ၵူၼ်းယူႇလႅၼ်လိၼ်တႆး-ထႆးသွင်ၵေႃႉၽူဝ်မေး တေႃႉယႃႈၽွင်ၶၢဝ်ဢတ်းတႅင်ႈ လုၵ်ႉတၢင်းပုင်ႇပႃႇၶႅမ် - မိူင်းတူၼ် - ၶၢမ်ႈၶူင်းၵႂႃႇတၢင်းမိူင်းပၼ်ႇသေ ၺႃးၵူတ်ႇထတ်းတီႈၶူဝ်တႃႈသၢင်း ၵေႃႉပဵၼ်ၽူဝ် ဝႅၼ်တူၵ်းၼမ်ႉၶူင်း၊ ၵေႃႉပဵၼ်မေးၺႃးတီႉၵုမ်းၶင်တူဝ်ဝႆႉတီႈမိူင်းပၼ်ႇ။


ဝၼ်းတီႈ 24/07/2017 ပလိၵ်ႈဝဵင်းမိူင်းပၼ်ႇ ၵူတ်ႇထတ်းရူတ်ႉၵႃးၵူၼ်းၵႂႃႇတႃႈပႆတၢင်းတီႈႁူဝ်ၶူဝ် တႃႈသၢင်း (ၶူဝ်ၼမ်ႉၶူင်း) ၼႂ်းၵႄႈမိူင်းပၼ်ႇလႄႈ မိူင်းတူၼ် ၽွင်းၼၼ်ႉမီးၵႃး ၾူဝ်းဝိၼ်ႊ သီႇၽၵ်း တူ သီၶၢဝ် လုၵ်ႈတၢင်း မိူင်းတူၼ်ၶၢမ်ႈၶူင်းမုင်ႈၸူးမိူင်းပၼ်ႇ ၸဝ်ႈၵႃး ၸၢႆးၵျေႃႇ ဢႃယု 42 ပီ လႄႈမေး ၼၢင်းၸၢမ်ႁွမ် ဢႃယု 23 ပီ ၶီႇၵႃးမႃးၸွမ်းၵၼ်။

တပ်ႉပလိၵ်ႈပႂ်ႉၶူဝ် ထတ်းႁၼ် ယႃႈၾိၼ်ႇၽွင်ၶၢဝ်ဢတ်းပဵၼ်တႅင်ႈ 298 တႅင်ႈ (ၼိုင်ႈတႅင်ႈမီးမွၵ်ႈ 350 ၵရမ်ႊ) ၵႃႈၶၼ်တေမီးငိုၼ်းမၢၼ်ႈမွၵ်ႈ26, 075 သႅၼ်ၵျၢတ်ႉ ။ လိူဝ်ၼၼ်ႉၸဝ်ႈၼႃႈတီႈမိူဝ်း ၵူတ်ႇထတ်းႁိူၼ်းၸၢႆးၵျေႃႇ  တီႈဝဵင်းပုင်ႇပႃႇၶႅမ် ထူပ်းႁၼ်ၵွင်ႈထႅင်ႈၼႆၾၢႆႇပလိၵ်ႈပုင်ႇပႃႇၶႅမ်လၢတ်ႈ။


ၵူၼ်းမိုတ်ႈၵိုဝ်း ၽူႈမီးပုၼ်ႈၽွၼ်းတပ်ႉပလိၵ်ႈ/ပႂ်ႉၶူဝ်တႃႈသၢင်းလၢတ်ႈဝႃႈ - “ ၸၢႆးၵျေႃႇ လုၵ်ႉၼိူဝ် ၶူဝ် တႃႈသၢင်းသေဝႅၼ်တူၵ်းၼမ်ႉၶူင်း မုင်ႈႁၼ်ၸူမ်ၽုတ်းၸူမ်ၽူး 2-3ၵမ်းသေ ႁၢႆၸွမ်းၼမ်ႉၵႂႃႇ ယဝ်ႉ၊ ၼမ်ႉၵေႃႈၸႅဝ်ႈ/ၼွင်းၶၢဝ်းၾူၼ်လႄႈလႅပ်ႈတၢႆယဝ်ႉ” ဝႃႈၼႆ။


ၸၢႆးၵျေႃႇၼႆႉ ႁိူၼ်းမီးတီႈ ပုင်ႇပႃႇၶႅမ် ၼၢင်းၸၢမ်ႁွမ်သမ်ႉ မီးႁိူၼ်းဝႆႉတီႈတႃႈၶီႈလဵၵ်းလႄႈၼႃးၵွင်းမူး ၶႃသွင်ၵေႃႉတႄႇၼႃႈႁိူၼ်းႁူမ်ႈၵၼ်ပႆႇပေႃးႁိုင် ။ ၼၢင်းၸၢမ်ႁွမ်ပဵၼ်မေးၵေႃႉထူၼ်ႈသွင်၊ လုၵ်ႈလၢင်း ယင်းပႆႇမီးႁူမ်ႈၵၼ် ဝႃႈၼႆ။