သင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ဢွၵ်ႇလိၵ်ႈပိုၼ်ၽၢဝ်ႇ ႁပ်ႉသဵၼ်ႈသၢႆမၢႆ လုၵ်ႈႁဵၼ်းမႂ်ႇ  တႃႇမႃးၶဝ်ႈႁဵၼ်း ၸၼ်ႉၸွမ် ပီ 2017 တီႈၸၼ်ႉၸွမ် မႁႃၵျူႇလႃးလူင်းၵွၼ်း ၸႄႈဝဵင်းဝင်းၼွႆႉ ၸိုင်ႈထႆး။

တႄႇဢဝ် ဝၼ်းတီႈ 08/03/-15/05/2017 ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ပိုၼ်ၽၢဝ်ႇတိုၵ်းသူၼ်းပိုတ်ႇႁပ်ႉသဵၼ်ႈသၢႆမၢႆ သင်ၶ/ ၵူၼ်းၸၢဝ်းၶိူဝ်းတႆး ၼႂ်းမိူင်း/ ၼွၵ်ႈမိူင်းတႆး ပွၵ်ႈ ၵမ်း 13 တႃႇမႃးၶိုၼ်ႈႁဵၼ်း ၸၼ်ႉၸွမ်မႁႃၵျူႇလႃးလူင်းၵွၼ်း ၸႄႈဝဵင်းဝင်းၼွႆႉ ၸႄႈတွၼ်ႈ ဢယုတ်ႉထယႃး၊ ၸိုင်ႈထႆး။


ၸဝ်ႈၶူးၸၢႆးဝၼ်း ဝိမလ မိူင်းမိတ်ႈ ႁွင်ႈၵၢၼ်ၾၢႆႇတိတ်းတေႃႇ ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ လၢတ်ႈဝႃႈ “ တေႃႈလဵဝ်ႁဝ်းၶႃႈ ပိုတ်ႇႁပ်ႉသဵၼ်ႈသၢႆမၢႆ လုၵ်ႈႁဵၼ်းမႂ်ႇယဝ်ႉၶႃႈ။ သင်ဝႃႈ ၸဝ်ႈပီႈ ၸဝ်ႈၼွင်ႉ ၸဝ်ႈလႂ် တေမႃးၶိုၼ်ႈႁဵၼ်းၸိုင် ႁႂ်ႈႁၢင်ႈႁႅၼ်းသူင်ႇမႃးဝႆႉ မၢႆၾၢင် (မၢတ်ႉပုင်ႇ တိၼ်ႇမိူင်းမၢၼ်ႈ)၊ ၼႃႈပၢတ်ႉသပွတ်ႇလႄႈ ဝိသႃႊ၊ ယဝ်ႉၵေႃႈ ဝႂ်ယဝ်ႉၸၼ်ႉလူင် ၸဵမ်ၸိူဝ်းၼႆႉ ႁႂ်ႈပိၼ်ႇပဵၼ် ၾၢႆႇဢင်း ၵိတ်းသေ သူင်ႇမႃး၊ ပေႃးဝႃႈ ႁၢင်ႈႁႅၼ်းယဝ်ႉ သူင်ႇမႃး ၸိူင်ႉၼၼ်ၸိုင် ၸဝ်ႈၶဝ်ၸင်ႇ တေႁဵတ်းပၼ်လိၵ်ႈႁွင်ႉလႆႈ။ ၼွၵ်ႈလိူဝ်ၼၼ်ႉ လွင်ႈႁပ်ႉသဵၼ်ႈသၢႆမၢႆလုၵ်ႈႁဵၼ်းၼႆႉ ဢမ်ႇလႆႈ တတ်းမၵ်း တေႁပ်ႉႁူဝ်ၵူၼ်းၵႃႈႁိုဝ်” ဝႃႈၼႆ။


ႁပ်ႉသဵၼ်ႈသၢႆမၢႆ ယၢမ်းလဵဝ်ၼႆႉ ဢမ်ႇၸႂ်ႈသင်ၶတႆးၵူၺ်း၊  ၵူၼ်းႁိူၼ်းၵေႃႈႁပ်ႉ၊ ၵူၼ်းႁိူၼ်းၼႆႉ တေလႆႈ ယဝ်ႉႁူင်းႁဵၼ်းၸၼ်ႉသိပ်းမိူင်းမၢၼ်ႈမႃး၊ ၵူၺ်းၵႃႈ တေလႆႈပဵၼ်တႆး။ ယူႇၼႂ်းမိူင်း တႆးၵေႃႈ လႆႈ/ ၼွၵ်ႈမိူင်းတႆးၵေႃႈလႆႈ ၸဵမ်ၸိူဝ်းၼႆႉ” ဝႃႈၼႆ။


ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇ ၸိုင်ႈထႆး ပိုၼ်ၽၢဝ်ႇ ႁပ်ႉလုၵ်ႈႁဵၼ်းမႂ်ႇ တႃႇမႃး ၶိုၼ်ႈၸၼ်ႉၸွမ် တီႈၸႄႈဝဵင်းဝင်းၼွႆႉၼႆႉ ၸတ်းႁဵတ်းမႃး ပဵၼ်ပွၵ်ႈ ၵမ်းတီႈ 13 ယဝ်ႉ၊ တင်းမူတ်း သင်ၶတႆး ၸိူဝ်းမႃးၶိုၼ်ႈ ထိုင်ယၢမ်းလဵဝ် မီး 180 တူၼ်ပၢႆ ဝႃႈၼႆ။


ၸဝ်ႈၶူးၸၢႆးဝၼ်း ဝိမလလၢတ်ႈဝႃႈ- သင်ဝႃႈ သင်ၶတႆး ၶႂ်ႈၶိုၼ်ႈ ၸၼ်ႉၸွမ်ၼႂ်းၸိုင်ႈထႆးၸိုင် ဢမ်ႇဝႃႈ တီႈၸၼ်ႉၸွမ်မႁႃၵျူႇလႃးလူင်းၵွၼ်း၊ တီႈလဵဝ်ၵူၺ်း- ၶႂ်ႈၶိုၼ်ႈတီႈလႂ်ၵေႃႈလိူၵ်ႈလႆႈ - ဝႃႈၼႆ။


ၶပ်ႉမၢႆမီးဝႆႉတႄႉ 1) တႄႇဢဝ်ဝၼ်းတီႈ 08/03/-15/05/2017 ႁပ်ႉသဵၼ်ႈမၢႆ။ 2) ဝၼ်းတီႈ 28/05/2017 ဝၼ်းတွပ်ႇၶဝ်ႈ(Entrance) ။ 3) ဝၼ်းတီႈ 29/05/2017 ဝၼ်းတွင်ႈထၢမ် (Interview)။  4) ဝၼ်းတီႈ  31/05/2017 ဝၼ်းဢွၵ်ႇသဵၼ်ႈ သၢႆမၢႆၽူႈဢွင်ႇ ပူၼ်ႉပၢင်တွပ်ႇၶဝ်ႈ။ 5) ဝၼ်းတီႈ 02-03/06/2017 ဝၼ်းႁပ်ႉသဵၼ်ႈမၢႆ ၶဝ်ႈပဵၼ် လုၵ်ႈႁဵၼ်း။ 6) ဝၼ်းတီႈ 05/06/2017 တႄႇပိုတ်ႇသွၼ်ႁဵၼ်း ၸဵမ်ၸိူဝ်းၼႆႉ။


တီႈၵပ်းသိုပ်ႇတိတ်းတေႃႇ ၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇသမ်ႉ

1) ၸဝ်ႈၶူးဝိမလ (မိူင်းမိတ်ႈ) မၢႆၾူၼ်း +66824-864-100 Email-saivimalamj@gmail.com/ Facebook - Sai Vimala Mong Mit ။

2) ၸဝ်ႈၶူးမႁႃႇလူႇ ထႃႇဝရူဝ်း (မိူင်းသၢတ်ႇ) မၢႆၾူၼ်း +66890-962-420 Facebook – To Thavaro ။

3) ၸဝ်ႈၶူးၼၼ်ႇတသႃႇမိ (ဝဵင်းလႃႈသဵဝ်ႈ) မၢႆၾူၼ်း +66991-437-229 Email- vennandasami@gmail.com Facebook – Sao Nanda ။