ႁႅင်းၵၢၼ်ယၢၼ်မိူင်း ၵူၼ်းၸႄႈဝဵင်းလၢင်းၶိူဝ်း၊ ပဵၼ်လူမ်းလူႉတၢႆ တီႈၼႂ်းၵၢတ်ႇမိူင်းမႆႇ ဝဵင်းၵဵင်းမႆႇ။ မိူဝ်ႈလဵဝ် ၶၢပ်ႈတူဝ်တၢႆထိုင်ဝႆႉတီႈ ႁူင်းယႃလူင်သူၼ်ၻွၵ်ႇ၊ ပႂ်ႉပီႈၼွင်ႉၸိူဝ်ႉၶိူဝ်း ၵႂႃႇႁပ်ႉဢဝ်ၶၢပ်ႈတူဝ်မႃးလုမ်းလႃး ႁႅၼ်းတၢၼ်းပၼ်။


ဝၼ်းတီႈ 23/06/2017 (မိူဝ်ႈၼႆႉ)ၵၢင်ၼႂ်ၸဝ်ႉ ယၢမ်း 03:10 မူင်း၊ ႁႅင်းၵၢၼ်ယၢၼ်မိူင်း ၸိုဝ်ႈၸၢႆးၶမ်း (ၸၢႆးပုတ်း) ဢႃယုမွၵ်ႈ 40 ပီ၊ ၵူၼ်းၸႄႈဝဵင်းလၢင်းၶိူဝ်း၊ လႆႈလူႉသဵင်ႈတၢႆၵႂႃႇတီႈ ၼႂ်းႁူင်းၸွတ်ႇလူတ်ႉၸၢႆးၼႆး ၼႂ်းၵၢတ်ႇမိူင်းမႆႇ၊ ဢိူင်ႇၸၢင်ႉမွႆႈ ဝဵင်းၵဵင်းမႆႇ မိူင်းထႆး။ ၽွင်းပဵၼ်လူမ်းၼၼ်ႉ မီးပုၼ်းပူၵ်ႇဢွၵ်ႇတၢင်းပၢၵ်ႇဝႆႉ၊ ဝၢႆးသဵင်ႈၸႂ်ယဝ်ႉ ၸဝ်ႈၼႃႈတီႈၶဝ် ဢဝ်ၶၢပ်ႈတူဝ်တၢႆမၼ်းၸၢႆး သူင်ႇၵႂႃႇႁူင်းယႃသူၼ်ၻွၵ်ႇ-ၼႆယဝ်ႉ။

ၸၢႆးလိူၼ်ၶမ်း ၽူႈတူင်ႉၼိုင်ၵၢၼ်တူင်ႇဝူင်းၵူၼ်း ၼႂ်းၵဵင်းမႆႇ လၢတ်ႈဝႃႈ- "ၶႃႈႁဝ်းတင်းၸၢႆးၶမ်းၼႆႉ ႁူႉၸၵ်းမိုတ်ႈၵိုဝ်းၵၼ်မႃးလႆႈမွၵ်ႈၶၢဝ်းတၢင်း 16 ပီယဝ်ႉ။ ဢၼ်မၼ်းၸၢႆးလႆႈလူႉၵႂႃႇၼႆႉ လႆႈႁူႉဝႃႈမၼ်းၵိၼ်လဝ်ႈသေသျွၵ်ႉ။ မိူဝ်ႈၶိုၼ်းၶမ်ႈဝႃးၼႆႉ မၼ်းၵႂႃႇဢႅဝ်ႇသေမႃးဢၢပ်ႇၼမ်ႉ တီႈၵၢတ်ႇမိူင်းမႆႇ၊ ဢၢပ်ႇၼမ်ႉယဝ်ႉပဵၼ်လူမ်း (သျွၵ်ႉ)၊ ပေႃးပဵၼ်လူမ်းၵေႃႈ ယူႇတီႈၵူၼ်းႁိမ်းႁွမ်းတင်းၵူၼ်းႁူႉၸၵ်းၵၼ်ၸိူဝ်းၼၼ်ႉ ဢဝ်ယႃႈသုတ်ႇပၼ်မၼ်းၼူမ်၊ မၼ်းၵေႃႈပဵၼ်လူမ်းၵၼ်ႈၸႂ်ပဵၼ်ၵမ်းပဵၼ်ၵမ်းသေလူႉသဵင်ႈၵႂႃႇ"-ဝႃႈၼႆ။


"မိူဝ်ႈလဵဝ် ၶၢပ်ႈတူဝ်တၢႆမၼ်း ဢဝ်ဝႆႉတီႈႁူင်းယႃသူၼ်ၻွၵ်ႇ၊ ႁဝ်းၶႃႈတိုၵ်ႉၶတ်းၸႂ်တိတ်းတေႃႇႁႃပီႈၼွင်ႉၸိူဝ်ႉၶိူဝ်း တႃႇတေမႃးႁပ်ႉဢဝ်ၶၢပ်ႈတူဝ်မိူဝ်းလုမ်းလႃးယူႇ။ သင်ဝႃႈဢမ်ႇမီးပီႈၼွင်ႉၸိုင် ယူႇတီႈၸုမ်းၸွႆႈထႅမ်ၶႅၵ်ႇလီပၢင်ၸႃႉ တီႈၼႂ်းၵဵင်းမႆႇ တေႁၢင်ႈႁႅၼ်းဢဝ်မိူဝ်းဝႆႉတီႈဝတ်ႉပႃႇပဝ်ႈ၊ ႁႅၼ်းတၢၼ်းယၢတ်ႇၼမ်ႉၶႂမ်ႈတဝ်ႈပၼ် ၸွမ်းၼင်ႇၾိင်ႈထုင်းသႃသၼႃၵႂႃႇ"- ၸၢႆးလိူၼ်ၶမ်း လၢတ်ႈ။


ၸၢႆးၶမ်းၼႆႉ ပဵၼ်ၵူၼ်းၸႃတိၸႄႈဝဵင်းလၢင်းၶိူဝ်း၊ ၵမ်ႈၽွင်ႈႁွင်ႉဝႃႈၸၢႆးပုတ်း၊ ယွၼ်ႉပိူဝ်ႈမိုဝ်းပုတ်းဝႆႉတင်းသွင်ၶွၼ် (ပဵၼ်တုၵ်ႉၶိတ)။ မၼ်းၸၢႆးလုၵ်ႉတၢင်းလၢင်းၶိူဝ်း ၶဝ်ႈမိူင်းထႆးတၢင်းမႄႈႁွင်ႈသွၼ်၊ ယူႇမႄႈႁွင်ႈသွၼ်ယဝ်ႉ ၶဝ်ႈမႃးႁႃၵိၼ်လဵင်ႉတွင်ႉ ၼႂ်းၵဵင်းမႆႇ။ ဢွၼ်ၼႃႈမိူဝ်ႈပႆႇလူႉသဵင်ႈၼႆႉ ႁဵတ်းၵိၼ်ၵၢၼ်ႁႃလဵင်ႉတွင်ႉ ပဵၼ်ၵူၼ်းၶၢႆဝႂ်ထီႇ(ႁူၺ်)လူင်ပွင်ၸိုင်ႈမိူင်းထႆး- ၼႆယဝ်ႉ။