ဝၢႆးသေလူင်ပွင်ၸိုင်ႈမိူင်းထႆး ဢွၵ်ႇပၵ်းပိူင်မၢႆမီႈၵဵဝ်ႇလူၺ်ႈႁႅင်းၵၢၼ်ယၢၼ်မိူင်း ၼႂ်းမိူင်းထႆးသေ ပိုၼ်ၽၢဝ်ႇၸႂ်ႉတိုဝ်း မိူဝ်ႈဝၼ်းတီႈ 23/06/2017 မႃးၼႆႉ ႁဵတ်းႁႂ်ႈႁႅင်းၵၢၼ်ယၢၼ်မိူင်း 3 ၸိုင်ႈမိူင်းႁိမ်းႁွမ်း မိူၼ်ၼင်ႇၵူၼ်းမိူင်း မိူင်းႁူမ်ႈတုမ်မၢၼ်ႈ၊ မိူင်းလၢဝ်း၊ မိူင်းၵမ်ႇပူးၶျႃး ၸိူဝ်းၶဝ်ႈႁဵတ်းၵၢၼ်ၼႂ်းမိူင်းထႆး တူၵ်းတၢင်းယၢပ်ႇၽိုတ်ႇၵပ်ႉၵိၼ်း ၶၢၼ်ၸႂ် တႃႇႁဵတ်းၵၢၼ်ႁႃၵိၼ်လဵင်ႉတွင်ႉတႄႉတႄႉ။

ပၵ်းပိူင်မၢႆမီႈ ဢၼ်တၢင်းၵၢၼ်ထႆး ဢွၵ်ႇပိုၼ်ၽၢဝ်ႇၸႂ်ႉတိုဝ်း ဝႃႈလူၺ်ႈႁႅင်းၵၢၼ်ယၢၼ်မိူင်းၼၼ်ႉ မီးသင်လၢႆလၢႆ၊ ၸွမ်းၼင်ႇလႆႈႁူႉတၼ်းလႄႈယိုၼ်းၶိုတ်းလႆႈၼၼ်ႉ ယွၼ်းဢဝ်မႃးပိုတ်ႇလၢတ်ႈၼႄၵၼ်လႄႈ တႅၵ်ႈၼႄတူဝ်ယၢင်ႇ ၵမ်ႈၽွင်ႈ၊ ယုမ်ႇယမ်ဝႃႈတေမီးၼမ်ႉတွၼ်းၽွၼ်းလီ တေႃႇႁႅင်းၵၢၼ်ယၢၼ်မိူင်း လႄႈ ၽူႈၸိူဝ်းၶႂ်ႈလဵပ်ႈႁဵၼ်းႁူႉ လွင်ႈၼႆႉၵၼ်ယူႇ။ ပၵ်းပိူင်မၢႆမီႈၼၼ်ႉမီးၼင်ႇပႃႈတႂ်ႈၼႆႉ။


(1) ၽူႈလႂ်ၽႂ်သေမဝ်ႇဝႃႈ (ပေႃႈလဵင်ႉမႄႈလဵင်ႉ ႁိုဝ် ၼၢႆးၸၢင်ႈ) ပေႃးႁပ်ႉႁႅင်းၵၢၼ်ယၢၼ်မိူင်းႁဵတ်းၵၢၼ် ဢၼ်မၢႆမီႈႁႄႉႁၢမ်ႈဝႆႉ၊ ႁပ်ႉၵူၼ်းဢမ်ႇမီးဝတ်းဝႂ်ဢၼုၺၢတ်ႈႁဵတ်းၵၢၼ် ႁဵတ်းၵၢၼ်ၸိူဝ်းၼႆႉ မီးတူတ်ႈတၢမ်ႇမႂ်ငိုၼ်း သီႇသႅၼ်ထိုင်ပႅတ်ႇသႅၼ် (400,000- 800,000) ဝၢတ်ႇ တေႃႇႁႅင်းၵၢၼ်ၼိုင်ႈၵေႃႉ။ (တူဝ်ယၢင်ႇ  မိူၼ်ၼင်ႇႁပ်ႉ ၵူၼ်းႁဵတ်းၵၢၼ် ဢမ်ႇမီးဝတ်းဝႂ်သင်၊ ဢမ်ႇမီးဝႂ်ဢၼုၺၢတ်ႈႁဵတ်းၵၢၼ်၊ သင်ၸိူဝ်ႉဝႃႈ ၸဝ်ႈၼႃႈတီႈၵူတ်ႇထတ်း ၺႃးတီႉၺွပ်းၸိုင် ပေႃးမီးႁႅင်းၵၢၼ်ၽိတ်းမၢႆမီႈသွင်ၵေႃႉၵေႃႈ ၺႃးတူတ်ႈတၢမ်ႇၶိုၼ်ႈထႅင်ႈတူပ်ႉၼႅပ်ႇ/သွင်ပုၼ်ႈ)။


(2)ၽူႈလႂ်ၽႂ် ႁႂ်ႈႁႅင်းၵၢၼ်ယၢၼ်မိူင်း ႁဵတ်းၵၢၼ်ဢမ်ႇမႅၼ်ႈၸွမ်းၼင်ႇၼႂ်းဝတ်းဝႂ် ဢၼုၺၢတ်ႈႁဵတ်းၵၢၼ်ၸိုင် ၺႃးတူတ်ႈတၢမ်ႇမႂ်ငိုၼ်း တီႈဢေႇသုတ်းဢမ်ႇယွမ်းသီႇသႅၼ် (400,000) ဝၢတ်ႇ တေႃႇႁႅင်းၵၢၼ်ၼိုင်ႈၵေႃႉ။  (တူဝ်ယၢင်ႇ မိူၼ်ၼင်ႇႁႅင်းၵၢၼ်မီးဝႂ်ဢၼုၺၢတ်ႈႁဵတ်းၵၢၼ် တီႈၼႂ်းႁူင်းငၢၼ်း၊ ပေႃႈလဵင်ႉမႄႈလဵင်ႉ သမ်ႉႁွင်ႉမႃးႁဵတ်းၵၢၼ်ၼွၵ်ႈႁိူၼ်း ၸိူဝ်းၼႆႉ)။


(3)ႁႅင်းၵၢၼ်ယၢၼ်မိူင်း ဢမ်ႇမီးဝႂ်ဢၼုၺၢတ်ႈႁဵတ်းၵၢၼ်သေ ႁဵတ်းၵၢၼ်လႂ်၊ ႁဵတ်းၵၢၼ်ဢၼ်ပၵ်းပိူင်မၢႆမီႈ ႁႄႉႁၢမ်ႈဝႆႉလႂ် မီးတူတ်ႈတၢမ်ႇတူၵ်းၶွၵ်ႈ တီႈဢေႇသုတ်းဢမ်ႇယွမ်း 5 ပီ၊ မၢပ်ႇမႂ်ငိုၼ်းတင်ႈတႄႇ သွင်ႁဵင်ဝၢတ်ႇ ထိုင်ၼိုင်ႈသႅၼ် (2,000-100,000) ဝၢတ်ႇ၊ ဢမ်ႇၼၼ် ငိုၼ်းၵေႃႈၺႃးမၢပ်ႇမႂ်၊ ၶွၵ်ႈၵေႃႈလႆႈတူၵ်း။ (တူဝ်ယၢင်ႇ တေလႆႈႁဵတ်းၵၢၼ်ၼၵ်း ဢၼ်ၸႂ်ႉမႃႇၸႂ်ႉႁႅင်း မႅၵ်ႇႁၢမ်ၶူဝ်းၶွင်ၸိူဝ်းၼႆႉ။ တေဢမ်ႇလႆႈႁဵတ်းၵၢၼ်မဝ် ၵၢၼ်ၸၼ်ႉသုင် ဢၼ်တတ်းမၵ်းဝႆႉတႃႇ ပီႈၼွင်ႉၵူၼ်းမိူင်းထႆးႁဵတ်း၊ ဢမ်ႇႁိမ်ၵၢၼ်ၵူၼ်းထႆး)။


(4)ႁႅင်းၵၢၼ်ယၢၼ်မိူင်း ၸိူဝ်းႁဵတ်းၵၢၼ်တိူဝ်းၸမ်ပဵၼ်လႄႈၼႃႈၵၢၼ်ၶိုၵ်ႉၶၵ်ႉသေ ဢမ်ႇလႆႈၸႅင်ႈလၢတ်ႈ ၸဝ်ႈၼႃႈတီႈၾၢႆႇလူင်းသဵၼ်ႈမၢႆၸိုဝ်ႈသဵင် ႁိုဝ် ၾၢႆႇၸတ်းႁႃငၢၼ်း မီးတူတ်ႈတၢမ်ႇမၢပ်ႇမႂ်ငိုၼ်း သွင်မိုၼ်ႇထိုင်ၼိုင်ႈသႅၼ် (20,000- 100,000) ဝၢတ်ႇ။ (တူဝ်ယၢင်ႇ ၸတ်းပၢင်ၵုမ်ဢုပ်ႇဢူဝ်းၵၼ် 1-2 ဝၼ်းၸိူဝ်းၼႆႉ ဢမ်ႇဝႃႈႁႅင်းၵၢၼ်ယၢၼ်မိူင်း ၸၢဝ်းၶိူဝ်းလႂ်၊ ၸၢဝ်းၼွၵ်ႈမိူင်း ၾရင်ႇၶဝ်ၵေႃႈယဝ်ႉ)။


(5)ႁႅင်းၵၢၼ်ယၢၼ်မိူင်း ႁဵတ်းၵၢၼ်ဢမ်ႇမႅၼ်ႈၸွမ်းၼင်ႇၼႃႈၵၢၼ် ၼႂ်းဝႂ်ဢၼုၺၢတ်ႈႁဵတ်းၵၢၼ်။ မီးတူတ်ႈတၢမ်ႇမႂ်ငိုၼ်း တီႈဢေႇသုတ်းထိုင်ၼိုင်ႈသႅၼ် (100,000) ဝၢတ်ႇ။ (တူဝ်ယၢင်ႇ မီးဝႂ်ဢၼုၺၢတ်ႈ ႁဵတ်းၵၢၼ်ၼႂ်းႁိူၼ်း ပဵၼ်မႄႈဝၢၼ်ႈ သမ်ႉၵႂႃႇႁဵတ်းၵၢၼ်ၼႂ်းႁူင်းငၢၼ်း)။


(6)ၽူႈလႂ် (ပေႃႈလဵင်ႉမႄႈလဵင်ႉ) ၽႂ်ဢဝ်ဝတ်းဝႂ်တူဝ်တႄႉလုၵ်ႈလဵင်ႉဝႆႉ မီးတူတ်ႈတၢမ်ႇတူၵ်းၶွၵ်ႈ တီႈဢေႇသုတ်းဢမ်ႇယွမ်း 6 လိူၼ်၊ မႂ်ငိုၼ်းတီႈဢေႇသုတ်းထိုင်ၼိုင်ႈသႅၼ် (100,000) ဝၢတ်ႇ။ (တူဝ်ယၢင်ႇ မိူၼ်ၼင်ႇပေႃႈလဵင်ႉမႄႈလဵင်ႉ ၵူဝ်လုၵ်ႈလဵင်ႉပၢႆႈၶၢႆႉဢွၵ်ႇၵၢၼ်သေ ၵုမ်းယိပ်းဝႆႉဝႂ်ဢၼုၺၢတ်ႈႁဵတ်းၵၢၼ် ဢၼ်တႄႉ။ မိူဝ်ႈၸဝ်ႈၼႃႈတီႈ ၶဝ်ႈၵူတ်ႇထတ်းသေ လုၵ်ႈလဵင်ႉလၢတ်ႈဝႃႈ ဝႂ်တႄႉမၼ်း ပေႃႈလဵင်ႉမႄႈလဵင်ႉ/ ၼၢႆးၸၢင်ႈဢဝ်ဝႆႉ။ ပေႃႈလဵင်ႉမႄႈလဵင်ႉၼႆႉ မီးသုၼ်ႇယိပ်းဝႆႉဝႂ်ၽိုၼ်မိူၼ်လုၵ်ႈလဵင်ႉလုၵ်ႈၸၢင်ႈၵူၺ်း)။


(7)ၽူႈလႂ်ၽႂ်လွၵ်ႇၵဝ်းတၢင်ႇၵေႃႉတၢင်ႇမိူင်းဝႃႈ တူဝ်ၵဝ်ႇဢွၼ်ဢဝ်ၶဝ်ႈၵႂႃႇႁဵတ်းၵၢၼ်ၼႂ်းမိူင်းထႆးလႆႈ၊ မီးပေႃႈလဵင်ႉမႄႈလဵင်ႉဝႆႉယဝ်ႉၸိူဝ်းၼႆႉသေ ႁွင်ႉၸူဝ်းဢွၼ်ဢဝ်ၶဝ်ႈမိူင်းထႆးၼၼ်ႉ မီးတူတ်ႈတၢမ်ႇၶွၵ်ႈသၢမ်ပီထိုင် သိပ်းပီ (3-10) ပီ၊ မၢပ်ႇမႂ်ငိုၼ်းတင်ႈတႄႇ ႁူၵ်းသႅၼ်ထိုင်ၼိုင်ႈလၢၼ်ႉ (600,000-1,000,000) ဝၢတ်ႇ တေႃႇႁႅင်းၵၢၼ်မိူင်းၼိုင်ႈၵေႃႉ။ (ငိုၼ်းၵေႃႈမႂ် ၶွၵ်ႈၵေႃႈတူၵ်းၵေႃႈ ၸၢင်ႈပဵၼ်လႆႈ)။


(8)ၽူႈလႂ်ႁဵတ်းၵၢၼ်ပၢႆးမၢၵ်ႈမီး ၵဵဝ်ႇၵပ်းၼၢႆးၼႃႈ (ႁဵတ်းၵူၼ်းၶဵဝ်ၼႂ်းၵႄႈၵၢင်) ၼမ်းပႃးဢွၼ်ဢဝ်ၵူၼ်း တၢင်ႇၸၢတ်ႈတၢင်ႇမိူင်း ၶဝ်ႈမႃးႁဵတ်းၵၢၼ်ၼႂ်းမိူင်းထႆး လူၺ်ႈဢမ်ႇလႆႈဢၼုၺၢတ်ႈတီႈ ႁူဝ်ပဝ်ႈႁွင်ႈၵၢၼ်လူင် ၾၢႆႇႁႅင်းငၢၼ်း မီးတူတ်ႈတၢမ်ႇတူၵ်းၶွၵ်ႈ 1-3 ပီ၊ ဢမ်ႇၼၼ် ၺႃးမႂ်ငိုၼ်းတင်ႈတႄႇသွင်သႅၼ်ထိုင်ႁူၵ်းသႅၼ် (200,000- 600,000) ဝၢတ်ႇ၊ ဢမ်ႇၼၼ် တင်းတူၵ်းၶွၵ်ႈတင်းမႂ်ငိုၼ်း။


လိူဝ်သေၼၼ်ႉ ႁႅင်းၵၢၼ်ယၢၼ်မိူင်းႁဵတ်းၵၢၼ်ၽိတ်းတီႈ ၺႃးမႂ်ငိုၼ်း 100,000 ဝၢတ်ႇ။ (တူဝ်ယၢင်ႇ မီးဝႂ်ဢၼုၺၢတ်ႈႁဵတ်းၵၢၼ် ၼႂ်းပိုၼ်ႉတီႈဝၢၼ်ႈဢိူင်ႇၼႆႉ သမ်ႉၵႂႃႇႁဵတ်းတၢင်ႇဝၢၼ်ႈဢိူင်ႇ တၢင်ႇၸႄႈဝဵင်း ၸိူဝ်းၼႆႉ)။


ဝၢႆးသေပၵ်းပိူင်မၢႆမီႈၼႆႉ ဢွၵ်ႇမႃးၸႂ်ႉတိုဝ်းယဝ်ႉ၊ ၸဝ်ႈၼႃႈတီႈၾၢႆႇပလိၵ်ႈ ၾၢႆႇသိုၵ်းႁူမ်ႈၵၼ် ၶဝ်ႈတီႉၺွပ်း ႁႅင်းၵၢၼ်ယၢၼ်မိူင်း ၸွမ်းၼႂ်းႁူင်းၵၢၼ် ၼႂ်းၵၢတ်ႇၼႂ်းသႃးၸိူဝ်းၼႆႉယဝ်ႉ ႁဵတ်းႁႂ်ႈႁႅင်းၵၢၼ်ယၢၼ်မိူင်း ၵူၼ်းမိူင်းမၢၼ်ႈ မိူင်းလၢဝ်းၸိူဝ်းၼႆႉ ယူႇယၢပ်ႇၵိၼ်းၸႂ် ထူပ်းတၢင်းယၢပ်ႇၽိုတ်ႇသေ ဢွၼ်ၵၼ်ပွၵ်ႈမိူဝ်း ၼပ်ႉႁူဝ်ႁဵင်။ ၽူႈယႂ်ႇၵူၼ်းလူင်ၼႂ်းထႆးၵမ်ႈၽွင်ႈလႄႈသင်၊ ၵူၼ်းႁဵတ်းၵၢၼ်မၢၵ်ႈမီးၸိူဝ်းၼႆႉလႄႈသင်၊ ၵွပ်ႈၼႃႈၵၢၼ်ယူပ်ႈယွမ်းတင်းၼမ် ဢမ်ႇပဵၼ်ၵၢၼ်ယဝ်ႉလႄႈ ဢွၼ်ၵၼ်ဢွၵ်ႇမႃးၼႄၵၢင်ၸႂ် တုၵ်းယွၼ်းတီႈလူင်ပွင်ၸိုင်ႈထႆး ႁႂ်ႈလူတ်းယွမ်းယွၼ်ႇယၢၼ်းပၼ်၊ ၶိုၼ်းၵႄႈလိတ်ႈပၼ်ပၵ်းပိူင်မၢႆမီႈ ပေႃႇလသီႇ၊ ႁႂ်ႈဢွၵ်ႇပၼ်ဝႂ်ႁႅင်းၵၢၼ်မႂ်ႇ ၸိူဝ်းၼႆႉ။


ဢိင်ၼိူဝ်လွင်ႈၼႆႉသေ ထိုင်မႃးမိူဝ်ႈဝၼ်းတီႈ 29/06/2016 ၼႆႉ လူင်ပွင်ၸိုင်ႈထႆး ဢၼ်မီးၸွမ်ၽွင်းလူင်ထႆး ပရႃႊယုတ်ႊ ၵျၼ်ႊဢူဝ်ႊၶျႃး ဢွၼ်ႁူဝ်ၼမ်းၼႃႈ လႆႈႁဵတ်းပၢင်ၵုမ်ၵၼ် ၵဵဝ်ႇလူၺ်ႈလွင်ႈၵူၼ်းႁဵတ်းၵၢၼ် ႁႅင်းၵၢၼ်ယၢၼ်မိူင်း။  ပၢင်ၵုမ်ဢွၵ်ႇပေႃႇလသီႇမႃးဝႃႈ ႁႅင်းၵၢၼ်ၸိူဝ်းမီးဝႂ်ပၢတ်ႉသပွတ်ႊ (ဝႂ်ၶဝ်ႈမိူင်း)ၼၼ်ႉ တၢင်းထႆးတေသိုပ်ႇဢွၵ်ႇပၼ်ဝီႊသႃႊ (ဝႂ်ၶဝ်ႈမိူင်း)ၵႂႃႇထႅင်ႈ။ သင်ဝႃႈၼႂ်းဝႂ်ဢၼုၺၢတ်ႈႁဵတ်းၵၢၼ်ၼၼ်ႉ ၸိုဝ်ႈပေႃႈလဵင်ႉမႄႈလဵင်ႉ ဢမ်ႇၸႂ်ႈၵေႃႉလဵဝ်ၵၼ်တင်း ၵေႃႉဢၼ်ႁဵတ်းၵၢၼ်ၸွမ်းၼၼ်ႉၸိုင် တၢင်ႇယိုၼ်ႈယွၼ်း လႅၵ်ႈလၢႆႈလႆႈ လူၺ်ႈဢမ်ႇသဵင်ႈၵႃႈသဵင်ႈႁူဝ်။ လိူဝ်သေၼၼ်ႉ တေသိုပ်ႇတေႃႇပၼ်ဢႃယုၸူဝ်ႈၶူပ်ႇဝႂ် MOU ၸွမ်းၼင်ႇဢၼ်သွင်ၸိုင်ႈမိူင်း လႆႈၸႂ်တူၵ်းလူင်းၵၼ်ဝႆႉ ၸိူဝ်းၼႆႉ။ လွင်ႈၵၢၼ်ၶဝ်ႈၵူတ်ႇထတ်း တီႉၺွပ်းႁႅင်းၵၢၼ်ယၢၼ်မိူင်းၼၼ်ႉၵေႃႈ ႁႂ်ႈၵိုတ်းယင်ႉဝႆႉၵွၼ်ႇ လႂ်ၸိူဝ်းၼႆႉ။

တၢင်းသိုဝ်ႇၶၢဝ်ႇထႆး လၢတ်ႈပႃးဝႃႈ- ႁႅင်းၵၢၼ်ယၢၼ်မိူင်းၶဝ်ၼႆႉ ဝတ်းဝႂ်ဢၼ်ထုၵ်ႇလီမီးဝႆႉၵိုၵ်းၵပ်းၸပ်းတူဝ်၊ ပိူဝ်ႈတႃႇဢဝ်ၼႄ မိူဝ်ႈၸဝ်ႈၼႃႈတီႈၶဝ်ႈၵူတ်ႇထတ်းၼၼ်ႉ တီႈဢေႇသုတ်းမၼ်းႁႂ်ႈမီး 3 ပိူင် မိူၼ်ၼင်ႇဝႂ်ပၢတ်ႉသပွတ်ႊ၊ ဝႂ်ဝီႊသႃႊ၊ ဝႂ်ဢၼုၺၢတ်ႈႁဵတ်းၵၢၼ် ၸိူဝ်းၼႆႉ။ သင်ၸိူဝ်ႉဝႃႈဢမ်ႇမၼ်ႈၸႂ် ၵူဝ်မၼ်းပႆႇထုၵ်ႇမႅၼ်ႈၸွမ်းပၵ်းပိူင်မၢႆမီႈၼႆၵေႃႈ ႁႂ်ႈၵႂႃႇၸႅင်ႈလၢတ်ႈပိုၵ်းသႃ တီႈႁွင်ႈၵၢၼ်ၾၢႆႇၸတ်းႁႃငၢၼ်း ဢမ်ႇၼၼ် တီႈပလိၵ်ႈၾၢႆႇၵူတ်ႇၵူၼ်းၶဝ်ႈမိူင်း (တေႃးမေႃး)-ဝႃႈၼႆ။


လၢတ်ႈလွင်ႈမၢႆမီႈမိူင်းထႆး လွင်ႈၸဝ်ႈၼႃႈတီႈမိူင်းထႆးမႃးၼမ်ယဝ်ႉ ၵူဝ်မိူဝ်ႇၵၼ်၊ ၵမ်းၼႆႉႁဝ်းမႃးၶဝ်ႈလွင်ႈ ပီႈၼွင်ႉတႆးၽွင်ႈ။ ဝၢႆးသေမၢႆမီႈထႆး ဝႃႈလူၺ်ႈလွင်ႈႁႅင်းၵၢၼ်ယၢၼ်မိူင်းဢွၵ်ႇမႃးၼႆႉ ႁၼ်ႁၼ်ပီႈၼွင်ႉတႆးၵမ်ႈၽွင်ႈ ထွတ်ႇၶႅပ်းႁၢင်ႈတၢင်ႇၶိုၼ်ႈၼိူဝ်ၾႅတ်ႊၼိူဝ်ဢွၼ်ႊလၢႆႊၽွင်ႈ။ လႆႈႁၼ်ႁဵတ်းတူင်ႇၸိူၵ်ႈ သွႆႉဝတ်းဝႂ်၊ ဢဝ်ပပ်ႉဝႂ်ပၢတ်ႉသပွတ်ႇ/ဝီႊသႃႊ၊ ဝႂ်ဢၼုၺၢတ်ႈႁဵတ်းၵၢၼ်ၸိူဝ်းၼႆႉ ႁွႆႈၸွမ်းၶေႃး၊  ၼဵပ်းၸွမ်းႁူဝ်ၸွမ်းၼႃႈဢူၵ်း ၸိူဝ်းၼႆႉသေႁဵတ်းၵၢၼ် သေလိုဝ်ႈယင်ႉၵေႃႈမီး။ ၵမ်ႈၽွင်ႈၶၢင်းဝႃႈ တႃႉပွၵ်ႈမိူဝ်းႁဵတ်းၵၢၼ် တီႈမိူင်းႁဝ်းလႃႈ၊ ယူႇမိူင်းထႆးၵေႃႈယူႇယၢပ်ႇၵိၼ်ယၢပ်ႇ၊ လႆႈငိုၼ်းမႃးၵေႃႈၵုမ်ႇႁဵတ်းဝတ်းဝႂ်သေသဵင်ႈၵႂႃႇၸွမ်းၵူၺ်း ဝႃႈၼႆၵေႃႈမီး။


ဢၼ်ၵမ်ႈၽွင်ႈတၢင်ႇၶိုၼ်ႈၼိူဝ်ၾဵတ်ႊဝႃႈ- ပီႈၼွင်ႉတႆးႁဝ်းတၢင်းၵဵင်းမႆႇတႄႉ ပဵၼ်ႁိုဝ်ဢမ်ႇႁူႉ။ တၢင်းလမ်းပုၼ်းၼႆႉတႄႉ ပေႃးဝႃႈဢမ်ႇမီးဝတ်းဝႂ်ထုၵ်ႇမႅၼ်ႈၸိုင် ယႃႇဝႃႈတေႁဵတ်းၵၢၼ်ၵွၼ်ႇလႃႈ တေႃႈတီႈၼွၼ်းၵူၺ်းၵေႃႈ ဢမ်ႇၶႂ်ႈမီးယဝ်ႉ။ ပူႇၵႄႇပူႇႁဵင်ၶဝ်ၼႂ်းဝၢၼ်ႈၼႂ်းဢိူင်ႇ ႁွင်ႉသေႃႇၼႂ်းဢူတ်ႇဝႃႈ ႁႅင်းၵၢၼ်ယၢၼ်မိူင်း ၸိူဝ်းဢမ်ႇမီးဝတ်းဝႂ်၊ ၸိူဝ်းမီးဝတ်းဝႂ်ဢမ်ႇထုၵ်ႇမႅၼ်ႈၼၼ်ႉ ႁႂ်ႈၶၢႆႉဢွၵ်ႇၼႂ်းဢိူင်ႇဝၢၼ်ႈ ၸႄႈတွၼ်ႈလမ်းပုၼ်း ၶၢဝ်းတၢင်း 3 ဝၼ်း-ဝႃႈၼႆၵၼ်ၵေႃႈမီး။


ၾၢႆႇၼိုင်ႈတၢင်းၼိုင်ႈၵေႃႈ ပီႈၼွင်ႉတႆးႁႅင်းၵၢၼ်ယၢၼ်မိူင်း ၸိူဝ်းတူၵ်းၵိၼ်းၼႂ်းမိူင်းထႆးသေ ၶႂ်ႈပွၵ်ႈမိူဝ်းၶိုၼ်း မိူင်းတႆးၼၼ်ႉ သင်ဝႃႈမိူဝ်းထိုင်တီႈလႅၼ်လိၼ်ထႆး-တႆး တီႈမႄႈသၢႆ-တႃႈၶီႈလဵၵ်းယဝ်ႉ ထူပ်းတၢင်းယၢပ်ႇၽိုတ်ႇၸိုင် တိတ်းတေႃႇၵပ်းသိုပ်ႇယွၼ်းတၢင်းၸွႆႈထႅမ် လႆႈတီႈလုမ်းၵပ်းသၢၼ် ၶွင်ႇသီႇဢဝ်ၶိုၼ်းၸိုင်ႈတႆး (RCSS) တီႈတႃႈၶီႈလဵၵ်း။ လွင်ႈၼႆႉ ၸဝ်ႈႁၢၼ်သႅင်လီ ၽူႈၼင်ႈလုမ်းၵေႃႈလၢတ်ႈဝႃႈ- "ပီႈၼွင်ႉႁဝ်းၶႃႈ ၸိူဝ်းႁွတ်ႈမႃးတီႈ လႅၼ်လိၼ်ၼၼ်ႉ သင်ဝႃႈဢမ်ႇမီးပီႈမီးၼွင်ႉ၊ ထူပ်းတၢင်းယၢပ်ႇၽိုတ်ႇၸိူဝ်းၼႆႉၸိုင် တိတ်းတေႃႇၵပ်းသိုပ်ႇမႃးတီႈ လုမ်းၵပ်းသၢၼ်ႁဝ်းၶႃႈလႆႈယူႇ"- ဝႃႈၼႆ။