ဢၼ်ပႃႇတီႇ NLD တၢင်ႇလိၵ်ႈႁႂ်ႈပူတ်းယႃႉ ပၢင်လိူၵ်ႈတင်ႈ 3 ဢိူင်ႇ ၼႂ်းၸႄႈဝဵင်းမိူင်းသူႈၼၼ်ႉ ၶွမ်ႊမသျိၼ်ႊ ၸၼ်ႉၸႄႈမိူင်း ဢမ်ႇတႅပ်းတတ်းလႆႈ။ လွင်ႈၼႆႉ ဢမ်ႇယဝ်ႉတူဝ်ႈသေ တေလႆႈၵႂႃႇတႅပ်းတတ်းတီႈ ၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ် (UEC) ။

ၼႂ်းၸႄႈဝဵင်းမိူင်းသူႈ တႃႇသၢမ်ဢိူင်ႇ (ဝၢၼ်ႈလွႆ၊ မေႃႇမႄႈ၊ ၵုၼ်ၵျွင်း)ၼႆႉ ပႃႇတီႇငဝ်ႈငုၼ်းတီႇမူဝ်ႇၶရေႊၸီႇ ၸိူဝ်ႉၸၢတ်ႈ (NLD) ႁၼ်ထိုင်ဝႃႈ ဢမ်ႇမီးလွင်ႈႁူမ်ႇလူမ်ႈပဵင်းပေႃး တႃႇႁဵတ်းပၢင်လိူၵ်ႈတင်ႈ ၼႆသေတၢင်ႇလိၵ်ႈ တုၵ်းယွၼ်းထိုင် ၶွမ်ႊမသျိၼ်ႊၵၢၼ်လိူၵ်ႈတင်ႈ ႁႂ်ႈပူတ်းယႃႉ (ယုၵ်ႉလိူၵ်ႈ) ၵၢၼ်ႁဵတ်းပၢင်လိူၵ်ႈတင်ႈ၊ ၵူၺ်းၵႃႈ ပႃႇတီႇၸၢဝ်းၶိူဝ်းတင်းလၢႆ ပႃးၸဵမ်ပႃႇတီႇသိူဝ်ၽိူၵ်ႇတႄႉ ႁၼ်ထိုင်ဝႃႈ ဢမ်ႇလီပူတ်းယႃႉ၊ ထုၵ်ႇလီၸတ်းႁဵတ်းၵႂႃႇ ၸွမ်းၼင်ႇၽႅၼ်ၵၢၼ် ဢၼ်တမ်းဝၢင်းဝႆႉမႃးၼၼ်ႉၵူၺ်း- ၼႆယဝ်ႉ။


ဝၼ်းတီႈ 23/03/2017 (မိူဝ်ႈဝႃး) ပွတ်းၼႂ်ၼႆႉ ၶွမ်ႊမသျိၼ်ႊၵၢၼ်လိူၵ်ႈတင်ႈ ၸၼ်ႉမိူင်းတႆး၊ ၶွမ်ႊမသျိၼ်ႊၵၢၼ်လိူၵ်ႈတင်ႈ ၸၼ်ႉၸႄႈတွၼ်ႈ လႄႈတင်းၸၼ်ႉၸႄႈဝဵင်း ႁွင်ႉဢဝ်တူဝ်တႅၼ်းပႃႇတီႇၵၢၼ်မိူင်း ဢိၵ်ႇ တူဝ်တႅၼ်းၵူၼ်းမိူင်းသေ ႁဵတ်းပၢင်ၵုမ်ၵၼ် တီႈလုမ်းၾၢႆႇၽွင်းငမ်းၵူႈလွင်ႈလွင်ႈ ဝဵင်းမိူင်းသူႈ။


ၵဵဝ်ႇၵပ်းလွင်ႈၼႆႉ ၵေႃႉပဵၼ်ၼေႃႇၽူႈတႅၼ်း ပႃႇတီႇသိူဝ်ၽိူၵ်ႇ (SNDP) ၼၢင်းၶမ်းယိၼ်ႇဢွင်ႇ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- ပေႃးဝႃႈဢမ်ႇႁဵတ်းၵၢၼ်လိူၵ်ႈတင်ႈ ဢၼ်တေလူႉသုမ်းသုၼ်ႇလႆႈၼႆႉ ပဵၼ်ၵူၼ်းဝၢၼ်ႈၵူၼ်းမိူင်း။ ၵွပ်ႈၼႆ ဢမ်ႇၶႂ်ႈႁႂ်ႈၵူၼ်းဝၢၼ်ႈၵူၼ်းမိူင်းႁၢမ်းသုၼ်ႇလႆႈ၊ ၵွပ်ႈၼၼ်လႄႈ ၼႂ်းပိုၼ်ႉတီႈၵူႈတီႈၼႆႉ တိုၼ်းထုၵ်ႇလီလႆႈႁဵတ်းပၢင်လိူၵ်ႈတင်ႈ။ ပိူင်တီႇမူဝ်ႇၶရေႇၸီႇဢၼ်ဝႃႈၼၼ်ႉ မၼ်းဢမ်ႇၸႂ်ႈတႃႇၶတ်းသၢင်ႈတႃႇဢွင်ႇပေႉၵူၺ်း၊ မၼ်းပဵၼ်ပႃးပိူဝ်ႈတႃႇၸွမ်းၵၢင်ၸႂ်ၵူၼ်းမိူင်းယဝ်ႉ၊ ပေႃးဢမ်ႇႁဵတ်းတီႈၼိုင်ႈၵေႃႈ ဢမ်ႇတၢပ်ႈႁဵတ်းသေတီႈယဝ်ႉ၊ ပေႃးဢမ်ႇႁဵတ်းၵေႃႈ ဢၼ်တိူဝ်ႉႁႅင်းၼႆႉ မၼ်းပဵၼ်ၵူၼ်းမိူင်းၵူၺ်း၊ ႁဝ်းၶႃႈႁၼ်ထိုင်ၸိူင်ႉၼႆ- ဝႃႈၼႆ။


ၾၢႆႇၼိုင်ႈၵေႃႈ ၼေႃႇၽူႈတႅၼ်းပႃႇတီႇႁူဝ်သိူဝ် (SNLD) ၸၢႆးလိၼ်းမျၢတ်ႉၵေႃႈလၢတ်ႈဝႃႈ- လွင်ႈဢၼ်တေပူတ်းယႃႉပႅတ်ႈၶဵတ်ႇလိူၵ်ႈတင်ႈ တႃႇသၢမ်ဢိူင်ႇဢၼ်ဝႃႈၼၼ်ႉ ႁဝ်းၶႃႈၵေႃႈဢမ်ႇႁၼ်လီ။ ႁဝ်းၶႃႈတႄႉ လၢတ်ႈဝႆႉတႅၵ်ႇလႅင်း တီႈၶွမ်ႊမသျိၼ်ႊၵၢၼ်လိူၵ်ႈတင်ႈယဝ်ႉ-ဝႃႈၼႆ။


ယူႇတီႈပႃႇတီႇသိူဝ်ၽိူၵ်ႇ ယင်းသိုပ်ႇလၢတ်ႈထႅင်ႈဝႃႈ- ယူႇတီႈႁဝ်းၶႃႈတႄႉ ၸိူင်ႉၼင်ႇပႃႇတီႇႁူဝ်သိူဝ် ဢမ်ႇၶဝ်ႈလႆႈမၢင်ဝၢၼ်ႈၵေႃႈ တေမီး၊ ဢၼ်ႁဝ်းၶႃႈဢမ်ႇၶဝ်ႈလႆႈမၢင်ဝၢၼ်ႈၵေႃႈတေမီး၊ ပိုၼ်ႉတီႈ ဢၼ်တေၶဝ်ႈၶႅင်ႇၵၢၼ်လိူၵ်ႈတင်ႈၼႆႉ မၼ်းပဵၼ်ပိုၼ်ႉတီႈဢီႈသင်ၼႆ ၽႂ်ၵေႃႈပွင်ႇၸႂ်ၵၼ်ဝႆႉယူႇ၊ ပိူင်လူင်မၼ်း ၼင်ႇႁိုဝ်ၵူၼ်းဝၢၼ်ႈၵူၼ်းသူၼ်တေဢမ်ႇႁၢမ်းသုၼ်ႇလႆႈၼၼ်ႉၵူၺ်း။ မိူၼ်ၼင်ႇဢၼ်ဝႃႈ ဢိူင်ႇၼႆႉ ဢမ်ႇတၢပ်ႈမီးပၢင်လိူၵ်ႈတင်ႈယဝ်ႉ၊ ဢိူင်ႇၼၼ်ႉသမ်ႉႁဵတ်းၵၢၼ်လိူၵ်ႈတင်ႈလႄႈ ၸိူဝ်းၼႆႉမၼ်းဢမ်ႇတူၵ်းထုၵ်ႇ။ ၵွပ်ႈၼၼ် ၼင်ႇႁိုဝ်ၵူၼ်းဝၢၼ်ႈၵူၼ်းမိူင်း တေဢမ်ႇႁၢမ်းသုၼ်ႇလႆႈၼၼ်ႉ လွင်ႈဢၼ် NLD တၢင်ႇလိၵ်ႈဝႃႈ ဢမ်ႇထုၵ်ႇလီႁဵတ်းပၢင်လိူၵ်ႈတင်ႈၼၼ်ႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈ ၸၼ်ႉဝၢၼ်ႈၸၼ်ႉဢိူင်ႇၸိူဝ်းၼႆႉ ထုၵ်ႇလီထတ်းသၢင်ၶိုၼ်းယူႇ- ၼၢင်းၶမ်းယိၼ်ႇဢွင်ႇလၢတ်ႈ။


ၵူၼ်းဝၢၼ်ႈၵူၼ်းသူၼ် ဢၼ်ၶဝ်ႈပႃးၼႂ်းတူဝ်တႅၼ်းၶွမ်ႊမသျိၼ်ႊၵၢၼ်လိူၵ်ႈတင်ႈ ၵေႃႉၼိုင်ႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- ၵူၼ်းဝၢၼ်ႈၵူၼ်းမိူင်းၼႆႉ ၺႃးၸၢၵ်ႇသိုၵ်းသိူဝ်မႃးၵေႃႈပီယၢဝ်းၶၢဝ်းႁိုင်ယဝ်ႉ၊ ၼႂ်းၸႄႈဝဵင်းမိူင်းသူႈၼႆႉ ဢမ်ႇလႆႈႁဵတ်းၵၢၼ်လိူၵ်ႈတင်ႈၵေႃႈမီးမႃး။ ၵွပ်ႈၼၼ်လႄႈ ထုၵ်ႇလီလုၵ်ႉဢဝ်တီႈ ၼႃႈလိၼ်လမ်သေ ပဵၼ်မႃးၼႃႈလိၼ်ၶွၼ်ႇ၊ လုၵ်ႉတီႈၼႃႈလိၼ်ၶွၼ်ႇသေပဵၼ်မႃးၼႃႈလိၼ်ၶၢဝ်၊ လီလႆႈမီးလွင်ႈထၢင်ႇႁၢင်ႈလွတ်ႈလႅဝ်းမႃးလိူဝ်ၵဝ်ႇ။ ၵွပ်ႈၼၼ် ဢၼ်ဢဝ်လွင်ႈတၢင်းသေဢၼ်ဢၼ် မႃးဢၢင်ႈဢိင်ဝႃႈ - ဢိူင်ႇၼၼ်ႉဢိူင်ႇၼႆႉ ဢမ်ႇလီႁဵတ်းပၢင်လိူၵ်ႈတင်ႈ၊ ထုၵ်ႇလီပူတ်းယႃႉ၊ ဢမ်ႇလီတင်ႈႁူင်းတွတ်ႈၶႅပ်းၸိူဝ်းၼႆႉ မၼ်းဢမ်ႇတူၵ်းထုၵ်ႇယဝ်ႉ- ဝႃႈၼႆ။


ၼေႃႇၽူႈတႅၼ်းပႃႇတီႇသိူဝ်ၽိူၵ်ႇ ယင်းသိုပ်ႇလၢတ်ႈထႅင်ႈဝႃႈ- ႁဝ်းၶႃႈတေပေႉဢမ်ႇပေႉၼၼ်ႉ မၼ်းဢိင်ၼိူဝ်ၵၢင်ၸႂ်ၵူၼ်းဝၢၼ်ႈၵူၼ်းမိူင်းၵူၺ်း၊ ႁဝ်းၵႂႃႇသူၼ်းတုမ်ႁႃသဵင် ၶဝ်ဢမ်ႇမႃးထွမ်ႇၼႆၵေႃႈ ဢဝ်ၵၢင်ၸႂ်ၶဝ်ဝႃႈၵူၺ်း၊ ၶဝ်ႁုမ်သူင်ပႃႇတီႇဢၼ်လႂ်ၵေႃႈ ႁႂ်ႈၶဝ်လႆႈလိူၵ်ႈလွတ်ႈလွတ်ႈလႅဝ်းလႅဝ်း၊ ႁဝ်းၶႃႈတူၺ်းပုၼ်ႈပၢင်ႈၽွၼ်းလီ တႃႇၵူၼ်းဝၢၼ်ႈၵူၼ်းမိူင်းၵူၺ်း။ ပိူင်လူင်မၼ်း ႁဝ်းၶႃႈၼႆႉ တႃႇယုၵ်ႉယွင်ႈပၼ်ပၢႆးပၺ်ၺႃ၊ ပၢႆးယူႇလီႁႂ်ႈပေႃးၶိုၼ်ႈသင်ႉၶိုၼ်ႈသုင်မႃးၼၼ်ႉယဝ်ႉ။ တႃႇတေလူင်းႁႃသဵင်ၼႆႉ မီးတေႃႇထိုင်လိူၼ်မၢတ်ႊၶျ်ၼႆႉသဵင်ႈၵူၺ်း၊ ၶၢဝ်းယၢမ်းၵေႃႈၵိုတ်းၼိုင်ႈဝူင်ႈၵူၺ်းယဝ်ႉ။ တႃႇတေပူတ်းယႃႉ ပၢင်လိူၵ်ႈတင်ႈ ဢမ်ႇႁဵတ်းႁူင်ႈတွတ်ႈၶႅပ်းၼၼ်ႉ လႅပ်ႈတေပဵၼ်ယၢပ်ႇ။ ဢိင်ၼိူဝ်ၵူၼ်းဝၢၼ်ႈၵူၼ်းသူၼ် ယိုၼ်ႈလိၵ်ႈတုၵ်းယွၼ်းသေ လွင်ႈၼႆႉ ၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ် တေလႆႈတႅပ်းတတ်းပၼ်ၵူၺ်းယဝ်ႉ-ဝႃႈၼႆ။


ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈ ၸၢႆးၵျေႃႇ ၵေႃႈလၢတ်ႈဝႃႈ- ႁဝ်းၶႃႈၼႆႉမိူဝ်ႈပီ 2015 ၵေႃႈဢမ်ႇလႆႈတွတ်ႈၶႅပ်း၊ တေႃႈလဵဝ်ၼႆႉ သမ်ႉမႃးဝႃႈတေဢမ်ႇႁဵတ်းပၢင်လိူၵ်ႈတင်ႈၼႂ်းဝၢၼ်ႈ ၼႂ်းဢိူင်ႇႁဝ်းၶႃႈၼႆၼၼ်ႉ မၼ်းဢမ်ႇတူၵ်းထုၵ်ႇ၊ ဢၼ်ႁၢမ်းသုၼ်ႇလႆႈၼႆႉ ပဵၼ်ႁဝ်းၶႃႈၵူၼ်းဝၢၼ်ႈၵူၼ်းမိူင်းၵူၺ်း၊ ႁဝ်းၶႃႈၵေႃႈပဵၼ်ၵူၼ်းဝၢၼ်ႈၵူၼ်းမိူင်း ၸိူင်ႉၼင်ႇပိူၼ်ႈတၢင်ႇတီႈယူႇ ဝႃႈၼႆ။


မိူဝ်ႈဝူင်ႈတီႈ 2 လိူၼ်မၢတ်ႊၶျ်ၼႆႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈ ၸၼ်ႉၸႄႈမိူင်း မႃးႁွတ်ႈထိုင်မိူင်းသူႈသေ မႃးႁူပ်ႉထူပ်းတူဝ်တႅၼ်းပႃႇတီႇ၊ တူဝ်တႅၼ်းၵူၼ်းမိူင်းသေ ဢုပ်ႇဢူဝ်းလႆႈၸႂ်ၵၼ်ဝႃႈ ပိုၼ်ႉတီႈမၢင်တီႈၼႆႉ တေဢမ်ႇလႆႈပႃးပလိၵ်ႈ/သိုၵ်း၊ တေဢဝ်တူဝ်တႅၼ်းၵူၼ်းဝၢၼ်ႈၵူၼ်းမိူင်း တူဝ်တႅၼ်းၶွမ်ႊမသျိၼ်ႊ ၵၢၼ်လိူၵ်ႈတင်ႈသေ တေဢဝ်ၶႅပ်းၵၢင်ၸႂ် ၵႂႃႇတင်ႈႁူင်းတွတ်ႈၶႅပ်းသေ ၸတ်းပၢင်လိူၵ်ႈတင်ႈ။


လွင်ႈၼႆႉ လႆႈၸႂ်ၵၼ်ဝႆႉယဝ်ႉသေတႃႉ ထိုင်မႃးမိူဝ်ႈဝၼ်းတီႈ 21 ပူၼ်ႉမႃးၼႆႉ ၵူၼ်းၼႂ်းပႃႇတီႇ NLD သွင်ၵေႃႉ သမ်ႉမႃး တၢင်ႇလိၵ်ႈတုၵ်းယွၼ်းဝႃႈ ၼႂ်းပိုၼ်ႉတီႈဝၢၼ်ႈလွႆ၊ မေႃႇမႄႈ၊ ၵုၼ်ၵျွင်းၸိူဝ်းၼႆႉ မၼ်းပဵၼ်ပိုၼ်ႉတီႈ ၼႃႈလိၼ် SSPP/SSA ၵုမ်းၵမ်၊ ဢမ်ႇမီးလွင်ႈႁူမ်ႇလူမ်ႈပဵင်းပေႃးတႃႇႁဵတ်းပၢင်လိူၵ်ႈတင်ႈ၊ ႁႂ်ႈပူတ်းယႃႉပႅတ်ႈ ပၢင်လိူၵ်ႈတင်ႈၼႆသေ ၸင်ႇမီးမႃးပၼ်ႁႃဢၼ်ၼႆႉ။


ၵူၺ်းၵႃႈ ၾၢႆႇပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆးတႄႉ ပိုၼ်ၽၢဝ်ႇဝႆႉတႅၵ်ႇလႅင်းၸဵမ်မိူဝ်ႈႁူဝ်ပီၼႆႉဝႃႈ ပႃႇတီႇဢၼ်လူင်းသဵၼ်ႈမၢႆၸိုဝ်ႈသဵင်ဝႆႉပဵၼ်တၢင်းၵၢၼ်ၼၼ်ႉ ပႃႇတီႇလႂ်သေဢမ်ႇဝႃႈ ၶဝ်ႈၶႅင်ႇလိူၵ်ႈတင်ႈလႆႈ လွတ်ႈလွတ်ႈလႅဝ်းလႅဝ်း ၼႂ်းၼႃႈလိၼ်ပိုၼ်ႉတီႈ SSPP/SSA ၵုမ်းၵမ်။ ပေႃးလူင်းႁႃသဵင်ၵေႃႈ ႁႂ်ႈပွင်ႇၶၢဝ်ႇတီႈ SSPP/SSA ႁူႉႁၼ်ၸွမ်းၵူၺ်းၵေႃႈလႆႈယဝ်ႉ။ SSPP/SSA ၼႆႉ ဢမ်ႇမီးပေႃႇလသီႇ တႃႇတေယႃႉ ပၢင်လိူၵ်ႈတင်ႈမႃးသေပွၵ်ႈ၊ မိူဝ်ႈပီ 2010 ၼၼ်ႉၵေႃႈ ၼႂ်းပိုၼ်ႉတီႈ SSPP/SSA ၵုမ်းၵမ်ၼႆႉ ႁဵတ်းပၢင်လိူၵ်ႈတင်ႈမႃးလွတ်ႈလွတ်ႈလႅဝ်းလႅဝ်းၼင်ႇၵဝ်ႇ- ၼႆယဝ်ႉ။