လွင်ႈတပ်ႉမတေႃႇ သိုၵ်းမၢၼ်ႈၸႂ်ႉႁိူဝ်းဝိၼ်သိုၵ်း တိုၵ်းယိုဝ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၽွင်းၶၢဝ်းဢွၵ်ႇဝႃႇသႃ ႁၢဝ်ႈႁႅင်းၼၼ်ႉ ၽူႈၶၢပၢၵ်ႇပႃႇတီႇႁူဝ်သိူဝ် (SNLD) လၢတ်ႈဝႃႈ- ပဵၼ်ပီႈၼွင်ႉၸၢဝ်းၶိူဝ်း ၼႂ်းမိူင်းၼင်ႇၵၼ် တိုၵ်းယိုဝ်းၵၼ်၊ ဢမ်ႇမီးလွင်ႈပဵၼ်ထမ်း ။

“လွင်ႈဢၼ်သိုၵ်းမၢၼ်ႈ ဢဝ်ႁိူဝ်းဝိၼ်တိုၵ်းသိုၵ်းသေ ၶဝ်ႈလေႃႇတိုၵ်းသိုၵ်းတဢၢင်း (TNLA) ၼႂ်းၸႄႈဝဵင်းၵျွၵ်ႉမႄးၼၼ်ႉ  မၼ်းပဵၼ်ပၼ်ႁႃ ၵူၼ်းၼႂ်းမိူင်းလဵဝ်ၵၼ် ပီႈၼွင်ႉၵၼ်ယိုဝ်းၵၼ်ၶိုၼ်း။ မိူၼ်ၼင်ႇပၼ်ႁႃတၢင်းမိူင်းရၶႅင်ႇတႄႉ မၼ်းၵႂႃႇပၢႆႉၵဵဝ်ႇၶွင်ႈတင်းၼွၵ်ႈမိူင်းလႄႈ ပဵၼ်ပၼ်ႁႃမိူင်းႁူမ်ႈတုမ်။ ၵွပ်ႈၼၼ်လႄႈ ပေႃးဢမ်ႇၵိုတ်းလွင်ႈႁၢင်ႈႁႅၼ်းသိုၵ်းတေႃႇၸၢဝ်းၶိူဝ်းၼႆႉ တႃႇဝၢၼ်ႈမိူင်းတေၵတ်းယဵၼ်ၼၼ်ႉ တိုၼ်းတေဢမ်ႇမီး။ ပဵၼ်သိုၵ်းၼႂ်းမိူင်း သမ်ႉၸႂ်ႉပႃးႁိူဝ်းဝိၼ်တိုၵ်းသိုၵ်းၸိူဝ်းၼႆႉ မၼ်းဢမ်ႇပဵၼ်ထမ်း ဢမ်ႇၶဝ်ႈတြႃး- ၽူႈၶၢၼ်ပၢၵ်ႇပႃႇတီႇႁူဝ်သိူဝ် (SNLD) ၸၢႆးလဵၵ်ႉ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ။


ပူၼ်ႉမႃးမိူဝ်ႈၽွင်းၶၢဝ်းဢွၵ်ႇဝႃႇသႃ လိူၼ်သိပ်းဢဵတ်းမူၼ်း ဝၼ်းတီႈ 16/10/2016 ၼၼ်ႉ သိုၵ်းမၢၼ်ႈ တပ်ႉမတေႃႇ တင်းသိုၵ်းတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်း တီႈႁိမ်းဝၢၼ်ႈပႃႇလႅင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ၾၢႆႇသိုၵ်းမၢၼ်ႈၸႂ်ႉႁိူဝ်းဝိၼ်မႅင်းမီႈ (Huskie) 3 လမ်း ၶဝ်ႈယိုဝ်းၸွႆႈတီႈၼႂ်းပိုၼ်ႉတီႈ ပၢင်တိုၵ်း ။


တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ၼႆႉ တူင်ႉၼိုင်ဝႆႉၼႂ်းၸိုင်ႈတႆးပွတ်းႁွင်ႇလၢႆၸႄႈဝဵင်း မိူၼ်ၼင်ႇၼႂ်းၸႄႈဝဵင်းၵျွၵ်ႉမႄး၊ ၸႄႈဝဵင်းၵူတ်ႉၶၢႆ၊ ၸႄႈဝဵင်းမၢၼ်ႈတူင်ႈ၊ ၸႄႈဝဵင်းၵျွၵ်ႉမႄး ၸိူဝ်းၼႆႉ။ မၢင်ပွတ်းတွၼ်ႈ မီးၸုမ်းဢူၺ်းလီ တပ်ႉသိုၵ်းၵူဝ်းၵၢင်ႉ MNDAA တင်းတပ်ႉသိုၵ်းရၶႅင်ႇ AA ၸိူဝ်းၼႆႉ တူင်ႉၼိုင်ဝႆႉၸွမ်းၵၼ် ။


တပ်ႉသိုၵ်းတဢၢင်း (TNLA) လႄႈ တပ်ႉသိုၵ်းၵူဝ်းၵၢင်ႉ (MNDAA) ၊ တပ်ႉသိုၵ်းရၶႅင်ႇ (AA) ၸိူဝ်းၼႆႉ ၾၢႆႇတပ်ႉမတေႃႇမၢၼ်ႈယိုၼ်ႈယွၼ်းဝႆႉဝႃႈ- သင်ၸိူဝ်ႉဝႃႈ ၶႂ်ႈၶဝ်ႈပႃးၼႂ်းပၢင်ၵုမ်လူင်ၵၢၼ်မိူင်း မိူင်းမၢၼ်ႈ၊ ဢမ်ႇၼၼ် ပၢင်ၵုမ်လွင်ႈငမ်းယဵၼ်ၸိူဝ်းၼႆႉၼႆၸိုင် တၵ်းလႆႈယွမ်းဝၢင်းၶိူင်ႈၵွင်ႈၵၢင်ႇပိူင်လဵဝ်။ ၵူၺ်းၵႃႈ ၾၢႆႇတၢင်းတပ်ႉသိုၵ်းတဢၢင်း တင်းၾၢႆႇၸုမ်းဢူၺ်းလီၶဝ် ဢမ်ႇႁပ်ႉ ၶေႃႈယိုၼ်ႈယွၼ်းၼႆႉလႄႈ ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၸတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်ၻီႊသႅမ်ႊၿိူဝ်ႊ (2016)ၼၼ်ႉၵေႃႈ ဢမ်ႇလႆႈၶဝ်ႈႁူမ်ႈပႃး ။