ၶွမ်ႊမၼီႊဢၼ်ႁပ်ႉၸၢင်ႈတေႃႇသၢႆၾႆးၾႃႉ လုၵ်ႉဢဝ်မိူင်းပၼ်ႇၵႂႃႇမိူင်းတူၼ်ၼၼ်ႉ ႁူပ်ႉထူပ်းၵၼ်တင်း ၸဝ်ႈႁႆႈၸဝ်ႈၼႃးမိူင်းပၼ်ႇသေ ဢုပ်ႇဢူဝ်းထဵင်ၵၼ် ၵဵဝ်ႇၵပ်းလွင်ႈပၵ်းသဝ်ၾႆးၾႃႉ ၼႂ်းၼႃး၊ ႁဵတ်းႁႂ်ႈၸဝ်ႈႁႆႈၸဝ်ႈၼႃးမိူင်းပၼ်ႇၵေႃႉၼိုင်ႈ ဢဝ်လိူတ်ႈၶိုၼ်ႈ ပဵၼ်လူမ်းလူႉတၢႆၵႂႃႇ ။

ၸဝ်ႈႁႆႈၸဝ်ႈၼႃးၵူၼ်းမိူင်းပၼ်ႇ တင်းၸဝ်ႈၼႃႈတီႈၶွမ်ႊပၼီႊၶဝ်ၼႆႉ ၶဝ်ႁူပ်ႉထူပ်းၵၼ်တီႈ လုမ်းၵွၼ်းၸႄႈဝဵင်း မိူဝ်ႈဝၼ်းတီႈ 14/12/2016 ။ ပဵၼ်ၶွမ်ႊပၼီႊဢွင်ႇမျိၼ်ႉမူဝ်ႇ ဢၼ်ႁပ်ႉၸၢင်ႈမဝ် (ၸၼ်ၵၼ်ႊထရႅၵ်ႊ) ပိူဝ်ႈတႃႇ တေႃႇသၢႆႁႅင်းထၢတ်ႈၾႆးၾႃႉ လုၵ်ႉဢဝ်မိူင်းပၼ်ႇၵႂႃႇမိူင်းတူၼ်၊ ၾၢႆႇၸဝ်ႈႁႆႈၸဝ်ႈၼႃးမီးၵူၼ်း 16 ၵေႃႉ၊ ႁူပ်ႉထူပ်းဢုပ်ႇဢူဝ်းၵၼ်သေထဵင်မေႃးၵၼ်၊ ႁဵတ်းႁႂ်ႈၸဝ်ႈႁႆႈၸဝ်ႈၼႃး ၸိုဝ်ႈဢူးတိၼ်ႇငူၺ်ႇ ဢၼ်မီးတၢင်းပဵၼ်ႁူဝ်ၸႂ်ဝႆႉ ပဵၼ်လိူတ်ႈၶိုၼ်ႈလူမ်းၶိုၼ်ႈသေ လႆႈလူႉတၢႆၵႂႃႇပႅတ်ႈ- ၼႆယဝ်ႉ ။


ၽူႈၵွၼ်းပွၵ်ႉတူၵ်း မိူင်းပၼ်ႇ လၢတ်ႈၼႄဝႃႈ- ၾၢႆႇၶွမ်ႊမၼီႊၶဝ်မႃးၵူၼ်း 3 ၵေႃႉ တင်းၵူၼ်းမိူင်းပၼ်ႇ ၾၢႆႇၾႆးၾႃႉၵေႃႉၼိုင်ႈ ၸိုဝ်ႈဝႃႈဢူးၸူဝ်းဢွင်ႇ တင်းမူတ်းမီး 4 ၵေႃႉ။ ၾၢႆႇတၢင်းၸဝ်ႈႁႆႈၸဝ်ႈၼႃးမိူင်းပၼ်ႇ မီးၵူၼ်း 16 ၵေႃႉ။ ၸဝ်ႈႁႆႈၸဝ်ႈၼႃးၶဝ် လႆႈၵႂႃႇတုၵ်းယွၼ်းတၢင်ႇလၢတ်ႈ ယႃႇႁႂ်ႈၶွမ်ႊပၼီႊႁႅင်းထၢတ်ႈၾႆးၾႃႉၶဝ် လႆႈမႃးပၵ်းသဝ်ၾႆးၾႃႉ ၼႂ်းၼႃး။ ၵွပ်ႈဝႃႈမိူဝ်ႈၵႃႈပူၼ်ႉမႃးၵေႃႈ လွင်ႈႁဵတ်းသဵၼ်ႈတၢင်းၸိူဝ်းၼႆႉၵေႃႈ ၸဝ်ႈႁႆႈၸဝ်ႈၼႃးၶဝ်ၼႆႉ လႆႈသုမ်းပၼ်တီႈလိၼ်တီႈၼႃးၵႂႃႇၼမ်ၼႃႇယဝ်ႉ၊ ပွၵ်ႈၼႆႉ ယႃႇႁႂ်ႈလႆႈပၼ်ထႅင်ႈၼႆ- လႆႈတုၵ်းယွၼ်း/တွင်းပၢၼ်ႇၸိူင်ႉၼႆ ။


သိုပ်ႇလၢတ်ႈဝႃႈ- ၾၢႆႇတၢင်းၶွမ်ႊပၼီႊၶဝ်တႄႉဝႃႈ သဝ်လၵ်းၾႆးၾႃႉၼႆႉ တိုၼ်းတေပၵ်းယဝ်ႉ၊ ၽႂ်မႃးႁႄႉႁၢမ်ႈတိုၼ်းဢမ်ႇလႆႈ၊ တိုၼ်းတေဢမ်ႇထွမ်ႇၵႂၢမ်းၸဝ်ႈႁႆႈၸဝ်ႈၼႃး၊ တိုၼ်းတေဢမ်ႇမီးလွင်ႈ သၢႆႈတႅၼ်းသင်လႄႈ တိုၼ်းတေႁဵတ်းၵႂႃႇႁႂ်ႈပေႃးယဝ်ႉတူဝ်ႈ။ ဝႃႈၼႆသေသွင်ၾၢႆႇထဵင်မေႃးၵၼ်ႁၢဝ်ႈႁႅင်း၊ ၾၢႆႇတၢင်းၶွမ်ႊပၼီႊၵေႃႈလုၵ်ႉမိူဝ်းၵႂႃႇ၊ ၾၢႆႇတၢင်းၸဝ်ႈႁႆႈၸဝ်ႈၼႃးၵေႃႈ လုၵ်ႉတီႈလုမ်းၵွၼ်းၸႄႈဝဵင်းသေ ဢွၵ်ႇမႃး။ ၽိူဝ်ႇဢွၵ်ႇပူၼ်ႉတူဝ်လုမ်းသေ မႃးထိုင်ၼႂ်းဝၢင်းၼၼ်ႉ ပေႃႈထဝ်ႈဢူးတိၼ်ႇငူၺ်ႇၼႆႉ ပဵၼ်လူမ်းပိၼ်ႈလူမ်ႉၵႂႃႇပႅတ်ႈတေႃႇၼႃႈတေႃႇတႃ ၽူႈၵွၼ်းလုမ်းၸႄႈဝဵင်း။ ၾၢႆႇတၢင်းၶွမ်ႊပၼီႊၶဝ်တႄႉ ဢမ်ႇဝၢႆးတူၺ်ႇသေ ပွၵ်ႈမိူဝ်းၵႂႃႇပႅတ်ႈ- လၢတ်ႈၼႄၼင်ႇၼႆ ။


ပေႃႈထဝ်ႈဢူးတိၼ်ႇငူၺ်ႇ ဢၼ်လူမ်ႉၼႂ်းဝၢင်းလုမ်းၵွၼ်းၸႄႈဝဵင်းၼႆႉ ဢႃယုမီး 74 ပီ၊ လူမ်ႉၵႂႃႇယဝ်ႉသေ ဢဝ်သူင်ႇၵႂႃႇ ယူတ်းယႃတူဝ်တီႈႁူင်းယႃ၊ ၵူၺ်းၵႃႈဢမ်ႇတၼ်းၶိုတ်းသေ လႆႈလူႉတၢႆၵႂႃႇတီႈႁူင်းယႃ၊ ၶၢပ်ႈတူဝ်မၼ်းၼႆႉ ဢဝ်ပွၵ်ႈမႃးတီႈႁိူၼ်းသေႁဵတ်းပၢင်ၸႃပၼ ႁႅၼ်းတၢၼ်းယၢတ်ႇၼမ်ႉၶႂမ်ႈတဝ်ႈ ပူၼ်ႉၶၢပ်ႈတူဝ်မိူဝ်ႈၼႆႉ ဝၼ်းတီႈ 15/12/2016 ၼႆႉ- ၼႆယဝ်ႉ ။


တႃႇတေမႃးပၵ်းလၵ်းသဝ်ၾႆးၾႃႉၼႆႉ ဢွၼ်ၼႃႈၼႆႉ ၶွမ်ႊပၼီႊၼႆႉ မႃးပၵ်းသဝ်လၵ်းၾႆး တီႈႁိမ်းၶၢင်ႈတၢင်းယဝ်ႉပွၵ်ႈၼိုင်ႈ၊ ၵူၺ်းၵႃႈ  ၸဝ်ႈၼႃႈတီႈ လုမ်းၵွၼ်းၾၢႆႇသိူဝ်ႇတၢင်းၶဝ်သမ်ႉဝႃႈ- မၼ်းပၵ်းၸမ်ၼိူဝ်သဵၼ်ႈတၢင်းပူၼ်ႉတီႈ ႁဵတ်းႁႂ်ႈသဵၼ်ႈတၢင်းၵႅပ်ႈၵႂႃႇ၊ ႁႂ်ႈလူင်းၼိူဝ်သဵၼ်ႈတၢင်း။ ၵွပ်ႈၼၼ် ၶွမ်ႊပၼီႊၶဝ်ၵေႃႈ လူင်းၼိူဝ်တၢင်းသေ ပၵ်းၶဝ်ႈၵႂႃႇပႃးၼႂ်းၼႃးၵူၼ်းမိူင်း။ ယွၼ်ႉပိူဝ်ႈလူင်းပၵ်းၼႂ်းၼႃး ၵူၼ်းမိူင်းသေ ၸဝ်ႈၼႃးၵူၼ်းမိူင်းပၼ်ႇၶဝ်ၵေႃႈ ၶၢင်းဝႃႈၼႃးလူႉၼႃးၵွႆ ။


ၵူၼ်းမိူင်းပၼ်ႇ ၸၢႆးလမ် ထႅင်ႈဝႃႈ- ဢၼ်သဝ်ၾႆးတေပၵ်းၼႂ်းၼႃးၼႆႉ ပိုၼ်ႉတီႈမၼ်းတေဢဝ်မွၵ်ႈလၢႆ ဢေႊၵႃႊတႄႉ ႁဝ်းၶႃႈဢမ်ႇၸၢင်ႈၼပ်ႉလႆႈ၊ ၶဝ်ပၵ်းလတ်းလူင်ၵႂႃႇၼႂ်းၼႃးၵမ်ႈၸႂ်ၶဝ်ၶႂ်ႈလတ်း၊ ၶဝ်ဢမ်ႇမႃးဢုပ်ႇၵူၼ်းဝၢၼ်ႈသင်။ ဢၼ်ၶဝ်မႃးတင်ႈသဝ်လၵ်းၾႆးသေ ၶုတ်းလိၼ်ၶုတ်းသၢႆးၸိူဝ်းၼႆႉ မၼ်းတုမ်ႉတိူဝ်ႉလိၼ်သူၼ်ႁႆႈၼႃးၵူၼ်းမိူင်း၊ ႁဵတ်းႁႂ်ႈၸဝ်ႈႁႆႈၸဝ်ႈၼႃး ဢမ်ႇၸၢင်ႈၽုၵ်ႇသွမ်ႈလီလီ။ ယၢမ်းလဵဝ် ၸဝ်ႈႁႆႈၸဝ်ႈၼႃးၸိူဝ်းမႃးတၢင်ႇလၢတ်ႈဝႆႉ ဢမ်ႇယွမ်းမွၵ်ႈ 50 ၵေႃႉ/ၸဝ်ႈ။ မၢင်တီႈၵေႃႈၶဝ်ပၵ်းသဝ်လၵ်းၾႆး ယဝ်ႉယဝ်ႉ၊ မၢင်တီႈၵေႃႈယင်းတိုၵ်ႉၶုတ်းလိၼ်ယူႇ၊ မၢင်တီႈၵေႃႈဢဝ်သဝ်လၵ်းၾႆးလႄႈသၢႆၾႆးၸိူဝ်းၼႆႉ မႃးလူင်းဝႆႉၼႂ်းၼႃးပိူၼ်ႈ၊ ႁဵတ်းႁႂ်ႈဢမ်ႇၸၢင်ႈႁဵတ်းၼႃး ၵွပ်ႈဝႃႈလၵ်းၾႆးသၢႆၾႆးၸိူဝ်းၼႆႉ မႃးမၢၵ်ႇမိူဝ်ဝႆႉယူႇတီႈၼႂ်းၼႃး- ဝႃႈၼႆ ။


ပေႃႈထဝ်ႈဢူးတိၼ်ႇငူၺ်ႇၼႆႉၵေႃႈ ၵွၼ်ႇၼႃႈမၼ်းတေမႃးၶဝ်ႈပၢင်ၵုမ်ၼႆႉ မၼ်းၵႂႃႇၵဵပ်းၽဵဝ်ႈသဝ်လၵ်းၾႆး တင်းသၢႆၾႆး ဢၼ်မႃးမၢၵ်ႇမိူဝ်ဝႆႉတီႈၼႂ်းၼႃးမၼ်းၸိူဝ်းၼႆႉ ဢဝ်ၶပ်ႉဢဝ်ၶႅပ်ႇဝႆႉႁိမ်းၶၢင်ႈၼႃး။ ပေႃႈထဝ်ႈၼႆႉသမ်ႉမီး တၢင်းပဵၼ်ႁူဝ်ၸႂ် ႁႅင်းႁူဝ်ၸႂ်ဢေႇ၊ သမ်ႉပဵၼ်ၵူၼ်းဢႃယုယႂ်ႇ ၵႄႇထဝ်ႈယဝ်ႉၵေႃႈပိူင်ၼိုင်ႈ။ ၽိူဝ်ႇႁဵတ်းၵၢၼ်ၼႂ်းၼႃးမႃးယဝ်ႉသေ မႃးဢုပ်ႇၵုမ်ၵၼ် မႃးထဵင်ၵၼ်တင်းၶွမ်ႊပၼီႊၶဝ်ၵေႃႈ ႁိူဝ်ႉႁႅင်းပူၼ်ႉတီႈသေမဝ်းလူမ်ႉၵႂႃႇ တေႃႇထိုင်မၼ်းပေႃးတၢႆ- ၸၢႆးလမ် ၵူၼ်းမိူင်းပၼ်ႇလၢတ်ႈ ။


ၵဵဝ်ႇၵပ်းလွင်ႈၼႆႉ ၽူႈၵွၼ်းၸႄႈဝဵင်းမိူင်းပၼ်ႇ ၵေႃႈလၢတ်ႈဝႃႈ- ၶွမ်ႊပၼီႊၶဝ်ၼႆႉ တေမႃးႁဵတ်းသဝ်ၾႆး ဝၢင်းသၢႆၾႆးၼႆႉၵေႃႈ ဢမ်ႇမႃးဢုပ်ႇၵုမ်ၵၼ်တင်း ၾၢႆႇလုမ်းၵွၼ်းၸႄႈဝဵင်း၊ တင်းၸဝ်ႈၼႃႈတီႈဢၼ်ၵဵဝ်ႇၶွင်ႈ သေဢမ်ႇၵႃး ဢမ်ႇမႃးဢုပ်ႇၵုမ်ၵၼ်တင်း ၸဝ်ႈၼႃးၶဝ်၊ ယွၼ်ႉၼၼ် ၸင်ႇမႃးပဵၼ်ပၼ်ႁႃယႂ်ႇလူင်၊ တီႈတႄႉမၼ်းဢမ်ႇထုၵ်ႇလီပဵၼ်ၸိူင်ႉၼႆ။ ၵွပ်ႈၼႆ ၾၢႆႇတၢင်းလုမ်းၵွၼ်းၸႄႈဝဵင်း တေတႅမ်ႈလိၵ်ႈသေ တၢင်ႇထိုင်တီႈ လူင်ပွင်ၸိုင်ႈမိူင်းတႆး၊ မိူဝ်ႈလဵဝ်ႁၢင်ႈႁႅၼ်းဝႆႉယဝ်ႉ- ဝႃႈၼႆ ။


ၶွမ်ႊပၼီႊၼႆႉ ၵၢၼ်ပၵ်းသဝ်လၵ်းၾႆးၼႆႉ ၶဝ်တႄႇႁဵတ်းမႃး ၸဵမ်မိူဝ်ႈပူၼ်ႉမႃး 3 လိူၼ်ယဝ်ႉ။ ၶဝ်ၶဝ်ႈၵႂႃႇၶုတ်းလုၵ်းသဝ်ၾႆးၾႃႉၼႂ်းၼႃးၵူၼ်းမိူင်းသေ ပၵ်းသဝ်ၾႆး ႁၢင်ႈသၢႆၾႆးၵႂႃႇတိၵ်းတိၵ်း၊ ဢမ်ႇဢုပ်ႇဢူဝ်းၽႂ် ။


ၵူၺ်ူးၵႃႈၵမ်းလိုၼ်းသုတ်း လႆႈႁူႉဝႃႈ မိူဝ်ႈဝႃးဝၼ်းတီႈ 14/12/2016 ယၢမ်းၵၢင်ၼႂ်ၸဵမ်ၸဝ်ႉ ၶွမ်ႊပၼီႊၶဝ်ၼႆႉ တင်းလူတ်ႉၵႃးဢၼ်ၸႂ်ႉၼႂ်းၵၢၼ်ငၢၼ်းၶဝ် (လူတ်ႉၵႃးမဵတ်း) ၵူၼ်းႁဵတ်းၵၢၼ်ၶဝ်ၸိူဝ်းၼႆႉ ၶိုၼ်းတၢင်ႇၶူဝ်းၶွင်ၶဝ်သေ ပွၵ်ႈၶိုၼ်းမိူဝ်းၵႂႃႇတၢင်းတူၼ်ႈတီး။ ၵူၺ်းၵႃႈ သဝ်လၵ်းၾႆးၸိူဝ်းမႃး ဢဝ်လူင်းဝႆႉၼႂ်းၼႃး ၵူၼ်းမိူင်းၸိူဝ်းၼၼ်ႉၵေႃႈ တိုၵ်ႉမီးဝႆႉယူႇ၊ ၶဝ်တေသိုပ်ႇႁဵတ်းထႅင်ႈႁႃႉ ဢမ်ႇသိုပ်ႇႁဵတ်းႁႃႉၸိူဝ်းၼႆႉ ၶဝ်ဢမ်ႇတၵ်းသဵင်သင်။ တီႈပၢင်ၸႃပၼ/မႃႇသႃႇ ပေႃႈထဝ်ႈတိၼ်ႇငူၺ်ႇၵေႃႈ ၶဝ်ဢမ်ႇမႃးငွၵ်ႈတူၺ်း၊ ဢမ်ႇမႃးတွင်ႈထၢမ်ၶၢဝ်ႇငၢဝ်းသင်- ၼႆယဝ်ႉ ။