ပၢင်လိူၵ်ႈတင်ႈသွမ်ႈမိူဝ်ႈဝၼ်းတီႈ1 လိူၼ် April ပီ 2017 ၼၼ်ႉ ပႃႇတီႇတႆး 2 ဢၼ် ဢၼ်ပဵၼ် ပႃႇတီႇႁူဝ်သိူဝ် SNLD လႄႈ ပႃႇတီႇ သိူဝ်ၽိူၵ်ႇ SNDP - ၶဝ်ႈၶဵင်ႇ လိူၵ်ႈတင်ႈ တီႈၼင်ႈၽွင်း တႅၼ်းသၽႃး 7 တီႈ ၼႂ်းမိူင်းတႆး။ ၼႂ်းၼၼ်ႉပႃႇတီႇႁူဝ်သိူဝ် ဢွင်ႇပေႉလႆႈတီႈၼင်ႈ 6 တီႈ။ ၼႂ်းၸႄႈ ဝဵင်းမိူင်းသူႈ 3 တီႈလႄႈ ၸႄႈဝဵင်းၵေးသီး 3 တီႈ။ ၵူၺ်းၵႃႈ တီႈၼင်ႈၽူႈတႅၼ်း သၽႃး ၸႄႈမိူင်း ၶဵတ်ႇလိူၵ်ႈတင်ႈမၢႆ 2 ဝဵင်းၵဵင်းတုင် တီႈၼိုင်ႈၼၼ်ႉတႄႉ ပႃႇတီႇတႆး ဢမ်ႇပေႉသေဢၼ်။ ပဵၼ်ပႃႇတီႇသၢင်ႇသီႈ USDP ဢွင်ႇပေႉလႆႈတီႈၼင်ႈၵႂႃႇပႅတ်ႈ။ ဢိင်ၼိူဝ်ၼႆႉသေ  ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ် လုင်းၸၢႆးထုၼ်း ႁူဝ်ပဝ်ႈပႃႇတီႇႁူဝ်သိူဝ် ဝဵင်းၵဵင်းတုင် ဝႆႉၼင်ႇၼႆၶႃႈဢေႃႈ။

ထၢမ်။ ။ႁဵတ်းသင်လႄႈပႃႇတီႇႁူဝ်သိူဝ်ၸႄႈဝဵင်းၵဵင်းတုင်လႆႈသုမ်းၵၢၼ်ႉ?

တွပ်ႇ။ ။ၶႃႈႁဝ်းႁၼ်ထိုင်ဝႃႈဢၼ်လႆႈသုမ်းၵၢၼ်ႉၵႂႃႇတႄႉ မၼ်းၵဵဝ်ႇၵပ်းလွင်ႈပီႈၼွင်ႉၵူၼ်းဝၢၼ်ႈၵူၼ်းမိူင်းႁဝ်း ဢမ်ႇပေႃးသူၼ်ၸႂ်လွင်ႈၵၢၼ်မိူင်းလႄႈ ဢၼ်မႃးတွတ်ႈၶႅပ်းၵၢင်ၸႂ်ၵေႃႈဢမ်ႇမႃးတွတ်ႈၶႅပ်းၵၢင်ၸႂ်ၵႂႃႇတဵမ်တဵမ်ထူၼ်ႈထူၼ်ႈ။ ပေႃးတေဝႃႈၸုမ်းပွင်ၵၢၼ်ႁဝ်းၶႃႈတီႈဝဵင်းၵဵင်းတုင်ၼႆႉ ၵမ်ႈၽွင်ႈၵေႃႈတၢင်းယူပ်ႈယွမ်းၵေႃႈမီးယူႇၽွင်ႈလႄႈ လွင်ႈၼႆႉၵေႃႈပႃးယူႇဢိတ်းဢီႈ။

ထၢမ်။ ။လွင်ႈလႆႈသုမ်းၵၢၼ်ႉၵႂႃႇယဝ်ႉမိူဝ်းၼႃႈမႃးထုၵ်ႇလီမူၼ်ႉမႄးၸိူင်ႉႁိုဝ်?

တွပ်ႇ။ ။ဢၼ်ႁဝ်းၶႃႈလႆႈသုမ်းၵၢၼ်ႉၵႂႃႇတႄႉ ဢၼ်တႆးႁဝ်းၶႃႈလူင်းသူၼ်းတုမ်လႄႈသင်၊ လွင်ႈပီႈၼွင်ႉတႆးႁဝ်းၶႃႈတၢင်းပွတ်းႁွင်ႇ ပွတ်းၸၢၼ်း ဢၼ်မႃးၸွႆႈႁဝ်းၶႃႈတႄႉ ၶႅမ်ႉလႅပ်ႈၵူႈလွင်ႈလွင်ႈယူႇ။ မၼ်းမီးတီႈတၢင်းယူပ်ႈယွမ်းႁဝ်းၶႃႈ တၢင်းပွတ်းဢွၵ်ႇၶူင်းႁင်းၵူၺ်း။ ၼင်ႇႁိုဝ်တေၶႅမ်ႉလႅပ်ႈၵႂႃႇၼၼ်ႉ ႁဝ်းၶႃႈတေဢုပ်ႇဢူဝ်းၵၼ်သေလႄႈ ၶိုင်ပွင်ႁၢင်ႈႁႅၼ်းတႃႇပီ 2020 ၼင်ႇႁိုဝ်ႁဝ်းၶႃႈတေဢမ်ႇသုမ်းၵၢၼ်ႉၼႆ ၶႂ်ႈလူင်းပိုၼ်ႉတီႈဢၼ်ႁဝ်းၶႃႈယူပ်ႈယွမ်း တီႈပွတ်းလႂ်၊ ဢိူင်ႇလႂ်ႁဝ်းၶႃႈတေဢုပ်ႇၵၼ်သေလူင်းပိုၼ်ႉတီႈၵႂႃႇမီးဝႆႉၽႅၼ်ၸိူင်ႉၼႆၶႃႈ။

ထၢမ်။ ။ၵဵဝ်ႇၵပ်းလွင်ႈလႆႈသုမ်းၵၢၼ်ႉၼႆႉသေၶႂ်ႈမွၵ်ႇလၢတ်ႈၼႄငဝ်ႈငုၼ်းပႃႇတီႇႁူဝ်သိူဝ်ၸိူင်ႉႁိုဝ်?

တွပ်ႇ။ ။ဢၼ်ႁဝ်းၶႃႈၶႂ်ႈမွၵ်ႇလၢတ်ႈၼႄတီႈငဝ်ႈငုၼ်းႁဝ်းၶႃႈတႄႉ ႁဝ်းၶႃႈၶႂ်ႈတၢင်ႇၶွပ်ႈၶုၼ်းမုၼ်ငဝ်း ဢၼ်တီႈငဝ်ႈငုၼ်းႁဝ်းၶႃႈ မႃးပၼ်တၢင်းၸွႆႈထႅမ်ႁဝ်းၶႃႈၵူႈလွင်ႈလွင်ႈသေ ဢမ်ႇၵႃးႁူဝ်ပဝ်ႈလူင်ႁဝ်းၶႃႈ ၸဝ်ႈလုင်းၶုၼ်ထုၼ်းဢူး ၶၢမ်ႇတုၵ်ႉၶၢမ်ႇယၢပ်ႇသေမႃးပၼ်ႁႅင်း ၽႅဝ်ထိုင်တီႈၵဵင်းတုင်ႁဝ်းၼႆႉ။ ႁဝ်းၶႃႈယူႇတီႈၵဵင်းတုင်သေလႄႈၶွပ်ႈၶုၼ်းမုၼ်တၢင်ႇယႂ်ႇယႂ်ႇသေ။ ယွၼ်ႉပိူဝ်ႈဝႃႈႁဵတ်းႁိုဝ်ၵေႃႈယႃႇ ႁဝ်းၶႃႈလႆႈသုမ်းၵၢၼ်ႉၵႂႃႇသေတႃႉၵေႃႈ ၵွပ်ႈပိူဝ်ႈဝႃႈ ဢၼ်ပဵၼ်ဢဵၼ်ႁႅင်းငဝ်ႈငုၼ်းႁဝ်းၶႃႈ မႃးၵမ်ႉႁႅင်းၼႆႁဝ်းၶႃႈယိၼ်းလီယိၼ်းၸူမ်းယူႇတႄႉတႄႉ။ ႁဝ်းၶႃႈတေသိုပ်ႇၶတ်းၸႂ်ၵႂႃႇ မီးၶေႃႈၵႂၢမ်းၶႂ်ႈလၢတ်ႈၼႄငဝ်ႈငုၼ်းၸိူင်ႉၼႆၶႃႈ။

ထၢမ်။ ။ၵဵဝ်ႇၵပ်းလွင်ႈလႆႈသုမ်းၵၢၼ်ႉၼႆႉသေၶႂ်ႈမွၵ်ႇလၢတ်ႈၼႄပီႈၼွင်ႉၵူၼ်းမိူင်းၸိူင်ႉႁိုဝ်?

တွပ်ႇ။ ။ၶႂ်ႈမွၵ်ႇလၢတ်ႈၼႄပီႈၼွင်ႉၵူၼ်းမိူင်းတႄႉ ၶႂ်ႈႁႂ်ႈႁူႉထိုင်ဝႃႈၸုမ်းပႃႇတီႇႁူဝ်သိူဝ်ႁဝ်းၶႃႈၼႆႉ ဢမ်ႇၸႅၵ်ႇယႅၵ်ႈဝႃႈပွတ်းၸၢၼ်း၊ ပွတ်းႁွင်ႇ၊ ပွတ်းဢွၵ်ႇငဝ်ႈငုၼ်းႁဝ်းၶႃႈ ၸင်ႇၶိုင်ပွင်ႁၢင်ႈႁႅၼ်းပၼ် ၼင်ႇႁိုဝ်တေၶိုၼ်ႈယႂ်ႇမႂ်ႇသုင်ၵႂႃႇတၢင်းၼႃႈၼႆ ႁဝ်းၶႃႈပႃႇတီႇႁူဝ်သိူဝ်တႄႉ ဢမ်ႇၸႅၵ်ႇယႅၵ်ႈပိုၼ်ႉတီႈလႂ်၊ ႁႂ်ႈလႆႈပဵၼ်ၼမ်ႉၼိုင်ႈၸႂ်လဵဝ်ၵၼ်ငဝ်ႈငုၼ်းႁဝ်းၶႃႈ မႃးၼႄႁၢင်ႈၼႄတူဝ်ၵႂႃႇ ၶႂ်ႈမွၵ်ႇလၢတ်ႈၼႄပီႈၼွင်ႉၵဵင်းတုင်ႁဝ်းၶႃႈ ၵႂႃႇၸိူင်ႉၼႆ။

ထၢမ်။ ။မိူဝ်းၼႃႈၼႆႉ ယူႇတီႈပႃႇတီႇႁူဝ်သိူဝ်ၸႄႈဝဵင်းၵဵင်းတုင်သမ်ႉ တေဢၢၼ်းႁဵတ်းသၢင်ႈသင်ၵႂႃႇထႅင်ႈ၊ ႁၢင်ႈႁႅၼ်းဝႆႉၸိူင်ႉႁိုဝ်?။

တွပ်ႇ။ ။ယွၼ်ႉဝႃႈတေႃႈလဵဝ်ၵေႃႉတိုၵ်ႉသူင်ႇပီႈၼွင်ႉၶႅၵ်ႇ မႃးၸွႆႈႁဝ်းၶႃႈႁႃသဵင် သူၼ်းတုမ်ပီႈၼွင်ႉႁဝ်းတီႈၵဵင်းတုင်ၼၼ်ႉ တိုၵ်ႉႁႃပွၵ်ႈၵူၺ်းလႄႈႁဝ်းၶႃႈပႆႇလႆႈႁဵတ်း ပၢင်ၵုမ်တႄႉတႄႉဝႃႈဝႃႈတိူဝ်ႈ၊ ပေႃးဝႃႈႁဝ်းၶႃႈတူဝ်ႈတၼ်းယဝ်ႉၵၢၼ်လီယဝ်ႉၼႆ ႁဝ်းၶႃႈတေႁဵတ်းပၢင်ၵုမ်ဢုပ်ႇဢူဝ်းဝၢင်းၽႅၼ်ၵႂႃႇ မိူဝ်းၼႃးယူႇ။

ပၢင်လိူၵ်ႈတင်ႈသွမ်ႈ ဢၼ်ၸတ်းႁဵတ်းၼႂ်းဝၼ်းတီႈ 1 လိူၼ် April ၼၼ်ႉ ပႃႇတီႇ ႁူဝ်သိူဝ် ၵိၼ်ၶၢတ်ႇပေႉပုၼ်ႈဢွင်ႇပေႉ 6 တီႈၼင်ႈ ၼႂ်းမိူင်းတႆး ။ ၸႄးဝဵင်းမိူင်းသူႈ 3 တီႈၼင်ႈတင်း ၸႄႈဝဵင်းၵေးသီး 3 တီႈၼင်ႈ။ ၼႂ်းမိူင်းတႆးၼႆႉ တီႈၼင်ႈ သၽႃးႁၢမ်းပဝ်ႇဝႆႉ 8 တီႈၼင်ႈ ပႃႇတီႇ တႆး 2 ဢၼ် ၶဝ်ႈၶေႉၶဵင်ႇ 7 တီႈၼင်ႈ။ ပႃႇတီႇႁူဝ်သိူဝ်လႆႈ 6 တီႈၼင်ႈ ။ 1 တီႈၼင်ႈ ၼႂ်းၸႄႈဝဵင်းၵဵင်းတုင်တႄႉ ပႃႇတီႇသၢင်ႇသီႈ လႆႈၶႅပ်းၵၢင်ၸႂ်ၼမ်သုတ်း သေ ၼႂ်းၸႄႈဝဵင်းယွင်ႈႁူၺ်ႈ 1 တီႈၼင်ႈ သမ်ႉ ပႃႇတီႇ ၼူၵ်ႉယူင်း ဢွင်ႇပေႉ ။

ပၢင်လိူၵ်ႈတင်ႈသွမ်ႈ ဢၼ်ၸတ်းႁဵတ်းၼႂ်းမိူင်းမၢၼ်ႈ ပတ်းပိုၼ်ႉ 22 ၸႄႈဝဵင်းၼႆႉ တီႈၼင်ႈ သၽႃးႁၢမ်းပဝ်ႇဝႆႉ 19 တီႈၼင်ႈ။ ပႃႇတီႇၵၢၼ်မိူင်း 24 ဢၼ်သူင်ႇတူဝ်တႅၼ်း 87 ၵေႃႉ၊ ယူႇတီႈသုၼ်ႇတူဝ်သေၶဝ်ႈၶေႉၶႅင်ႇသမ်ႉ 7 ၵေႃႉ ႁူမ်ႈတင်းမူတ်း 94 ၵေႃႉ ၶဝ်ႈၶေႉၶႅင်ႇၵၼ်။ ၼႂ်းၼၼ်ႉ ပႃႇတီႇ ၼူၵ်ႉယုင်းပေႉ 9 တီႈၼင်ႈ၊ ပႃႇတီႇ ႁူဝ်သိူဝ် ပေႉ 6 တီႈၼင်ႈ။ ပႃႇတီႇသၢင်ႇသီႈ 2 တီႈၼင်ႈလႄႈ ပႃႇတီႇရၶႅင်ႇ 1 တီႈၼင်ႈ ပႃႇတီႇ တီႊမွၵ်ႇၶရေသီႇၵူၼ်းၶိူဝ်းႁူမ်ႈ ( လူႇမဵဝ်းပွင်းၸူင်ႇ တီႊမွၵ်ႇၶရေသီႇပႃႇတီႇ) 1 တီႈၼင်ႈ။ ပၢင်လိူၵ်ႈတင်ႈသွမ်ႈၵမ်းၼႆႉ ၽူႈမီးသုၼ်ႇတွတ်ႈၶႅပ်းၵၢင်ၸႂ် မိူင်းမၢၼ်ႈပတ်းပိုၼ်ႉ မီး 2 လၢၼ်ႉပၢႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 06/04/2017