ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ ၸၢႆးသီႇႁႃႉၵျေႃႇ(ၶ) ၸၢႆးႁၵ်ႉ တွင်ႈထၢမ် ၼႂ်းပၢင်ၵုမ်သၽႃးၵူၼ်းမိူင်း ဢၼ်လူင်ပွင်ၸိုင်ႈ ၵဵပ်းငိုၼ်းၵူၼ်းမိူင်းယႆ 38 ဝၢၼ်ႈသေ ဝႃႈ တေသႂ်ႇပၼ်ၾႆးၾႃႉႁႅင်းလႅတ်ႇ(ၾႆးသူဝ်ႇလႃႇ) ပၼ်ၼႆၼၼ်ႉ မီးၶၢဝ်းတၢင်း ပီပၢႆယဝ်ႉ ပႆႇႁၼ်ႁဵတ်းသင်ပၼ်ၵူၼ်းမိူင်း ဝႃႈၼႆ။


ဝၼ်းတီႈ 25/07/2017 ပၢင်ၵုမ်သၽႃးၵူၼ်းမိူင်း ပွၵ်ႈၵမ်း 2 ထူၼ်ႈထီႉ 5 တီႈၼေႇပျီႇတေႃႇၼၼ်ႉ ၸၢႆးသီႇႁႃႉ ၵျေႃႇ(ၶ) ၸၢႆးႁၵ်ႉ တူၵ်ႇထၢမ် ၼႂ်းသၽႃးဝႃႈ- ၵဵပ်းငိုၼ်းၵူၼ်းဝၢၼ်ႈ ၵူၼ်းမိူင်း 38 ဝၢၼ်ႈယဝ်ႉ သမ်ႉဢမ်ႇ လူင်း တိတ်းတင်ႈပၼ်ၶိူင်ႈႁပ်ႉ/ၸႂ်ႉၾႆးၾႃႉႁႅင်းလႅတ်ႇ ၵွပ်ႈသင်လႄႈ ဢမ်ႇႁဵတ်းပၼ်၊ တေႁဵတ်းပၼ်မိူဝ်ႈလႂ်၊ ယဝ်ႉၵေႃႈ တေႁဵတ်းပၼ်ႁႃႉ၊ ဢမ်ႇႁဵတ်းပၼ်။ သင်ဝႃႈ ဢမ်ႇႁဵတ်းပၼ်ယဝ်ႉၵေႃႈ ငိုၼ်းဢၼ်ၵဵပ်းမႃးတီႈ ၵူၼ်းမိူင်း ၸိူဝ်းၼၼ်ႉ ၸွင်ႇတေပၼ်ၶိုၼ်းႁႃႉ၊ ဢမ်ႇပၼ် ၸဵမ်ၸိူဝ်းၼႆႉ ဝႃႈၼႆ။

ၸၢႆးသီႇႁႃႉၵျေႃႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယူႇတီႈႁွင်ႈ ၵၢၼ်ၾၢႆႇ ၽုၵ်ႇသွမ်ႈ၊ ၵၢၼ်လဵင်ႉလူသတ်းလႄႈ မိူင်ထၢၼ်ႇ ၶဝ်တေႁဵတ်းပၼ်ၾႆး တႃႇဝၢၼ်ႈ ၼွၵ်ႈၼႃးပၢင်ႇ ၸိူဝ်းဢၼ်ၾႆးၾႃႉ ဢမ်ႇထိုင်တီႈၸိူဝ်းၼၼ်ႉ။ ၼင်ႇႁိုဝ် ဝၢၼ်ႈၸိူဝ်းၼႆႉ ပေႃးတေလႆႈၾႆး ၶဝ်တေသႂ်ႇပၼ်ၾႆး သူဝ်ႇလႃႇ။ ၸိူင်ႉၼႆသေ ၶဝ်ၵေႃႈသမ်ႉၵဵပ်းသဵၼ်ႈသၢႆမႆ တီႈၵူၼ်းဝၢၼ်ႈလႄႈ ငိုၼ်းဝႆႉယဝ်ႉ။ သမ်ႉဢမ်ႇမႃးႁဵတ်းပၼ် သင် ၶၢဝ်းတၢင်းမီး ပီပၢႆယဝ်ႉ ၵူၼ်းဝၢၼ်ႈၵူၼ်းသူၼ် ၵေႃႈထၢမ်မႃးတီႈၶႃႈတိၵ်းတိၵ်းလႄႈ ၶႃႈႁဝ်းၵေႃႈ ၸင်ႇလႆႈ မႃးတွင်ႈထၢမ်ၵႂႃႇ ၼႂ်းပၢင်ၵုမ်သၽႃး” ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈ ဢူးလႃႉၵျေႃႇ ၵႅမ်ၽွင်းလူင် ၵၢၼ်ၽုၵ်ႇသွမ်ႈ၊ ၵၢၼ်လဵင်ႉလူသတ်းလႄႈ မိူင်ထၢၼ်ႇ တွပ်ႇလၢတ်ႈပၼ်ၶိုၼ်းဝႃႈ “ ပေႃးၶဝ်လႆႈသဵၼ်ႈသၢႆမၢႆမူတ်းယဝ်ႉ ၶဝ်သၢင်ႇၶူဝ်းၶဝ်ႈမႃး၊ သင်ဝႃႈ ၶူဝ်းၶဝ်ႈမႃးယဝ်ႉ ပဵၼ်ၶွမ်ႊပၼီႊဢၼ်လႂ် ၶူဝ်းၶႅမ်ႉဢမ်ႇၶႅမ်ႉ လႆႈၸႂ်ႉၶၢဝ်းယၢမ်းတႃႇ 9 လိူၼ်၊ ပေႃးဝႃႈ သၢင်းၶူဝ်းၶဝ်ႈမႃးယဝ်ႉၵေႃႈ လႆႈၸၢမ်းတူၺ်း ၶူဝ်းၸိူဝ်းၼၼ်ႉ ၸွင်ႇမၼ်းၶႅမ်ႉဢမ်ႇၶႅမ်ႉ ၸွမ်းၼင်ႇၶွမ်ႊပၼီႊဝႃႈဝႆႉ။ ယဝ်ႉၵေႃႈ သမ်ႉႁဵတ်း ပပ်ႉၵႅမ်မိုဝ်း တႃႇတေၸႂ်ႉတိုဝ်း ပၼ်ၵူၼ်းဝၢၼ်ႈၼႆထႅင်ႈလႄႈ လႆႈႁၢင်ႈႁႅၼ်းၸိူဝ်ႉၼႆႉ လႆႈဢဝ်ၶၢဝ်းယၢမ်းႁိုင် 9 လိူၼ် ယွၼ်ႉၼၼ် ၸင်ႇလႆႈႁိုင်ၵႂႃႇ ပီပၢႆ” ဝႃႈၼႆ။


ဢူးလႃႉၵျေႃႇ သိုပ်ႇလၢတ်ႈထႅင်ႈဝႃႈ ၼႂ်းၶၢဝ်းတၢင်း 7 လိူၼ်ၼႆႉ တေတမ်းဝၢင်းပၼ် ၶိူင်ႈၾႆးၾႃႉပၼ်ၵူၼ်းမိူင်းသေ ပေႃးထိုင်မႃး ၼႂ်းလိူၼ်ဢွၵ်ႊၵိူဝ်ႊ  တေတိတ်းတင်ႈပၼ်ႁႂ်ႈယဝ်ႉ မူတ်းမူတ်း ဝႃႈၼႆ။


ဝၢၼ်ႈ 38 ဝၢၼ်ႈ ဢၼ်တေလႆႈႁပ်ႉၾႆးႁႅင်းလႅတ်ႇ(ၾႆးသူဝ်ႇလႃႇ)သမ်ႉ ယူႇတီႈၸုမ်းၶၢဝ်ႇသႅၼ်ပၢႆး ဢွၵ်ႇဝႆႉသမ်ႉ  မိူၼ် ၼင်ႇ ၼႂ်းဢိူင်ႇမၢၼ်ႈၽၢႆႇ 6 ဝၢၼ်ႈ၊ ဢိူင်ႇၼႃးၽႅင်း 1 ဝၢၼ်ႈ၊ ဢိူင်ႇမၢၼ်ႈၵျွင်း 2 ဝၢၼ်ႈ၊ ဢိူင်ႇၼႃးဝႃႇ 5 ဝၢၼ်ႈ၊ ဢိူင်ႇလွႆငိုၼ်း 1 ဝၢၼ်ႈ၊ ဢိူင်ႇမၢၼ်ႈပုင်ႇ 3 ဝၢၼ်ႈ၊ ဢိူင်ႇမိူင်းႁႅင်း 6 ဝၢၼ်ႈ၊ ဢိူင်ႇမိူင်းၵွင် 3 ဝၢၼ်ႈ၊ ဢိူင်ႇလူင်လႅင်း 1 ဝၢၼ်ႈ၊ မိူင်းႁႃႉမၢၼ်ႈမူင်ႈ 3 ဝၢၼ်ႈ၊ ဢိူင်ႇမၢၼ်ႈၸၢင်ႉ 2 ဝၢၼ်ႈ၊ ဢိူင်ႇႁူဝ်ယႃႉ 2 ဝၢၼ်ႈ၊ ဢိူင်ႇၵွင်းၼွင် 1 ဝၢၼ်ႈ လႄႈ ဢိူင်ႇမၢၼ်ႈၵျွင်းပၢင်ႇသိမ်ႇ 2 ဝၢၼ်ႈ ၸိူဝ်းၼၼ်ႉ ၼႆယဝ်ႉ။