မုၵ်ႉၸုမ်းလုၵ်ႈႁဵၼ်းသင်ၶတႆး မိူင်းၵွၵ်ႇ ၸိုင်ႈထႆး ဢွၼ်ႁူဝ်ၼမ်းၼႃႈ ပိုတ်ႇပၢင်သွၼ် ၽိူမ်ႉထႅမ်ၼမ်ႉၵတ်ႉ ပၼ်လုၵ်ႈ ႁဵၼ်းတႆး ၸိူဝ်းဢၼ်မႃးၶိုၼ်ႈႁဵၼ်းတီႈၸၼ်ႉၸွမ် ဝင်းၼွႆႉ ဢယုတ်ႉထယႃး ၸိုင်ႈထႆး ဝႃႈ ၼႆ။


တႄႇဢဝ် ဝၼ်းတီႈ 26/06/2017 ယၢမ်းဝၢႆးဝၼ်း 4 မူင်း မုၵ်ႉၸုမ်းလုၵ်ႈႁဵၼ်းသင်ၶတႆး မိူင်းၵွၵ်ႇ ၸိုင်ႈထႆး ဢွၼ်ႁူဝ်ၼမ်းၼႃႈ ပိုတ်ႇပၢင်သွၼ် ၽိူမ်ႉထႅမ်ၼမ်ႉၵတ်ႉ ပၼ်လုၵ်ႈႁဵၼ်းတႆး ၸိူဝ်းဢၼ်ပႆႇၵႅၼ်ႇၶႅင် လၢႆးလၢတ်ႈ၊ လၢႆးလူ၊ လၢႆးတႅမ်ႈ ၼႂ်းလိၵ်ႈဢင်းၵိတ်း၊ လိၵ်ႈထႆးလႄႈ ၶွမ်ႊၽိဝ်ႊတိူဝ်ႊ ၸဵမ်ၸိူဝ်းၼႆႉ။ ထႅင်ႈလွင်ႈၼိုင်ႈၵေႃႈ ႁႂ်ႈ လုၵ်ႈႁဵၼ်းသင်ၶတႆး လႆႈမိုတ်ႈၵိုဝ်းၸမ်ၸႂ်ၵၼ်။ ပၢင်သွၼ်ၼႆႉ ၸတ်းႁဵတ်းတီႈၸၼ်ႉၸွမ် ဝင်းၼွႆႉ ၸႄႈတွၼ်ႈ ဢယုတ်ႉထယႃး ၸိုင်ႈထႆး။

ၸဝ်ႈၶူးဢုတ်ႉတရၶမ်း မိူင်းပွၼ် ဢၼ်တိုၵ်ႉၶိုၼ်ႈႁဵၼ်းၸၼ်ႉၸွမ် B.A ပီထူၼ်ႈ 4 ၊ ပဵၼ်ႁူဝ်ၼႃႈၾၢႆႇပၢႆးပၺ်ၺႃ ၼႂ်းမုၵ်ႉၸုမ်းလုၵ်ႈႁဵၼ်းသင်ၶတႆး မိူင်းၵွၵ်ႇၸိုင်ႈထႆးလၢတ်ႈဝႃႈ “ ယိူင်းဢၢၼ်း ဢၼ်ႁဝ်းၸဝ်ႈၶဝ် သွၼ်တီႈၼႆႈၼႆႉ ႁႂ်ႈႁဝ်းၶႃႈ မိုတ်ႈၵိုဝ်းၸမ်ၸႂ်ၵၼ်လိူဝ်မႃးထႅင်ႈ ၵွပ်ႈပိူဝ်ႈဝႃႈ ႁဝ်းယူႇၵေႃႉမိူင်းမိူင်းၸွတ်ႇ တူဝ်ႈမိူင်းတႆးသေမႃး ၶိုၼ်ႈ ပဵၼ်တီႈလဵဝ်ၵၼ်ၼႆသေတႃႉၵေႃႈ ၽႃသႃမၼ်းသမ်ႉ ဢမ်ႇမိူၼ်ၵၼ်လႄႈ သင်ဝႃႈ ႁဝ်းမီး ပၼ်ႁွင်ႈႁဵၼ်း ဢၼ်တႆး ႁဝ်းလႆႈၸတ်းၸိူင်ႉၼႆၸိုင် ႁဝ်းမႃးႁူပ်ႉၵၼ်ၵူႈဝၼ်းဝၼ်း ႁဝ်းၸင်ႇမီးလွင်ႈမိုတ်ႈၵိုဝ်းၸမ်ၸႂ်ၵၼ်။ လိူဝ်ၼၼ်ႉ ယူႇတီႈၸုမ်းသင်ၶတႆး မီးၵၢၼ်ၶိုပ်ႈၼႃႈၾၢႆႇၵၢၼ်ႁဵၼ်းၼႆႉ သင်ပွၵ်ႈမိူဝ်ႈမိူင်းတႆးၵေႃႈ ႁႂ်ႈမီးၵၢၼ်တူဝ်ႈတၼ်းဝႆႉ” ဝႃႈၼႆ။


လွင်ႈပၢင်သွၼ်ၽိူမ်ႉထႅမ်ၼမ်ႉၵတ်ႉၼႆႉ ယၢမ်းဝၢႆးဝၼ်း 4 မူင်း တႄႇလင်လိူၵ်ႈၵၢၼ်သွၼ်ၵၢၼ်ႁဵၼ်း ၼႂ်းၸၼ်ႉ ၸွမ် ဢဝ်ၶၢဝ်းယၢမ်း 45 မိၼိတ်ႉသေ ပူင်သွၼ်/ ၽိူမ်ႉထႅမ်ပၼ် ဝႃႈၼႆ။


ႁွင်ႈႁဵၼ်း ဢၼ်တေပိုတ်ႇပူင်သွၼ်ပၼ်သမ်ႉ တင်းမူတ်း မီး 4 ႁွင်ႈႁဵၼ်း။ ပေႃးထိုင်မႃး ဝၼ်းၽတ်းၵူႈဝူင်ႈၼႆ တေႁူမ်ႈၵၼ်သေ မီးပၢင်လႅၵ်ႈလၢႆႈတၢင်းႁူႉ ၵဵဝ်ႇၵပ်းလွင်ႈၵၢၼ်ၸိူဝ်ႉၶိူဝ်း ၽႃသႃလႄႈ သႃသၼႃ ၼႂ်းၸိုင်ႈတႆး ၸဵမ်ၸိူဝ်းၼႆႉ ၼိုင်ႈဝူင်ႈၼိုင်ႈပွၵ်ႈ၊ တေၸႂ်ႉၵႂၢမ်းလၢတ်ႈ သွင် ၽႃသႃ ၵႂၢမ်းတႆးတင်း ၵႂၢမ်းဢင်းၵိတ်း ဝႃႈၼႆ။


ၽႃသႃလိၵ်ႈထႆး ဢၼ်တေပိုတ်ႇပူင်သွၼ်ၵႂႃႇၼႆႉ တေပဵၼ်ၼႂ်းဝၼ်းၸၼ်၊ ဝၼ်းဢင်းၵၢၼ်းလႄႈ ဝၼ်းပုတ်ႉ။ လိၵ်ႈဢင်းၵိတ်းတင်းၶွမ်ႊၽိဝ်ႊတိူဝ်ႊၵေႃႈ မိူၼ်ၵၼ်ၵူၺ်း ဝႃႈၼႆ။


ၸဝ်ႈၶူးဢုတ်ႉတရၶမ်း သိုပ်ႇလၢတ်ႈထႅင်ႈဝႃႈ  ဢၼ်လႆႈႁပ်ႉႁူႉသဵၼ်ႈသၢႆမၢႆ လုၵ်ႈႁဵၼ်းသင်ၶတႆး ဢၼ်တေသွၼ် ႁဵၼ်းဢဝ်ၵႂႃႇသမ်ႉ ၼိုင်ႈႁွင်ႈလႂ် တေမီး 30 ပၢႆ တင်းမူတ်း ဢၼ်လႆႈႁပ်ႉႁူႉတႄႉ မီး 120 ပၢႆ ၶၢဝ်းတၢင်းတေ ပူင်သွၼ်ၵႂႃႇသမ်ႉ ၼိုင်ႈပီ။ ၼွၵ်ႈလိူဝ်ၼၼ်ႉ ပၢင်သွၼ် ၾၢႆႇၶွမ်ႊၽိဝ်ႊတိူဝ်ႊၼႆၵေႃႈ ၵွပ်ႈပိူဝ်ႈဝႃႈ လုၵ်ႈႁဵၼ်းၶဝ် တွၼ်ႈတႃႇတေႁဵတ်း ၽိုၼ်လိၵ်ႈ၊ ၵၢၼ်ႁိူၼ်း(Home Work)၊ တွၼ်ႈတႃႇၾၢႆႇႁၢင်ႈၶိူင်ႈ ၼႂ်း Photoshop၊ ႁၢင်ႈၶိူင်ႈ ၼႂ်းဢိၼ်ႊတီႊသၢႆႊ (ၾၢႆႇတႅမ်ႈႁၢင်ႈႁိူၼ်း)။


ယိူင်းဢၢၼ်းထႅင်ႈဢၼ်ၼိုင်ႈတႄႉၵေႃႈ ပေႃးပွၵ်ႈမိူဝ်းမိူင်းတႆးၼႆ သင်ႁဵတ်းၵၢၼ်ၼႆၵေႃႈ ႁႂ်ႈမၼ်းၸဵဝ်းယဝ်ႉတူဝ်ႈ၊ ငၢႆႈလူမ်ၸႂ်။ တွၼ်ႈတႃႇလိၵ်ႈဢင်းၵိတ်းတႄႉ မိူၼ်ၸိူင်ႉၼင်ႇဝႃႈ ႁႂ်ႈႁဝ်းလၢတ်ႈ ၼႂ်း ၵႄႈၵၢင်ပိူၼ်ႈၵေႃႈ ႁႂ်ႈပိူၼ်ႈ ပေႃးပွင်ႇၸႂ်၊ ႁႂ်ႈႁဝ်းပဵၼ်ၵူၼ်းတီႈၵတ်ႉၶႅၼ်ႇ၊ ႁႂ်ႈလႆႈလဵပ်ႈႁဵၼ်းထႅင်ႈ လၢႆလၢႆတၢင်းႁူႉ ဢၼ်မီးၼႂ်းဢိင်းၵလဵတ်ႈ ယွၼ်ႉဝႃႈ မီးဝႆႉၵူႈၸိူဝ်ႉၵူႈလွင်ႈ။ ႁႂ်ႈပိူၼ်ႈပေႃး ယွမ်းႁပ်ႉဝႃႈ သင်ၶတႆးၵေႃႈ ၵတ်ႉၶႅၼ်ႇ ႁဵတ်းလႆႈမိူၼ်ပိူၼ်ႈယူႇ ဝႃႈၼႆ။


ၼႂ်းပီ 2017 ၼႆႉ လုၵ်ႈႁဵၼ်းသင်ၶတႆး ၼႂ်းမိူင်းတႆး ၸိူဝ်းဢၼ်မႃး ၶဝ်ႈၶိုၼ်ႈႁဵၼ်းတီႈၸၼ်ႉၸွမ် ဝင်းၼွႆႉ ဢယုတ်ႉ ထယႃး တင်းမူတ်း မီး 45 တူၼ်။ လိူဝ်ၼၼ်ႉ လုၵ်ႈႁဵၼ်း ၸုပ်ႈၵဝ်ႇတင်း မႂ်ႇ ႁူမ်ႈၵၼ် တေမီးယူႇ 200 ပၢႆ ဝႃႈၼႆ။


ၼႂ်းပီ 2017 လုၵ်ႈႁဵၼ်းသင်ၶတႆး တင်းၵူၼ်းႁိူၼ်း ၸိူဝ်းႁဵၼ်းယဝ်ႉ B.A တင်း M.A တီႈၸၼ်ႉၸွမ်မႁႃၸူႇလႃး လူင်းၵွၼ်း ၸႄႈဝဵင်းဝင်းၼွႆႉ ၸိုင်ႈထႆး ဢၼ်လႆႈႁပ်ႉၸုမ်ႈၶူး B.A တင်းမူတ်း 23 တူၼ်၊ ၵူၼ်းႁိူၼ်း 2 ၵေႃႉ။ ႁပ်ႉ ၸုမ်ႈၶူး M.A ၵူၼ်းႁိူၼ်း 1 ၵေႃႉ ႁူမ်ႈၵၼ်တင်းမူတ်း မီး 26 ၵေႃႉ ဝႃႈၼႆ။