ၸွမ်းၼင်ႇၾိင်ႈထုင်းၸၢဝ်းပုတ်ႉထသႃသၼႃ ၼပ်ႉယမ်ၵိူဝ်းလီပုတ်ႉထသႃသၼႃသေ မိူၼ်ၼင်ႇတီႈၼႂ်းဝတ်ႉဝႃး ႁႄႉႁၢမ်ႈ ဢမ်ႇပၼ်ၽူႈယိင်းလႆႈၶိုၼ်ႈၼိူဝ်ၼႃႈၶႃႇပၢၼ်းလႄႈသင်၊ ၼႂ်းသိမ်ႇလႂ်ၸဵမ်ၸိူဝ်းၼႆႉလႄႈသင် ယူႇတီႈၼၢင်းယိင်းသေၶႂ်ႈတွပ်ႇဝႃႈ လွင်ႈၸိူင်ႉၼႆၼႆႉ ပဵၼ်မႃးပၢၼ်သိုပ်ႇပၢၼ် ၸဵမ်မိူဝ်ႈပူႇဢွၼ်ႁဵတ်းမႃး ယႃႈႁဵတ်းဝႆႉ။ ယွၼ်ႉၼၼ် တီႈၼႂ်းသိမ်ႇလႂ် တီႈၸၼ်ႉသုင်လႂ်ၸိူဝ်းၼႆႉ ပေႃးႁဝ်းၶႃႈၵႂႃႇၶိုၼ်ႈဝတ်ႉၵျွင်းၼႆၸိုင် လႆႈႁၼ်ဝႃႈၼၢင်းယိင်းလႆႈၼင်ႈတီႈၼိုင်ႈ၊ ၵူၼ်းၸၢႆးလႆႈၼင်ႈတၢင်းၼိူဝ်ထႅင်ႈဢိတ်းၼိုင်ႈ။


တၢင်းႁၼ်ထိုင်တႄႉ မိူၼ်ၼင်ႇၼႂ်းသိမ်ႇလႂ် ဢွင်ႈတီႈၶိုၵ်ႉၶမ်ႇဢၼ်ႁဝ်းၶႃႈၵိူဝ်းယမ်တႄႉတႄႉၼႆႉ ၼၢင်းယိင်း ႁဝ်းၶႃႈၼႆႉ ဢမ်ႇၶိုၼ်ႈၵႂႃႇ၊ ယွၼ်ႉဝႃႈၼၢင်းယိင်းၼႆႉ ပေႃးဝႃႈမီးၼႃႈလိူၼ်ႁႃႉၸိူဝ်းၼႆႉ တေႁဵတ်းႁႂ်ႈၶူဝ်းၶွင် ၶိုၵ်ႉယႂ်ႇလမ်ႇလွင်ႈ ဢၼ်မီးဢူမီးၽုင်းၸိူဝ်းၼၼ်ႉ တေႁၢႆၵႂႃႇပႅတ်ႈ။ ၵွပ်ႈၼၼ် ယုမ်ႇယမ်မႃးၸိူင်ႉၼၼ်သေ ၸင်ႇမီးလွင်ႈႁႄႉႁၢမ်ႈ။


ဢမ်ႇၵွမ်ႉၵႃႈၽူႈယိင်းၵူၺ်း ဢၼ်ထုၵ်ႇႁႄႉႁၢမ်ႈ ဢွင်ႈတီႈမၢင်တီႈယင်းဢမ်ႇပၼ်ၵူၼ်းၸၢႆးၶိုၼ်ႈၵႂႃႇ။ ယွၼ်ႉၼၼ်လႄႈ ယူႇတီႈၼၢင်းယိင်းသေ ဢမ်ႇမီးလွင်ႈၶွင်ႉၶမ်သင် ၵဵဝ်ႇၵပ်းလူၺ်ႈလွင်ႈၸိူင်ႉၼႆ။ ၵွပ်ႈဝႃႈ ပဵၼ်တီႈၵိူဝ်းယမ်ႁဝ်းၶႃႈလႄႈ ထုၵ်ႇလီလႆႈႁဵတ်းၸွမ်းၼင်ႇၾိင်ႈထုင်း ပုတ်ႉထသႃသၼႃ ဢၼ်တိုဝ်းၵမ်ႁဵတ်းမႃးဝႆႉၼၼ်ႉ။


လွင်ႈဢၼ်ၵိူတ်ႇမႃးပဵၼ်ၽူႈၸၢႆး လႆႈႁဵတ်းသၢင်ႇႁဵတ်းလွင်း၊ ပေႃးပဵၼ်ၼၢင်းယိင်းသမ်ႉဢမ်ႇလႆႈႁဵတ်းၼၼ်ႉ ပၢႆးႁၼ်လွင်ႈၼႆႉမၼ်းငၢႆႈငၢႆႈၵူၺ်း။ ပဵၼ်ၵူၼ်းၸၢႆး ၼင်ႇႁိုဝ်ပေႃးတေႁဵတ်းၸွမ်းၼင်ႇပုၼ်ႈၽွၼ်းၵူၼ်းၸၢႆး တဵမ်ထူၼ်ႈၼၼ်ႉၵူၺ်း၊ လွင်ႈၼၢင်းယိင်းၵေႃႈ ၶၢမ်ႇသၢင်ႇၶၢမ်ႇလွင်းဢမ်ႇလႆႈၼၼ်ႉ ၸႂ်လမ်ၼႃႇ၊ သုၼ်ႇလႆႈသုၼ်ႇပဵၼ်တေလႆႈပဵင်းၵၼ်ဢိူဝ်ႈ ၼႆၵေႃႈဢမ်ႇၸႂ်ႈၼင်ႇၵဝ်ႇ။ ယွၼ်ႉဝႃႈ ၼၢင်းယိင်းႁဝ်းၶႃႈၵေႃႈ ပေႃးႁဝ်းၵိူဝ်းယမ်ပုတ်ႉထၽႃႇသႃႇ ၶိုင်ပွင်ႁဵတ်းသၢင်ႈလွင်ႈလီ၊ ပဵၼ်ၵူၼ်းလီ၊ ပႆသဵၼ်ႈတၢင်းလီ၊ တိုဝ်းၵမ်လီ၊ ဢမ်ႇႁဵတ်းပူၼ်ႉပႅၼ်၊ ဢမ်ႇႁဵတ်းၽိတ်းၸိူဝ်းၼႆႉၵေႃႈ ထုၵ်ႇမႅၼ်ႈယဝ်ႉ။ ဢမ်ႇမီးလွင်ႈၶွင်ႉၶမ်သင် ၵဵဝ်ႇၵပ်းလွင်ႈၼႆႉ။


ၸူဝ်ႈပၢၼ်ၵိူတ်ႇမႃးပဵၼ်ၽူႈယိင်းၼႆႉ လွင်ႈသၢင်ႇၵေႃႈဢမ်ႇလႆႈႁဵတ်းၸၢင်းၵေႃႈဢမ်ႇလႆႈႁဵတ်း။ ပေႃးလႆႈႁဵတ်းသၢင်ႇပေႇၼမ်ႉၼူမ်းမႄႈၶွၼ်ၼိုင်ႈ၊ ပေႃးလႆႈႁဵတ်းၸၢင်း ပေႇၼမ်ႉၼူမ်းမႄႈတင်းသွင်ၶွၼ်ၼၼ်ႉ ပေႃးပဵၼ်ၼၢင်းယိင်းသမ်ႉ ထုၵ်ႇၼီႈၵေႃႉပဵၼ်မႄႈဝႆႉႁႃႉၼႆၼၼ်ႉ ဢမ်ႇထုၵ်ႇၶႃႈ။ ၵူၼ်းၸၢႆးၼႆႉၵမ်ႈၼမ် ဢမ်ႇပေႃးလႆႈတူၺ်းလူလွမ်ၼႂ်းၼႃႈႁိူၼ်းတႃယေးလႆႈ မိူၼ်ၼင်ႇၼၢင်းယိင်း ၶႃႈဝူၼ်ႉဝႃႈၸိူင်ႉၼၼ်။ ၼၢင်းယိင်းႁဝ်းၶႃႈၼႆႉ မီးလွင်ႈဢူၼ်ႈၼူၼ်းဢူၼ်ႈဢွၼ်ႇ မေႃၶိုင်ပွင်ႁဵတ်းသၢင်ႈၸွႆႈၼႃႈၵၢၼ်ႁိူၼ်း၊ ႁဵတ်းႁႂ်ႈလွင်ႈယူႇသၢင်ႈၵိၼ်သဝ်း၊ ဢမ်ႇဝႃႈလွင်ႈၵိၼ်တၢင်းယႅမ်ႉ ပတ်းၽဵဝ်ႈမူတ်းသႂ်၊ ယူႇၸွမ်းၵေႃႉပဵၼ်ပေႃႈမႄႈ ၸိူဝ်းၼႆႉ ၼမ်လိူဝ်သေၵူၼ်းၸၢႆးလူးၵွၼ်ႇ။ ယွၼ်ႉၼၼ်လႄႈ ႁဝ်းၶႃႈပဵၼ်ၵူၼ်းလီ ႁူႉၵုၼ်းမုၼ်ငဝ်း တွပ်ႇတႅၼ်းၶိုၼ်းၵုၼ်းမုၼ်ပေႃႈမႄႈလႄႈ လူလွမ်တူၺ်းထိုင်ၵေႃႉပဵၼ်ပေႃႈမႄႈ၊ ဢၼ်ၼႆႉၵေႃႈလႆႈဝႃႈ ႁဝ်းၶႃႈႁဵတ်းလွင်ႈလီ၊ ပဵၼ်ၵူၼ်းလီ၊ ပဵၼ်ၽွၼ်းလီတွၼ်ႈတႃႇၼၢင်းယိင်းယူႇၶႃႈ။