လွင်ႈဢၼ် တီႈၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ၊ လႆႈႁပ်ႉမွပ်ႈယိုၼ်ႈပၼ်သူး (ရၢင်းဝလ်း) လွင်ႈၾၢႆႇၸွႆႈထႅမ်ၵူၼ်း (Humanitarian Award) တီႈၸၼ်ႉၸွမ်ႁႃႊဝိူတ်ႊ Harvard University တီႈမိူင်းဢမႄႊရိၵႃႊၼၼ်ႉ ၾၢႆႇၸုမ်းၸၢဝ်းၶိူဝ်း ဢွၼ်ၵၼ်ထတ်းသၢင်သႄႉသွမ်း ဢမ်ႇႁၼ်လီၸွမ်း ။

လွင်ႈလႆႈထတ်းသၢင်သႄႉသွမ်းၼႆႉ ယွၼ်ႉပိူဝ်ႈဝႃႈ ယူႇတီႈ ၼၢင်းဢွင်ႇသၢၼ်းၸုၵျီႇသေ ဢမ်ႇလႆႈ လူင်းပိုၼ်ႉတီႈႁွတ်ႈထိုင်တီႈ ပၢင်သဝ်းၵူၼ်းပၢႆႈၽေး ဢၼ်မီးၼႂ်းၼႃႈလိၼ်ၸၢဝ်းၶိူဝ်းသေပွၵ်ႈ။ လိူဝ်သေၼၼ်ႉ လွင်ႈႁၢမ်ႈႁႄႉရူတ်ႉၵႃးတေႃႉသူင်ႇၶူဝ်းၵမ်ႉၸွႆႈၵူၼ်းပၢႆႈၽေး တီႈၼႂ်းၼႃႈလိၼ်ၸၢဝ်းၶိူဝ်းၸိူဝ်းၼႆႉၵေႃႈ ယင်းတိုၵ်ႉမီးယူႇ၊ ယွၼ်ႉပိူဝ်ႈၼၼ် ၸင်ႇလႆႈထတ်းသၢင်သႄႉသွမ်း- ၼႆယဝ်ႉ ။


လဝိဝၼ်း ၾၢႆႇၵဵပ်းၶေႃႈမုလ်းတႅမ်ႈၶၢဝ်ႇၸၢဝ်းၶိူဝ်း လၢတ်ႈဝႃႈ- ပေႃးဝႃႈသူး/ရၢင်းဝလ်း လွင်ႈၾၢႆႇၸွႆႈထႅမ်ၵူၼ်း Humanitarian Award ၼႆတႄႉ ၶႃႈႁဝ်းၶဝ်ပွင်ႇၸႂ်ဝႃႈ ထုၵ်ႇလီလႆႈမွပ်ႈယိုၼ်ႈပၼ်ၵူၼ်းၵေႃႉ ဢၼ်လူင်းၼႂ်းပိုၼ်ႉတီႈသေ ၸွႆႈထႅမ်ပၼ်ၵူၼ်းပၢႆႈၽေးၼၼ်ႉတႄႉတႄႉ။ မိူၼ်ၼင်ႇ ၸုမ်းဢၼ်ၸွႆႈထႅမ်ပၼ် ဢမ်ႇၼၼ် ၵူၼ်းၵေႃႉဢၼ်ၸွႆႈထႅမ်ပၼ်တီႈ ၵူၼ်းပၢႆႈၽေးၶၢင်ၶဝ်ၼၼ်ႉ မၼ်းတေလႆႈမီးၸႂ်ၵႂႃႇၸွႆႈထႅမ်ပၼ် ၵူၼ်းပၢႆႈၽေး မိူင်းရၶႅင်ႇၸိူဝ်းၼႆႉ။ ပဵၼ်ၸၢဝ်းၶိူဝ်းရၶႅင်ႇၵေႃႈလီ၊ ပဵၼ်ၸၢဝ်းၶိူဝ်းမူႇသလိမ်ႇၵေႃႈလီ ပေႃးဝႃႈပဵၼ်ၵူၼ်းပၢႆႈၽေးၼႆ တေလႆႈဝႆႉၸႂ်ၽဵင်ႇပဵင်းၵၼ်သေ ၸွႆႈထႅမ်ၵႂႃႇ ။


လိူဝ်သေၼၼ်ႉ ဢၼ်ပဵၼ်ပီႈၼွင်ႉၵူၼ်းပၢႆႈၽေး မိူၼ်ၼင်ႇၼႂ်းၸိုင်ႈတႆးပွတ်းႁွင်ႇၸိူဝ်းၼႆႉၵေႃႈ ထုၵ်ႇလႆႈၵႂႃႇ ၸွႆႈထႅမ်ပၼ်ပႃး၊ တၵ်းတေလႆႈပဵၼ်ၵေႃႉဢၼ်ၸွႆႈထႅမ်ၵူၼ်းပၢႆႈၽေး ၵူႈတီႈၵူႈတၢင်း။ ပေႃးပဵၼ်ၵူၼ်း ၸိူင်ႉၼႆတႄႉ ထုၵ်ႇလီလႆႈလိူၵ်ႈသေပၼ်သူး ၸိူင်ႉၼႆယူႇ။ ၵူၺ်းၵႃႈၸုမ်းၸဝ်ႈတႃႇၼ ဢၼ်ပၼ်သူး ဢွင်ႇသၢၼ်းၸုၵျီႇ ၵႂႃႇၼႆႉသမ်ႉ ၶဝ်ဢမ်ႇလဵပ်ႈႁဵၼ်းထတ်းသၢင်တူၺ်းဝႃႈ မၼ်းၼၢင်းၼႆႉ ယင်းဢမ်ႇယၢမ်ႈႁွတ်ႈထိုင် ပၢင်သဝ်းၵူၼ်းပၢႆႈၽေးၼႂ်းၼႃႈလိၼ်ၸၢဝ်းၶိူဝ်းသေပွၵ်ႈ၊ ႁဵတ်းသင်ၶဝ်သမ်ႉမႃး မွပ်ႈယိုၼ်ႈသူးၼၼ်ႉ၊ ဢၼ်ၼႆႉပဵၼ်ဢၼ်လီဝူၼ်ႉဢၼ်ၼိုင်ႈ ဢမ်ႇၼၼ်ၵေႃႈ ၶဝ်ႁဵတ်းႁႂ်ႈပဵၼ်ႁႅင်းဢီးႁႂ်ႈ ဢွင်ႇသၢၼ်းၸုၵျီႇ ၵႂႃႇလူင်းပိုၼ်ႉတီႈထိုင်တီႈ ပၢင်သဝ်းၵူၼ်းပၢႆႈၽေးၼႂ်းၼႃႈလိၼ်ၸၢဝ်းၶိူဝ်းႁိုဝ် ၼႆၵေႃႈပဵၼ်ဢၼ်လီဝူၼ်ႉဢၼ်ၼိုင်ႈ- ဝႃႈၼႆ ။


ၼႂ်းပၢၼ်လူင်ပွင်ၸိုင်ႈမႂ်ႇၼႆႉ ၼႂ်းၼႃႈလိၼ်ၸၢဝ်းၶိူဝ်း မိူၼ်ၼင်ႇတီႈၼႂ်းမိူင်းၶၢင် မိူင်းတႆးပွတ်းႁွင်ႇ ပွတ်းၵၢင်ၸိူဝ်းၼႆႉ ယင်းတိုၵ်ႉမီးပၢင်သဝ်းၵူၼ်းပၢႆႈၽေးၼမ်ယူႇသေ ၸုမ်းတူင်ႉၼိုင်တူင်ႇဝူင်းၵူၼ်း ၶဝ်လႄႈသင်၊ ၸဝ်ႈတႃႇၼၶဝ်လႄႈသင် ဢၼ်တေၵႂႃႇၸွႆႈထႅမ်ၼၼ်ႉၵေႃႈ ယင်းတိုၵ်ႉၵႂႃႇယၢပ်ႇမႃးယၢပ်ႇယူႇ၊ ယင်းတိုၵ်ႉႁႃမီးၸဝ်ႈဢႃႇၼႃႇၶဝ် မၢင်တီႈမၢင်တွၼ်ႈႁၢမ်ႈႁႄႉ ဢမ်ႇပၼ်ၵႂႃႇမႃးၸိူဝ်းၼႆႉယူႇ။ မိူၼ်ၼင်ႇ ၼႂ်းလုၵ်ႈၸုမ်းပႃႇတီႇ NLD ဢၼ်ပဵၼ်တေႃႇၶိၼ်ႇၵျီႇ Foundation ၸိူဝ်းၼႆႉၵေႃႈ မီးလွင်ႈသူင်ႇၶဝ်ႈၼမ်ႉတၢင်းၵိၼ် ထိုင်တီႈပၢင်သဝ်းၵူၼ်းပၢႆႈၽေးယူႇသေတႃႉၵေႃႈ တေႃႇထိုင်မိူဝ်ႈလဵဝ်ၼႆႉၵေႃႈ လွင်ႈၵႂႃႇမႃး လွင်ႈၸွႆႈထႅမ်ၵေႃႈတိုၵ်ႉယၢပ်ႇၽိုတ်ႇယူႇ- ၼႆယဝ်ႉ ။


ပၢင်သဝ်းၵူၼ်းပၢႆႈၽေး ဢၼ်မီးတီႈၼႂ်းမိူင်းၶၢင်လႄႈ တၢင်ႇတီႈတၢင်ႇလႅၼ်ၼႆႉ ၸဝ်ႈၼႃႈတီႈ ၾၢႆႇၽွင်းငမ်းၶဝ်ႁၢမ်ႈႁႄႉဝႆႉ ဢမ်ႇပၼ်ၸဝ်ႈၼႃႈတီႈ ၸၢတ်ႈၸိုင်ႈလုမ်ႈၾႃႉ (UN) သူင်ႇရူတ်ႉၵႃး ၶိုၼ်ႈၵႂႃႇၸွႆႈထႅမ် ၶဝ်ႈၼမ်ႉတၢင်းၵိၼ်ၼႆႉ ၸဵမ်မိူဝ်ႈလိူၼ်သႅပ်ႊထႅမ်ႊၿိူဝ်ႊ ပီ 2014 ပူၼ်ႉမႃး။ ယွၼ်ႉႁၢမ်ႈဢိုတ်းမႃးသေ ၵၢၼ်တေႃႉသူင်ႇတိုၵ်ႉယၢပ်ႇတေႃႇထိုင်ဝၼ်းမိူဝ်ႈလဵဝ် ။


ၸၢႆးၽူင်းႁၢၼ် ႁွင်ႈၵၢၼ်ၾၢႆႇပိုၼ်ၽၢဝ်ႇ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၵေႃႈလၢတ်ႈဝႃႈ- သူး/ရၢင်းဝလ်းၼႆႉ မီးတီႈပွင်ႇဝႃႈႁိုဝ်တႄႉ ၶႃႈႁဝ်းၵေႃႈဢမ်ႇႁူႉလီလီ၊ ၵူၺ်းၵႃႈ ၵဵဝ်ႇၵပ်းလွင်ႈပၢင်တိုၵ်းသေ ဢၼ်ၾၢႆႇတၢင်းလူင်ပွင်ၸိုင်ႈ ဢိုတ်းသူပ်းဢိုတ်းပၢၵ်ႇ ယဵၼ်ယူႇဝႆႉသီႇသီႇၼႆႉတႄႉ ဢမ်ႇထုၵ်ႇလီလႆႈပဵၼ်။ မိူဝ်ႈၽွင်းဢၼ် ၼၢင်းဢွင်ႇသၢၼ်းၸုၵျီႇ လႆႈႁပ်ႉသူး/ရၢင်းဝလ်း လွင်ႈၸွႆႈထႅမ်ၵူၼ်းတီႈ ၸၼ်ႉၸွမ် ႁႃႊဝိူတ်ႊၼၼ်ႉ ၵဵဝ်ႇၵပ်းလွင်ႈၵူၼ်းပၢႆႈၽေးသိုၵ်း ဢၼ်တိုၵ်ႉမီးယူႇတေႃႇထိုင်မိူဝ်ႈလဵဝ်ၼႆႉသေ ဢမ်ႇလၢတ်ႈၸွမ်းသင်သေဢိတ်းၼႆႉ ဢမ်ႇထုၵ်ႇလီလႆႈပဵၼ်- ဝႃႈၼႆ ။


လုၵ်ႈႁဵၼ်းၸၢဝ်းၶိူဝ်းမူႇသလိမ်ႇ ဢၼ်ၵႂႃႇႁဵၼ်းလိၵ်ႈယူႇတီႈ ၸၼ်ႉၸွမ်ႁႃႊဝိူတ်ႊ (Harvard University) ၼၼ်ႉၵေႃႈ ယင်းဢွၵ်ႇမႃၼႄၵၢင်ၸႂ် တေႃႇၼၢင်းဢွင်ႇသၢၼ်းၸုၵျီႇဝႃႈ တေႃႈလဵဝ် ဢၼ်ပဵၼ်ငဝ်းလၢႆး ၵူၼ်းၶိူဝ်းမူႇသလိမ်ႇ ဢၼ်မီးၼႂ်းၸႄႈမိူင်းရၶႅင်ႇၼၼ်ႉ တိုၵ်ႉႁူပ်ႉထူပ်းလွင်ႈယၢပ်ႇၽိုတ်ႇယူႇလူင်လၢင်၊ ထိုင်ပၢၼ်လူင်ပွင်ၸိုင်ႈမႂ်ႇယဝ်ႉၵေႃႈ ယင်းပႆႇလႆႈယူႇၶႅၼ်းၸႂ်- ၼႆယဝ်ႉ ။


ႁွင်ႈၵၢၼ်ၾၢႆႇသိုဝ်ႇၶၢဝ်ႇၸၢဝ်းၶိူဝ်း ၶျိၼ်းဝေႃႊလ် သလၢႆးမၼ်း ၵေႃႈလၢတ်ႈဝႃႈ- ႁဝ်းၶႃႈတႄႉႁၼ်ထိုင်ဝႃႈ ဢွင်ႇသၢၼ်းၸုၵျီႇၼႆႉ ၵႃႈပိူၼ်ႈပၼ်သူး/ရၢင်းဝလ်းၼႆႉ မၼ်းၼၢင်းဢမ်ႇလီႁပ်ႉလူင်ၵႂႃႇၵူႈဢၼ်၊ ၵူၼ်းမိူင်းတေႁၼ်ထိုင်ၼိူဝ်မၼ်းဝႃႈ မၼ်းၼၢင်းႁဵတ်းၵၢၼ်မိူင်း တႃႇႁပ်ႉသူး၊ ၵွပ်ႈၼၼ်လႄႈ မၼ်းၼၢင်းဢမ်ႇလီႁပ်ႉ- ဝႃႈၼႆ ။


ဢွင်ႇသၢၼ်းၸုၵျီႇၼႆႉ မိူဝ်ႈႁပ်ႉသူး/ရၢင်းဝလ်းၼၼ်ႉ မၼ်းၼၢင်းၵေႃႈလၢတ်ႈဝႃႈ- ၶႃႈၼၢင်းႁၼ်ထိုင်ဝႃႈ ဢၼ်ၶႃႈၼၢင်းလႆႈႁပ်ႉမွပ်ႈသူးဢၼ်ၼႆႉ ယွၼ်ႉပိူဝ်ႈၶႃႈၼၢင်းႁဵတ်းၵၢၼ်ယဝ်ႉတူဝ်ႈသေ ပိူၼ်ႈမွပ်ႈသူးပၼ် ဢမ်ႇၸႂ်ႈ။ ယုမ်ႇယမ်ႁၼ်ထိုင် သႂ်ႇၸႂ်ပၵ်းၸႂ်ဝႆႉဝႃႈ လႆႈသူးဢၼ်ၼႆႉယဝ်ႉ တွၼ်ႈတႃႇတေႁဵတ်းၵၢၼ် ၵႂႃႇမိူဝ်းၼႃႈ ႁပ်ႉဝႆႉၼႂ်းၸႂ်ၼင်ႇၼႆ- မၼ်းၼၢင်းလၢတ်ႈၼႄတီႈ ၵူၼ်းမႃးၶဝ်ႈႁူမ်ႈပၢင်ပွႆးမွပ်ႈယိုၼ်ႈသူး/ ရၢင်းဝလ်းၼၼ်ႉ ၼင်ႇၼႆ ။