ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵျွၵ်ႉမႄး ၸတ်းႁဵတ်းပၢင်ယုၵ်ႉယွင်ႈ တွၼ်ႈသူး/ရၢင်းဝလ်း ပၼ်လုၵ်ႈႁဵၼ်း ၸိူဝ်းဢွင်ႇပူၼ်ႉၸၼ်ႉသိပ်း ၼႂ်းပီ 2015-2016 ၸတ်းႁဵတ်းပဵၼ်ပွၵ်ႈၵမ်းႁႅၵ်ႈ လုၵ်ႈႁဵၼ်း တင်းမူတ်း မီး 200 ပၢႆ ။

ဝၼ်းတီႈ 26/09/2016 ယၢမ်း 13:00-17:00 မူင်း ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵျွၵ်ႉမႄး ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်တွၼ်ႈသူး/ရၢင်းဝလ်း ၵူၼ်းၼုမ်ႇတႆး ၸိူဝ်းဢွင်ႇပူၼ်ႉၸၼ်ႉသိပ်း ၼႂ်းၸႄႈဝဵင်းၵျွၵ်ႉမႄး။ ပၢင်တွၼ်ႈသူးၼႆႉ ၸတ်းႁဵတ်း တီႈႁူင်းႁေႃ ၵၢင်ဝဵင်း ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ။


ၼၢင်းၶိၼ်ႇမႃႇဢေး ၽူႈၼမ်းၼႂ်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၵျွၵ်ႉမႄး လၢတ်ႈဝႃႈ “ ဢၼ်လမ်ႇလွင်ႈမၼ်းတႄႉ ၶႂ်ႈႁႂ်ႈၼေႃႇတႅၼ်းၶိူဝ်း ႁဝ်းၸိူဝ်းၼႆႉ မေႃႁူမ်ႈမိုဝ်းၵၼ် မေႃၶဝ်ႈ ဢွၵ်ႇၵၼ်၊ မေႃတူင်ႉတၵ်ႉၵၼ်။ ၶႂ်ႈႁႂ်ႈၶဝ်ႁပ်ႉႁူႉပႃးဝႃႈၵေႃလိၵ်ႈလၢႆးလႄႈၾိင်ႈငႄႈတႆးၼႆႉ ႁဵတ်းသၢင်ႈ သင်မႃးၸိူင်ႉႁိုင်။ ႁႂ်ႈၶဝ်လႆႈၶဝ်ႈမႃး ပုတ်ႈတႅၼ်းႁဵတ်းၵၢၼ်တူင်ႉၼိုင်ၼ်ႂ်းၵေႃ၊ ထႅင်ႈၾၢႆႇၼိုင်ႈၵေႃႈ ၵူဝ်ၶဝ် ပႆသဵၼ်ႈ တၢင်းၽိတ်း။ ၸင်ႇလႆႈ ယုၵ်ႉယွင်ႈၼမ်ႉၸႂ် လုၵ်ႈဢွၼ်ႇတႆးႁဝ်း” ဝႃႈၼႆ ။


လုၵ်ႈႁဵၼ်းတႆး ၸိူဝ်းဢွင်ႇပူၼ်ႉၸၼ်ႉသိပ်း ၼႂ်းပီ 2015-2016  ၼႂ်းၸႄႈဝဵင်းၵျွၵ်ႉမႄးၼႆႉ တင်းမူတ်း မီး 250 ၵေႃႉ၊ ဢၼ်မႃးႁပ်ႉသူး/ရၢင်းဝလ်း သမ်ႉ 226 ၵေႃႉ- ဝႃႈၼႆ ။


ၼႂ်းလုၵ်ႈႁဵၼ်း 226 ၵေႃႉ ဢၼ်လႆႈႁပ်ႉသူးယုၵ်ႉယွင်ႈၼၼ်ႉ ဢၼ်လႆႈလၢဝ်ၸွင်ႈ(ၵူင်ႇထူး) မီး 71 ၵေႃႉ၊ ၸိူဝ်းပူၼ်ႉၸၼ်ႉလၢႆလၢႆ 159 ၵေႃႉ၊ ၸိူဝ်းလႆႈလၢဝ်ၸွင်ႈ 6 လုၵ်ႈ မီး 1 ၵေႃႉ၊ 5 လုၵ်ႈသမ်ႉ 4 ၵေႃႉ၊ 4 လုၵ်ႈ 6 ၵေႃႉ၊ 3 လုၵ်ႈ 5 ၵေႃႉ၊ 1 လုၵ်ႈသမ်ႉ 46 ၵေႃႉ ဝႃႈၼႆ ။