ငဝ်ႈငုၼ်း မုၵ်ႉၸုမ်းလူင် သင်ၶၸိုင်ႈတႆး ၸုမ်းၾၢႆႇပၢႆးပၺ်ႇၺႃႇၸတ်းႁဵတ်းပၢင်ၵုမ်ၵမ်းထူၼ်ႈ 3 တီႈဝဵင်းပၢင်လူင် ၸိုင်ႈတႆးပွတ်းၸၢၼ်း ႁၢင်ႈႁႅၼ်းတႃႇ ၸတ်းႁဵတ်းပၢင်ၵုမ်လူင် “ၶွၼ်ႊၾရႅၼ်ႉ” လိၵ်ႈလူင်တႆး ပွၵ်ႈၵမ်း 5  ။


ပၢင်ၵုမ် ပွၵ်ႈၵမ်း (3) ၸုမ်းၾၢႆႇပၢႆးပၺ်ၺႃ ငဝ်ႈငုၼ်း မုၵ်ႉၸုမ်းလူင် သင်ၶၸိုင်ႈတႆး ၵမ်းၼႆႉ ၸတ်းႁဵတ်း တီႈ ဝတ်ႉပိတၵတ် ဝဵင်းပၢင်လူင် ၸႄႈတွၼ်ႈလွႆလႅမ် ။ ပၢင်ၵုမ်လူင် တေၸတ်းႁဵတ်း သွင်ဝၼ်း၊ ၼႂ်းဝၼ်း တီႈ 15 -16/07/2017 ၶၢဝ်းယၢမ်း 9 မူင်း ၵၢင်ၼႂ် တေႃႇထိုင် ဝၢႆးဝၼ်း 3 မူင်း ။ သင်ၶၸဝ်ႈတၢင်တူဝ် ၸႄႈဝဵင်းၽႂ်မၼ်း ပတ်းပိုၼ်ႉမိူင်းတႆးမႃးၶဝ်ႈႁူမ်ႈ ဢမ်ႇယွမ်း 60 တူၼ်။

ဝၼ်းတီႈ 15   ဢုပ်ႇဢူဝ်းၵၼ် ၵဵဝ်ႇလူၺ်ႈ ပၢႆးပၺ်ၺႃ၊  ၼႂ်းဝၼ်းတီႈ 16 သမ်ႉ သင်ၶၸဝ်ႈလႄႈ ၸဝ်ႈၽူႈလူင်ႉလႅၼ်ႇလိၵ်ႈလၢႆးပၢႆၵမ် ပၢၼ်ၵဝ်ႇ ပၢၼ်မႂ်ႇၶဝ်ၸဝ်ႈ တေဢုပ်ႇၵုမ်ၵၼ် လွင်ႈလိၵ်ႈလူင် ၊ တွၼ်ႈတႃႇႁၢင်ႈႁႅၼ်း ၶွၼ်ႊၾရႅၼ်ႉ လိၵ်ႈလူင်တႆး ပွၵ်ႈၵမ်း 5   ။


ၸဝ်ႈတူၼ်ၶူးလူင် ၽတ်ႉတၼ်တ တွၵ်ႊတိူဝ်ႊ ပၺ်ၺႃၼၼ်တ ပၼ်ဢေႃးဝႃတ  ပိုတ်ႇ ပၢင်ၵုမ်  ။ ၸဝ်ႈ တူၼ်ၶူးလူင် တွၵ်ႊတိူဝ်ႊ ၶမ်းမၢႆ ထမ်မသႃမိ သမ်ႉၶႆႈၼႄ  လွင်ႈၵၢၼ်တႅမ်ႈ ပပ်ႉလၵ်းသုတ်ႇၵၢၼ်သွၼ်/ႁဵၼ်း (ပပ်ႉပူင်သွၼ်/ပပ်ႉယိပ်းတိုဝ်းႁဵၼ်းဢဝ်)။


သိုပ်ႇၼၼ်ႉ ၸဝ်ႈၵၼ်ထဝႃၸၵ ပၼ်တိတ ၸဝ်ႈတူၼ်ၶူးလူင် ၽတ်တၼ်တ ဝိၸႃရၼ ၵႅမ်ႁူဝ်ပဝ်ႈ ငဝ်ႈငုၼ်း မုၵ်ႉၸုမ်းလူင် သင်ၶၸိုင်ႈတႆး လၢတ်ႈၼႄ တၢင်းႁၼ်ထိုင် ပပ်ႉလၵ်းသုတ်ႇၵၢၼ်သွၼ်/ႁဵၼ်း သင်ၶတႆး။


ၸဝ်ႈတူၼ်ၶူးလႄႈ ၽူႈမႃးၶဝ်ႈႁူမ်ႈပၢင်ၵုမ် လႆႈဢုပ်ႇၵုမ်ၵၼ် လွင်ႈပွင်ၵၢၼ် သႃသၼႃ၊ ပၢႆးသၢႆႊ၊ သၽႃဝ သိင်ႇဝႅတ်ႉလွမ်ႉ၊ ပိုၼ်း၊ ပၢႆးၼပ်ႉ၊ လိၵ်ႈဢိင်းၵလဵတ်ႈ၊ လိၵ်ႈမၢၼ်ႈ၊ လိၵ်ႈလၢႆးတႆး၊ ပႃလိ၊ ဢၽိထမ်မ၊ သုတ်တၢၼ်၊ ဝိၼယ   ၸဵမ်ၸိူဝ်းၼႆႉ။


ဝၼ်းထိ 15 ယၢမ်းဝၢႆးဝၼ်း 1:00 မူင်း  သင်ၶၸဝ်ႈ ၽူႈမႃးၶဝ်ႈႁူမ်ႈပၢင်ၵုမ် ၸႅၵ်ႇပဵၼ်မူႇသေ ဢုပ်ႇဢူဝ်းၵၼ် ႁႃၶေႃႈတႅပ်းတတ်းၼႂ်းႁူဝ်ၶေႃႈဢၼ်ဢုပ်ႇၵုမ်ၵၼ်မႃး။


ပၢင်ၵုမ်ၶွၼ်ႊၾရႅၼ်ႉ လိၵ်ႈလူင်တႆး ပွၵ်ႈၵမ်း(5)ၼႆႉ တေၸတ်းႁဵတ်းၼႂ်းဝၼ်းတီႈ 27 လိူၼ်တီႊသႅမ်ႊၿႃႊ 2017 ႁၢင်ပီၼႆႉ ဝႃႈၼႆ။ ၶၢဝ်းပၢင်ၵုမ် 2 ဝၼ်းၼႆႉ ၸဝ်ႈၽူႈၸႂ်လီသတ်ႉထႃး ၼႂ်းဝဵင်းပၢင်လူင်၊ ၸုမ်းၵေႃလိၵ်ႈလၢႆး၊ ၸုမ်းတူၺ်းလူ(ဝူၺ်ႇယႃႇဝိတ်ႉၸ)၊ ၸုမ်းၵူၼ်းၼုမ်ႇ ဢိၵ်ႇလၢႆမူႇလၢႆၸုမ်း သၢၼ်မိုဝ်းၵၼ်ႁပ်ႉ ပုၼ်ႈၽွၼ်း တူၺ်းထိုင်လုမ်းလႃးလွင်ႈသွမ်းပဵၼ်းၼမ်ႉၵတ်းၼမ်ႉဝၢၼ် - ၵမ်ႉၵႅမ်ၸွႆႈထႅမ်တႃႇ ပွင်ပဵၼ် ပၢင်ၵုမ် ဝႃႈၼႆ။