ပီႈၼွင်ႉတႆး ၸိူဝ်းႁွတ်ႈၽႅဝ်မိူင်းထႆး ၼႂ်းၸႄႈတွၼ်ႈလမ်းပုၼ်း၊ ၵဵင်းမႆႇလႄႈ ၵုင်းထဵပ်ႈ ႁူမ်ႈၵၼ် ၵဵပ်းၶူဝ်း ၶွင်၊ ၶွင်ၵိၼ်ယႅမ်ႉ ငိုၼ်းတွင်း တႃႇၵႂႃႇၸွႆႈထႅမ်ပၼ်ပီႈၼွင်ႉၵူၼ်းပၢႆႈၽေးသိုၵ်းၸိူဝ်း မႃးယူႇဝႆႉတီႈပၢင်သဝ်း တီႈမူႇဝၢၼ်ႈလွႆသၼ်ၸူႉ/ လွႆသၢမ်သိပ်း ၼႂ်းၸႄႈဝဵင်းမိူင်းတူၼ် ၸိုင်ႈတႆး ပွတ်းဢွၵ်ႇၶူင်း။


ဝၼ်းတီႈ 20/06/2017 ၼႆႉၸုမ်းတႆးတူၼ်ႈတီး ၸိူဝ်းတီႈႁဵတ်းၵၢၼ်ၼႂ်းမိူင်းထႆး ႁူမ်ႈၵၼ်တုင်းႁပ်ႉ ၶဝ်ႈၼမ်ႉတၢင်းၵိၼ်၊ ၶိူင်ႈၶူဝ်းၶွင်ၸႂ်ႉသွႆလႄႈ ငိုၼ်းတွင်း တီႈၽူႈမီးၸႂ်သတ်ႉထႃးၵမ်ႉၸွႆႈ တႃႇၵႂႃႇၸွႆႈထႅမ် ပၼ်ပီႈၼွင်ႉၵူၼ်းမိူင်းတႆးလၢႆလၢႆတီႈ ၸိူဝ်းပၢႆႈၽေးသိုၵ်းဢၼ်မႃးယူႇသဝ်းဝႆႉတီႈပၢင်သဝ်း ၵူၼ်းပၢႆႈၽေး မူႇဝၢၼ်ႈလွႆသၼ်ၸူႉ/လွႆသၢမ်သိပ်း ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း။ တႃႇၵူၼ်းပၢႆႈၽေးႁိမ်း 200 ၵေႃႉ။

ၸၢႆးတူၼ်ႉ ၽူႈဢွၼ်ႁူဝ် တၢင်းပွတ်းၸႄႈတွၼ်ႈလၢမ်းပုၼ်း ၼႂ်းၸိုင်ႈထႆး လၢတ်ႈဝႃႈ “ ယူႇတီႈၸုမ်းႁဝ်းၶႃႈ တင်းသၢမ်ၸုမ်း ပွတ်းလမ်းပုၼ်း၊ ၵဵင်းမႆႇလႄႈ ၵုင်းထဵပ်ႈ ႁဝ်းၶႃႈ ဢွၼ်ၵၼ်လူင်းလူႇၶၢမ်ႇ တီႈပီႈၼွင်ႉတႆးႁဝ်း ၸိူဝ်းမႃးႁဵတ်းၵၢၼ် ၼႂ်းမိူင်းထႆး ၵေႃႉဢိတ်းၵေႃႉဢွတ်း ၸွမ်းၼင်ႇပီႈၼွင်ႉတႆးႁဝ်းၶႃႈ ပွင်ပဵၼ်လႆႈသေ၊ ႁဝ်းၶႃႈ ဢဝ်ၶူဝ်းၶွင်လႄႈ ၶွင်ၵိၼ်ယႅမ်ႉ မႃးႁူမ်ႈၵၼ်တီႈလဵဝ်။


ၵမ်းၼႆႉ ၸင်ႇမႃးၸတ်းတႃႇတေတေႃႉသူင်ႇ ၵမ်ႉထႅမ်ပၼ် ပီႈၼွင်ႉၵူၼ်း ပၢႆႈၽေးႁဝ်းၶႃႈ ၸွမ်းလႅၼ်လိၼ် တႆး-ထႆး။ ယူႇတီႈၸုမ်းႁဝ်းၶႃႈ တင်းသၢမ်ၸုမ်းသေ လႆႈၵႂႃႇၵမ်ႉ ထႅမ်ပၼ် ပီႈၼွင်ႉ ၵူၼ်းပၢႆႈၽေး တၢင်းပွတ်းၸႄႈဝဵင်းမိူင်းတူၼ်ၼႆႉ မီး 4 ပွၵ်ႈ ပႃးပွၵ်ႈၼႆႉယဝ်ႉ ဝႃႈၼႆ။


ပွၵ်ႈၵမ်းၼႆႉ ဢၼ်လႆႈတေႃႉသူင်ႇၵႂႃႇၸွႆႈထႅမ်ပၼ်ၵူၼ်းပၢႆႈၽေး တၢင်းပွတ်းၸႄႈဝဵင်းမိူင်းတူၼ် မူႇဝၢၼ်ႈလွႆ သၼ်ၸူႉ/ လွႆသၢမ်သိပ်းၼႆႉ မိူၼ်ၼင်ႇ ၶဝ်ႈသၢၼ်ထူင်ယႂ်ႇ 54 ထူင်၊ ၼမ်ႉမၼ်း 10 တိူၵ်ႈ၊ ၵိူဝ်၊ ၽွင်ဝၢၼ်လႄႈ ၶဝ်ႈသွႆးငေႃး(ၶဝ်ႈသွႆးဢေႃႇတေႃႇ) လႄႈ ၶဝ်ႈမုၼ်း/ပွင်း ၸဵမ်ၸိူဝ်းၼႆႉ တင်းမူတ်း တေတူၵ်းမႅၼ်ႈငိုၼ်းယူႇ ႁိမ်း 1 သႅၼ်ဝၢတ်ႇ။ ၵူၺ်းၵႃႈ ဢၼ်ယၢပ်ႇၽိုတ်ႇထႅင်ႈလွင်ႈၼိုင်ႈတႄႉ လူတ်ႉၵႃး တႃႇတေတေႃႉသူင်ႇပၼ်ၼၼ်ႉ ဢမ်ႇတဵမ်ထူၼ်ႈ ယွၼ်ႉၶူဝ်းၶွင်သမ်ႉၼမ် ဝႃႈၼႆ။


ပီႈၼွင်ႉၵူၼ်းမိူင်းဢၼ်ပၢႆႈၽေးသိုၵ်းမႃးယူႇသဝ်း တီႈဝၢၼ်ႈလွႆသၼ်ၸူႉ/ လွႆသၢမ်သိပ်း ၸႄႈဝဵင်းမိူင်းတူၼ်ၼႆႉ ၵမ်ႈၼမ် ပဵၼ်ပီႈၼွင်ႉၵူၼ်းမိူင်းတႆး တၢင်းပွတ်းႁွင်ႇ၊ ပွတ်းၸၢၼ်း ၵမ်ႈၼမ်။ တၢင်းပွတ်းဢွၵ်ႇၶူင်း မီးယူႇဢိတ်း ဢွတ်း။