ၽူႈတႅၼ်းသၽႃးၵူၼ်းမိူင်း၊ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ႁူပ်ႉထူပ်း ၸဝ်ႈႁႆႈၸဝ်ႈၼႃးလႄႈ ၸုမ်းၵူၼ်းၼုမ်ႇ တီႈထုင်ႉမိူင်းတွမ်း တၢင်ႉယၢၼ်း ပွၵ်ႈၵမ်းႁႅၵ်ႈ မီးပီႈၼွင်ႉၵူၼ်း မိူင်း ၶဝ်ႈႁူမ်ႈ 1500 ပၢႆ ။

ဝၼ်းတီႈ 19/10/2016 ယၢမ်း ၵၢင်ဝၼ်း 12:00-02:30 မူင်းၶိုင်ႈ ၽူႈတႅၼ်းသၽႃးၵူၼ်းမိူင်း ၸၢႆးမွင်ႇပုၼ်ႉလႄႈ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ2 ၸၢႆးၶမ်းမျၢတ်ႈ ႁူပ်ႉထူပ်း ၸဝ်ႈႁႆႈၸဝ်ႈၼႃးလႄႈ မူႇၸုမ်းၵူၼ်းၼုမ်ႇ တီႈဝိႁၢရ်ၼမ်ႉတီး၊ ဢိူင်ႇမိူင်းတွမ်း၊ ၸႄႈဝဵင်း တၢင်ႉယၢၼ်း ၸိုင်ႈတႆးပွတ်းႁွင်ႇ။ ၽူႈတႅၼ်းသၽႃး သပ်းလႅင်းလၢတ်ႈၼႄ လွင်ႈသၽႃး။ ၸဝ်ႈႁႆႈၸဝ်ႈၼႃး သပ်းလႅင်းၼႄ ၶေႃႈယိူင်းဢၢၼ်း ၸဝ်ႈႁႆႈၸဝ်ႈၼႃး၊ ၸုမ်းၵူၼ်းၼုမ်ႇ သပ်းလႅင်းၼႄ လွင်ႈၸုမ်းၵူၼ်းၼုမ်ႇ တင်းၸဝ်ႈႁႆႈၸဝ်ႈၼႃးပိုင်ႈဢိင်ၵၼ်ၸိူင်ႉႁိုဝ် ၸဵမ်ၸိူဝ်းၼႆႉ ။


ၸၢႆးၸွမ်သႅင် ၽူႈပွင်ၵၢၼ်ၼႂ်းပႃႇတီႇႁူဝ်သိူဝ် ၸႄႈဝဵင်းတၢင်ႉယၢၼ်း လၢတ်ႈဝႃႈ “ ပိူင်လူင်မၼ်း  ႁဝ်းၶႃႈယူႇတီႈၽူႈတႅၼ်းသၽႃးၵူၼ်းမိူင်း တင်းၽူႈတႅၼ်းသၽႃးၸႄႈမိူင်း တၢင်ႉယၢၼ်း ႁူပ်ႉထူပ်းပေႃႈမႄႈၵူၼ်းမိူင်း၊ ၸဝ်ႈႁႆႈၸဝ်ႈၼႃးလႄႈ ၵူၼ်းၼုမ်ႇ၊ ၶဝ်ၸဝ်ႈလႆႈသပ်းလႅင်းလၢတ်ႈၼႄ ဢၼ်လႆႈႁၢပ်ႇၵၢၼ်ၼႂ်းသၽႃး၊ ဢိၵ်ႇပႃး သပ်းလႅင်းလၢတ်ႈၼႄ ၵေႃႁူမ်ႈ သၢင်ႈၸဝ်ႈ ႁႆႈၸဝ်ႈၼႃး လႄႈ ၵူၼ်းၼုမ်ႇ ၸဵမ်ၸိူဝ်းၼႆႉ” ဝႃႈၼႆ ။


ၽူႈတႅၼ်းသၽႃးၵူၼ်းမိူင်း ၸၢႆးမွင်ႇပုၼ်ႉ သပ်းလႅင်းလၢတ်ႈၼႄ လွင်ႈသုၼ်ႇလႆႈသုၼ်ႇပဵၼ် ၵူၼ်းမိူင်း၊ ၵူၼ်းမိူင်းၼိုင်ႈၵေႃႉ မီးသုၼ်ႇဢီႈသင်လၢႆလၢႆ၊ တိုၵ်းသူၼ်းထိုင်ၵူၼ်းမိူင်း ႁႂ်ႈတူင်ႉ တူင်ႉတိုၼ်ႇတိုၼ်ႇသေ မီးလွင်ႈယၢပ်ႇၽိုတ်ႇၸိူင်ႉႁိုဝ်ၵေႃႈ ႁႂ်ႈတၢင်ႇလိၵ်ႈထိုင်မႃး ႁတ်းႁတ်း ႁၢၼ်ႁၢၼ်  ၸဵမ်ၸိူဝ်းၼႆႉ ။


ၽူႈတႅၼ်းသၽႃးၸႄႈမိူင်း ၸၢႆးၶမ်းမျၢတ်ႈ သပ်းလႅင်းလၢတ်ႈၼႄ “ၵူၼ်းမိူင်း တိုၵ်ႉလႆႈၵူဝ်ႁႄ၊ ပႆႇပွင်ႇၸႂ်လွင်ႈသုၼ်ႇလႆႈၸဝ်ႈႁႆႈၸဝ်ႈၼႃး၊  ယိူင်းဢၢၼ်းမီးၸိူင်ႉႁိုဝ်၊ ၸဝ်ႈၼႃး ထုၵ်ႇလႆႈၵႅတ်ႇၵင်ႈ ၼမ်ႉလိၼ်ႁိၼ်ၽႃ ႁဝ်းၸိူင်ႉႁိုဝ်၊ ယဝ်ႉၵေႃႈ သပ်းလႅင်းပႃး လွင်ႈၵူၼ်းၼုမ်ႇ လႄႈ ၸဝ်ႈႁႆႈ ၸဝ်ႈၼႃး တေလႆႈဢိင်ပိုင်ႈၵၼ် ၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ ။


ၵဵဝ်ႇၵပ်းလွင်ႈပၢင်ႁူပ်ႉထူပ်းၵူၼ်းမိူင်း ပွၵ်ႈၵမ်းၼႆႉ မီးသင်ၶၸဝ်ႈလႄႈ ၽူႈယႂ်ႇၵူၼ်းလူင် ၼႂ်းဢိူင်ႇ မိူင်းတွမ်း၊ ၽူႈၵွၼ်းဝၢၼ်ႈၵွၼ်းဢိူင်ႇ၊ တပ်ႉသိုၵ်းၵူၼ်းမိူင်း ဢိူင်ႇမိူင်းတွမ်း၊ ၽူႈတႅၼ်းသၽႃးၵူၼ်းမိူင်းတင်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸဵမ်ၸိူဝ်းၼႆႉ ၶိုၼ်ႈႁွတ်ႈမွၵ်ႇလၢတ်ႈၶေႃႈၵႂၢမ်း။ မီးသင်ၶၸဝ်ႈလႄႈ ၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈ တင်းမူတ်း 1500 ပၢႆ ဝႃႈၼႆ ။