ၸဝ်ႈႁႆႈၸဝ်ႈၼႃးဝဵင်းမိူင်းၼၢႆး ႁူမ်ႈၵၼ် 100 ပၢႆ ၵႂႃႇတိူင်ႇၵၢဝ်ႇၸူး ၽီၸဝ်ႈဝၢၼ်ႈၸဝ်ႈမိူင်း လႄႈ ၸဝ်ႈပႂ်ႉၼမ်ႉပႂ်ႉလိၼ်၊ ၵိၼ်ႇၵၢဝ်ႇၽူႈၸိူဝ်းယႃႉသိင်ႇဝႅတ်ႉလွမ်ႉလႄႈမႄႈၼမ်ႉႁႂ်ႈလႆႈထူပ်းတၢင်းၶီ ။

Photo: ၸဝ်ႈႁႆႈၸဝ်ႈၼႃးဝဵင်းမိူင်းၼၢႆး ႁူမ်ႈၵၼ်တိူင်ႇၵၢဝ်ႇၸဝ်ႈဝၢၼ်ႈၸဝ်ႈမိူင်း ၵိၼ်ႇၵၢဝ်ႈၽူႈယႃႉၼမ်ႉလိၼ်ႁိၼ်ၽႃသိင်ႇဝႅတ်ႉလွမ်ႉ (ၶႅပ်းႁၢင်ႈ- ၽူႈႁၵ်ႉသိင်ႇဝႅတ်ႉလွမ်ႉ မိူင်းၼၢႆး)

ဝၼ်းတီႈ16 လႄႈ17/02/2017 ၸဝ်ႈႁႆႈၸဝ်ႈၼႃးႁူမ်ႈၵၼ် 100 ပၢႆ ၵႂႃႇတီႈၼမ်ႉႁူးၾၢႆႇ ႁွင်ႇဝဵင်းလႄႈ ၾၢႆႇၸၢၼ်းဝဵင်း မိူၼ်ၼင်ႇၼမ်ႉႁူး ပႃဝႅၼ်၊ ၼမ်ႉႁူးၶွၼ်၊ ၼမ်ႉႁူးၼၵႃး မီးၼႂ်းဝၢၼ်ႈၼမ်ႉမေႃႇသူမ်ႈ လႄႈၼမ်ႉႁူးၼွင်လွႆၸႄႈ ၸိူဝ်းၼႆႉသေ ၶၢတ်ႈႁူဝ်ႉ၊ ရႃႇၸမၢတ်ႈ၊ တႆႈတဵၼ်းတိူင်ႇၵၢဝ်ႇၸူးၽီပႂ်ႉၼမ်ႉလိၼ်ႁိၼ်ၽႃ ။
ၸဝ်ႈႁႆႈၸဝ်ႈၼႃးၵိၼ်ႇၵၢဝ်ႇဝႃႈ ၽူႈၵေႃႉဢၼ်ယႃႉၼမ်ႉႁူး ၼမ်ႉႁွင်ႈဢၼ်လဵင်ႉၼႃး၊ လဵင်ႉၵူၼ်း မိူင်းၼၢႆး ၼၼ်ႉ ယႃႇႁႂ်ႈလႆႈထူပ်းလွင်ႈလီ ၊ ႁႂ်ႈလႆႈႁူပ်ႉတၢင်းၶီ တၢင်းယၢၵ်ႈ။ ႁႂ်ႈလႆႈၽၢတ်ႇယၢၼ်ၵူၼ်းႁၵ်ႉၵူၼ်းပႅင်း ၵူႈၸၢတ်ႈၵူႈပၢၼ် ၸဵမ်ၸိူဝ်းၼႆႉ ။


လုင်းၸၢႆး ထဝ်ႈဝၢၼ်ႈထဝ်ႈၼႃး မိူင်းၼၢႆးလၢတ်ႈဝႃႈ- ပၼ်ႁႃၼႆႉပဵၼ်ယွၼ်ႉ လူင်ပွင်ၸိုင်ႈမိူင်းတႆး တမ်းပၼ်မၢႆၾၢင် လွၵ်းလိၼ် 105 (ပူင်ႇၸၢၼ်ႇ 105) ပၼ်ၽူႈဝႃႈလႆႈပွင်ပဵၼ် 2 ၵေႃႉ။ ဢၼ်ပႆႇလႆႈ မၢႆၾၢင် 105 သမ်ႉ ၸၢဝ်းၶိူဝ်းၶႄႇ 2 ၵေႃႉ။ လိၼ်ၼႃးၶဝ် 4 ၵေႃႉမီး 20 ဢေႊၶိူဝ်ႊပၢႆ ။ မီးၾၢႆႇႁွင်ႇ မိူင်းၼၢႆး မီးႁိမ်းႁူဝ်ၼမ်ႉႁူး။ ၸိူဝ်းၶဝ်ဢၢၼ်းတေႁဵတ်းပၢႆးမၢၵ်ႈမီး ၵေႃႇသၢင်ႈ ၊ ႁူင်းႁဵတ်းမၢၵ်ႇဢုတ်ႇ ၸိူဝ်း ၼႆႉလႄႈ ၵူၼ်းမိူင်းၵူဝ်ၼမ်ႉႁူးလု၊ ၼမ်ႉလဵင်ႉၼႃးႁႅင်ႈ။ တၢင်ႇယွၼ်းတၢင်းၸွႆႈ ထႅမ် တီႈလူင်ပွင်ၸိုင်ႈ လၢႆလၢႆပွၵ်ႈယဝ်ႉ ယင်းဢမ်ႇမီလွင်ႈၸတ်းၵၢၼ်ပၼ်သင်လႄႈ ၸင်ႇလႆႈႁူမ်ႈၵၼ် ပိုင်ႈၸဝ်ႈဝၢၼ်ႈ ၸဝ်ႈမိူင်း ဝႃႈၼႆ။


ၵဵဝ်ႇၵပ်းလွင်ႈၼႆႉသေ ၸၢႆးမွၼ်းလိူၼ် ၽွင်းတႅၼ်းသၽႃးမိူင်းၼၢႆး ပႃႇတီႇႁူဝ်သိူဝ် လၢတ်ႈဝႃႈ- ပၼ်ႁႃတီႈလိၼ်လႄႈလွင်ႈသိင်ႇဝႅတ်ႉလွမ်ႉၼႆႉ ၶႃႈၵေႃႈလႆႈဢဝ်လၢတ်ႈၼႂ်းသၽႃးၵမ်း ၼိုင်ႈယဝ်ႉ မိူဝ်ႈပီၵၢႆ။ ၾၢႆႇလူင်ပွင်ၸိုင်ႈမိူင်းတႆး ပၼ်ၶေႃႈတွပ်ႇဝႃႈ ဢၼ်မီး မၢႆၾၢင် 105 မီး 2 ၵေႃႉၵူၺ်း- ၼႆၵူၺ်း။ တႃႇတေၸွႆႈထႅမ်ပၼ်ၵူၼ်းမိူင်းၵေႃႈဢမ်ႇတွပ်ႇသင်မႃး။ ၵူၼ်းမိူင်းဢမ်ႇၸၢင်ႈၸႂ်ယႂ်ႇၽႂ် လႆႈယဝ်ႉလႄႈၸင်ႇတိူင်ႇၵၢဝ်ႇထိုင်ၸဝ်ႈဝၢၼ်ႈၸဝ်ႈမိူင်း- ၸွမ်းၼင်ႇတၢင်းယုမ်ႇယမ် ၸဵမ်ပၢၼ်ပူႇမွၼ်ႇၼၢႆးယႃႈမီးဝႆႉ- ဝႃႈၼႆ။


ၼႂ်းၽိုၼ်လိၵ်ႈဢၼ်ၸဝ်ႈႁႆႈၸဝ်ႈၼႃးတႅမ်ႈတိူင်ႇၵိၼ်ႇၵၢဝ်ႇၼၼ်ႉပႃဝႆႉထႅင်ႈဝႃႈ - ၵူၼ်းၸိူဝ်းယႃႉ ၼမ်ႉႁူးလႄႈၼမ်ႉႁွင်ႈ၊ဢိၵ်ႇသိင်ႇဝႅတ်ႉလွမ်ႉလုၵွႆၼၼ်ႉ ႁႂ်ႈလႆႈႁူပ်ႉလွင်ႈဢမ်ႇလီ၊ ႁႃၵိၼ်လဵင်ႉ တွင်ႉယၢပ်ႇ၊ ၵွတ်းၽၢၼ်ၵူႈၸၢတ်ႈ၊ ႁႂ်ႈငူးတွတ်ႇ၊ၾႃႉၽႃႇ၊လိၼ်ဢိုၼ်၊ ၾႆးမႆႈ၊ ၺႃးၽေး ၵိုင်ႉၵၢင်ႉၸဵမ်ၸိူဝ်းၼႆႉဝႃႈၼႆ။


ၸၢႆးမွၼ်းလိူၼ် ပၼ်ၾၢင်ႉထိုင်ပီႈၼွင်ႉၵူၼ်းမိူင်းၼၢႆးဝႃႈ - မိူဝ်ႈလဵဝ်ၼႆႉ ဢိင်ၼိူဝ် ဝၢၼ်ႈမိူင်း ၶိုၼ်ႈယႂ်ႇမႃးလႄႈ တီႈလိၼ်ၵေႃႈၵႃႈၶၼ်သုင်မႃး လွင်ႈလၵ်ႉၶၢႆတီႈလိၼ်ၵၼ် ၵေႃႈမီးၼမ် မႃး၊ ၵူၼ်းတၢင်ႇတီႈတၢင်ႇတၢင်း၊တၢင်ႇၸၢဝ်းၶိူဝ်းၵေႃႈမႃးယူႇဝၢၼ်ႈမိူင်းႁဝ်းၼမ်၊ ၵွပ်ႈၼၼ်လႄႈ ၶႂ်ႈႁႂ်ႈ ၵူၼ်းမိူင်းႁဝ်းဝႆႉၼၵ်းၼႃၼိူဝ်လွင်ႈတီႈလိၼ် ၊ႁႂ်ႈႁူမ်ႈမိုဝ်းၵၼ်ၵႅတ်ႇၵင်ႈတီလိၼ်ၽႂ်မၼ်း၊ ႁႂ်ႈဢွၼ် ၵၼ် ႁဵတ်းဝႆႉဝႂ်တီႈလိၼ်ၵၼ်ၵူႈၵေႃႉ။ ပေႃးထူပ်းပၼ်ႁႃသင်ၵေႃႈ ႁႂ်ႈဢွၼ်ၵၼ် တၢင်ႇ လၢတ်ႈတီႈ ၽူႈတႅၼ်းႁဝ်း ၼင်ႇဢၼ်ႁဝ်းပွင်ပဵၼ်လႆႈၼၼ်ႉ တေၶတ်းၸႂ်ၸွႆႈထႅမ်ပၼ်ယူႇ - ဝႃႈၼႆ။


ၼမ်ႉၵေးဢၼ်လဵင်ႉၼႃးၵူၼ်းမိူင်းၼၢႆးၼႆႉမီး 2 ၵေး။ လုၵ်ႉတီႈၼမ်ႉႁူးၸိူဝ်းမီးၾၢႆႇႁွင်ႇမိူင်းၼၢႆး ႁူမ်ႈၵၼ်လႆလူင်းမႃး ၵေးၼိုင်ႈ။ ဢၼ်မီးၾၢႆႇၸၢၼ်းဝဵင်း ၵေးၼိုင်ႈ။ တီႈၼႂ်းၸႄႈဝဵင်းမိူင်းၼၢႆးၼႆႉ ၵၢၼ်ႁဵတ်းၵိၼ်ႁႃလဵင်ႉတွင်ႉၵူၼ်းမိူင်း  ပဵၼ်ၵၢၼ်ၽုၵ်ႇသွမ်ႈပဵၼ်ပိူင်လူင်။ ဝဵင်းႁိမ်းႁွမ်းမိူင်းၼၢႆး လၢႆလၢႆဝဵင်းၵေႃႈ လႆႈပိုင်ႈဢိင်ၵၢၼ်ၽုၵ်ႇသွမ်ႈ ၼႂ်းၸႄႈဝဵင်းမိူင်းၼၢႆးဝႆႉ ။ ၶဝ်ႈသၢၼ်ဢၼ်ဢွၵ်ႇဝဵင်းမိူင်းၼၢႆး လႆႈသူင်ႇၶၢႆ ထိုင်လၢႆလၢႆတၢင်း။ ၶႂ်ႈဝႃႈတူဝ်ႈၼႂ်းၸေႈတွၼ်ႈလၢင်းၶိူဝ်း ထိုင်လႅၼ်လိၼ် တႆး-ထႆးၸိူဝ်းၼႆႉလူးၵွၼ်ႇ။