လူင်ပွင်ၸိုင်ႈမိူင်းထႆး ပိုၼ်ႇၽၢဝ်ႇႁႂ်ႈၵိုတ်းၵၢၼ်ၵူတ်ႇထတ်း ႁႅင်းၵၢၼ်ယၢၼ်မိူင်းလႄႈ ယွၼ်ႇယၢၼ်း လွင်ႈတတ်းမၵ်းပိုၼ်ႉတီႈ ၵူၼ်းႁဵတ်းၵၢၼ်။


ဝၼ်းတီႈ 30/06/2017 ႁွင်ႈၵၢၼ်ၶၢဝ်ႇထႆး NBT ပိုၼ်ၽၢဝ်ႇဝႃႈ - တီႈပၢင်ၵုမ်လူင်ၸဝ်ႈၼႃႈတီႈ ၸၼ်ႉသုင် ဢၼ်ၸတ်းႁဵတ်း မိူဝ်ႈဝၼ်းတီႈ 29/06/ 2017 ၼၼ်ႉ ၸွမ်သိုၵ်းလူင် ပရႃႊယုတ်ႊ ၸၼ်းဢူဝ်းၶျႃး ပဵၼ်ႁူဝ်ပဝ်ႈ ၼႂ်းပၢင်ၵုမ်သေ ဢုပ်ႇဢူဝ်းၵၼ်ပႃး ၵဵဝ်ႇလူၺ်ႈလွင်ႈႁႅင်းၵၢၼ်ယၢၼ် မိူင်း။

တူၵ်းလူင်းလႆႈၸႂ်ၵၼ်ဝႃႈ - မိူဝ်ႈလဵဝ် ႁႂ်ႈၸဝ်ႈၼႃႈတီႈ ၵိုတ်းလွင်ႈ ၶဝ်ႈၵူတ်ႇထတ်း ႁႅင်းၵၢၼ်ယၢၼ် မိူင်းဝႆႉၵွၼ်ႇ ၊ ယွၼ်ႇယၢၼ်းပၼ် လွင်ႈတတ်းမၵ်း ပိုၼ်ႉတီႈႁဵတ်းၵၢၼ်၊ ႁႅင်းၵၢၼ်ဢၼ် ၸိုဝ်ႈပေႃႈ လဵင်ႉၼၢႆးၸၢင်ႈၽိတ်းဝႆႉၼၼ်ႉၵေႃႈ ႁႂ်ႈၵႂႃႇတၢင်ႇယွၼ်းႁႂ်ႈထုၵ်ႇမႅၼ်ႈ၊ တေသဵင်ႈငိုၼ်း 100 ၿၢတ်ႇ ၵူၺ်းဝႃႈၼႆ။ သင်ၸဝ်ႈၼႃႈတီႈ ၵေႃႉလႂ် ၸုမ်းလႂ် ဢဝ်တိုဝ်ႉတၢင်းၼႆႉသေ ၵိၼ်ၸိၵ်းတီႈႁႅင်း ၵၢၼ်ၸိုင် တေၺႃးတူတ်ႈတၢမ်ႇၸွမ်းၼင်ႇ ပၵ်းပိူင်မၢႆမီႈ - ဝႃႈၼႆ။


ဝႃႊရႃႊၼူၼ်ႊ ပီႊတီႊဝၼ်ႊ  ၸဝ်ႈၼႃႈတီႈႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း လၢတ်ႈဝႃႈ - “ ႁႅင်း ၵၢၼ်ၸိူဝ်းဢမ်ႇမီးဝတ်းဝႂ်ၼၼ်ႉ  ႁႂ်ႈဢွၼ်ၵၼ်ပွၵ်ႈၶိုၼ်းႁိူၼ်းသေ ႁဵတ်းဝႂ်ၶၢမ်ႈမိူင်း MOU ၶဝ်ႈမႃးႁႂ်ႈ ထုၵ်ႇ မႅၼ်ႈမၢႆမီႈ၊ပုၼ်ႈတႃႇပေႃႈလဵင်ႉၼၢႆးၸၢင်ႈဢၼ်ၶၢတ်ႇၵူၼ်းႁဵတ်းၵၢၼ် ဢမ်ႇမီးၵူၼ်း ႁဵတ်း ၵၢၼ်ယဝ်ႉ ၼၼ်ႉႁႂ်ႈတႅမ်ႈလိၵ်ႈထိုင်တီႈ ႁွင်ႈၵၢၼ်ၾၢႆႇၸတ်းႁႃၵၢၼ်ငၢၼ်း၊ လွင်ႈဢၼ်တုၵ်း ယွၼ်းႁႂ်ႈႁဵတ်းပၼ်ဝတ်းမႂ်ႇၼၼ်ႉတႄႉ ပႆႇမီးပိူင်မၼ်း ” ဝႃႈၼႆ။


ဝၢႆးသေမီးပၵ်းပိူင်မႂ်ႇပီ 2017 ဢွၵ်ႇမႃး ဢၼ်ဝႃႈ – ၽူႈလႂ်ၽႂ်ႁပ်ႉၵူၼ်းႁဵတ်းၵၢၼ် ဢမ်ႇမီး ဝတ်းဝႂ်၊ ႁဵတ်းၵၢၼ် ၽိတ်းတီႈ၊ ႁဵတ်းၵၢၼ်ၽိတ်းပၵ်းပိူင်ၼႆၸိုင် မီးတၢမ်ႇမႂ်ငိုၼ်း 400,000 – 800, 000 ၿၢတ်ႇ တေႃႇၵူၼ်းႁဵတ်းၵၢၼ် ၼိုင်ႈၵေႃႉ။ ႁဵတ်းႁႂ်ႈပေႃႈလဵင်ႉ/ မႄႈ လဵင်ႉလႄႈႁႅင်းၵၢၼ် ဢွၼ်ၵၼ် တူၵ်းၸႂ် ႁႅင်းၵၢၼ်မၢၼ်ႈ၊ၶႅမ်ႊၿေႃႊတီႊယႃႊ ဢွၼ်ၵၼ်ပွၵ်ႈ ႁိူၼ်းၶိုၼ်းၼပ်ႉႁူဝ်ႁဵင်ယဝ်ႉ – ဝႃႈၼႆ။