လူင်ပွင်ၸိုင်ႈမိူင်းထႆး ယွၼ်ႇယၢၼ်းပၼ် ႁႂ်ႈႁႅင်းၵၢၼ်ၶပ်းၶိုင်ဝႂ်ၵပ်းတူဝ် ဝတ်းဝႂ်လႄႈ ၸိူဝ်းမီးပေႃႈ လဵင်ႉသေပႆႇမီးဝတ်းၼၼ်ႉၵေႃႈ ႁႂ်ႈႁၢင်ႈႁႅၼ်းတၢင်ႇယိုၼ်ႈယွၼ်းၼႂ်းဝၼ်းတီႈ 24 လိူၼ်ၵျႃႊလၢႆႊ - 07 လိူၼ်ဢေႃႊၵတ်ႊသ်ၼႆႉ။


ဝၼ်းတီႈ 24 /07 ထိုင်07/08/2017 ၼႆႉလူင်ပွင်ၸိုင်ႈမိူင်းထႆး ပိုၼ်ၽၢဝ်ႇ ႁႂ်ႈပေႃႈလဵင်ႉ ၼၢႆးၸၢင်ႈဢွၼ်ဢဝ် လုၵ်ႈလဵင်ႉဢၼ်ဢမ်ႇမီးဝတ်းဝႂ်သင်ၼၼ်ႉ ၵႂႃႇတၢင်ႇယွၼ်းႁဵတ်းဝတ်းဝႂ်တီႈႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း (ဢွင်ႈတီႈတေပိုၼ်ၽၢဝ်ႇထႅင်ႈၵမ်းၼိုင်ႈ) ၸိူဝ်းႁဵတ်း ၵၢၼ်ၽိတ်းတီႈ၊ ၸိုဝ်ႈပေႃႈလဵင်ႉ ၼၢႆးၸၢင်ႈၽိတ်းၼၼ်ႉ ၵေႃႈ ႁႂ်ႈၵႂႃႇၶပ်းၶိုင် ႁႂ်ႈယဝ်ႉတူဝ်ႈၼႂ်းၶၢဝ်းတၢင်း 6 လိူၼ်။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈဝႃႈ - မိူဝ်ႈလဵဝ်ၼႆႉ တေလႆႈ ဝႃႈပဵၼ် တိုဝ်ႉတၢင်းလီတႄႉတႄႉ ဢၼ်လူင်ပွင်ၸိုင်ႈၶဝ်ပိုတ်ႇတိုဝ်ႉတၢင်းပၼ် ၸိူဝ်းဢၼ်မီးပေႃႈလဵင်ႉၼၢႆး ၸၢင်ႈသေဢမ်ႇမီးဝတ်းဝႂ်ၼၼ်ႉ ႁႂ်ႈႁၢင်ႈႁႅၼ်းတူဝ်ၵႂႃႇတၢင်ႇယိုၼ်ႈၸွမ်း ၼင်ႇဢၼ်မၵ်းမၼ်ႈဝႆႉၼၼ်ႉ ”ဝႃႈၼႆ။


လူင်ပွင်ၸိုင်ႈပိုၼ်ၽၢဝ်ႇ ယွၼ်ႇယၢၼ်းပၼ်ၶၢဝ်းယၢမ်းႁႅင်းၵၢၼ်ႁဵတ်းဝတ်းဝႂ် 6 လိူၼ်ၼႆသေတႃႉ ႁႅင်းၵၢၼ် ယၢၼ်မိူင်းယင်းတိုၵ်ႉဢွၼ်ၵၼ်ဢွၵ်ႇမိူဝ်းယူႇၶိူဝ်းယႂ်း။


ၸဝ်ႈႁၢၼ်သႅင်လီ ၽူႈၼင်ႈလုမ်းၵပ်းသၢၼ် RCSS ဝဵင်းတႃႈၶီႈလဵၵ်ႉလၢတ်ႈဝႃႈ - “ မိူဝ်ႈလဵဝ်ၵေႃႈ တီႈတႃႈၶီႈ လဵၵ်းၼႆႉ မီးႁႅင်းၵၢၼ်ပွၵ်ႈမႃးယူႇၵူႈဝၼ်း မၢင်ဝၼ်းမီးမွၵ်ႈ100၊ မၢင်ဝၼ်း 50၊ မၢင်ဝၼ်း 20 -30 ၸိူဝ်းၼႆႉ ယူႇတီႈႁဝ်း ၶႃႈ RCSS/ ပႃႇတီႇၵၢၼ်မိူင်း၊ ၸုမ်းတူင်ႇဝူင်းၵူၼ်းၸိူဝ်းၼႆႉ ဢွၼ်ၵၼ်ပႂ်ႉႁပ်ႉတွၼ်ႈ ၸွႆႈထႅမ်လွင်ႈ ယူႇလွင်ႈၵိၼ်လွင်ႈပွၵ်ႈႁိူၼ်းၸိူဝ်းၼႆႉ။


ဝၢႆးသေလူင်ပွင်ၸိုင်ႈထႆးပိုၼ်ၽၢဝ်ႇ ပၵ်းပိူင်မႂ်ႇတွၼ်ႈတႃႇႁႅင်းၵၢၼ် ပီ 2017 ဢွၵ်ႇမႃးဝႃႈ – ၽူႈလႂ် ၽႂ်ႁပ်ႉၵူၼ်း ႁဵတ်းၵၢၼ် ဢမ်ႇမီးဝတ်းဝႂ်၊ ႁဵတ်းၵၢၼ်ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် တေၺႃးမႂ် 400,000 – 800, 000 ၿၢတ်ႇ တေႃႇၵူၼ်းႁဵတ်း ၵၢၼ်ၼိုင်ႈၵေႃႉ။ ၾၢႆႇလူင်ပွင်ၸိုင်ႈ ယွၼ်ႇယၢၼ်းပၼ် 6 လိူၼ်ႁႂ်ႈလႆႈၶၢဝ်းယၢမ်းႁၢင်ႈႁႅၼ်းတူဝ်သေတႃႉ ၵူၼ်းႁဵတ်းၵၢၼ်မိူင်းထႆး ယင်း တိုၵ်ႉဢွၼ်ၵၼ် ပွၵ်ႈႁိူၼ်းယူႇၶိူဝ်းယႂ်း ။ ၸုမ်းတူင်ႉၼိုင် တူင်ႇဝူင်းတႆး၊ တပ်ႉသိုၵ်းတႆး RCSS/ SSPP/ ပႃႇတီႇၵၢၼ်မိူင်းတႆး SNLD / SNDP ၸိူဝ်းၼႆႉဢွၵ်ႇလိၵ်ႈယိုၼ်ႈမိုဝ်းၸွႆႈထႅမ်ႁႅင်းၵၢၼ်ၽွင်းပွၵ်ႈ ၶိုၼ်းႁိူၼ်း။