ၸုမ်းပွင်ၵၢၼ်ပႃႇတီႇႁူဝ်သိူဝ် ထုင်ႉလွႆႁူဝ်သိူဝ် ၸတ်းပၢင်ပၼ်တၢင်းႁူႉ ၵူၼ်းမိူင်း ႁႂ်ႈၵူၼ်းမိူင်းႁူႉ ၵႃႈၶၼ်သၽႃႇဝသိင်ႇဝႅတ်ႉလွမ်ႉ၊ ၽွၼ်းၸႃႉယႃႉပႃႇထိူၼ်ႇလႄႈ ႁႂ်ႈမေႃႁူမ်ႈၵၼ်ပႂ်ႉပႃးႁၵ်ႉသႃသိင်ႇ ဝႅတ်ႉလွမ်ႉ – ဝႃႈၼႆ ။

Photo By - Sai Kyaw Thiha

ဝၼ်းတီႈ22-26/09/2016 ၶၢဝ်းတၢင်း 5 ဝၼ်း ၸုမ်းပွင်ၵၢၼ်ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်း တႆး ႁိုဝ် ပႃႇတီႇႁူဝ်သိူဝ်SNLD ၸတ်းႁဵတ်းပၢင်သွၼ်ၵဵဝ်ႇလူၺ်ႈလွင်ႈ သိင်ႇဝႅတ်ႉလွမ်ႉ ၸတ်းႁဵတ်း တီႈ ႁူင်းႁေႃၵေႃလိၵ်ႈလၢႆးလႄႈၾိင်ႈငႄႈတႆး ဝၢၼ်ႈၼမ်ႉႁီး ဢိူင်ႇထုင်ႉလွႆႁူဝ်သိူဝ် ၸႄႈဝဵင်းမၢၼ်ႈ ၸႄႈ လႅၼ်လိၼ်တႆး-ၶၢင်  မီးၵူၼ်းၼုမ်ႇၼႂ်းပိုၼ်ႉတီႈမႃးႁဵၼ်းမွၵ်ႈ 20ၵေႃႉ ။

ပူင်သွၼ်ပၼ်တၢင်းႁူႉ ပိုၼ်းၵၢၼ်မိူင်းတႆး လွင်ႈသိင်ႇဝႅတ်ႉလွမ်ႉ မိူၼ်ၼင်ႇ တၢင်းႁူႉၵၢၼ် ယူႇႁူမ်ႈ တူင်ႇဝူင်းလဵဝ်ၵၼ် Ecosystem ၊ လၢႆးပႂ်ႉပႃးႁၵ်ႉသႃ သိင်ႇဝႅတ်ႉလွမ်ႉ၊ လွင်ႈတူင်ႇဝူင်းၵူၼ်း၊ လွင်ႈ ၸတ်းၵၢၼ်ၶူဝ်းၶွင်ၾိင်ႈတိုၼ်းၸဵမ်ၸိူဝ်းၼႆႉ။ ၶူးပူင်သွၼ်ပဵၼ် ၸၢႆးၵျေႃႇတီႇႁ ၊ ၸၢႆးသိၼ်ႇ မိၼ်းဢေး သွၼ်ပၼ်ၶၢဝ်းယၢမ်းၵၢင်ၼႂ် 08:00 ထိုင်ၵၢင်ၶမ်ႈ 05:00 ၵၢင်ၶမ်ႈ ။ လိူဝ်ၼၼ်ႉၵေႃႈလႆႈ ဢွၼ်ၵၼ်တူၺ်းလူလဵပ်ႈႁဵၼ်း (ၸိူင်းယၢဝ်း) ၵဵဝ်ႇၵပ်းၽဝၸၢတ်ႈ ပၢၼ်ဢၼ် ပဵၼ်တႄႉ မီးတႄႉ (Documentary) ။


ယိူင်းဢၢၼ်း ၼင်ႇႁိုဝ်ၵူၼ်းၼုမ်ႇ ၼႂ်းပိုၼ်ႉတီႈ လႆႈၶိုၼ်းမိူဝ်းပူင်သွၼ်ပၼ်ၶိုၼ်းၵူၼ်းဝၢၼ်ႈ ၼႂ်းဢိူင်ႇ ပိုၼ်ႉတီႈၽႂ်မၼ်း။
ၸၢႆးၵျေႃႇတီႇႁ ၶူးပူင်သွၼ်လႄႈ ၽူႈၶဝ်ႈၶွမ်ႊမတီႇငဝ်ႈငုၼ်း လၢတ်ႈဝႃႈ -  “ႁဝ်းၶႃႈတေၶတ်းၸႂ် ၸတ်းႁဵတ်းပၢင်ပၼ်တၢင်းႁူႉလွင်ႈသိင်ႇဝႅတ်ႉလွမ်ႉၵႂႃႇႁႂ်ႈပေႃးၸွတ်ႇတူဝ်ႈၵူႈတီႈ ၼင်ႇႁိုဝ်ၵူၼ်းမိူင်း ပေႃးတေႁူႉၽွၼ်းၸႃႉယႃႉပႃႇထိူၼ်ႇလႄႈမေႃႁူမ်ႈၵၼ်ႁၵ်ႉသႃပႂ်ႉပႃးထိင်းသိမ်းသၽႃႇဝသိင်ႇဝႅတ်ႉလွမ်ႉ ” ဝႃႈၼႆ ။


ဝၼ်းတီႈ15-19 /09/2016 ၼၼ်ႉၵေႃႈ ၸုမ်းပွင်ၵၢၼ်ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး ၸတ်းႁဵတ်းပၢင်သွၼ်ၵဵဝ်ႇလူၺ်ႈလွင်ႈ သိင်ႇဝႅတ်ႉလွမ်ႉ တီႈဝတ်ႉသူၺ်ႇၵျွင်း ၸႄႈဝဵင်းမၢၼ်ႈမေႃႇ မိတ်ႉၵျီးၼႃး ၸႄႈမိူင်းၶၢင် မီးၵူၼ်းၼုမ်ႇ ၼႂ်းပိုၼ်ႉတီႈ မႃးလဵပ်ႈႁဵၼ်းမွၵ်ႈ 30 ၵေႃႉ ။