ၸၼ်ႉၸွမ် တူင်ႇၵူၼ်းတႆး Shan Community College လူင်းပိုၼ်ႉတီႈ ႁူပ်ႉထူပ်းပီႈၼွင်ႉၵူၼ်းမိူင်း ၼႂ်းၸိုင်ႈတႆး ပွတ်းႁွင်ႇ ပွတ်းၸၢၼ်း သပ်းလႅင်းၼႄ ၶေႃႈယိူင်းဢၢၼ်း လွင်ႈၵေႃႇတင်ႈ ၸၼ်ႉၸွမ်တႆးလႄႈ ၵၢၼ်ႁဵၼ်းၵၢၼ် သွၼ် လွင်ႈပၢႆးပၺ်ၺႃ  ၸဵမ်ၸိူဝ်းၼႆႉ။


ဝၼ်းတီႈ 26/07/2017 ယၢမ်းဝၢႆးဝၼ်း 2 မူင်းထိုင် 5 မူင်း တၢမ်းၶမ်ႈ ၸၼ်ႉၸွမ်တူင်ႇၵူၼ်းတႆး (SCC) ၵႃလိ လူင်းပိုၼ်ႉတီႈ ႁူပ်ႉထူပ်းပီႈၼွင်ႉၵူၼ်းမိူင်း၊ ၸုမ်းပႃႇတီႇၵၢၼ်မိူင်း၊ ၸုမ်းတူင်ႉၼိုင်တူင်ႇဝူင်းတႆး။ ႁူပ်ႉၵၼ်တီႈႁူင်းႁေႃ ၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ။ ပီႈၼွင်ႉၵူၼ်းမိူင်း ၶဝ်ႈႁူမ်ႈလဵပ်ႈႁဵၼ်း ႁိမ်း 200 ၵေႃႉ ဝႃႈၼႆ။

ၼၢင်းမွၼ်းမွၼ်းပဝ်း ၽူႈၶပ်းၶိုင်ပၢင်ႁူပ်ႉထူပ်း လၢတ်ႈဝႃႈ “ လွင်ႈၸၼ်ႉၸွမ်တူင်ႇၵူၼ်းတႆး ၼႂ်းတႆးႁဝ်းၼႆႉ ဢမ်ႇယၢမ်ႈမီးမႃးသေပွၵ်ႈ၊ ယဝ်ႉၵေႃႈ ဢမ်ႇယၢမ်ႈငိၼ်းမႃး၊ ယူႇတီႈမေႃသွၼ်ၶဝ် သမ်ႉၶႂ်ႈႁူပ်ႉထူပ်း ၵူၼ်းမိူင်းသီႇပေႃႉ ၶႂ်ႈလၢတ်ႈၼႄ လွင်ႈၸၼ်ႉၸွမ်တူင်ႇၵူၼ်းတႆးၼႆလႄႈ ႁဝ်းၶႃႈၵေႃႈ လႆႈႁပ်ႉဢဝ် ပုၼ်ႈၽွၼ်းသေ ၸတ်းပၼ် မွၵ်ႇထိုင် ပီႈၼွင်ႉၵူၼ်းမိူင်းသီႇပေႃႉႁဝ်း ၸိူဝ်းၶဝ်ႈၸႂ် သူၼ်ၸႂ် တႃႇလွင်ႈလိၵ်ႈ လၢႆးတႆးႁဝ်း ႁႂ်ႈပေႃးၶိုၼ်ႈယႂ်ႇလႄႈ လွင်ႈတူင်ႇဝူင်းတႆးႁဝ်း ႁႂ်ႈပေႃးၶိုၼ်ႈယႂ်ႇ၊ ႁဝ်းၶႃႈၸွႆႈမွၵ်ႇပၼ် ၶပ်ႉၶိုင်ပၼ် ႁႂ်ႈၶဝ်လႆႈႁူႉဝႃႈ တႆးႁဝ်းၵေႃႈ ပေႃးမေႃလိၵ်ႈတႆး ၶိုၼ်ႈလႆႈၸၼ်ႉၸွမ်တႆးယူႇၼႆၼၼ်ႉၶႃႈဢေႃႈ” ဝႃႈၼႆ။


ပၢင်ႁူပ်ႉထူပ်းၼႆႉ ယူႇတီႈၽူႈမီးပုၼ်ႈၽွၼ်း၊ ၶူးသွၼ် ၸၼ်ႉၸွမ်တူင်ႇၵူၼ်းတႆး SCC ၵႃလိ လႆႈမႃးသပ်းလႅင်းၼႄ ပိူင်ၵၢၼ်သွၼ်ၵၢၼ်ႁဵၼ်း၊ ယိူင်းဢၢၼ်းလႄႈ လွင်ႈၵေႃႇတင်ႈၸၼ်ႉၸွမ်တႆး ၸဵမ်ၸိူဝ်းၼႆႉ။ ၽူႈမႃးလၢတ်ႈၼႄတႄႉ ၸၢႆးၽူင်းၶွင်ႇ၊ ၼၢင်းႁဵဝ်းသႅင်၊ ၸၢႆးထုၼ်းသႃႇလႄႈ ၼၢင်းၵမ်ႉၵေႃႇယွတ်ႈသႅင် ဢဝ်ပုၼ်ႈၽွၼ်း လူင်းႁူပ်ႉထူပ်း  ဝႃႈၼႆ။


ၶပ်ႉမၢႆ ၼႂ်းပၢင်ႁူပ်ႉထူပ်းသမ်ႉ မွၵ်ႇထိုင် ၽူႈမႃးၶဝ်ႈႁူမ်ႈ ဢဝ်တီႈယူႇ၊ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ (1) ၼၢင်းသၢၼ်းသၢၼ်းဢေး မွၵ်ႇလၢတ်ႈၶေႃႈၵႂၢမ်းပိုတ်ႇပၢင်၊ ၵပ်းသိုပ်ႇမိုတ်ႇၵိုဝ်းမေႃသွၼ်၊ ၸၢႆးၽူင်းၶွင်ႇ သပ်းလႅင်း လွင်ႈပၢႆးပၺ်ၺႃ ၸိူဝ်ႉၶိူဝ်းတႆး၊ ၼၢင်းႁဵဝ်းသႅင် သပ်းလႅင်းၼႄ ၸၼ်ႉၸွမ်တူင်ႇၵူၼ်းတႆး၊ ထၢမ်တွပ်ႈလႄႈ ၽူႈၼမ်းၼႃႈ ၵေႃလိၵ်ႈလၢႆး လုင်းၸၢႆးၼုၽွၼ်း  မွၵ်ႇလၢတ်ႈၶေႃႈၵႂၢမ်းလုပ်းပၢင်ၵႂႃႇ ဝႃႈၼႆ။


ၸၼ်ႉၸွမ်တူင်ႇၵူၼ်းတႆး (College ) ၼႆႉပီဢွၼ်တၢင်းသုတ်းတေတႄႇသွၼ် 2 ပၢႆး မိူၼ် ၼင်ႇ 1. ပၢႆးသၢႆႈ တူင်ႇ ဝူင်းၵူၼ်း Social Science ၊ 2. ပၢႆးၸတ်းပွင်ၵၢၼ်မၢၵ်ႈမီး Business Administration မိူဝ်းၼႃႈ မႃးတေ ၽိူမ်ႉ ၼမ်မႃးလိူဝ်ၼႆႉ။ ၶူးပူင်သွၼ်ပဵၼ်ၵူၼ်းၼႂ်းၸုမ်း ၵေႃတႆး ဢၼ်ၵႂႃႇယဝ်ႉ ၸၼ်ႉၸွမ် ၼွၵ်ႈမိူင်းမႃး မိူၼ်ၼင်ႇ ၼၢင်းၶႅမ်ဝၼ်း၊ ၼၢင်းႁဵဝ်းသႅင်၊ ၸၢႆးထုၼ်းသႃႇ ၊ ၼၢင်းမူၺ်သႅင်၊ ၼၢင်းဝၼ်းလီ ၸိူဝ်းၼႆႉ တင်းမူတ်း မီးမွၵ်ႈ 16 ၵေႃႉ။


လုၵ်ႈႁဵၼ်းဢၼ်တေမႃးၶိုၼ်ႈႁဵၼ်းတီႈဢေႇသုတ်း ႁႂ်ႈထိုင်ၸၼ်ႉ 10 ႁူင်းႁဵၼ်း လူင်ပွင်ၸိုင်ႈ၊ ပီတီႈၼိုင်ႈ တေ ႁပ်ႉ60 ၵေႃႉ။ ၼိုင်ႈ ၵေႃႉ တေလႆႈၸွႆႈၵႃႈၸႂ်ႉၸၢႆႇၵၢၼ်ႁဵၼ်းၵၢၼ်သွၼ် 10 သႅၼ်ၵျၢတ်ႉ တေႃႇ 1 ၼိုင်ႈထိူမ်ႊ (ၼိုင်ႈထိူမ်ႊ5 လိူၼ် 1 ပီ 2 ထိူမ်ႊ) ႁူမ်ႈပႃး ၵႃႈၵိၼ်ၵႃႈယူႇၵႃႈဢွၵ်ႇတၢင်းလဵပ်ႈႁဵၼ်းၶူၼ်ႉၶႂႃႉ။ ၶၢဝ်းႁဵၼ်းတေႃႇ ပေႃးယဝ်ႉ တေႁိုင် 3 ပီ ။