ပီႈၼွင်ႉၵူၼ်းမိူင်းဝၢၼ်ႈပၢင်ၵွၼ် ဢိူင်ႇပၢင်ၵွၼ် ဝဵင်းၵျွၵ်ႉမႄး ဢွၼ်ၵၼ်ဢွၵ်ႇပၢႆႈမႃးယူႇသဝ်းတီႈၶႅမ်ႉၵူၼ်းပၢႆႈၽေးသိုၵ်း တီႈဝတ်ႉ/ၵျွင်းမုၼ်ၸဝ်ႈပွၵ်ႉ 8 ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။

တႄႇဢဝ်ဝၼ်းတီႈ 11 မႃးတေႃႇယၢမ်းလဵဝ် သိုၵ်းတဢၢင်းၵဵပ်းသိုၵ်းမႂ်ႇလႄႈ ၵူၼ်းဝၢၼ်ႈၵူၼ်းမိူင်းၵူဝ်ႁႄ ၵူဝ်လႆႈႁဵတ်းသိုၵ်း၊ ဢွၼ်ၵၼ်ပၢႆႈဢွၵ်ႇမႃး ယူႇသဝ်းၼႂ်းဝဵင်းၵျွၵ်ႉမႄးတင်းဝၢၼ်ႈ ဝႃႈၼႆ ။


ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ (2) လၢတ်ႈဝႃႈ- “ သိုၵ်းလွႆၶဝ်မႃးၵဵပ်းသိုၵ်းမႂ်ႇ၊ ယူႇတီႈသိုၵ်းလွႆၶဝ်မႃးဢဝ်ၵူၼ်းၵႂႃႇႁဵတ်းသိုၵ်းမီး 24 ၵေႃႉ၊ ပီႈၼွင်ႉဝၢၼ်ႈပၢင်ၵွၼ်သမ်ႉၵူဝ်ႁႄသေ လႆႈပၢႆႈမႃးတင်းၼႂ်းဝဵင်းၵျွၵ်ႉမႄး၊ ဢၼ်ပၢႆႈဢွၵ်ႇမႃးတႄႉ ပၢႆႈမႃးတင်းဝၢၼ်ႈယဝ်ႉ၊ ၵူၺ်းၵႃႈဢၼ်ပၢႆႈမႃးယူႇႁိူၼ်းပီႈၼွင်ႉၵေႃႈမီး၊ ဢၼ်မီးႁိူၼ်းၼႂ်းဝဵင်းၵေႃႈမႃးယူႇႁိူၼ်းၽႂ်ႁိူၼ်းမၼ်း၊ ဢၼ်ၸိူဝ်းပၢႆႈမႃးတီႈပၢင်သဝ်း (ၶႅမ်ႉ) ပွၵ်ႉ 8 ၼႆႉၵေႃႈမီး။ တီႈၶႅမ်ႉတႄႉတေမီးမွၵ်ႈ 140 ၵေႃႉပၢႆႁိမ်း 150 ယွမ်းယွမ်း။ ထိုင်ယၢမ်းလဵဝ်ပႆႇႁတ်းပွၵ်ႈႁိူၼ်း” ဝႃႈၼႆ ။


ဝၢၼ်ႈပၢင်ၵွၼ် ဢၼ်လင်ႁိူၼ်းမီး 170 ပၢႆၼႆႉ ၵူၼ်းဝၢၼ်ႈ မီးႁူဝ်ၵူၼ်း 600 ပၢႆ၊ ၵူၼ်းဝၢၼ်ႈမၢင်ၵေႃႉၵေႃႈ လႆႈငိၼ်းၶၢဝ်ႇသိုၵ်းလွႆတေမႃးၵဵပ်းသိုၵ်းမႂ်ႇၼႆသေ ဢွၵ်ႇပၢႆႈမႃးဢွၼ်တၢင်းၵေႃႈမီး၊ မၢင်ၵေႃႉလႆႈႁူႉယဝ်ႉသေဢွၵ်ႇပၢႆႈမႃးၵမ်းလဵဝ်ၵေႃႈမီး၊ ၼႂ်းဝၼ်းတီႈ 11 တႄႉ ဢွၼ်ၵၼ်ပၢႆႈမႃးတင်းဝၢၼ်ႈယဝ်ႉ- ဝႃႈၼႆ ။


ပူၼ်ႉမႃးမိူဝ်ႈဝၼ်းတီႈ 10/12/2016 ၼၼ်ႉၵေႃႈ သိုၵ်းလွႆ(တဢၢင်း) မႃးဢဝ်ၵူၼ်းဝၢၼ်ႈပၢင်ၵွၼ် ၵႂႃႇႁဵတ်းသိုၵ်းမႂ်ႇထႅင်ႈ 24 ၵေႃႉ-ဝႃႈၼႆ ။


ၼွၵ်ႈလိူဝ်ၼၼ်ႉ ၵူၼ်းပၢႆႈၽေးသိုၵ်း ဢၼ်မႃးမီးဝႆႉတီႈပၢင်သဝ်းၵူၼ်းပၢႆႈၽေး တီႈလႃႈသဵဝ်ႈမီး 414 ၵေႃႉ၊ ပၢင်သဝ်းမီး7 တီႈ၊ မူႇၸႄႈ 322 ၵေႃႉ၊ ၶႅမ်ႉပၢင်သဝ်းမီး5 တီႈ၊ ၼွင်ၶဵဝ် 221 ၵေႃႉ၊ ၶႅမ်ႉပၢင်သဝ်းမီး 1 တီႈ၊ သီႇပေႃႉ 122 ၵေႃႉ၊ ၶႅမ်ႉပၢင်သဝ်းမီး 1 တီႈ၊ ၼမ်ႉတူႈ 1200 ပၢႆ၊ ၶႅမ်ႉပၢင်သဝ်းမီး 5 တီႈ၊ မၢၼ်ႈတူင်ႈ 41 ၵေႃႉ၊ ၶႅမ်ႉပၢင်သဝ်း 1 တီႈ၊ ၼႂ်းၸႄႈတွၼ်ႈၵျွၵ်ႉမႄး ၵူၼ်းပၢႆႈၽေးသိုၵ်း တင်းမူတ်းမီး 1,858 ၵေႃႉယဝ်ႉ- ဝႃႈၼႆ ။