ၼႂ်းလိူၼ်ၻီႊသႅမ်ႊၿိူဝ်ႊ ပီ 2017 ဝႃႈၼႆ။


ၼၢင်းမူၺ်ၽွင်းလူင်ၼႆႉ ပဵၼ်လုၵ်ႈယိင်းၵေႃႉၵၢင် ၸၢႆးတဵင်းလႄႈ ၼၢင်းၽွင်း ႁဵၼ်းၸၼ်ႉၸွမ် ပီ(3) မိူင်းၵွၵ်ႇ ၸိုင်ႈထႆး။


လိူဝ်ၼၼ်ႉ ၼႂ်းၸိုင်ႈတႆး ပွတ်းႁွင်ႇ၊ ပွတ်းၸၢၼ်းၵေႃႈၶတ်းလိူၵ်ႈၼၢင်းႁၢင်ႈလီ။ ဢၼ်လုၵ်ႉတီႈၸၼ်ႉတိူင်းလႄႈ ၸႄႈမိူင်းၶိုၼ်ႈမႃးၼၼ်ႉ တေလႆႈၵႂႃႇၶဵင်ႇၵၼ်ထႅင်ႈ တီႈဝဵင်းတႃႈၵုင်ႈ(ယၢၼ်ႇၵုင်ႇ) ၼႂ်းလိူၼ်ၻီႊသႅမ်ႊၿိူဝ်ႊ ပီ 2017 တႃႇလိူၵ်ႈ တူဝ်တႅၼ်းမိူင်းႁူမ်ႈတုမ်မျၢၼ်ႇမႃႇ ဝႃႈၼႆ။

ၸုမ်းၶၢဝ်ႇတွႆႇႁွၵ်ႈ/ ၸၢႆးယွတ်ႈၶမ်း 04/07/2017