ၽူႈတႅၼ်းသၽႃးၸႄႈမိူင်းတင်း ပေႃႈမႄႈပီႈၼွင်ႉၵူၼ်းမိူင်း ပႃးၾၢႆႇတႅၵ်ႈၼႃႈလိၼ် ၸႄႈဝဵင်း သီႇပေႃႉ 

သၢၼ်မိုဝ်းၵၼ်ၵႂႃႇ တႅၵ်ႈတီႈလိၼ် ၶမယ 506 ၼင်ႇႁိုဝ် ၵူၼ်းမိူင်း ပေႃးတေလႆႈႁူႉ ၸႅင်ႈလႅင်းဝႃႈ တီႈလိၼ်ဢၼ်မီးႁိမ်းတပ်ႉၼႆႉ ပဵၼ်ၶွင်ၵူၼ်းမိူင်း။

ဝၼ်းတီႈ 26/04/2017 ယၢမ်းၵၢင်ၼႂ် တေႃႇ တၢမ်းၶမ်ႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈ တင်ႈမၢႆ (1) ၸႄႈဝဵင်းသီႇပေႃႉ ၼၢင်းသၢၼ်းသၢၼ်းဢေး၊ ၶဵတ်ႇလိူၵ်ႈတင်ႈမၢႆ (2) ၸၢႆးၶမ်းဢွင်ႇ၊ ၾၢႆႇတႅၵ်ႈၼႃႈလိၼ်(မြေစာရင်း)၊ ၵူၼ်းဝၢၼ်ႈၼႂ်းဢိူင်ႇၼမ်ႉမေႃႇသူၺ်ႇ၊ ႁွင်ႉဢဝ်ၽူႈမီးပုၼ်ႈၽွၼ်း ၾၢႆႇတပ်ႉသိုၵ်းသေ လူင်းတႅၵ်ႈတူၺ်းတီႈလိၼ် ၼႂ်းၵႄႈဢိူင်ႇၼမ်ႉလၼ်ႈတင်း ဢိူင်ႇၼမ်ႉမေႃႇသူၺ်ႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ 

 

တီႈလိၼ်တပ်ႉၵွင်(တပ်ႉတိၼ်ဝႆး) ၶမယ 506 ၸႄႈဝဵင်းသီႇပေႃႉၼႆႉ တင်းၵႂၢင်းမီး 502.50 ဢေႊၶိူဝ်ႊ 

တႅၵ်ႈယဝ်ႉၵႂႃႇ 2 ၼႃႈ၊ ၵိုတ်းထႅင်ႈ 2 ၼႃႈ။ လိူၼ်တေမႃး တေတႅၵ်ႈထႅင်ႈၵမ်းၼိုင်ႈ- ဝႃႈၼႆ။

ၼၢင်းသၢၼ်းသၢၼ်းဢေး ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ(1) ၸႄႈဝဵင်းသီႇပေႃႉ လၢတ်ႈဝႃႈ 

“ မိူဝ်ႈပီ 1990 ပၢႆၼၼ်ႉ တႅၵ်ႈ ယဝ်ႉၵမ်းၼိုင်ႈ မိူဝ်ႈပီပူၼ်ႉမႃးၵေႃႈ တႅၵ်ႈထႅင်ႈၵမ်းၼိုင်ႈ။ ၵူၼ်းမိူင်းဢမ်ႇပွင်ႇၸႂ် တပ်ႉသမ်ႉပၼ်ၵူၼ်းမိူင်းႁဵတ်းၵၢၼ်ၽုၵ်ႇသွမ်ႈယူႇ။ ပေႃးယဝ်ႉ တပ်ႉသမ်ႉႁုပ်ႈ ယိုတ်းဢဝ်ၶိုၼ်း မၼ်းပဵၼ်ပၼ်ႁႃဝႆႉၸိူင်ႉၼႆ။ ၵွပ်ႈၼႆ ၼင်ႇႁိုဝ် ၵူၼ်းဝၢၼ်ႈၵေႃႈတေ ႁၢၼ်ႉၸႂ်၊ တင်း ၾၢႆႇတပ်ႉ ၵေႃႈႁႂ်ႈၶဝ်မီး

ၶွပ်ႇၶဵတ်ႇၼႃႈလိၼ်ၶဝ် ႁႂ်ႈၵူၼ်းဝၢၼ်ႈတင်း ၾၢႆႇတပ်ႉ လႆႈႁပ်ႉႁူႉ ၸႅင်ႈလႅင်း ၵႂႃႇတင်းသွင်ၾၢႆႇ ” ဝႃႈၼႆ။

ၼၢင်းသၢၼ်းသၢၼ်းဢေး လၢတ်ႈဝႃႈ သင်ဝႃႈတႅၵ်ႈတူၺ်းဢေႊၶိူဝ်ႊ ၼႃႈလိၼ်တပ်ႉယဝ်ႉ တင်း 4 ၾၢႆႇၸိုင် တီႈလိၼ်ၶွင်တပ်ႉသိုၵ်းမၢၼ်ႈၼႆႉ တၵ်းတေလႆႈမီး 502.50 ဢေႊၶိူဝ်ႊ သင်ဝႃႈ မၼ်းလိူဝ် ၵႂႃႇၼႆ တေလႆႈမႄးတတ်းဢွၵ်ႇပၼ် ၵူၼ်းဝၢၼ်ႈၵူၼ်းမိူင်းၶိုၼ်း ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 27/04/2017