မိူဝ်ႈလဵဝ်ၼႆႉ ၼႂ်းၸိုင်ႈမိူင်းႁဝ်း ၸွမ်းၼင်ႇလႆႈတွင်ႈထၢမ် ၽူႈမီးတူဝ်ထူပ်းၶဝ်လႄႈသင်၊ ဢွၵ်ႇၸွမ်းၶၢဝ်ႇငၢဝ်းၶဝ်လႄႈသင်၊ ၸွမ်းၼင်ႇလႆႈႁဵၼ်းႁူႉၶိုတ်းတၼ်းၼၼ်ႉ လႆႈဝႃႈၶိူင်ႈမိင်းမဝ်းလိုမ်းတူဝ် ယႃႈမဝ်းၵမ်ၸိူဝ်းၼႆႉ ၽႄႈတိူၼ်းလၢမ်းလိူင်ႇတိူဝ်းၼမ်တႄႉတႄႉ ။

ၼႂ်းၸိုင်ႈမိူင်းႁူမ်ႈတုမ်မၢၼ်ႈ ဢၼ်လုမ်ႈၾႃႉမၵ်းမၼ်ႈဝႆႉ ပဵၼ်မိူင်းဢွၵ်ႇယႃႈမဝ်းၵမ်ပဵၼ်ထီႉ 2 ၼၼ်ႉ ၼႂ်းမိူင်းတႆး သမ်ႉဢွၵ်ႇၼမ်လိူဝ်ပိူၼ်ႈသုတ်း။ ၸွမ်းၼင်ႇၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) လူင်းပိုၼ်ႉတီႈ ႁူပ်ႉထူပ်းၵူၼ်းမိူင်း ၼႂ်းၸိုင်ႈတႆးလၢႆလၢႆၸႄႈဝဵင်း ၽွင်းၵၢင်ပီ 2016 ၼၼ်ႉၵေႃႈ လႆႈႁူႉဝႃႈယႃႈမဝ်းၵမ် ပဵၼ်ပၼ်ႁႃလူင်ၼႂ်းပိုၼ်ႉတီႈ၊ ၵူၼ်းၼုမ်ႇမွၵ်ႈ 10 ၵေႃႉၼႆႉ တိတ်းၸပ်းယႃႈဢမ်ႇယွမ်းမွၵ်ႈ 6-7 ၵေႃႉ ။


ၶိူင်ႈမဝ်းမိင်းဢၼ်ဝႃႈၼႆႉ မီးသႅၼ်းမၼ်းတင်းၼမ်တင်းလၢႆယဝ်ႉ။ ပေႃးတူၵ်ႇလၢတ်ႈၶိူဝ်းမၼ်းၵေႃႈ မီးယႃႈမဝ်းၵမ်လၢႆလၢႆသႅၼ်း တင်းၼမ်ႉသူႇရႃႇ ၼမ်ႉလဝ်ႈ ဢၼ်ႁဝ်းႁွင်ႉဝႃႈၼမ်ႉႁိူဝ်ႇၶဝ်ႈ ၼမ်ႉတႃမူၼ်းလႂ်ၸိူဝ်းၼႆႉ။ ယႃႈမဝ်းၵမ်တႄႉ မီးမိူၼ်ၼင်ႇယႃႈမႃႉ၊ ယႃႈၽွင်ၶၢဝ် (ႁေႊရူဝ်ႊဢိၼ်ႊ)၊ ယႃႈၾိၼ်ႇလမ်၊ ယႃႈဢႆႊသ် ၸဵမ်ၸိူဝ်းၼႆႉၵႂႃႇယဝ်ႉ ။


ယႃႈမႃႉၼႆႉ မိူဝ်ႈၵွၼ်ႇ မိူင်းထႆးၵေႃႈႁွင်ႉဝႃႈ ယႃႈမႃႉၼင်ႇၵဝ်ႇ၊ ယွၼ်ႉပိူၼ်ႈဢွႆႇမႃႉ တႃႇမႃႉၵိၼ်ၵူၺ်း။ ဝၢႆးမႃးၵူၼ်းၵေႃႈၵိၼ်၊  ပေႃးၵိၼ်မႃးယဝ်ႉသမ်ႉၵႆႉႁဵတ်းၵၢၼ်။ ၵူၺ်းၵႃႈ ၽိူဝ်ႇၸပ်းယိၼ်ႉမၼ်းသေ ၵိၼ်ၼမ်ၵိၼ်ႁိုင်မႃးသမ်ႉမႃႈသမ်ႉယွင်ႇ၊ ဝၢႆးမႃးလူင်ပွင်ၸိုင်ႈထႆး ၸင်ႇတင်ႈၸိုဝ်ႈမႂ်ႇဝႃႈ ယႃးပႃႉ ယႃႈဝႃႈ (မႃႈ)- ယႃႈယွင်ႇ၊ ၵိၼ်ယဝ်ႉၸၢင်ႈဝႃႈၸၢင်ႈယွင်ႇ။ မၢႆမီႈဝၢၼ်ႈမိူင်းၵေႃႈ ဝၢင်းတမ်းဝႆႉဝႃႈ ၶၻီး(ဢမု) လွင်ႈသူႇသမ်းၵိၼ်ယႃႈလႄႈ ၵႃႉၶၢႆယႃႈမဝ်းၵမ်ၼႆႉ ပဵၼ်တူတ်ႈတၢမ်ႇၼၵ်း ၵွပ်ႈဝႃႈပဵၼ်ၶိူင်ႈဢၼ်ယႃႉလူႉလႅဝ် ထွတ်ႈမျၢတ်ႈသီႇယိူင်ႈ ၸိူဝ်ႉၸၢတ်ႈ ဝၢၼ်ႈမိူင်း ၽႃႇသႃႇ သႃႇသၼႃႇ ။


ၼႂ်းမိူင်းႁဝ်းၼႆႉ ဢိင်ၼိူဝ်မၢႆမီႈၸိုင်ႈမိူင်း ဢမ်ႇႁူမ်ႇတူဝ်ႈလႆႈပတ်းပိုၼ်ႉၸိုင်ႈမိူင်းသေ ယႃႈမဝ်းၵမ်ၼႆႉ ၼႂ်းၶၢဝ်းတၢင်းႁူဝ်သိပ်းပီပူၼ်ႉမႃး တေႃႇထိုင်ယၢမ်းလဵဝ် ၽႄႈတိူၼ်းလိူင်ႇၼမ် ၶႂ်ႈၸွတ်ႇၵႂႃႇၵူႈတီႈၵူႈလႅၼ်ယဝ်ႉ။ ယၢမ်းလဵဝ်ၼႆႉ ပဵၼ်ပၢၼ်ယႃႈမႃႉႁိူင်းလႄႈ ၵူၼ်းၵိၼ်မၼ်းယိုင်ႈၶႅၼ်းတိူဝ်းလိူဝ်မႃးယဝ်ႉ။ ၽူႈမီးဢႃႇၼႃႇ ၼႂ်းပိုၼ်ႉတီႈၵမ်ႈၽွင်ႈၵေႃႈ ဝၵ်ႉဢဝ်တိုဝ်ႉတၢင်းႁဵတ်းၵၢၼ်မၢၵ်ႈမီး။ ပဵၵ်ႉသမ်ႉမီးမၢင်ၸုမ်း ႁႄႉႁၢမ်ႈတိုၵ်းတေႃးၵႅတ်ႇၵင်ႈၽေးယႃႈမဝ်းၵမ် ပိူဝ်ႈတႃႇၸိူဝ်ႉၶိူဝ်းတူဝ်ၵဝ်ႇ ၼႆသေတႃႉ ဢမ်ႇတိုၵ်းတေႃးၽဵဝ်ႈမူၺ်ႉမွတ်ႇႁၢႆလႆႈ။ လူင်ပွင်ၸိုင်ႈပၢၼ်သိုပ်ႇပၢၼ်ၵေႃႈ ဢဝ်ယႃႈမဝ်းၵမ်ပဵၼ်ၶိူင်ႈမိုဝ်းၵၢၼ်မိူင်းမႃး၊ ၸုမ်းလႂ်ဝႃႈငၢႆႈထွမ်ႇၵႂၢမ်း ၶဝ်ပွႆႇႁႂ်ႈထၢင်ႇႁၢင်ႈၵႃႉၶၢႆ။ ႁူႉဢမ်ႇႁၼ်-ႁၼ်ဢမ်ႇႁူႉ ပွႆႇပၼ်ႁဵတ်းထၢင်ႇႁၢင်ႈလွတ်ႈလႅဝ်း ၵေႃႈမီးယဝ်ႉ ။


ၼႂ်းသိလ်ႁႃႈသဵၼ်ႈ ဢၼ်ပုတ်ႉထၶမ်းၽြႃးပဵၼ်ၸဝ်ႈႁေႃးဝႆႉၼၼ်ႉ သိလ်ၶေႃႈထီႉ 5 သူႇရႃႇမေႇရယ ဢမ်ႇပႃးယႃႈမဝ်းၵမ်၊ ပဵၼ်သူႇရႃႇၼမ်ႉလဝ်ႈမဝ်းပၼ်ႇတႃလၢႆးၵူၺ်း ၼႆသေတႃႉ ယႃႈမဝ်းၵမ်ၵေႃႈ ပဵၼ်ၶိူင်ႈၸႂ်ႉတိုဝ်းသူႇသမ်းၵိၼ်ယဝ်ႉ မဝ်းမိင်းၼင်ႇၵဝ်ႇလႄႈ လႆႈဝႃႈၸတ်းၶဝ်ႈၼႂ်းသိလ်ၶေႃႈထီႉ 5 ၊ ပေႃးၸႂ်ႉတိုဝ်းၵေႃႈ လႆႈဝႃႈၽိတ်းၼင်ႇၵၼ်ယဝ်ႉ။ ပၢၼ်မိူင်းမိူဝ်ႈလဵဝ် ၵၢၼ်သိုဝ်ႉၶၢႆ/ၵိၼ်ယႃႈမဝ်းၵမ် ၽိတ်းမၢႆမီႈၸိုင်ႈမိူင်းႁၢဝ်ႈႁႅင်း၊ ၵၢၼ်သိုဝ်ႉၶၢႆၼမ်ႉၵိၼ်မိင်းမဝ်း ယင်းမီးတမ်းၶၢႆၼႂ်းႁၢၼ်ႉၼႂ်းသႅင်ႇ။ တၢင်းၽိတ်းၼႂ်းလူၵ်ႈၼႃႈၶူင်းၼႃႈၼၼ်ႉ ႁဝ်းယင်းပႆႇမုင်ႈႁၼ်လႆႈ၊ ၵူၺ်းၵႃႈ ႁဝ်းဢဝ်မၢႆမီႈမိူင်းၵူၼ်းၼႆႉ တႅၵ်ႈၼိူင်းၼႄတူၺ်းၵွၼ်ႇ ။


တၢင်းၽိတ်းလွင်ႈၵိၼ်လဝ်ႈတႄႉ ဢၼ်တိုၼ်းတဵင်ႈတႄႉၼႄႉၼွၼ်းၼၼ်ႉ 1.သဵင်ႈငိုၼ်းတွင်း။ 2.ၸၢင်ႈႁဵတ်းႁႂ်ႈၵိူတ်ႇလွင်ႈၽိတ်းမေႃးထဵင်ၵၼ်။ 3.ၸၢင်ႈႁဵတ်းႁႂ်ႈၸပ်းတၢင်းပဵၼ်ရေႃးၵႃႇ။ 4.ၸၢင်ႈႁဵတ်းႁႂ်ႈ ၸိုဝ်ႈသဵင်လူႉၼဝ်ႈ။ 5.ၸၢင်ႈႁဵတ်းႁႂ်ႈဢမ်ႇမီးတၢင်းဢူၵ်းဢၢႆ။ 6.ၸၢင်ႈႁဵတ်းႁႂ်ႈႁႅင်းပၺ်ၺႃဢေႇ။ ၶေႃႈၼိုင်ႈၼၼ်ႉ သဵင်ႈငိုၼ်းတွင်း လူၺ်ႈဢမ်ႇၵိုင်ႇလီသဵင်ႈ၊ ၵၢၼ်မၢၵ်ႈမီးဢမ်ႇၶိုၼ်ႈ။ ပေႃးၵၢၼ်မၢၵ်ႈမီးႁဝ်းဢမ်ႇၶိုၼ်ႈယႂ်ႇလႆႈၵေႃႈ ႁဝ်းၵေႃႈဢမ်ႇပဵၼ်ၵူၼ်းပေႉတူဝ်လႆႈသေပွၵ်ႈ ။


ၼႂ်းသင်ႇၵႃႇလေႃးဝႃႇတ ဢၼ်ပုတ်ႉထၸဝ်ႈႁေႃးဝႆႉ ပိူဝ်ႈတႃႇၵူၼ်းတင်းၼမ်တိုဝ်းၵမ်ႁဵတ်းၸွမ်းၵေႃႈ လၢတ်ႈဝႆႉဝႃႈတၢင်းၽိတ်းလွင်ႈသူတ်ႉလဝ်ႈၼမ်ႉသူႇရႃႇၼႆႉ- 1.ဢုၸ်ႉၸႃႇယူပ်ႈယွမ်းမႃး။ 2.လၢတ်ႈထမ်းတြႃးဢမ်ႇၶဝ်ႈ။ 3.ၵႆႉပဵၼ်ၸဵပ်းရေႃးၵႃႇ။ 4.ၸိုဝ်ႈဢမ်ႇသႃႇလိုဝ်းႁူင်။ 5.ဢမ်ႇႁႄႉလူမ်ႈတူဝ်ၶိင်း။ 6.ၺၢၼ်ႇတၼ်ပိင်းထိုင်ႉထူၼ်ႈ ၸိူဝ်းၼႆႉ ။


ၵူၼ်းႁဝ်းၼႆႉ ပေႃးဝႃႈၵိၼ်လဝ်ႈမႃး ၸႂ်ၸၢင်ႈႁတ်းႁၢၼ်မႃးသေ ပိူၼ်ႈၸူဝ်းႁဵတ်းသင်ၵေႃႈႁဵတ်း၊ ၸၢင်ႈဢွၵ်ႇၸႂ်ၶႂ်ႈႁဵတ်းႁွတ်းလူင်ၵႂႃႇၵႃႈပွင်ႇၵႃႈပဵၼ်၊ တၢင်းလၢတ်ႈၵေႃႈ ၸၢင်ႈလၢတ်ႈဝႃႈဝီႈလူင်ၵႂႃႇ။ ၵွပ်ႈမၼ်းပဵၼ်ၵဝ်ႉငဝ်ႈငိူၼ်ႈၼဵၼ် ဢၼ်ၸၢင်ႈၽိတ်းမႅၼ်ႈ သိလ်ၶေႃႈထီႉၼိုင်ႈ လွင်ႈၶႃႈႁႅမ်ပိူၼ်ႈတၢႆ၊ ၶေႃႈသွင် လွင်ႈလၵ်ႉလၢႆၶူဝ်းပိူၼ်ႈ၊ ၶေႃႈသၢမ် လွင်ႈဢႅဝ်ႇသိူၼ်ႈၽိတ်းၼၢင်း၊ ၶေႃႈသီႇ လွင်ႈလႅၼ်ၽၢင်းလၢတ်ႈပိူၼ်ႈ ၸိူဝ်းၼႆႉလႄႈ လူၺ်ႈၸႂ်မဵတ်ႉတႃႇၵရုၼႃႇယႂ်ႇႁႅင်းၼိူဝ်သတ်းတဝႃႇ ပုတ်ႉထၶမ်းၸဝ်ႈသေ ၸဝ်ႈႁဝ်းၸင်ႇႁၢမ်ႈဝႆႉ ပဵၼ်သိလ်ၶေႃႈထီႉ 5 တႃႇပုထုၸၼ်ႇၵူၼ်းႁိူၼ်းတိုဝ်းၵမ်ယဝ်ႉ။ ငဝ်းလၢႆးမိူင်းႁဝ်းယၢမ်းလဵဝ် ၵွပ်ႈပဵၼ်ပၢၼ်ယႃႈမႃႉႁိူင်းလႄႈ ၽူႈၵေႃႉၵိၼ်လဝ်ႈမႃးယဝ်ႉ ပိူၼ်ႈၸူဝ်းႁမ်းပႃးယႃႈမဝ်းၵမ်ၵေႃႈ ၸၢင်ႈပႃးၵႂႃႇၸွမ်းယဝ်ႉ ။


လွင်ႈၵိၼ်လဝ်ႈၼၼ်ႉ ပေႃးမေႃၵိၼ်ၵေႃႈပဵၼ်ယႃႈယႃ- ဢမ်ႇမေႃၵိၼ်ၵေႃႈပဵၼ်မႃ။ ၵိၼ်မၢင်မိူဝ်ႈမၢင်ပွၵ်ႈၸိူဝ်းၼႆႉ ပဵၼ်ၵၢၼ်ၶဝ်ႈတူင်ႇဝူင်းၵူၼ်းပိူင်ၼိုင်ႈယဝ်ႉ။ ဢူၺ်းၵေႃႉၵၼ် ႁဵတ်းၵၢၼ်ႁိူဝ်ႉၸွမ်းၵၼ်မႃးၸိူဝ်းၼႆႉ ၸူဝ်းၵၼ်ဝႅင်းပၢင် ဢုပ်ႇဢူဝ်းၵၼ်၊ မီးၵၢၼ်သင်ၵေႃႈတေၸွႆႈၵၼ် တေႁွင်ႉၵၼ်ၸိူဝ်းၼႆႉ ပဵၼ်ၵၢၼ်သၢင်ႈ လွင်ႈမိုတ်ႈၵိုဝ်းၸမ်ၸႂ်ၵၼ် ၸႃႉႁူမ်ႈၶီ-လီႁူမ်ႇၸၢမ်ႇ ပိူင်ၼိုင်ႈၼင်ႇၵဝ်ႇယဝ်ႉ၊ ၵူၺ်းၵႃႈဢမ်ႇလီဢိုၵ်ႉဢွၵ်ႉ ပၼ်တႃႇသေႇ ထိုင်တီႈၸပ်းယိၼ်ႉမၼ်းတႄႉတႄႉသေ တုမ်ႉတိူဝ်ႉၵၢၼ်မၢၵ်ႈမီး ၼႃႈႁိူၼ်းတူဝ်ၵဝ်ႇၼၼ်ႉယဝ်ႉ ။


ပေႃႈမႄႈမၢင်ၵေႃႉ တီႈမိူင်းတႆးႁဝ်းၼႆႉ ပေႃးဝႃႈႁူႉဝႃႈလုၵ်ႈလၢင်း ယူႇၼႂ်းဝၢၼ်ႈၼႂ်းသူၼ် လႅပ်ႈၸပ်းတိတ်း လဝ်ႈယႃႈယဝ်ႉ မၢင်ၵေႃႉသူင်ႇလုၵ်ႈလၢင်းၵႂႃႇမိူင်းထႆးယဝ်ႉ။ ၼၢင်းယိင်းမၢင်ၵေႃႉ ယွၼ်ႉၸဝ်ႈၽူဝ်ၵိၼ်လဝ်ႈ ၵိၼ်ယႃႈသေ ပၢႆႈၽူဝ်ၶဝ်ႈမိူင်းထႆးၵေႃႈမီးယဝ်ႉ။ ပေႃးမႃးတူၺ်းတီႈၼႆႈဢွၼ်ႇၵူၺ်းၵေႃႈ လဝ်ႈယႃႈၼႆႉယႃႉၸိူဝ်ႉယႃႉၶိူဝ်း ယႃႉၼႃႈႁိူၼ်း၊ ယႃႉၵေႃႉႁၵ်ႉၵၼ်ပေႃးလႆႈၽၢတ်ႇၵၼ် ဢၼ်ဝႃႈၼၼ်ႉ မၼ်းၸိုဝ်ႈၸႂ်ႈယူႇၼႆ ၽႂ်ၵေႃႈလႅပ်ႈတေဢမ်ႇၶႂ်ႈထဵင် ။


ၶႅၵ်ႇလီပၢင်ၸႃႉမိူင်းႁဝ်း ပေႃးဢမ်ႇမီးယႃႈလဵင်ႉၵၼ်ပေႃးဢမ်ႇၶႂ်ႈပဵၼ်ပၢင်။ ႁႅၼ်းလူႇႁႅၼ်းတၢၼ်း ႁဵတ်းပၢင်ပွႆးၸႃႇၵၼႂ်းဝႃႇၼႂ်းၵမ် ပေႃးဢမ်ႇလဵင်ႉၵၼ် ပေႃးဢမ်ႇၶႂ်ႈမီးၵူၼ်းႁႆႈၵွင်ႁႆႇမွင်း၊ ယူႇၸွမ်းၵၼ်တေႃႇထိုင်မိူင်းလႅင်းဢမ်ႇလႆႈ။ ႁဵတ်းၵၢၼ်ဢဝ်ဝၼ်းမိုဝ်းၵၼ် မိူၼ်ၼင်ႇထူၺ်ႈၵႃႈ သွမ်ႈၼႃး ပၢတ်ႇၶဝ်ႈပေႃႉၶဝ်ႈၸိူဝ်းၼႆႉၵေႃႈ ၾိင်ႈထုင်းႁဝ်းၶႂ်ႈႁၢႆၵႂႃႇယဝ်ႉ။ ၵမ်ႈၼမ်ၸၢင်ႈၵၼ်ပဵၼ်ဝၼ်း လႆႈပၼ်ၵႃႈႁႅင်းပဵၼ်ငိုၼ်းလႄႈ လဵင်ႉပႃးယႃႈမဝ်းၵမ်- ၼႆၵွၼ်ႇယဝ်ႉ။ သင်ဝႃႈ ဢမ်ႇမီးယႃႈဢမ်ႇပဵၼ်၊ မိူင်းဢမ်ႇလႅင်းၸွမ်းၵၼ်လႆႈၼႆၸိုင် မိူဝ်ႈပၢၼ်ပူႇမွၼ်ႇၼၢႆးယႃႈႁဝ်းၼၼ်ႉ ႁဵတ်းပွႆးယႂ်ႇလၢမ်းလူင် သမ်ႉႁဵတ်းႁိုဝ်ႁဵတ်းမႃးလႆႈ၊ ၼႆႉပဵၼ်ၵႂၢမ်းထၢမ် ။


ငဝ်းလၢႆးပၢၼ်မိူဝ်ႈလဵဝ် ပီႈၼွင်ႉၵူၼ်းမိူင်းၸိုင်ႈတႆးႁဝ်း ဢမ်ႇထုၵ်ႇလီလိုမ်းဝႃႈ ယႃႈမဝ်းၵမ် တူၵ်းပဵၼ်ၶိူင်ႈမိုဝ်း ၵၢၼ်မိူင်း၊ ပိူၼ်ႈလဵင်ႉဢွႆႇ ပိူၼ်ႈပွႆႇႁႂ်ႈႁဝ်းၵိၼ်ယဝ်ႉ လိုမ်းၸိူဝ်ႉၶိူဝ်း လိုမ်းဝၢၼ်ႈမိူင်း။ ဝၢႆးမႃးၶိူဝ်းႁဝ်း ၸၢင်ႈတူၵ်းလုၵ်းလဝ်ႇ ၸၢင်ႈထုၵ်ႇႁႅဝ်ႉထုၵ်ႇၶိုမ်း ဢၼ်ပိူၼ်ႈႁၢင်ႈၵၢင်ႉဝႆႉ၊ ထိုင်တီႈႁဝ်းႁူႉတူဝ်ၵေႃႈပေႃးတူၵ်းလိုၼ်း၊ ပိူၼ်ႈသူၼ်သၢႆလင်၊ ယိုင်ႈတဵၼ်ႈယိုင်ႈႁုတ်ႉ ။


ယွၼ်ႉသုမ်းတၢင်းႁၵ်ႉ၊ ၵေႃႉႁၵ်ႉႁဵတ်းလႆႈ၊ တၢင်းႁၵ်ႉဢမ်ႇတဵမ်ၸႂ်ၸိူဝ်းၼႆႉသေ ၵူၼ်းၸၢႆးမၢင်ၵေႃႉ ဢဝ်လဝ်ႈႁဵတ်းၵေႃႉ၊ ပေႃးၶပ်းႁေႃႈလူတ်ႉၵႃး ၵိူတ်ႇၽေးဢုပၢတ်ႈ ၽေးၵိုင်ႉၵၢင်ႉမႃး ပိူၼ်ႈဝႃႈယွၼ်ႉမၼ်းၵိၼ်လဝ်ႈ တၢႆယွၼ်ႉလဝ်ႈ။ ၵမ်ႈၽွင်ႈမၢင်ၵေႃႉ ပေႃးၵိၼ်လဝ်ႈယဝ်ႉဢုပ်ႇၽူႈၽၢဝ်ႇလူမ်းလူင် ဢုပ်ႇသဵင်လင်၊ ဢူၼ်းဢၢၼ်မေႃးမႄး ငိၼ်းထိုင်ႁိူၼ်းတႂ်ႈႁိူၼ်းၼိူဝ်၊ ပိူၼ်ႈတၢင်ႇၵေႃႉလၵ်ႉလႆႈဢမ်ႇလၵ်ႉလႆႈ၊ ၶႂ်ႈထွမ်ႇဢမ်ႇၶႂ်ႈထွမ်ႇမၼ်းဢမ်ႇႁူႉ သွၼ်ႇႁႂ်ႈလႆႈဢုပ်ႇၵူၺ်း။ ထိုင်တီႈမၢင်ၵေႃႉဝႃႈ ၵိၼ်လဝ်ႈယဝ်ႉဢမ်ႇလႆႈဢုပ်ႇ တဝ်ႈၼိုင်ႈပျႃးၵေႃႈဢမ်ႇသိုဝ်ႉၵိၼ်။ ၸင်ႇဝႃႈၼမ်ႉၶဝ်ႈၼႃးၶဵတ်ႇႁွင်ႉ -လဝ်ႈၶဝ်ႈတွင်ႉၵူၼ်းမေႃး ။


ၵၢၼ်ၵိၼ်လဝ်ႈၵိၼ်ယႃႈၼႆႉ မၼ်းတိုၼ်းဢမ်ႇၶိုၵ်ႉလႃးလႃး ဢၼ်ဝႃႈၼၼ်ႉ ယွၼ်းလၢတ်ႈၼႄတီႈတႅၵ်ႈ ဢိတ်းဢွၼ်ႇၼိုင်ႈ။ မီးႁိူၼ်းလင်ၼိုင်ႈ ၽႃႉတီႇယွၵ်းၶဝ်ႁၢႆ ႁႃဢမ်ႇႁၼ်ၵေႃႈ ၶေႃႈၵႂၢမ်းၸၢင်ႈလုတ်ႈဢွၵ်ႇသူပ်း ဢွၵ်ႇပၢၵ်ႇၶဝ်မႃးဝႃႈ ၶီႈလဝ်ႈၶီႈယႃႈၶဝ် မႃးလၵ်ႉဢဝ်ၵႂႃႇၶၢႆၵိၼ်ပႅတ်ႈယဝ်ႉယူဝ်ႉ.... ၼႆၵွၼ်ႇယဝ်ႉ။ သမ်ႉထႅင်ႈၼႂ်းႁိူၼ်းလင်ၼိုင်ႈၼႆႉ သင်ဝႃႈမီးၶီႈလဝ်ႈၶီႈယႃႈယူႇဝႆႉၼႂ်းႁိူၼ်းၸိုင် ၶူဝ်းၶွင်ဢၼ်မီးၵႃႈၶၼ်ၼၼ်ႉ ၵႆႉဢမ်ႇၵိုတ်းယဝ်ႉ၊ ၼႂ်းၼႃႈႁိူၼ်းၵေႃႈဢမ်ႇမူၼ်းလႆႈ၊ ၽူဝ်မေးၸၢင်ႈၽိတ်းၽႅၵ်ႇၵၼ် ၸၢင်ႈမီးလွင်ႈပေႃႉထုပ်ႉၶႃႈႁႅမ်ၵၼ်၊ ပႅတ်ႈၵၼ်လႂ်ၸိူဝ်းၼႆႉယဝ်ႉ ။


ၸိူင်ႉႁိုဝ်ၵေႃႈယဝ်ႉ သင်ၸိူဝ်ႉဝႃႈပဵၼ်လႆႈၸိုင် တေႃႈၼင်ႇ ပူႉ၊ ပႃးၸဵမ်လႅၼ်းယႃႈၸိူဝ်းၼႆႉၵေႃႈ ယင်းဢမ်ႇလီၵိၼ်/လုတ်ႇၵွၼ်ႇယဝ်ႉ။ ၵမ်ႈၽွင်ႈဝႃႈလႅၼ်းယႃႈၼႆႉ မၼ်းပဵၼ်ၶိူင်ႈၶွင်ၵူၼ်းၸၢႆး ၼႆသေတႃႉၵေႃႈ တူင်ႇဝူင်းၵူၼ်းဢၼ်ပဵၼ်မိူင်းၶိုၼ်ႈယႂ်ႇၵမ်ႈၼမ် ႁၢမ်ႈၵၼ်ဝႆႉယဝ်ႉ၊ မိူၼ်ၼင်ႇမၢင်တီႈ ႁၢမ်ႈလုတ်ႇလႅၼ်းယႃႈ၊ ပေႃးပူၼ်ႉပႅၼ်မၢပ်ႇမႂ် 2,000 ဝၢတ်ႇ ၼႆၵေႃႈမီးယဝ်ႉ။ မၢင်တီႈလၢတ်ႈဝႃႈ ဢွင်ႈတီႈၼႆႈပဵၼ်တီႈလွတ်ႈႁၢမ်း လႅၼ်းယႃႈ ၼႆၵေႃႈမီးယဝ်ႉ။ လႅၼ်းယႃႈၼႆႉ ဢမ်ႇပဵၼ်ၵၢၼ်ၶႃႈၵူၼ်းတၢင်းသိုဝ်ႈၵေႃႈ ပဵၼ်ၵၢၼ်ၶႃႈၵူၼ်းတၢင်းဢွမ်ႈ၊ ၵွပ်ႈဝႃႈၵူၼ်းဢၼ်သုတ်ႇမႅၼ်ႈ ဢၢႆၵႂၼ်းလႅၼ်းယႃႈၼၼ်ႉ ဝၢႆးမႃးၸၢင်ႈၸပ်းတၢင်းပဵၼ် ၼႆယူႇယဝ်ႉ ။


ၸၢႆးၽွၼ်းလီ
17/01/2017