ၸုမ်းတူင်ႉၼိုင်တူင်ႇဝူင်းၵူၼ်းတႆး Shan CBOs ၼွၵ်ႈမိူင်း/ၼႂ်းမိူင်း တေၸတ်းႁဵတ်းပၢင်သပ်း ၸႅင်ႈၶၢဝ်ႇ လႄႈ သၢႆၼႄငဝ်းႁၢင်ႈသဵင် လွင်ႈမႄႈၼမ်ႉ ၼႂ်းၸိုင်ႈတႆး ဢၼ်ပဵၼ်ၶူဝ်းၶွင်သၽႃဝ ၵိုၵ်းပိုၼ်းမိူင်း တႆးမႃး ပီယၢဝ်းၶၢဝ်းႁိုင် ။

ဝၼ်းတီႈ 28/09/2016 ၸုမ်းတူင်ႉၼိုင်တူင်ႇဝူင်းတႆး  ၼွၵ်ႈမိူင်း/ၼႂ်းမိူင်း ႁူမ်ႈၵၼ်ၸတ်းႁဵတ်း ပၢင်သပ်းၸႅင်ႈၶၢဝ်ႇလႄႈ သၢႆၼႄငဝ်းႁၢင်ႈသဵင် လွင်ႈမႄႈၼမ်ႉ ၼႂ်းၸိုင်ႈတႆး ၼင်ႇႁိုဝ် ၵူၼ်းမိူင်း ၼွၵ်ႈမိူင်းၼႂ်းမိူင်း တေလႆႈႁပ်ႉႁူႉႁၼ်ၸွမ်း လူင်ပွင်ၸိုင်ႈမိူင်းမၢၼ်ႈ တေၵေႃႇ သၢင်ႈၾၢႆၼိူဝ်မႄႈ ၼမ်ႉၼႂ်းမိူင်းတႆးလၢႆလၢႆတီႈ။ ဢၼ်တေၸၢင်ႈမီးလွင်ႈတုမ်ႉတိူဝ်ႉၵူၼ်းမိူင်းၼမ်။ ပၢင်သပ်းၸႅင်ႈ ၶၢဝ်ႇၼႆႉ တေၸတ်းႁဵတ်း တီႈ ဝဵင်းတႃႈၵုင်ႈ၊ ဝဵင်းတူၼ်ႈတီးလႄႈ ၵဵင်းမႆႇ ၸိုင်ႈထႆး ၼႂ်းဝၼ်းလဵဝ် ၸတ်းႁဵတ်း 3 တီႈ ၼႆယဝ်ႉ ။


ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းတူင်ႇဝူင်းတႆး လၢတ်ႈဝႃႈ “ ၵၢၼ်ဢၼ်တေၸတ်းႁဵတ်း ပၢင်သပ်းၸႅင်ႈၶၢဝ်ႇလႄႈ သၢႆၼႄငဝ်းႁၢင်ႈသဵင် မႄႈၼမ်ႉၼႆႉ ယွၼ်ႉဝႃႈ မိူင်းတႆး တၢင်းပွတ်းၸၢၼ်း ၵဵင်းတွင်း ၵဵင်းၶမ်း၊ ၵဵင်းလူမ်းတင်းၵုၼ်ႁဵင်ၼႆႉ မီးမႄႈၼမ်ႉပၢင်၊ ၼမ်ႉတူၵ်းတၢတ်ႇ ပဵၼ်ဢၼ်ၶိုၵ်ႉၶႅမ်ႉႁၢင်ႈလီ၊ ယဝ်ႉၵေႃႈ ပဵၼ်ဢၼ်ၵိုၵ်းပိုၼ်းၼႂ်းမိူင်းတႆးႁဝ်းၶႃႈမႃး ပီယၢဝ်းၶၢဝ်းႁိုင်၊ သင်ဝႃႈလူင်ပွင်ၸိုင်ႈ မိူင်းမၢၼ်ႈ ၵေႃႇသၢင်ႈၾၢႆတႄႉၸိုင် ၼႂ်းပိုၼ်ႉတီႈ တၢင်းပွတ်း တွၼ်ႈၼႆႉ တေၸူမ် တႂ်ႈၼမ်ႉတင်းမူတ်း၊ ယွၼ်ႉၼၼ်လႄႈ ယူႇတီႈၸုမ်းတူင်ႉ ၼိုင်တူင်ႇဝူင်း တႆးႁဝ်း ပဵၼ်ဢၼ်မႆႈၸႂ် ၸွမ်းသေ ၸင်ႇဢွၼ်ၵၼ်ၸတ်းႁဵတ်း ႁႂ်ႈၵူၼ်းၼႂ်းလုမ်ႈၾႃႉလႆႈႁပ်ႉႁူႉၸွမ်း” ဝႃႈၼႆ ။


သိုပ်ႇလၢတ်ႈဝႃႈ ၼႂ်းၸိုင်ႈတႆးၼႆႉ လူင်ပွင်ၸိုင်ႈမၢၼ်ႈ တေဢၢၼ်းႁဵတ်း ၾၢႆၼိူဝ်မႄႈၼမ်ႉပၢင်၊ မႄႈၼမ်ႉတူႈလႄႈ ၼမ်ႉၶူင်း၊ သင်ဝႃႈ ၶဝ်သၢင်ႈတၢင်းပွတ်းၸၢၼ်း ၼႆႉၸိုင် ၵူၼ်းမိူင်း ပိုၼ်ႉတီႈ ပွတ်းတွၼ်ႈၼၼ်ႉ ၸိူဝ်းလႆႈပၢႆႈၽေးသိုၵ်း မိူဝ်ႈပီ 1996-1998 ႁူဝ်ၵူၼ်း 3 သႅၼ်ပၢႆ၊ မၢင်ၸိူဝ်းဢၼ်ၵႂႃႇယူႇၸွမ်းပီႈၼွင်ႉၼႂ်းဝဵင်းၵေႃႈမီး၊ မၢင်ၸိူဝ်းဢၼ်ၵႂႃႇယူႇ ၸွမ်းလႅၼ်လိၼ်၊  ၼႂ်းမိူင်းထႆးၸိူဝ်းၼၼ်ႉ။ သင်ဝႃႈ ၶဝ်တေ ပွၵ်ႈမႃးၶိုၼ်းၸိုင် တေဢမ်ႇမီးတီႈယူႇ။  ၵွပ်ႈၼၼ် တိုၵ်းသူၼ်းထိုင်ႁႂ်ႈပီႈၼွင်ႉၵူၼ်းမိူင်းႁဝ်း ဢွၼ်ၵၼ်မႃးၶဝ်ႈႁူမ်ႈထွမ်ႇၸွမ်းတင်းၼမ်သေၵမ်း” ဝႃႈၼႆ ။


ပၢင်သပ်းၸႅင်ႈၶၢဝ်ႇလႄႈ လွင်ႈတေသၢႆၼႄငဝ်းႁၢင်ႈသဵင် မႄႈၼမ်ႉ ၼႂ်းၸိုင်ႈတႆးၼႆႉ  တေၸတ်း ႁဵတ်းသၢမ်တီႈ ၼႂ်းဝၼ်းလဵဝ်ၵၼ်။ မိူၼ် ဝဵင်းတႃႈၵုင်ႈသမ်ႉ တေၸတ်းႁဵတ်း တီႈႁူင်းလိုဝ်ႈသဝ်း ဢေႃႊၶျၵိတ်ႊ(ORHID HOTEL)၊ ၶၢဝ်းယၢမ်းၵၢင်ၼႂ် 10:00-12:30 မူင်းၵၢင်ဝၼ်း၊ တီႈၵဵင်းမႆႇ ၸိုင်ႈထႆးသမ်ႉ တီႈဝတ်ႉပႃႇပဝ်ႈ ယၢမ်းၵၢင်ၶမ်ႈ 06:00-09:00 မူင်း၊ တီႈတူၼ်ႈတီးသမ်ႉ ႁူင်းႁေႃ ၵေႃလိၵ်ႈလၢႆး လႄႈၾိင်ႈငႄႈတႆး ဝဵင်းတူၼ်ႈတီး၊ ယၢမ်းၵၢင်ၼႂ် 10:00-12:30 မူင်းၵၢင်ဝၼ်း ၸဵမ်ၸိူဝ်းၼႆႉ ။


လိူဝ်ၼၼ်ႉ ၵဵဝ်ႇၵပ်းလွင်ႈမႄႈၼမ်ႉၼႂ်းၸိုင်ႈတႆး ဢၼ်လႆႈႁဵတ်း ပၢင်သပ်းၸႅင်ႈၶၢဝ်ႇၵႂႃႇၼၼ်ႉ တၢင်းၾၢႆႇသိုဝ်ႇၶၢဝ်ႇ ထီးဝီး Thai PBS  တေသၢႆၼႄငဝ်းႁၢင်ႈသဵင်ၼႂ်း TV ၶိုၼ်း ၼႂ်းလၢႆးၵၢၼ် TV ၿၢၼ်ႉရဝ်း (TV บ้านเรา)၊ ၶၢဝ်းယၢမ်း ဝၢႆးဝၼ်း 01:30 မူင်းလႄႈသိုဝ်ႇၶၢဝ်ႇ ထီးဝီး DVB ၵေႃႈ တေသၢႆၼႄ ၸဵမ်ၸိူဝ်းၼႆႉ။ ထႅင်ႈၾၢႆႇၼိုင်ႈၵေႃႈ ၽိတ်ႈမွၵ်ႇပႃးၸုမ်းသိုဝ်ႇၶၢဝ်ႇ  ၼွၵ်ႈမိူင်း/ ၼႂ်းမိူင်း ၾၢႆႇတႆး၊ ၾၢႆႇထႆး၊ ၾၢႆႇမၢၼ်ႈလႄႈ ၾၢႆႇဢင်းၵိတ်ႉထႅင်ႈ ဝႃႈၼႆ ။


ပူၼ်ႉမႃး မိူဝ်းဝၼ်းတီႈ 08/09/2016 ၼၼ်ႉ ယူႇတီႈၽွင်းလူင် ၾၢႆႇၽႅၼ်ၵၢၼ်လႄႈ ပၢႆးမၢၵ်ႈမီး ဢူးသူဝ်းၺုၼ်ႉလုၼ်ႇ လၢတ်ႈတီႈပၢင်ႁူပ်ႉထူပ်း ၵူၼ်းမိူင်း လႃႈသဵဝ်ႈဝႃႈ ၵၢၼ်သၢင်ႈၾၢႆတီႈ ၼွင်ၽႃ (ၵူၼ်းပိုၼ်ႉတီႈႁွင်ႉဝႃႈ ၼွင်ၽႃ)တင်း ၾၢႆမၢၼ်ႈတွင်း သွင်ဢၼ်ၼႆႉ တေႃႈလဵဝ်ၵိုတ်းယင်ႉ လိုဝ်ႈဝႆႉ ယဝ်ႉ ဝႃႈၼႆ ။


ၾၢႆၼွင်ၽႃၼႆႉ တေႁဵတ်းဢွၵ်ႇလႆႈႁႅင်းၾႆးၾႃႉ 1200 မႄႊၵဝတ်ႊ၊ ၾၢႆမၢၼ်ႈတွင်းသမ်ႉ ႁႅင်းၾႆးၾႃႉတေဢွၵ်ႇ 200 မႄႊၵဝတ်ႊ၊ ၾၢႆတင်းသွင်ဢၼ် ၼႆႉ ယူႇဝႆႉၼႂ်းၸႄႈဝဵင်း တၢင်ႉယၢၼ်း ၸိုင်ႈတႆးပွတ်းႁွင်ႇ ။