ၾူၼ်တူၵ်းထပ်းၵၼ်လၢႆဝၼ်းသေ ၼမ်ႉပႃႇၼမ်ႉႁူၺ်ႈလႆၼွင်း ၼႂ်းဝဵင်းၼမ်ႉလၼ်ႈ လၢႆလၢႆပွၵ်ႉ၊ ၵူၼ်းမိူင်းလူႉ သုမ်းမၢၵ်ႇၶဝ်ႈတဝ်ႈၼမ်ႉတင်းၼမ်၊ ၼမ်ႉထွင်းႁႅင်းလႄႈ မၢင်တီႈ သဵၼ်ႈတႃႈသၢႆတၢင်းလူႉလႅဝ်။


ၾူၼ်တူၵ်းထပ်းၵၼ် တႄႇဢဝ် ဝၼ်းတီႈ 27-29/06/2017 ၼမ်ႉထူမ်ႈပွၵ်ႉမၢၵ်ႇမူင်ႈႁိင်ႇ၊ ပွၵ်ႉၵွင်းလၢင်း၊ ပွၵ်ႉၵတ်း ယဵၼ်၊ ပွၵ်ႉၵၢင်ဝဵင်း၊ ပွၵ်ႉႁွင်ႇလႄႈ ဝၢၼ်ႈပၢင်ႇႁႆႈ ၼႂ်းဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈ တႆး ပွတ်းႁွင်ႇ။ ၾူၼ်တူၵ်းထပ်းၵၼ်လၢႆဝၼ်းသေ ၼမ်ႉပႃႇၼမ်ႉႁူၺ်ႈ လႆၼွင်းထူမ်ႈ မၢင်တီႈထူမ်ႈၽႅဝ်ႁူးလႅင်း၊ ထိုင်ဢႅင်ႈထိုင်ဢႅဝ် ထိုင်ႁူဝ်ၶဝ်ႇ ၸဵမ်ၸိူဝ်းၼႆႉ။ ယွၼ်ႉၼမ်ႉထူမ်ႈသေ ၸွမ်းသဵၼ်ႈတႃႈသၢႆတၢင်း လႆႈလူႉလႅဝ်တင်း ၼမ်လၢႆ။ ၼွၵ်ႈလိူဝ်ၼၼ်ႉ ႁူင်းႁဵၼ်း လၢႆလၢႆလင်လႆႈဢိုတ်းယင်ႉဝႆႉ။ မိူၼ်ၼင်ႇ ႁူင်းႁဵၼ်း-တီႈဝၢၼ်ႈပၢင်ႇႁႆႈ လႆႈ ဢိုတ်းယင်ႉဝႆႉထိုင်ယၢမ်းလဵဝ် ပႆႇပဵၼ်ပိုတ်ႇ ဝႃႈၼႆ။

ၸၢႆးၼေႃႇသႅင် ၸုမ်းၵူၼ်းၼုမ်ႇတႆး (Tai Youth Network) လၢတ်ႈဝႃႈ “ မိူဝ်ႈၼႆႉ ၵၢင်ၼႂ် ဝၼ်းတီႈ 30 လႆႈႁၼ် ၼမ်ႉယွမ်းလူင်းၵမ်ႈၽွင်ႈယဝ်ႉ။ ၵူၺ်းၵႃႈ ၸွမ်းႁွင်ႈၼမ်ႉဢၼ်လႆလတ်း ၽၢၼ်ႇၼႂ်းၵၢင်ဝဵင်းၼမ်ႉလၼ်ႈ ၼၼ်ႉတႄႉ ၼမ်ႉတိုၵ်ႉလႆထွင်းႁႅင်းယူႇ၊ ၸွမ်းပွၵ်ႉၸွမ်းဝၢၼ်ႈ ၼႂ်းဝၢင်းႁိူၼ်း ၵူၼ်းမိူင်းတႄႉ ၼမ်ႉယွမ်းလူမ်းတင်းၼမ်ယဝ်ႉ။ ၶူဝ်းၶွင်ဢၼ်ၼမ်ႉထူမ်ႈတႄႉ ပဵၼ်ၶဝ်ႈၵၢပ်ႇ ယွၼ်ႉပီႈၼွင်ႉၵူၼ်းမိူင်းႁဝ်း ဝႆႉၸွမ်းတႂ်ႈလၢင်ႈႁိူၼ်း၊  ဢမ်ႇတၼ်းၶၢႆႉ ပူၼ်ႉသေ ထုၵ်ႇၼမ်ႉထူမ်ႈၵေႃႈမီးတင်းၼမ်” ဝႃႈၼႆ။


သိုပ်ႇလၢတ်ႈၼႄထႅင်ႈဝႃႈ ၼမ်ႉဢၼ်လႆၼွင်းထူမ်ႈသွင်-သၢမ်ဝၼ်းထပ်းၵၼ်ၼႆႉ မၼ်းပဵၼ်ၼမ်ႉပႃႇ လႆလူင်းၼႂ်း ၼွင်ၼိမ်း မီးသူၼ်ၶဝ်ႈၵၢပ်ႇ ပီႈၼွင်ႉၵူၼ်းမိူင်းၽုၵ်ႇဝႆႉၼၼ်ႉၵူၺ်းလႄႈ ပေႃးၾူၼ်တူၵ်း တင်းၼမ်ႉ တင်းၶီႈၵူမ်ႇ ၶီႈလိၼ် လႆလူင်းမႃးၸွမ်းၵၼ်။ လိူဝ်ၼၼ်ႉ ၼႂ်းႁွင်ႈၼမ်ႉ ဢၼ်လႆလတ်း ၵၢင်ဝဵင်းၼမ်ႉလၼ်ႈၵေႃႈ ႁွင်ႈတိုၼ်ႈ ၼမ်ႉၸင်ႇလူၼ်ႉၾင်ႇ ဝႃႈၼႆ။


ထဝ်ႈဝၢၼ်ႈထဝ်ႈၼႃး ဝဵင်းၼမ်ႉလၼ်ႈ လၢတ်ႈဝႃႈ “ ႁွင်ႈၼမ်ႉဢၼ်လႆယူႇၼၼ်ႉ လူဝ်ႇလႆႈလၢင်းပၼ် ၼိုင်ႈပီ - ၼိုင်ႈပွၵ်ႈ-သွင်ပွၵ်ႈ ယဝ်ႉၵေႃႈ ႁွင်ႈၼမ်ႉမၢင်တီႈ မၼ်းၵႅပ်ႈ ၼမ်ႉလႆဢမ်ႇၶိုၼ်းတၼ်း ၵွပ်ႈၼႆ ထုၵ်ႇလႆႈလၢင်း လႆႈၶုတ်း။ ၼွၵ်ႈလိူဝ်ၼၼ်ႉ ၵူၼ်းဝၢၼ်ႈၵူၼ်းမိူင်းၵေႃႈ သမ်ႉပႅတ်ႈယုၵ်းယၵ်း ပႅတ်ႈသႂ်ႇၼႂ်းႁွင်ႈၼမ်ႉ ၸိူဝ်းၼၼ်ႉ ႁဵတ်းႁႂ်ႈႁွင်ႈၼမ်ႉတၼ်။ ၵွပ်ႈၼႆလႄႈ ၵူၼ်းမိူင်းႁဝ်းၵေႃႈ လူဝ်ႇလႆႈပႅတ်ႈယုၵ်းယၵ်း ပဵၼ်တီႈပဵၼ်တၢင်း။ ၸဝ်ႈၼႃႈ တီႈၾၢႆႇလိူမ်ႈလႆႇၵေႃႈ တၵ်းလႆႈ လၢင်းႁွင်ႈပၼ်၊ မွၵ်ႇလၢတ်ႈပၼ်ၵူၼ်းမိူင်း ပႅတ်ႈယုၵ်းယၵ်း ပဵၼ်တီႈပဵၼ်တၢင်း” ဝႃႈၼႆ။


တၢင်းၸိုင်ႈတႆး ပွတ်းဢွၵ်ႇၶူင်းၵေႃႈ ၾူၼ်တူၵ်းႁၢဝ်ႈႁႅင်း လၢႆလၢႆဝၼ်းထပ်းလႄႈ ၼမ်ႉထူမ်ႈ ၼႂ်းဝဵင်းၵဵင်းတုင် ၸွမ်းပွၵ်ႉလႄႈ ၵၢတ်ႇလူင် ၵမ်ႈၽွင်ႈ ဝႃႈၼႆ။ၾၢႆႇၶူၼ်ႉၶႂႃႉလဵပ်ႈႁဵၼ်း ၾိင်ႈၾႃႉရႃႇသီႇမိူင်းမၢၼ်ႈတႄႉ ပိုၼ်ၽၢဝ်ႇ ဝႆႉဝႃႈ- မိူင်းမၢၼ်ႈတွၼ်ႈၼိူဝ်လႄႈ ၼႂ်းမိူင်းတႆးၾူၼ်တေတူၵ်းထပ်းၵၼ်ထႅင်ႈ 2 ဝၼ်း ဝႃႈၼႆ။