တပ်ႉသိုၵ်းလူင်ပွင်ၸိုင်ႈမၢၼ်ႈ ႁၢင်ႈႁႅၼ်းသိုၵ်းၶဝ်ႈလေႃႇတိုၵ်း တပ်ႉပၢင်သဝ်း တပ်ႉသိုၵ်းၸိုင်ႈတႆး (RCSS/SSA) တီႈၼႂ်းဢိူင်ႇဢုမ်မူႉ ၸႄႈဝဵင်းသီႇပေႃႉ၊ သွင်ၾၢႆႇလႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း။

ဝၼ်းတီႈ 07/03/2017 (မိူဝ်ႈဝႃး) တႄႇယၢမ်းဝၢႆးဝၼ်း 2 မူင်း၊ ၾၢႆႇသိုၵ်းမၢၼ်ႈတပ်ႉပႃႈတႂ်ႈၶမယ 504 ၊ ဢၼ်ပဵၼ်တပ်ႉတူင်ႉၼိုင်ၼႂ်းၸႄႈဝဵင်းသီႇပေႃႉ ၶဝ်ႈလေႃႇတိုၵ်းယိုဝ်း တပ်ႉပၢင်သဝ်းတပ်ႉသိုၵ်းၸိုင်ႈတႆး (RCSS/SSA) ဢၼ်မီးတီႈဢိူင်ႇဢုမ်မူႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ၊ ဢၼ်မီးၾၢႆႇႁွင်ႇဝဵင်းသီႇပေႃႉမွၵ်ႈ 7 လၵ်း။


ၽူႈမီးၸၼ်ႉၼႂ်း RCSS/SSA ၸဝ်ႈၼိုင်ႈလၢတ်ႈဝႃႈ- တပ်ႉမၢၼ်ႈ 504 ၼႆႉ ပဵၼ်တပ်ႉဢၼ်တူင်ႉၼိုင် ၼႂ်းပိုၼ်ႉတီႈ ၼႂ်းၸႄႈဝဵင်းသီႇပေႃႉ၊ ၶဝ်ၵေႃႈႁူႉယူႇဝႃႈတီႈၼႆႈပဵၼ်တပ်ႉပၢင်သဝ်းၶွင် RCSS/SSA ႁဝ်းၶႃႈလိုဝ်ႈယူႇသဝ်းဝႆႉ၊ ၵူၺ်းၵႃႈၶဝ်ၵေႃႈ ႁႅၼ်းသိုၵ်းသေတိုၼ်းၶႂ်ႈၶိုၼ်ႈယိုဝ်းႁဝ်းၵမ်းသိုဝ်ႈ၊ ၶဝ်ဢဝ်ၶိူင်ႈၵွင်ႈလူင် ယိုဝ်းၶိုၼ်ႈတၢင်းထၢင်ၸၢင်ႉပၢင်ၶႃး တၢင်းဢၼ်မီးတပ်ႉပၢင်သဝ်း RCSS/SSA ၼၼ်ႉ၊ တင်ႈဢဝ် ယၢမ်းဝၢႆးဝၼ်း 2 မူင်းတေႃႇထိုင်မွၵ်ႈ 5-6 မူင်းႁူဝ်ၶမ်ႈၸိူဝ်းၼႆႉ၊ ၾၢႆႇတၢင်းသိုၵ်းမၢၼ်ႈထႅမ်ႁႅင်းသိုၵ်းသေ ၶိုၼ်ႈမႃးယိုဝ်း၊ ထိုင်မွၵ်ႈႁူဝ်ၶမ်ႈ 6 မူင်းၼႆႉ ၶဝ်ဢဝ်ၵူၼ်းဝၢတ်ႇၸဵပ်းၶဝ်သေ ထွၼ်ဢွၵ်ႇၵႂႃႇၶိုၼ်း၊ တေႃႇထိုင်ၵၢင်ၶမ်ႈၵၢင်ၶိုၼ်းတႄႉ ၶဝ်ဢမ်ႇၶိုၼ်ႈမႃးၶိုၼ်းၼင်ႇၵဝ်ႇ-ဝႃႈၼႆ။


ၵဵဝ်ႇၵပ်းလွင်ႈပၢင်တိုၵ်းပွၵ်ႈၵမ်းၼႆႉ ၽူႈၼမ်းၼႂ်းၵူႈလွင်ႈလွင်ႈ RCSS/SSA ၸဝ်ႈသိုၵ်းလူင်ၸၢႆးလႃႉ ၵေႃႈယိုၼ်ယၼ်ဝႃႈ ပဵၼ်ပၢင်တိုၵ်းတႄႉယူႇ။ ၵူၺ်းၵႃႈ သွင်ၾၢႆႇလႆႈပဵၼ်ပၢင်တိုၵ်းၵၼ်သေ မီးလွင်ႈလူႉသုမ်းဝၢတ်ႇၸဵပ်းလူႉတၢႆတင်းသွင်ၾၢႆႇသေတႃႉ ယင်းပႆႇၸၢင်ႈယိုၼ်ယၼ်။


ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)ၼႆႉ ပႃးၼႂ်းၸုမ်းၸၢဝ်းၶိူဝ်း ဢၼ်လူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) ဝႆႉ ၸွမ်းလူင်ပွင်ၸိုင်ႈမၢၼ်ႈ။ ဝၢႆးလင်လူင်းလၢႆးမိုဝ်းမႃးယဝ်ႉ တပ်ႉပၢင်သဝ်း RCSS/SSA မိူၼ်ၼင်ႇၼႂ်းၸႄႈဝဵင်းလွႆလႅမ် မိူင်းၵိုင်ၸိူဝ်းၼႆႉၵေႃႈ ထုၵ်ႇသိုၵ်းလူင်ပွင်ၸိုင်ႈ တပ်ႉမတေႃႇမၢၼ်ႈ ၶဝ်ႈယိုဝ်းၼင်ႇၵဝ်ႇ၊ ၾၢႆႇတပ်ႉသိုၵ်းမၢၼ်ႈဝႃႈပဵၼ် ၶၵ်ႉၵၢၼ်ၵႂၢတ်ႇလၢင်ႉၼႃႈလိၼ်- ၼႆယဝ်ႉ။