ႁူင်းပလိၵ်ႈမၢၼ်ႈ ၸႄႈဝဵင်းသီႇပေႃႉ ထုၵ်ႇၵူၼ်းဢမ်ႇႁူႉၸၵ်း ဢဝ်မၢၵ်ႇမႃးဝိုတ်ႉပွႆႇသႂ်ႇ ၼႂ်းႁူင်းပလိၵ်ႈ
မၢၵ်ႇတႅၵ်ႇ တိူဝ်ႉ လူတ်ႉၵႃးလႄႈပလိၵ်ႈၵေႃႉၼိုင်ႈ ဝႃႈၼႆ။

ဝၼ်းတီႈ 02/07/2017 ယၢမ်းၵၢင်ၼႂ် 4:30 မူင်းပၢႆၼၼ်ႉ မီးၵူၼ်းဢဝ်မၢၵ်ႇတႅၵ်ႇ မႃးဝိုတ်ႉပွႆႇသႂ်ႇ ၼႂ်းႁူင်း
ပလိၵ်ႈ မၢၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆး ပွတ်းႁွင်ႇ၊ ပလိၵ်ႈမၢၼ်ႈၵေႃႉၼိုင်ႈ
မၢတ်ႇၸဵပ်းဢိတ်းဢီႈ လူတ်ႉၵႃး လူႉၵွႆ 2 လမ်း ဝႃႈၼႆ။


ၵူၼ်းၼႂ်းပိုၼ်ႉတီႈၸႄႈဝဵင်းသီႇပေႃႉ လၢတ်ႈဝႃႈ “ ၶႃႈႁဝ်းလႆႈငိၼ်းသဵင်မၢၵ်ႇတႅၵ်ႇၼၼ်ႉ ယၢမ်းၵၢင်ၼႂ်ၸဝ်ႉ 4 မူင်း ၶိုင်ႈပၢႆ သဵင်မၼ်းတႅၵ်ႇႁႅင်းတႄႉ ၶႃႈႁဝ်းတိုၼ်ႇလုၵ်ႉမႃး တူၺ်းယၢမ်းမူင်း တိုၵ်ႉၸဝ်ႉယူႇ။ ထိုင်ယၢမ်း
ၵၢင်ၼႂ် ၸဝ်ႉမႃး ၶႃႈႁဝ်းၵႂႃႇတူၺ်းတီႈႁိမ်းႁွမ်းလႄႈ ၼႂ်းႁူင်းပလိၵ်ႈၼၼ်ႉ လႆႈႁၼ်တီႈႁူဝ်ႉဢုတ်ႇၵေႃႈ
လႅဝ်ဝႆႉ။ လူတ်ႉၵႃး လႅၼ်ႊၶရူႊ သိူဝ်ႊဢၼ်ၵိုတ်းဝႆႉၼႂ်းႁူင်းပလိၵ်ႈၼၼ်ႉၵေႃႈတိူဝ်ႉၺႃးမၢၵ်ႇၵမ်ႈၽွင်ႈ၊ သမ်ႉထႅင်ႈ လူတ်ႉၵႃးလူင်လမ်း ၼိုင်ႈၵေႃႈတိူဝ်ႉပႃး။ ပလိၵ်ႈပႂ်ႉယၢမ်းၵေႃႈၼိုင်ႈ တိူဝ်ႉၺႃးၸၢၵ်ႇမၢၵ်ႇ တီႈၶႃသေတႃႉ ဢမ်ႇထိုင်တီႈမႆႈၸႂ်လႆႈ” ဝႃႈၼႆ။


ၵူၼ်းပိုၼ်ႉတီႈ ၵမ်ႈၽွင်ႈလၢတ်ႈဝႃႈ မီးၵူၼ်းၶီႇလူတ်ႉၶိူင်ႈ ဢဝ်မၢၵ်ႇမႃးဝိုတ်ႉပွႆႇသႂ်ႇ ႁူင်းၵုမ်းၶင်သေတႃႉ ႁၢၼ်ႉတေႃႇ ယၢမ်းလဵဝ် ပလိၵ်ႈယင်းပႆႇတီႉလႆႈတူဝ်ၵူၼ်းႁၢႆႉ ဝႃႈၼႆ။


ၵဵဝ်ႇၵပ်းလွင်ႈၼႆႉ ယူႇတီႈၾၢႆႇၸဝ်ႈၼႃႈတီႈပလိၵ်ႈမၢၼ်ႈၸႄႈဝဵင်းသီႇပေႃႉ လူင်းပိုၼ်ႉတီႈ ၵူတ်ႇထတ်း တူၺ်းၸွမ်း ဝၢၼ်ႈၸွမ်းသူၼ်သေတႃႉ ယင်းပႆႇႁူႉဝႃႈ ၵူၼ်းႁၢႆႉပဵၼ်ၽႂ်၊ ၸုမ်းလႂ် ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 03/07/2017