ၸဝ်ႈၼႃႈတီႈပလိၵ်ႈထႆး၊ ၾၢႆႇၽဵဝ်ႈမူၺ်ႉယႃႈမဝ်းၵမ် တီႉၺွပ်းၵူၼ်းၵႃႉယႃႈလႄႈယိုတ်းလႆႈယႃႈမႃႉ ၼပ်ႉသႅၼ်၊ ယႃႈဢႆႉသ် ၵႃႈၶၼ်တူၵ်းမႅၼ်ႈငိုၼ်းထႆး 60 လၢၼ်ႉပၢႆ ။

ဝၼ်းတီႈ07/12/2016 ပလိၵ်ႈလႄႈၸဝ်ႈၼႃႈတီႈၾၢႆႇၽဵဝ်ႈမူၺ်ႉယႃႈမဝ်းၵမ် ၸႄႈတွၼ်ႈသမုတ်ႊ သႃၶွၼ်ႊ ႁူမ်ႈၵၼ်တီႉၺွပ်းလႆႈယႃႈမဝ်းၵမ် တီႈဢိူင်ႇထႃႊသၢႆႊ ၸႄႈဝဵင်းမိူင်း ၸႄႈတွၼ်ႈ သမုတ်ႊသႃႊၶွၼ်ႊ ၸိုင်ႈထႆး ။


သိုဝ်ႇၶၢဝ်ႇထႆး TNN ပိုၼ်ၽၢဝ်ႇဝႃႈ - ပလိၵ်ႈတီႉၺွပ်းလႆႈ ၽူႈၸၢႆး4 ၵေႃႉ ပဵၼ်တႆးလႄႈလၢဝ်း ဢမ်ႇလႆႈ ႁူႉၸိုဝ်ႈ ယိုတ်းလႆႈယႃႈမႃႉ 97 မတ်ႉ ႁူမ်ႈ 194,000 မဵတ်ႉယႃႈဢႆႉသ် 23 ၵီႊလူဝ်ႊ တူၵ်း မႅၼ်ႈငိုၼ်း 65 လၢတ်ႉၿၢတ်ႇ  တူၵ်းငိုၼ်းမၢၼ်ႈ 2,000 လၢၼ်ႉၵျၢတ်ႉပၢႆ ။


ၽွၼ်ႊၶျႆႊ ၵျရိူၼ်ႊဝူင်ႊ (ပလိၵ်ႈ) ၸၼ်ႉၸွမ်ႁၢၼ် လၢတ်ႈဝႃႈ  “ယႃႈမဝ်းၵမ်ၼႆႉ ဢဝ်လုၵ်ႉ မႃးတၢင်း မိူင်းလၢဝ်းသေ တေဢၢၼ်းမႃးၶၢႆတၢင်း ၸိုင်ႈထႆးပွတ်းၸၢၼ်း  ၸုမ်းၵႃႉယႃႈမဝ်းၵမ် ၸုမ်းၼႆႉ လၵ်ႉ သူင်ႇယႃႈလၢႆၵမ်းယဝ်ႉ ႁဝ်းၶႃႈတေထတ်းထၢမ်ဢဝ် ၵူၼ်းၸိူဝ်းႁူမ်ႈၽၢၵ်ႈ (ႁူမ်ႈၵၢၼ်) မႃးပၼ်တူတ်ႈ တၢမ်ႇ ၸွမ်းၼင်ႇမၢႆမီႈမီးၼၼ်ႉၵႂႃႇ” ဝႃႈၼႆ ။


ၸိူင်ႉၼၼ်ၼင်ႇၵဝ်ႇ မိူဝ်ႈဝၼ်းတီႈ 08/12/2016 ၸဝ်ႈၼႃႈတီႈပလိၵ်ႈထႆး မီးလွင်ႈပိုတ်းယိုဝ်းၵၼ် တင်း ၸုမ်းၵႃႉယႃႈမဝ်းၵမ် တီႈဢိူင်ႇတႃႈတွၼ်း ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး ။ ၵူၼ်းတေႃႉသူင်ႇသၢႆယႃႈ တၢႆ 7 ၵေႃႉ ပဵၼ်ၽႂ် ၸုမ်းလႂ် ဢၼ်ဝႃႈၼၼ်ႉ တၢင်းၾၢႆႇၸဝ်ႈၼႃႈတီႈတိုၵ်ႉ ထတ်းထွင်တူၺ်းယူႇ ။


ဝၢႆးၼၼ်ႉၸဝ်ႈၼႃႈတီႈၽိူမ်ႉထႅမ်ဢဵၼ်ႁႅင်းပႂ်ႉတီႈလၢၼ်ႇ (ၵဵၵ်ႉ) တီႈဝၢၼ်ႈႁူဝ်မိူင်းငၢမ်း မူႇ 11 ဢိူင်ႇတႃႈတွၼ်း ၸႄႈဝဵင်းမႄႈဢၢႆး  ယိုတ်းလႆႈယႃႈမႃႉ 4 ထူင် မွၵ်ႈ 400,000 မဵတ်ႉ ယႃႈၽွင်ၶၢဝ် ႁေႊရူဝ်ႊဢိၼ်ႊ 6 ထူင် ၵွင်ႈAK-47 ၼိုင်ႈ လဝ်းလႄႈမၢၵ်ႇၵွင်ႈ ၸိူဝ်းၼႆႉ ။