ပိူင်လူင်မၼ်း ယိူင်းဢၢၼ်းၶႂ်ႈႁႂ်ႈၵူၼ်းၼုမ်ႇႁဝ်းၶႃႈ ၸၢဝ်းၶိူဝ်းႁဝ်းၶႃႈႁႂ်ႈပူၵ်းပွင် ႁဵတ်းၵၢၼ်ပၼ်လႆႈ ၶိုၼ်း ၵူၼ်းမိူင်းႁဝ်းၶႃႈၸိူဝ်ႉၸၢတ်ႈဝၢၼ်ႈမိူင်းႁဝ်းၶႃႈလႄႈ   ၸင်ႇလႆႈပူၵ်းတင်ႈ ႁူင်းႁဵၼ်းၵူၼ်း ၼုမ်ႇ ၸိူဝ်ႉၸၢတ်းၸိုင်ႈတႆးမႃး ၶႃႈဢေႃႈ။ ၼင်ႇႁိုဝ်ၵူၼ်းၼုမ်ႇပေႃးတေမီးၼမ်ႉ ၵတ်ႉပွင်ႇၸႂ် ၵၢၼ်ဝၢၼ်ႈၵၢၼ်မိူင်း ပွင်ႇၸႂ်ၵၢၼ်ၸိူဝ်ႉၸၢတ်ႈဝၢၼ်ႈမိူင်း ။ မိူဝ်းၼႃႈမႃးၸၢင်ႈပဵၼ် ၽူႈဢွၼ်ႁူဝ်လီ လႆႈ ။ ၵူၼ်းၼုမ်ႇတင်း ယိင်းတင်းၸၢႆး ႁဝ်းၶႃႈၶႂ်ႈပူၵ်းပွင်ပၼ် ႁႂ်ႈၶဝ်ပေႃးပဵၼ်ၽူႈႁူမ်ႈႁဵတ်းႁူမ်ႈသၢင်ႈ ၼင်ႇႁိုဝ်ဝၢၼ်ႈမိူင်းႁဝ်း ၶႃႈ   တူင်ႇဝူင်းၵူၼ်းႁဝ်းၶႃႈ လႄႈလွင်ႈသုၼ်ႇလႆႈသုၼ်ႇပဵၼ်ၵူၼ်းမိူင်းႁဝ်းၶႃႈ  ႁႂ်ႈမီးလွင်ႈ ၶိုၼ်ႈယႂ်ႇမႃး  ၼႆၶႃႈဢေႃႈ။


ယွၼ်ႉပိူဝ်ႈငဝ်းလၢႆးဝၢၼ်ႈမိူင်းသေ ၵူၼ်းၼုမ်ႇဢၼ်တိုၵ်ႉၶႂ်ႈလႆႈ တိုဝ်ႉတၢင်းၼႆႉမီးထႅင်ႈတၢင်းၼမ်။ လွင်ႈယၢပ်ႇၽိုတ်ႇတႄႉ  မီးဢၼ်ဝႃႈ ႁဝ်းၶႃႈဢမ်ႇႁပ်ႉလႆႈၵူၼ်းၼုမ်ႇ ပဵင်းၼင်ႇ ၵၢင်ၸႂ်ၶႂ်ႈႁပ်ႉ။ မိူၼ်ၸိူင်ႉၼင်ႇၼိုင်ႈပီၼိုင်ႈပီၼႆႉ မီးၵူၼ်းယိုၼ်ႈယွၼ်းမႃး130 ။ ႁဝ်းၶႃႈႁပ်ႉလႆႈ မွၵ်ႈ 30 ပၢႆၵူၺ်းၶႃႈ။ ပေႃးပဵၼ်လႆႈ ၶႂ်ႈႁပ်ႉၼမ်လိူဝ်ၼႆႉ  ၶႃႈဢေႃႈ။ ၵူၺ်းၵႃႈၸိူင်ႉႁိုဝ်ၵေႃႈယဝ်ႉဢၼ်လႆႈ ပူၵ်းပွင်မႃးၶၢဝ်းတၢင်း 16 ပီပၢႆၼႆႉၵေႃႈ လႆႈႁၼ်ၵူၼ်းၼုမ်ႇပဵၼ်ဢဵၼ်ႁႅင်းလႄႈတူင်ႉၼိုင်တွၼ်ႈတႃႇ ၵူၼ်းတၢင်း ၼမ်တၢင်းလၢႆ ဢၼ်လႆႈၶိုၼ်းၵႂႃႇပူၵ်းပွင်ပၼ်တူင်ႇဝူင်းၵူၼ်းႁဝ်းၶိုၼ်းၼႆၵေႃႈႁူမ်ၸူမ်း ၸွမ်းတေႉတေႉ ၶႃႈဢေႃႈ။


ၼင်ႇႁိုဝ်ပေႃးတေတိုၵ်းလႆႈၵူႈၾၢႆႇၾၢႆႇၼၼ်ႉ  ၼမ်ႉၵတ်ႉပိုၼ်ႉထၢၼ် ၵူၼ်းၼုမ်ႇ ႁဝ်းၶႃႈၼႆႉ လမ်ႇလွင်ႈတေႉတေႉ ။  ဢၼ်ၵူၼ်းၼုမ်ႇၼႂ်းမိူင်းတႆး လႆႈမႃးလဵပ်ႈႁဵၼ်းတီႈႁဝ်းၶႃႈသေ မိူဝ်းၵႂႃႇ ၶိုၼ်းၼၼ်ႉ လႆႈႁၼ်ပဵၼ်ၽွၼ်းလီ တႄႉတႄႉ။ ယိူင်းဢၢၼ်းႁဝ်းၶႃႈ ၶႂ်ႈႁႂ်ႈၸွတ်ႇတူဝ်ႈလႆႈလိူဝ် ၼႆႉ ၊ ၶႂ်ႈႁႂ်ႈလႆႈႁူမ်ႈမိုဝ်းၵၼ်သေ သိုပ်ႇပူၵ်းပွင်ၵူၼ်းမိူင်းႁဝ်းၵႂႃႇၼမ်လိူဝ်ၼႆႉ။


ၼႂ်းတိုဝ်ႉတၢင်းဝၼ်းၼၢင်းယိင်းလုမ်ႈၾႃႉၼႆႉသေ သင်ႇထိုင်တင်းၵူၼ်းၼုမ်ႇယိင်းၵူၼ်းၼုမ်ႇ ၸၢႆးတင်းသဵင်ႈ  ဢွၼ်ၵၼ်ႁူမ်ႈမိုဝ်းၵၼ်  တူင်ႉတိုၼ်ႇ ။   ၶႂ်ႈႁႂ်ႈၵူၼ်းၼုမ်ႇႁဝ်းၶႃႈမီးလွင်ႈၶဝ်ႈၸႂ်ၼိူဝ် ၵၢၼ်ၵူၼ်း တၢင်းၼမ် သေသိုပ်ႇႁဵတ်းၵႂႃႇထႅင်ႈ။  ၵူၼ်းၼုမ်ႇႁဝ်းမီးၼမ်ႉၵတ်ႉႁဵတ်းလႆႈ  ထူပ်းတၢင်း ယၢပ်ႇ ၽိုတ်ႇသင်ၵေႃႈ  ၶႂ်ႈႁႂ်ႈၵူၼ်းၼုမ်ႇႁဝ်းၶႃႈ ႁူမ်ႈမိုဝ်းၵၼ် သိုပ်ႇတေႃႇသူႈၵႂႃႇၼင်ႇဢၼ် ၵူၼ်းလူင်ႁဝ်းၶဝ်ၼႄတၢင်းဝႆႉ ၼၼ်ႉ ႁႂ်ႈဝၢၼ်ႈ မိူင်းႁဝ်းပေႃးၶိုၼ်ႈယႂ်ႇမႂ်ႇသုင်ၼင်ႇယိူင်း ဢၢၼ်းႁဝ်းမီးၼၼ်ႉၼႆၶႃႈဢေႃႈ။