သင်ၶၸဝ်ႈလႄႈၽူႈယႂ်ႇၵူၼ်းလူင်ဝၢၼ်ႈ ၼႂ်းၸႄႈဝဵင်းၵျွၵ်ႉမႄး ၸတ်းပၢင်ႁူပ်ႉဢုပ်ႇၵၼ် တႃႇႁူမ်ႈ ၵၼ်ႁႃတၢင်းဢွၵ်ႇ ပၼ်ႁႃယႃႈမဝ်းၵမ် မီးၵူၼ်းၶဝ်ႈႁူမ်ႈၸမ်200။

Photo By - Sao On

ဝၼ်းတီႈ16/02/2017 ၶၢဝ်းယၢမ်း09:00-12:00 ၸဝ်ႈသေႇၵဵင်ႇတ ၽူႈၵွၼ်းဝတ်ႉၸေႇယသုၶ ၼွင်ပိင်ဢွၼ်ႇ  ပူႇႁဵင်လုင်းၸၢႆးလႃႉမိၼ်ႉ ၊ ပူႇမိူင်း လုင်းၸၢႆးပႃႉထေးၸိူဝ်းၼႆႉ ဢွၼ်ႁူဝ်သေ ၸတ်းႁဵတ်း ပၢင်ဢုပ်ႇဢူဝ်းၵၼ်တႃႇႁႃလၢႆးတၢင်းၵႄႈလိတ်ႈ ပၼ်ႁႃယႃႈမဝ်းၵမ် ၸတ်းႁဵတ်းတီႈ ဝတ်ႉၸေႇယသုၶ ဝၢၼ်ႈၼွင်ပိင်ဢွၼ်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ သင်ၶၸဝ်ႈ၊ ၾၢႆႇဢုပ်ႉပိူင်ႇဢိူင်ႇ ၽွင်းငမ်းဝၢၼ်ႈ ၊ တပ်ႉသိုၵ်းRCSS/SSA / SSPP/SSA ဢိၵ်ႇၵူၼ်းဝၢၼ်ႈၶဝ်ႈ ႁူမ်ႈထွမ်ႇငိၼ်း 179ၵေႃႉ ။


ပၢင်ႁူပ်ႉထူပ်းၼႆႉတူၵ်းလူင်းလႆႈၸႂ်ၵၼ် 3ၶေႃႈ မိူၼ်ၼင်ႇ ၵူၼ်းၸိူဝ်းမႃးႁူမ်ႈပၢင်ဢုပ်ႇဢူဝ်းၼၼ်ႉ လူင်းလၢႆးမိုဝ်းဝႃႈ တေႁူမ်ႈၵၼ် ၽဵဝ်ႈမူၺ်ႉယႃႈမဝ်းၵမ်ၵူႈၵေႃႉ။


ပေႃးၽႂ်ဢမ်ႇလူင်းလၢႆးမိုဝ်းသေ သမ်ႉၵဵဝ်ႇၶွင်ႈ ယႃႈမဝ်းၵမ်ၼႆၸိုင် မိူၼ်တင်းဝႃႈၵူၼ်းၵေႃႉၼၼ်ႉ ႁၵ်းလင်ၸိူဝ်ႉၸၢတ်ႈ ၵိတ်ႇၶႂၢင် လွင်ႈၶိုၼ်ႈယႂ်ႇဝၢၼ်ႈမိူင်းလႄႈ တႄႇဢဝ်ဝၼ်းပၢင်ၵုမ် 16/02/2017 ၼႆႉၵႂႃႇသင်ၶၸဝ်ႈ ၽူႈမီးပုၼ်ႈ ၽွၼ်း ၵူၼ်းဝၢၼ်ႈၵူႈၵေႃႉ တေႁူမ်ႈမိုဝ်းၵၼ်သၢၼ်ၶတ်းလႄႈ ၽဵဝ်ႈမူၺ်ႉယႃႈမဝ်းၵမ်ၵႂႃႇ ဝႃႈၼႆ။


ၸဝ်ႈသေႇၵဵင်ႇတ လၢတ်ႈဝႃႈ- “မိူဝ်ႈလဵဝ်ၼႂ်းဝၢၼ်ႈဝဵင်းႁဝ်းဢမ်ႇဝႃႈတီႈလႂ် ယႃႈမဝ်းၵမ်ၵေႃႈလိူင်ႇၼမ် သင်ဝႃႈၵူၼ်းၼုမ်ႇပေႃႈမႄႈၵူၼ်းမိူင်း ၸပ်းယႃႈၵႂႃႇယဝ်ႉၼႆၸိုင် ဢမ်ႇဝႃႈပၢႆးပၺ်ၺႃ၊ ပၢႆးမၢၵ်ႈမီး လွင်ႈ ၶိုၼ်ႈယႂ်ႇၸိူဝ်းၼႆႉ တေတူၵ်းလႃႈတူၵ်းလိုၼ်းၵႂႃႇတိၵ်းတိၵ်း။ ၽႂ်သူႇသမ်းၵိၼ်ယႃႈ တေဢဝ် မွပ်ႈပၼ်တပ်ႉသိုၵ်း/ၺႃးတူတ်ႈတၢမ်ႇၼၵ်း /ၾိုၵ်းသွၼ်ၵၢၼ်သိုၵ်း ၸိူဝ်းၼႆ- ဝႃႈၼႆ။


မိူဝ်ႈဝၼ်းတီႈ 29-31/01/2017 ၼၼ်ႉၵေႃႈ သင်ၶၸဝ်ႈလႄႈ ပေႃႈမႄႈ ၵူၼ်းမိူင်း ႁူမ်ႈၵၼ် ၸတ်း ႁဵတ်း ပၢင်ႁူပ်ႉထူပ်း ပေႃႈမႄႈၵူၼ်းမိူင်း တီႈဝၢၼ်ႈ မိူင်းငေႃႉ၊ ပုင်းလူင်၊ ႁူးသူၼ် ၸႄႈဝဵင်းၵျွၵ်ႉမႄး ပၼ်တၢင်းႁူႉလွင်ႈ ၵၢၼ်ၽွမ်ႉႁူမ်ႈ၊ လွင်ႈႁၵ်ႉၸိူဝ်ႉၶိူဝ်း ၊ လွင်ႈၽွၼ်းၸႃႉယႃႈမဝ်းၵမ် ၊ လွင်ႈၽူႈ ႁတ်းႁၢၼ် ၸိူဝ်းၼႆႉ။ ၶၢဝ်းတၢင်း3ဝၼ်းၼၼ်ႉ မီးၵူၼ်း ၶဝ်ႈႁူမ်ႈ1,900 ၵေႃႉပၢႆ ။