ၵေးၼမ်ႉတွၼ် တင်းၼမ်ႉၵႅဝ်ႈ ၼွင်းလူၼ်ႉၾင်ႇထူမ်ႈတူင်ႈၼႃး ၵူၼ်းမိူင်း ၸႄႈဝဵင်းမိူင်း ၼၢႆး မီးလွင်ႈလူႉသုမ်းၼမ် တင်းတႄႇဝၼ်းတီႈ 19/08/2016 တေႃႇဝၼ်းမိူဝ်ႈၼႆႉ ။

ၸိုင်ႈတႆးပွတ်းၸၢၼ်း ၸႄႈတွၼ်ႈလၢင်းၶိူဝ်း ၸႄႈဝဵင်းမိူင်းၼၢႆးၼႆႉ ၼမ်ႉလႆလတ်းႁိမ်းဝဵင်းမီး 2 ၵေး၊ ၵေးၼမ်ႉတွၼ်လႄႈ ၵေးၼမ်ႉၵႅဝ်ႈ ။


ၾူၼ်တူၵ်းႁႅင်းလၢႆဝၼ်းထပ်းၵၼ် ၾၢႆၵေႃႈၵူၼ်ႇပင်း ၼမ်ႉၵေႃႈ ထူမ်ႈတူင်ႈႁႆႈတူင်ႈၼႃး၊ တင်ႈတႄႇဝၼ်းသုၵ်းမႃး ယင်းတိုၵ်ႉယိုင်ႈထူမ်ႈတူင်ႈႁႆႈတူင်ႈၼႃးယူႇ။
ၸၢႆးၶမ်းဢႅၼ် ဝဵင်းမိူင်းၼၢႆး ၵေႃႉၼိုင်ႈ လၢတ်ႈဝႃႈ “ တူင်းၼႃး ဢၼ်ထုၵ်ႇၼမ်ႉထူမ်ႈၼႆႉ ပႆႇလႆႈႁပ်ႉႁူႉဝႃႈ လူႉသုမ်းမွၵ်ႈလၢႆဢေႊၵႃႊ လွင်ႈလူႉသုမ်းတႄႉ တိုၼ်းဝႃႈလူႉသုမ်း ၼမ်ယဝ်ႉ ယွၼ်ႉၼမ်ႉတိုၵ်ႉထူမ်ႈဝႆႉယူႇ တေႃႇထိုင်ယၢမ်းလဵဝ် ၼမ်ႉပႆႇယွမ်းလူင်” ဝႃႈၼႆ ။


ၼမ်ႉထူမ်ႈတူင်ႈၼႃး တင်ႈဢဝ်ဝၢၼ်ႈပၢင်ဢူႈ တေႃႇထိုင် ဝၢၼ်ႈႁႄႈ- ၸႄႈဝဵင်းမိူင်းၼၢႆး ၸိုင်ႈတႆး ပွတ်းၸၢၼ်း ။


ၵေးၼမ်ႉႁွင်ႈၵႅဝ်ႈ တင်းၵေးၼမ်ႉတွၼ်ၼႆႉ ယွၼ်ႉၾူၼ်တူၵ်းႁၢဝ်ႈႁႅင်း လႄႈ ၼမ်ႉၼွင်း လူၼ်ႉၾင်ႇ၊ ထႅင်ႈၾၢႆႇၼိုင်ႈၵေႃႈ ၾၢႆပၢၼ်ႈၼမ်ႉၶဝ်ႈၼႃး(လဵင်ႉၼႃး) ၼိူဝ်မႄႈၼမ်ႉတွၼ်သမ်ႉ ၵူၼ်ႇပင်း ၵေႃႈပိူင်ၼိုင်ႈ ၸင်ႇလႆႈလႆထူမ်ႈတူင်ႈၼႃးၵူၼ်းမိူင်း တင်းၼမ်လၢႆ။ မိူၼ် မႄႈၼမ်ႉႁွင်ႈၵႅဝ်ႈသမ်ႉ လုၵ်ႉၸဵင်ႇႁွင်ႇဝၼ်းတူၵ်း ဝဵင်းမိူင်းၼၢႆး လႆၸူးၼႃႈဝၼ်းဢွၵ်ႇ ဝဵင်းမိူင်းၼၢႆး၊ မႄႈၼမ်ႉတွၼ်သမ်ႉ လႆလတ်းလူင်း တူင်ႈၼႃး တၢင်းပွတ်းဢွၵ်ႇ လူင်းၸူးတၢင်းၾၢႆႇၸၢၼ်း ။


ၸိုင်ႈတႆး ပွတ်းၸၢၼ်း ၸႄႈဝဵင်းလၢႆးၶႃႈၵေႃႈ ၼမ်ႉထူမ်ႈၼွင်းတူင်ႈၼႃး ၵူၼ်းမိူင်း တၢင်းၾၢႆႇ ဢွၵ်ႇဝဵင်း ယွၼ်ႉၾူၼ်တူၵ်း ႁၢဝ်ႈႁႅင်း မႄႉၼမ်ႉတဵင်းၼွင်းလူၼ်ႉၾင်ႇ တေႃႇထိုင်ယၢမ်းလဵဝ် ပႆႇလူတ်းယွမ်းလူင်း။ ၼႂ်းၸႄႈဝဵင်း လၢႆလၢႆတီႈ ၼႂ်းမိူင်းတႆး ဢၼ်ထုၵ်ႇၼမ်ႉထူမ်ႈၼႆႉ မိူၼ် မိူင်းမိတ်ႈ၊ ၵဵင်းတွင်း၊ မိူင်းတူၼ်၊ မိူင်းပၼ်ႇ မိူင်းပွၼ် ဢိၵ်ႇထႅင်ႈလၢႆလၢႆၸႄႈဝဵင်း ၸဵမ်ၸိူဝ်းၼႆႉ ။