လူင်ပွင်ၸိုင်ႈထႆးပိုၼ်ၽၢဝ်ႇ တေၵူတ်ႇထတ်းယိုတ်းရူတ်ႉၵႃး ၽူႈၸိူဝ်းဢမ်ႇမီးဝႂ်ၶပ်းၶီႇရူတ်ႉလႄႈ ဢမ်ႇမီးဝႂ်ႁပ်ႉႁွင်းၽေးၵိုင်ႉၵၢင်ႉ (ၽေႃႊရေႃႊပေႃႊ) သေႁေႃႈရူတ်ႉၵႃး။


မိူဝ်ႈဝၼ်းတီႈ 12/05/2017 သိုဝ်ႇၶၢဝ်ႇထႆးရတ်ႊ ပိုၼ်ၽၢဝ်ႇဝႃႈ - တႄႇဢဝ်ႁၢင်လိူၼ်မေႊ 2017 ၼႆႉၵႂႃႇ ၸဝ်ႈၼႃႈတီႈပလိၵ်ႈၼႂ်းမိူင်းထႆး တေတင်ႈလၢၼ်ႇ(ၵဵတ်ႉ)ၵူတ်းထတ်း ရူတ်ႉၵႃးၼိူဝ်သဵၼ်ႈ တႃႈသၢႆတၢင်းႁၢဝ်ႈႁႅင်း သင်တီႉၺႃးၽူႈဢမ်ႇမီးဝႂ်ၶႂၢင်ႉႁေႃႈရူတ်ႉ(ဝႂ်ၶပ်းၶီႇ) ဢမ်ႇလႆႈတေႃႇ (ၽေႃး ရေႃႊၿေႃႊ) ၸိုင်တေယိုတ်းရူတ်ႉၸူဝ်ႈၶၢဝ်း - ဝႃႈၼႆ။

ၸွမ်သိုၵ်းလူင် ဝိတ်ႊထယႃႊ ပရႃႊယူင်ႊၽၼ်ႊ  ၵႅမ်ၽူႈၵွၼ်းလုမ်းပလိၵ်ႈငဝ်ႈၸိုင်ႈ မိူင်းထႆးလၢတ်ႈ ဝႃႈ -  “ယိူင်းဢၢၼ်းၼင်ႇႁိုဝ်တေလူတ်းပၼ်ႁႃရူတ်ႉၵႃးတိတ်းၵပ်ႉ၊ လွင်ႈၵႃးတုမ်ႉၽႃႇၵၼ် - ပဵၼ် ၽေးၵိုင်ႉၵၢင်ႉသေ ၵူၼ်းလႆႈမၢတ်ႇၸဵပ်းလူႉသုမ်းသၢႆၸႂ် ။ ပေႃးမႃးတူၺ်းၸိုင်ပၼ်ႁႃ ဢၼ်ၵႆႉႁူပ်ႉ ထူပ်းၵမ်ႈၼမ်ပဵၼ်ယွၼ်ႉလူၺ်ႈ ႁေႃႈရူတ်ႉႁေႃႈၵႃးဝႆး လိူဝ်သေမၢႆမီႈမၵ်းမၼ်ႈဝႆႉ၊ ႁေႃႈရူတ်ႉပိၼ်ႈ ၾူၼ်၊ ႁေႃႈရူတ်ႉၵႃးၼိူဝ်သဵၼ်ႈ တၢင်းၵူၼ်းပႆၸိူဝ်းၼႆႉ ယွၼ်းႁႂ်ႈၵူၼ်းဝၢၼ်ႈၵူၼ်းမိူင်းဢွၼ် ၵၼ်ႁဵတ်းၸွမ်း ၼင်ႇပၵ်းပိူင်မၢႆမီႈသေၵမ်း ” ဝႃႈၼႆ။


ၵွပ်ႈၼၼ်လႄႈၵူၼ်းႁေႃႈရူတ်ႉၵႃးၵူႈၵေႃႉ တေလႆႈမီးဝႂ်ၶႂၢင်ႉႁေႃႈရူတ်ႉၵႃး(ဝႂ်ၶပ်းၶီႇ)လႄႈ ဝႂ်ႁပ်ႉႁွင်း ၽေးၵိုင်ႉၵၢင်ႉၼိူဝ်သဵၼ်ႈတၢင်း ၽေႃႊရေႃႊပေႃႊ ဝႃႈၼႆ။


ၵဵဝ်ႇလူၺ်ႈလွင်ႈတၢင်းၸိူဝ်းၼႆႉသေ ၽူႈၵွၼ်းငဝ်ႈလုမ်းပလိၵ်ႈမိူင်းထႆး လႆႈသင်ႇၵႂႃႇတီႈႁူင်းပလိၵ်ႈ ၼႂ်းမိူင်းထႆး တႄႇႁၢင်လိူၼ်ၼႆႉၵႂႃႇ ႁႂ်ႈၵူတ်ႇထတ်းရူတ်ႉၵႃး ႁၢဝ်ႈႁႅင်း ဝႃႈၼႆ။