ၸုမ်းတူင်ႉၼိုင်တူင်ႇဝူင်းတႆး၊ သင်ၶၸဝ်ႈလႄႈ ၶူးသွၼ်ၼႂ်းႁူင်းႁဵၼ်း လွႆတႆးလႅင်း ဢွၼ်ႁူဝ် ၸတ်းႁဵတ်း ဝၼ်းလုၵ်ႈဢွၼ်ႇ ပဵၼ်ပွၵ်ႈၵမ်းႁႅၵ်ႈ လုၵ်ႈဢွၼ်ႇႁဵၼ်းၶဝ်ႈႁူမ်ႈ မီးတင်းမူတ်း 880 ၵေႃႉ ပၢႆဝႃႈၼႆ ။

ဝၼ်းတီႈ 12/01/2017 ယၢမ်းၵၢင်ၼႂ် 08:00-17:00 မူင်း ၸုမ်းၵွင်တိုၼ်းၵမ်ႉထႅမ်ပၢႆးပၺ်ၺႃ လုၵ်ႈႁဵၼ်းတႆး၊ သင်ၶၸဝ်ႈ ၽရႃႉဢႃးၸၢၼ် သူမ်ဝုၼ်း ဝတ်ႉပႃႇ မႄႈၸၼ်း ၵဵင်းႁၢႆးလႄႈ ၶူးသွၼ်ၼႂ်းႁူင်းႁဵၼ်း ႁူမ်ႈၵၼ်ၸတ်းႁဵတ်း ဝၼ်းလုၵ်ႈဢွၼ်ႇ တီႈႁူင်းႁဵၼ်းၸိူဝ်ႉၸၢတ်ႈ ၸၼ်ႉသုင် လွႆတႆးလႅင်း ၼင်ႇႁိုဝ် လုၵ်ႈဢွၼ်ႇႁဵၼ်း ပေႃးတေမိုတ်ႈၵိုဝ်းၸမ်ၸႂ် ၶဝ်ႈဢွၵ်ႇႁႃၵၼ်၊ ပၼ်ႁႅင်း လုၵ်ႈဢွၼ်ႇႁဵၼ်း ႁႂ်ႈၶတ်းၸႂ်ႁဵၼ်း ၸဵမ်ၸိူဝ်းၼႆႉ ဝႃႈၼႆ ။


ၽူႈၸွႆႈၶပ်းၶိုင် ပွင်ပဵၼ်ပၢင်ပွႆးဝၼ်းလုၵ်ႈဢွၼ်ႇ လၢတ်ႈဝႃႈ “ ယိူင်းဢၢၼ်းဢၼ်လႆႈၸတ်းႁဵတ်း ဝၼ်းလုၵ်ႈဢွၼ်ႇတီႈငဝ်းၸိုင်ႈလွႆတႆးလႅင်းၼႆႉ ၼင်ႇႁိုဝ် လုၵ်ႈဢွၼ်ႇႁဝ်း တေမေႃႁတ်း လၢတ်ႈႁတ်းၸႃ၊ မေႃၶဝ်ႈၵႄႈဢွၵ်ႇၵၢင်ၵူၼ်းတင်းၼမ်၊ ႁႂ်ႈမေႃပိၼ်ႇပႆႇလႅၵ်ႈလၢႆႈ တၢင်းႁူႉႁၼ် ၽူႈယႂ်ႇ ၵူၼ်းလူင် လႄႈလုၵ်ႈဢွၼ်ႇ၊ ယဝ်ႉၵေႃႈ ၼင်ႇႁိုဝ် လုၵ်ႈဢွၼ်ႇႁဝ်းပေႃးတေ မီးတၢင်းႁတ်း ႁၢၼ်ၵႂႃႇမိူဝ်းၼႃႈ၊ ပီၼႆႉ လုၵ်ႈဢွၼ်ႇႁဵၼ်း တင်းမူတ်းမီး 880 ၵေႃႉ၊ ၶူးသွၼ်မီး 30 ပၢႆ” ဝႃႈၼႆ ။


ဝၼ်းလုၵ်ႈဢွၼ်ႇတီႈလွႆတႆးလႅင်းၼႆႉ မီးၽူႈယႂ်ႇၵူၼ်းလူင် မွၵ်ႇလၢတ်ႈၶေႃႈၵႂၢမ်း တိုၵ်းသူၼ်း လုၵ်ႈႁဵၼ်းၵႂႃႇ မိူၼ် ၸဝ်ႈၶူးၽရႃႉဢႃးၸၢၼ် သူမ်ဝုၼ်း၊ ဝတ်ႉပႃႇ မႄႈၸၼ်း၊ ၸဝ်ႈသိုၵ်း ၶိူဝ်းလၢဝ်၊ ႁူဝ်ပဝ်ႈ ၵွင်တိုၼ်းၵမ်ႉထႅမ်ပၢႆးပၺ်ၺႃ လုၵ်ႈႁဵၼ်းတႆး ၸၢႆးလိုၼ်း၊ ၶူးပူင်သွၼ်ၼႂ်းႁူင်းႁဵၼ်း ၸိူဝ်ႉၸၢတ်ႈလႄႈ ဢိၵ်ႇထႅင်ႈလၢႆလၢႆၵေႃႉ ဝႃႈၼႆ ။


ၼႂ်းဝၼ်းလုၵ်ႈဢွၼ်ႇၼႆႉ မီးလွင်ႈတူင်ႉၼိုင် မိူၼ်ၼင်ႇ တႅမ်ႈဝွၵ်းၶေႉၵၼ်၊ ပွင်ႈၵႂၢမ်း၊ ၸၼ်ႁၢင်ႈ လႄႈ လဵၼ်ႈၵဵမ်း။ ၼွၵ်ႈလိူဝ်ၼၼ်ႉ မီးၶူဝ်းတွၼ်ႈထိုင်လုၵ်ႈႁဵၼ်း ၶွင်လဵၼ်ႈ၊ ၶွင်ၵိၼ်၊ ၶိူင်ႈၸႂ်ႉ ၼႂ်းႁူင်းႁဵၼ်း ၸဵမ်ၸိူဝ်းၼႆႉ ဝႃႈၼႆ ။


ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ငဝ်ႈငုၼ်းလွႆတႆးလႅင်းၼႆႉ ၸွမ်သိုၵ်း ယွတ်ႈသိုၵ်း ဢွၼ်ႁူဝ်ၸတ်းႁဵတ်းဝၼ်းလုၵ်ႈဢွၼ်ႇမႃးၵူႈပီ။ ပီၼႆႉၵေႃႈ ၸတ်းႁဵတ်းထႅင်ႈၼင်ႇၵဝ်ႇ ။