ၸုမ်းတူင်ႉၼိုင်လွင်ႈၵူၼ်းႁဵတ်းၵၢၼ်လၢႆၸုမ်း ႁူမ်ႈၵၼ်ၸတ်းႁဵတ်းဝၼ်းမႄႈဝၢၼ်ႈလုမ်ႈၾႃႉ ယိူင်း ဢၢၼ်း ႁႂ်ႈမႄႈဝၢၼ်ႈလႆႈႁပ်ႉသုၼ်ႇလႆႈၽဵင်ႇပဵင်း မီးၽူႈၶဝ်ႈႁူမ်ႈၸမ်ပၢၵ်ႇ။


ဝၼ်းတီႈ 18/06/2017 ၸုမ်းတူင်ႉၼိုင်လွင်ႈႁႅင်းၵၢၼ်ၼႂ်းၵဵင်းမႆႇ လၢႆၸုမ်းမိူၼ်ၼင်ႇ ၶူင်းၵၢၼ် ပၢႆးယူႇလီလႄႈ ပၼ်တၢင်းႁူႉ ႁႅင်းၵၢၼ်ၸၢဝ်းၶိူဝ်း MAP ၊ ၶိူဝ်းၶၢႆႇၵူၼ်းႁဵတ်းၵၢၼ်ၸိုင်ႈထႆးပွတ်းၼိူဝ် ၸိူဝ်းၼႆႉ ႁူမ်ႈၵၼ် ၸတ်းႁဵတ်း ဝၼ်းမႄႈဝၢၼ်ႈ (ဝၼ်းၵူၼ်းႁဵတ်းၵၢၼ်ၼႂ်းႁိူၼ်း) လုမ်ႈၾႃႉ Dom estic Workers Day  တီႈႁူင်းလိုဝ်ႈသဝ်းထႃးရိၼ်ႊ ၵဵင်းမႆႇ ၸိုင်ႈထႆး။ မီးတူဝ်တႅၼ်းၸဝ်ႈ ၼႃႈတီႈ ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး၊  တူဝ်တႅၼ်းၵူၼ်းႁဵတ်းၵၢၼ်ၼႂ်းႁိူၼ်းဢိၵ်ႇၽူႈသူၼ်ၸႂ် တင်း မူတ်းၶဝ်ႈႁူမ်ႈၸမ် 100။

ၼႂ်းပၢင်ၼႆႉ ၸဝ်ႈၼႃႈတီႈလူင်း Application ၼႂ်းၵၢၼ်ႁႃၶေႃႈမုလ်းလႄႈ တႃႇယွၼ်းတၢင်း ၸွႆႈထႅမ် ပၼ်ႁႅင်းၵၢၼ်ၸိူဝ်းမႃးၶဝ်ႈႁူမ်ႈ။  ဢုပ်ႇဢူဝ်းလႅၵ်ႈလၢႆႈငဝ်းလၢႆးၵူၼ်းႁဵတ်းၵၢၼ်ၼႂ်းႁိူၼ်း ၸိူဝ်းၼႆႉ သိုပ်ႇၼၼ်ႉဢွၼ်ၵၼ် တႅမ်ႈၽိုၼ်လိၵ်ႈထိုင်ပေႃႈလဵင်ႉၼၢႆးၸၢင်ႈလႄႈ လူင်ပွင်ၸိုင်ႈမိူင်းထႆး။ ၼႂ်းၽိုၼ်လိၵ်ႈၼၼ်ႉပႃးဝႆႉဝႃႈ - ႁႂ်ႈမႄႈဝၢၼ်ႈၶဝ်ႈထိုင်လႆႈသုၼ်ႇလႆႈၵၢၼ်ႁပ်ႉ ႁွင်းၸွႆႈထႅမ်တူင်ႇဝူင်း ၵူၼ်း၊ လွင်ႈဝၼ်းလိုဝ်ႈ၊ ႁႂ်ႈလူင်ပွင်ၸိုင်ႈယွမ်း ႁပ်ႉဢဝ် ၶေႃႈမၵ်းမၼ်ႈ ILO၊ မၵ်းမၼ်ႈပၼ်ၶၢဝ်းယၢမ်း ႁဵတ်းၵၢၼ်၊ လွင်ႈၵႃႈ ၸၢင်ႈ ၸိူဝ်းၼႆႉ။


ၼၢင်းငမ်းယဵၼ် ၸဝ်ႈၼႃႈတီႈၾၢႆႇတူၺ်းထိုင်ၵူၼ်းႁဵတ်းၵၢၼ်ၼႂ်းႁိူၼ်း(မႄႈဝၢၼ်ႈ) MAP လၢတ်ႈဝႃႈ - “ ဝၼ်း ၵူၼ်းႁဵတ်းၵၢၼ်ၼႂ်းႁိူၼ်းၼႆႉ ၶႂ်ႈႁႂ်ႈပီႈၼွင်ႉႁဝ်းဝႆႉၼမ်ႉၼၵ်းသေ မႃးၶဝ်ႈႁူမ်ႈၼမ်ၼမ်  ပေႃးႁဝ်း မီးပၼ်ႁႃသင်မႃးၵေႃႈ ႁႂ်ႈႁဝ်းဢွၼ်ၵၼ် မႃးၶွၼ်ႈတုမ် ၵၼ်သေ တုၵ်းယွၼ်းတၢင်ႇထိုင် ၸဝ်ႈၼႃႈတီႈ ၽူႈမီးပုၼ်ႈၽွၼ်း တုၵ်းယွၼ်းဢဝ်သုၼ်ႇလႆႈႁဝ်းၼၼ်ႉသေၵမ်း ”ဝႃႈၼႆ ။


ၼၢင်းမူၺ်လႅင်း တူဝ်တႅၼ်းႁႅင်းၵၢၼ်မႄႈဝၢၼ်ႈ လၢတ်ႈဝႃႈ - “ ၶႂ်ႈၾၢၵ်ႇထိုင်ပီၼွင်ႉႁဝ်းၶႃႈ ယႃႇၵုမ်ႇမိုင်ႉ ႁဵတ်း ၵၢၼ်ပိူင်လဵဝ်ၵူၺ်း ႁႂ်ႈဢွၼ်ၵၼ် ၶဝ်ႈႁႃမူႇၸုမ်းဢၼ်ပိူၼ်ႈတူင်ႉၼိုင်လွင်ႈႁႅင်းၵၢၼ်လႄႈ ႁႂ်ႈဢွၼ်ၵၼ် လဵပ်ႈႁဵၼ်း လွင်ႈပၵ်းပိူင်မၢႆမီႈ ၼင်ႇႁိုဝ်ႁဝ်းပေႃး တေႁူႉၶိုတ်းတၼ်းငဝ်း လၢႆးဝၢၼ်ႈမိူင်းၼၼ်ႉ” ဝႃႈၼႆ။


ဝၼ်းၵူၼ်းႁဵတ်းၵၢၼ်ႁိူၼ်း (မႄႈဝၢၼ်ႈ)ၼႆႉ လႆႈၵေႃႇတင်ႈမႃးမိူဝ်ႈဝၼ်းတီႈ 16/6/2011 ယိူင်း ဢၢၼ်းပိူဝ်ႈတႃႇ ၵူၼ်းႁဵတ်းႁဵတ်းၵၢၼ်ၼႂ်းႁိူၼ်း လႆႈႁပ်ႉသုၼ်ႇလႆႈၽဵင်ႇပဵင်း ၼင်ႇပၵ်းပိူင်မၢႆမီႈ ဝၢၼ်ႈမိူင်း မီးၼၼ်ႉ ဝႃႈၼႆ။