ၵွင်တိုၼ်းၵၢင်ၸွႆႈၸၢတ်ႈ ၵဵင်းမႆႇ ႁၢင်ႈႁႅၼ်းပိူဝ်ႈတႃႇဢဝ်ၶူဝ်းၶွင်ၶိူင်ႈၸႂ်ႉ၊ ၶူဝ်းၶွင်ၵိၼ်ယႅမ်ႉ ၵႂႃႇၸွႆႈထႅမ်ပီႈၼွင်ႉပွတ်းလႅၼ်လိၼ်၊ ၼိူဝ်လွႆတႆးလႅင်း ပႃးၸဵမ်ၽူႈႁၢပ်ႇၵိုတ်ႉၵၢၼ်ၸိူဝ်ႉၸၢတ်ႈ။

ဝၼ်းတီႈ 02/03/2017 ယၢမ်းဝၢႆးဝၼ်း ၵွင်တိုၼ်းၸွႆႈၸိူဝ်ႉၸၢတ်ႈ ဢၼ်ပၵ်းမူႇၸုမ်းဝႆႉၼႂ်းၵဵင်းမႆႇ မိူင်းၸိုင်ႈထႆး၊ လႆႈၸတ်းပၢင်ႁႅၼ်းတၢၼ်း ယၢတ်ႇၼမ်ႉၶႂမ်ႈတဝ်ႈ ၶူဝ်းၶွင်ၶိူင်ႈၵိၼ်ယႅမ်ႉ ၶိူင်ႈၸႂ်ႉသွႆ ၸိူဝ်းၵဵပ်းလႆႈတီႈပီႈၼွင်ႉတႆး ဢိၵ်ႇပီႈၼွင်ႉၽူႈမီးၼမ်ႉၸႂ်ၸေႇတၼႃႇ ၼႂ်းမိူင်းထႆး ၼႂ်းၸႄႈတွၼ်ႈၵဵင်းမႆႇ လမ်းပုၼ်း လၢႆလၢႆၸႄႈဝဵင်းၵမ်ႉထႅမ်ၸွႆႈပၼ်၊ တီႈဝတ်ႉၻွၼ်းၸၼ်ႇ (ၻွၼ်းၵျၼ်ႇ) ဢိူင်ႇတႃႈသႃလႃး ၸႄႈဝဵင်းမိူင်း ၵဵင်းမႆႇ။ ဝၢႆးယၢတ်ႇၼမ်ႉၶႂမ်ႈတဝ်ႈယဝ်ႉၵေႃႈ ႁၢင်ႈႁႅၼ်းတေႃႉသူင်ႇ ၵႂႃႇၸႅၵ်ႇပၼ်ပီႈၼွင်ႉ ၸိူဝ်းထူပ်းတၢင်းယၢပ်ႇၽိုတ်ႇပွတ်းလႅၼ်လိၼ် ၼိူဝ်လွႆတႆးလႅင်း။


ၶူဝ်းၶွင်တင်းမူတ်းၼႆႉ ၵႂႃႇၸႅၵ်ႇပၼ်တီႈပီႈၼွင်ႉပွတ်းလႅၼ်လိၼ် မိူၼ်ၼင်ႇ ၵူၼ်းပၢႆႈၽေး၊ ၵူၼ်းၸိူဝ်းယူႇၼႂ်းထိူၼ်ႇ ၵႆၵၢတ်ႇၵႆသႃး၊ ၵူၼ်းတူၵ်းၵိၼ်းၶၢၼ်ၸႂ်၊ ႁူင်းႁဵၼ်းၸိူဝ်ႉၸၢတ်ႈ ၼိူဝ်လွႆတႆးလႅင်း ဢၼ်မီးလုၵ်ႈဢွၼ်ႇၽၢၼ်ပေႃႈမႄႈတင်းၼမ် ၶိုၼ်ႈႁဵၼ်းဝႆႉလႄႈ ပႃးၸဵမ်တီႈႁူင်းယႃၸိူဝ်းၼႆႉ၊ ၵႂႃႇၸႅၵ်ႇပၼ်ပႃးၶူဝ်းၼုင်ႈတၢင်းမႆၸိူဝ်းၼႆႉၸွမ်း- ၸၢႆးၽူင်း ၽူႈဢွၼ်ႁူဝ်ၵေႃႇတင်ႈ ၵွင်တိုၼ်းၸွႆႈၸိူဝ်ႉၸၢတ်ႈ ယၢမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ။


ၵွင်တိုၼ်းၵၢင်ၸွႆႈၸၢတ်ႈ ႁိုဝ် ၵွင်တိုၼ်းၸွႆႈၸိူဝ်ႉၸၢတ်ႈၼႆႉ ၼွၵ်ႈၼိူဝ်သေ ၸွႆႈထႅမ်ပၼ်ၵူၼ်းဝၢၼ်ႈၵူၼ်းမိူင်း ၸိူဝ်းတူၵ်းတၢင်းယၢပ်ႇၽိုတ်ႇယဝ်ႉ လႆႈၸွႆႈထႅမ်ပႃးတီႈ ၽူႈႁၢပ်ႇၵၢၼ်ၸိူဝ်ႉၸၢတ်ႈ တပ်ႉသိုၵ်း၊ မိူၼ်ၼင်ႇတီႈၵွင်းမုင်ႈမိူင်းလႄႈသင်၊ တီႈလွႆၵေႃႇဝၼ်း လွႆၵေႃႇမိူင်း ဢၼ်တေႃႇၼႃႈၸႄႈတွၼ်ႈၵဵင်းႁၢႆး ၸိူဝ်းၼႆႉၵေႃႈၵႂႃႇၸွႆႈထႅမ်ပၼ်ၼင်ႇၵဝ်ႇ။


တင်ႈတႄႇဢဝ်ႁူဝ်ပီ 2016 မႃး ပေႃးထိုင်မႃးဝၼ်းတီႈ 2 ၵူႈလိူၼ် လႆႈၼမ်းဢဝ် ၶူဝ်းၶွင် ၶဝ်ႈၼမ်ႉတၢင်းၵိၼ် ၶိူင်ႈၸႂ်ႉၶူဝ်းသွႆၵူႈလွင်ႈလွင်ႈ ၸိူဝ်းႁႃႁပ်ႉတၢၼ်းလႆႈတီႈပီႈၼွင်ႉၽူႈႁၵ်ႉၸၢတ်ႈ ႁွမ်းတၢၼ်းပၼ်ၼၼ်ႉ လူႇတၢၼ်းယၢတ်ႇၼမ်ႉၶႂမ်ႈတဝ်ႈ တီႈသင်ၶၸဝ်ႈဝတ်ႉၻွၼ်းၸၼ် (ၻွၼ်းၵျၼ်ႇ)။ ဝၢႆးၼၼ်ႉ ပေႃးထိုင်မႃးဝၼ်းတီႈ 7 ၵူႈလိူၼ် လႆႈၼမ်းဢဝ်လူတ်ႉၵႃးလၢႆလၢႆလမ်း ႁူမ်ႈၵၼ်တေႃႉသူင်ႇတၢင်ႇၵႂႃႇ ၸွႆႈထႅမ်ပီႈၼွင်ႉၸွမ်းလႅၼ်လိၼ်၊ ပွၵ်ႈၼႆႉပဵၼ်ပွၵ်ႈၵမ်းထူၼ်ႈ 14 ယဝ်ႉ-လႆႈႁူႉၸွမ်းၼင်ႇၼႆ။


ၶူဝ်းၶွင်ၸိူဝ်းၵႂႃႇၸွႆႈထႅမ်ၸိူဝ်းၼႆႉ ယူႇတီႈ ၵွင်တိုၼ်းၵၢင်ၸွႆႈၸၢတ်ႈသေ ႁူမ်ႈၵၼ်ၵႂႃႇႁႃယွၼ်းႁပ်ႉတၢၼ်း (လူႇၶၢမ်ႇ) သပ်းလႅင်းတိုၼ်းသူၼ်းပီႈၼွင်ႉတႆး ၸိူဝ်းႁွတ်ႈၼႂ်းၵဵင်းမႆႇ မိူင်းထႆးၸိူဝ်းၼႆႉ လၢႆတီႈလၢႆတၢင်း မိူၼ်ၼင်ႇၼႂ်းၸႄႈဝဵင်းႁၢင်ၻူင်း၊ ၸႄႈဝဵင်းမႄႈရိမ်း၊ ၸၢင်ႉၶဵၼ်ႉ၊ ၸႄႈဝဵင်းသၼ်သၢႆး လႄႈ ၼႂ်းၸႄႈတွၼ်ႈ လမ်းပုၼ်း ၸိူဝ်းၼႆႉ၊ ဢမ်ႇဝႃႈသုၼ်ႇတူဝ်/ မုၵ်ႉၸုမ်း။ ၶူဝ်းၶွင်ၵမ်ႈၼမ်ႁပ်ႉဢဝ် မိူၼ်ၼင်ႇၶဝ်ႈသၢၼ်၊ ၼမ်ႉမၼ်း၊ ၵိူဝ်၊ ၵိူဝ်ဝၢၼ်၊ ထူဝ်ႇၼဝ်ႈ၊ မၢၵ်ႇၽိတ်ႉ၊ ၽွင်ဝၢၼ်၊ ႁူဝ်မီႇၽိူၵ်ႇ မီႇလႅင်၊ ၶိင်၊ ပႃဢႅပ်ႇ၊ ပႃႁႅင်ႈ၊ ထူဝ်ႇလိူင်၊ ၶဝ်ႈသွႆးဢေႃႇတေႃႇ (မႃးမႃႉ)၊ ၶဝ်ႈသဵၼ်ႈၶဝ်ႈသွႆးႁႅင်ႈ၊ ပႃးၸဵမ်ၼမ်ႉၼူမ်းဢႅပ်ႇ ၼမ်ႉသူမ်ႈၼမ်ႉဝၢၼ်ၸိူဝ်းၼႆႉ လၢႆၸိူဝ်ႉလၢႆလွင်ႈ။ ပေႃးလႆႈငိုၼ်းတွင်းၵေႃႈ ၶိုၼ်းဢဝ်မႃးသိုဝ်ႉ ပဵၼ်ၶူဝ်းၶွင်- ၼႆယဝ်ႉ။


ၽူႈဢွၼ်ႁူဝ်ၵေႃႇတင်ႈ ၵွင်တိုၼ်းၸွႆႈၸၢတ်ႈ ယၢမ်ႈလၢတ်ႈၼႄတၢင်းယိူင်းဢၢင်းဝႃႈ- 1.ပိူဝ်ႈတႃႇၸွႆႈထႅမ် ၵူၼ်းယူႇ ၼႂ်းထိူၼ်ႇၼႂ်းၶိူဝ်း ၸိူဝ်းၵႆၵၢတ်ႇၵႆဝဵင်း ၶၢၼ်ၸႂ်လွင်ႈၵိၼ်လွင်ႉယႅမ်ႉ။ 2.ပိူဝ်ႈတႃႇႁႂ်ႈမီး သဵၼ်ႈမၢႆငိုၼ်းၵၢင်သေ ႁႂ်ႈမီးငိုၼ်းၸွႆႈထႅမ်ၵူၼ်းထူပ်းၽေး ၼႂ်းမိူင်းတႆး။ 3.ပိူဝ်ႈတႃႇ ႁႂ်ႈပေႃးပိုတ်ႇလႆႈႁူင်းႁဵၼ်း သွၼ်လိၵ်ႈလၢႆးၶၢဝ်းမႆႈ တီႈဝတ်ႉၻွၼ်းၵျၼ်ႇ ၼႂ်းၵဵင်းမႆႇၸိုင်ႈထႆး ၸိူဝ်းၼႆႉ-ဝႃႈၼႆ။


ပိူဝ်ႈတႃႇပီႈၼွင်ႉတီႈၵႆ ၼႂ်းမိူင်းၼွၵ်ႈမိူင်း ၶႂ်ႈႁွမ်းလူႇတၢၼ်းဝတ်ႉထုငိုၼ်းတွင်းမႃးၼၼ်ႉ ၵွင်တိုၼ်းၵၢင်ၸွႆႈၸၢတ်ႈၼႆႉ ပိုတ်ႇဝႆႉပၼ်သဵၼ်ႈမၢႆယေးငိုၼ်း ဢၼ်ၼိုင်ႈယဝ်ႉ။ သင်ဝႃႈ ၸဝ်ႈၽူႈၵူၼ်းလီၵေႃႉလႂ် ၶႂ်ႈဢူၼ်းငိုၼ်းႁွမ်းလူႇႁွမ်းတၢၼ်း လႄႈၶႂ်ႈႁူႉလွင်ႈႁူဝ်ယွႆႈတႅတ်ႈတေႃးၸိုင် ၵပ်းသိုပ်ႇတိတ်းတေႃႇတွင်ႈထၢမ် လႆႈတီႈ ၸၢႆးၽူင်း တီႈမၢႆၾူၼ်ႊ 084 376 8361 ။


ၵွင်တိုၼ်းၸွႆႈၸိူဝ်ႉၸၢတ်ႈၼႆႉ ၵူၼ်းၼုမ်ႇၽူႈႁၵ်ႉၸၢတ်ႈ ၸိူဝ်းႁွတ်ႈၽႅဝ်ၼႂ်းၸိုင်ႈထႆး လႆႈၸႂ်ၵၼ်ႁူမ်ႈ ၶွတ်ႇၽွတ်ႈၵေႃႇတင်ႈမႃး ၽွင်းႁူဝ်ပီ 2016။ ဝၢႆးသေၶွတ်ႇၽွတ်ႈၶိုၼ်ႈမႃးယဝ်ႉ လႆႈႁႃၵဵပ်းၶူဝ်းၶွင် ၵိၼ်ၶွင်ၸႂ်ႉ ႁႅင်းငိုၼ်းတွင်းတီႈ ၽူႈႁၵ်ႉၸၢတ်ႈၶဝ်ၸွႆႈထႅမ်မႃး။ ပေႃးပဵၼ်ငိုၼ်းတွင်းၵေႃႈ ၶိုၼ်းဢဝ်သိုဝ်ႉ ပဵၼ်ၶူဝ်းၶွင်ၵိၼ်ယႅမ်ႉ။ မိူဝ်ႈလဵဝ် လုၵ်ႈၸုမ်းမီးၼပ်ႉႁူဝ်ပၢၵ်ႇၵေႃႉ၊ ၵမ်ႈၼမ် ပဵၼ်ၵူၼ်းၼုမ်ႇ ၸိူဝ်းယူႇၼႂ်းၸႄႈတွၼ်ႈၵဵင်းမႆႇ ၸႄႈဝဵင်းႁၢင်ၻူင်း၊ ၸႄႈဝဵင်းမႄႈရိမ်း၊ ၸႄႈဝဵင်းသၼ်သၢႆး၊ ၸၢင်ႉၶဵၼ်ႉ လႄႈ ၸႄႈတွၼ်ႈလမ်းပုၼ်း။