ပႃႇတီႇသိူဝ်ၽိူၵ်ႇ လူင်းသူၼ်းတုမ်ႁႃသဵင်တီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ငဝ်ႈငုၼ်းဝၢၼ်ႈႁႆး



တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး ႁိုဝ် ပႃႇတီႇႁူဝ်သိူဝ် (SNDP) လူင်းသူၼ်းတုမ်ႁႃသဵင်တီႈငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) တီႈဝဵင်းမႂ်ႇဝၢၼ်ႈႁႆး။ မီးၵူၼ်းၶဝ်ႈႁူမ်ႈထွမ်ႇငိၼ်း တီႈပၢင်ႁႃသဵင် 400 ပၢႆ-ၼႆယဝ်ႉ။


ၼႂ်းၸႄႈဝဵင်းမိူင်းသူႈၼႆႉ ၾၢႆႇၼိုင်ႈၵေႃႈ မိူဝ်ႈၽွင်း 3 ဢိူင်ႇ မိူၼ်ၼင်ႇဝၢၼ်ႈလွႆ၊ မႄႈမေႃႈ၊ ၵုၼ်ၵျွင်းၸိူဝ်းၼႆႉ ထုၵ်ႇပႃႇတီႇၼူၵ်ႉယုင်း NLD တႅမ်ႈလိၵ်ႈတၢင်ႇထိုင်ၶွမ်ႊမသျိၼ်ႊၵၢၼ်လိူၵ်ႈတင်ႈ ႁႂ်ႈပူတ်းယႃႉပႅတ်ႈ ပၢင်လိူၵ်ႈတင်ႈၼၼ်ႉ တီႈဝဵင်းၵေးသီးတႄႉ လႆႈလူင်းသူၼ်းတုမ်ႁႃသဵင်လႆႈထၢင်ႇႁၢင်ႈလွတ်ႈလႅဝ်း၊ ပႃႇတီႇသိူဝ်ၽိူၵ်ႇ ယင်းလူင်းႁႃသဵင်ပႃးတီႈငဝ်ႈငုၼ်းဝၢၼ်ႈႁႆးဝႆႉယူႇ- ၼႆယဝ်ႉ။


ၵဵဝ်ႇၵပ်းပၢင်လိူၵ်ႈတင်ႈသွမ်ႈၼႆႉ ယူႇတီႈၽူႈၼမ်းၼႃႈ SSPP/SSA ၸွမ်သိုၵ်းလူင်သိူဝ်ထႅၼ်ႈ လၢတ်ႈဝႃႈ- ယူႇတီႈတပ်ႉသိုၵ်းၸိုင်ႈတႆးသေ ယိၼ်းလီႁပ်ႉတွၼ်ႈပၢင်လိူၵ်ႈတင်ႈ၊ ပၢင်လိူၵ်ႈတင်ႈၼႆႉမၼ်းလမ်ႇလွင်ႈ တႃႇၵူၼ်းမိူင်း။ ၵွပ်ႈၼၼ်လႄႈ ၼင်ႇႁိုဝ်တေမီးၽွၼ်းလီတႃႇၵူၼ်းမိူင်းၼၼ်ႉ ႁဝ်းၶႃႈတိုၼ်းဢွၵ်ႇလိၵ်ႈ ပိုၼ်ၽၢဝ်ႇဝႆႉၸဵမ်လႂ်ယဝ်ႉ၊ လွင်ႈဝႃႈႁႂ်ႈလႆႈလိူၵ်ႈတင်ႈထၢင်ႇႁၢင်ႈလွတ်ႈလႅဝ်းၼႆၼၼ်ႉ။ ၼႂ်းပိုၼ်ႉတီႈႁဝ်းၶႃႈၵုမ်းၵမ်ၼႆႉ ႁဝ်းပွႆႇဝႆႉပၼ်ထၢင်ႇႁၢင်ႈလွတ်ႈလႅဝ်း- ဝႃႈၼႆ။


တီႈငဝ်ႈငုၼ်းဝၢၼ်ႈႁႆး ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA)ၼႆႉ ႁၢင်ႈႁႅၼ်းဝႆႉ တႃႇတေၸတ်းပၢင်လိူၵ်ႈတင်ႈတီႈ 2 တီႈ၊ တီႈၼိုင်ႈပဵၼ်တီႈ ႁူင်းႁဵၼ်းၸၼ်ႉသုင်တီႈဝၢၼ်ႈႁႆး၊ ထႅင်ႈတီႈၼိုင်ႈ ပဵၼ်တီႈတၢင်းၽႄပႃၶီး- ၼႆယဝ်ႉ။




 
© 2012 All Rights Reserved | Asean Celebrity | Fonts @ AtFonts | Free Templates