ၸမ်ထိုင်ဝၼ်းတီႈ 01 လိူၼ်မေႊ ဝၼ်းႁႅင်းၵၢၼ်လုမ်ႈၾႃႉယဝ်ႉလႄႈ ၸဝ်ႈၼႃႈတီႈၾၢႆႇႁႅင်းၵၢၼ် ႁူမ်ႈၵၼ်ၸတ်းႁဵတ်း ပၢင်ႁူပ်ႉထူပ်းယွင်ႈၵုင်ႇဢဝ်မုၼ် ၵူၼ်းႁဵတ်းၵၢၼ် ၸိူဝ်းဢၼ်ၸွႆႈပူၵ်းပွင် ဝၢၼ်ႈမိူင်း ၶိုၼ်ႈယႂ်ႇ မႂ်ႇသုင် မီးၽူႈယႂ်ႇၵူၼ်းလူင် ႁႅင်းၵၢၼ် ထႆး-တႆး ၶဝ်ႈႁူမ်ႈ တင်းၼမ်။

ဝၼ်းတီႈ 21-23 / 04 / 2017 ၸုမ်းတူင်ႉၼိုင် ၾၢႆႇပၢႆးပိူင်ၵူၼ်းလႄႈ ၾၢႆႇႁႅင်းၵၢၼ် ႁူမ်ႈ19 ၸုမ်း ႁူမ်ႈၵၼ်
ၸတ်းႁဵတ်း ပၢင်ႁူပ်ႉထူပ်းၶူၼ်ႉၶိုၼ်းပိုၼ်း ၵူၼ်းႁဵတ်းၵၢၼ်  သႂ်ႇၸိုဝ်ႈဝႃႈ “ၵူၼ်းႁဵတ်းၵၢၼ် တင်ႈဝၢၼ်ႈ သၢင်ႈမိူင်း ” ။ ၸတ်းႁဵတ်းတီႈ သဵၼ်ႊထလ်ႊၽလႃႊသႃႊ ၵဵင်းမႆႇ ဢႄႊၽွတ်ႊ ဝဵင်းၵဵင်းမႆႇ ၸိုင်ႈထႆး။


ၼႂ်းပၢင်ၼႆႉ မီးၶူးသွၼ် ၽူႈလူင်ႉလႅၼ်ႇ လုၵ်ႉတီႈၸၼ်ႉၸွမ်ၵဵင်းမႆႇ၊ ၸၼ်ႉၸွမ်မႄႈၸူဝ်ႉ ၸုမ်းႁႅင်းၵၢၼ်ထႆး၊ တူဝ်တႅၼ်းပေႃႈလဵင်ႉ၊မႄႈလဵင်ႉ (ၼၢႆးၸၢင်ႈ) ႁႅင်းၵၢၼ်တႆး ၸုမ်းႁႅင်းၵၢၼ် ၽွမ်ႉႁူမ်ႈ ဢိၵ်ႇၽူႈသူၼ်ၸႂ်
ၸိူဝ်းၼႆႉၶဝ်ႈႁူမ်ႈ 300 ပၢႆ။


ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆႇသဵင် FM 99 Mhz လၢတ်ႈဝႃႈ - “ ပေႃးႁဝ်းၶႃႈမႃးတူၺ်း ၼႂ်းၸိုင်ႈထႆးပွတ်းၼိူဝ်ၼႆႉ မိူဝ်ႈလဵဝ် တၢင်းလူင်ပွင်ၸိုင်ႈၵေႃႈပၼ်တိုဝ်ႉတၢင်းႁဝ်းမႃး ႁၼ်ၵႃႈၶၼ် ၵူၼ်းႁဵတ်းၵၢၼ်ၶၢမ်ႈမိူင်းမႃး ၵွပ်ႈၼၼ်လႄႈ ႁဝ်းၵေႃႈလူဝ်ႇလႆႈမေႃယူႇမေႃၵိၼ် ႁဵတ်းၸွမ်းၼင်ႇ ပၵ်းပိူင်မၢႆမီႈဝၢၼ်ႈမိူင်း ပိူၼ်ႈမီးဝႆႉၼၼ်ႉ သေၵမ်း  ” ဝႃႈၼႆ။


ႁွင်ႈၵၢၼ်ၾၢႆႇၵူၼ်းႁဵတ်းၵၢၼ်မိူင်းထႆး ပိုၼ်ၽၢဝ်ႇသဵၼ်ႈမၢႆ ႁႅင်းၵၢၼ်ယၢၼ်မိူင်း (ၵူၼ်းႁဵတ်းၵၢၼ် ၶၢမ်ႈမိူင်း) ဢၼ်မႃးႁႃ ႁဵတ်းၵၢၼ် တီႈၼႂ်းမိူင်းၸိုင်ႈထႆး  ႁူဝ်ႁုပ်ႈပီ 2016 ၼၼ်ႉဝႃႈ- ႁႅင်းၵၢၼ် ဢၼ်ထတ်းထွင်ၵူၼ်းၵိုၵ်းမိူင်း ( ၽိသုတ်ႇသၼ်ႊၶျၢတ်ႊ) ယဝ်ႉၼၼ်ႉ မီး ႁိမ်း 9 သႅၼ်ၵေႃႉ၊ ဢၼ်ၶဝ်ႈမိူင်းလူၺ်ႈပိူင် MOU မီး ႁိမ်း4 သႅၼ်ၵေႃႉ ဢၼ်ဢမ်ႇမီး ၼႂ်းသဵၼ်ႈမၢႆၵေႃႈယင်းတေမီး ထႅင်ႈ  ဝႃႈၼႆ ။



ၸုမ်းၶၢဝ်ႇၽူႈတွႆႇႁွၵ်ႈ / သၢႆမွၵ်ႇႁွမ်
25/04/2017