ၵေႃလိၵ်ႈလၢႆးလႄႈၾိင်ႈငႄႈတႆး တင်း  ပီႈၼွင်ႉၵူၼ်းမိူင်း တႆး ၊ ၶၢင် မူႇၸႄႈ ႁူမ်ႈၵၼ်ပႂ်ႉႁပ်ႉတွၼ်ႈ  ၸုမ်းယိပ်းၵွင်ႈၵၢင်ႇ လုၵ်ႉၽိုၼ်ႉၶွင်ႊသီႊၾႅတ်ႊတရႄႊ ၸၢဝ်းၶိူဝ်း ၽွမ်ႉႁူမ်ႈ UNFC တီႈႁူဝ် ဝဵင်းမူႇၸႄႈ ။

ဝၼ်းတီႈ 24/07/2016 ၸဝ်ႈၸၢႆးထူး ၊ ၶူးဢူးရႄႇ ၽူႈၼမ်းၸုမ်းတူဝ်တႅၼ်း UNFC ႁွတ်ႈထိုင်မႃး ဝဵင်းမူႇၸႄႈ ။ ၼႂ်းၸုမ်းဢၼ်ႁွတ်ႈၽႅဝ်မႃး မူႇၸႄႈၼၼ်ႉ ယင်းျပႃးၼၢင်းႁၢၼ်ၾႃႉ တူဝ်တႅၼ်းၸုမ်းၼၢင်းယိင်း WLB။ ပီႈၼွင်ႉတႆး ပီႈၼွင်ႉၶၢင် ႁူမ်ႈၵၼ်ပႂ်ႉႁပ်ႉ ။


ၸၢႆးလၢဝ်လႅင်းပၢင်ႇ ၵႅမ်ၽူႈၼမ်းၼႂ်း ၵေႃလိၵ်ႈလၢႆးလႄႈၾိင်ႈငႄႈတႆး မူႇၸႄႈ လၢတ်ႈဝႃႈ “ ယိူင်းဢၢၼ်း ဢၼ်ႁဝ်းၶႃႈ ဢွၼ်ၵၼ်ၵႂႃႇပႂ်ႉႁပ်ႉတွၼ်ႈၼႆႉ ဢဝ်ၼမ်ႉၸႂ်ႁဝ်းၶႃႈၶဝ်သေ ၵႂႃႇပႂ်ႉႁပ်ႉတွၼ်ႈ ၊ လွင်ႈဝႃႈ မီးၸုမ်းသေၸုမ်းၸုမ်း တဵၵ်းၸႂ်ႉၵႂႃႇပႂ်ႉႁပ်ႉတွၼ်ႈ ဢမ်ႇၸႂ်ႈၶႃႈ ၊ ယူႇတီႈ ၸုမ်းၵေႃလိၵ်ႈလၢႆးမူႇၸႄႈႁဝ်းၶႃႈသေ လႆႈငိၼ်းၶၢဝ်ႇဝႃႇ ၸုမ်းၸၢဝ်းၶိူဝ်း ၽွမ်ႉႁူမ်ႈ UNFC တေမႃးၼႆလႄႈ ႁဝ်းၶႃႈၶဝ်ဢုပ်ႇၵၼ်သေ ဝႃႈ ၵိုင်ႇလီၵႂႃႇႁပ်ႉတွၼ်ႈယူႇၶႃႈယူဝ်ႉ၊ မိူၼ်ၼင်ႇ လူင်ပွင်ၸိုင်ႈ မိူင်းႁူမ်ႈတုမ် မိူင်းမၢၼ်ႈမႃး ၊ ၵူၼ်းလူင်သေတီႈတီႈမႃး ႁဝ်းၶႃႈ ဢဝ်ၼူၵ်ႉႁဝ်းသေ ၵႂႃႇပႂ်ႉႁပ်ႉယူႇ ၊ ယွၼ်ႉၼၼ် တီႈၸုမ်းၸၢဝ်းၶိူဝ်း ၽွမ်ႉႁူမ်ႈ သမ်ႉတေမႃး ထႅင်ႈၾၢႆႇၼိုင်ႈၵေႃႈ ပဵၼ် ၸုမ်းတူင်ႉၼိုင်ႁဵတ်းၵၢၼ်မိူင်း တႃႇၵူၼ်းမိူင်းတႆးႁဝ်းလႄႈ ႁဝ်းၶႃႈ ၸင်ႇဢွၼ်ၵၼ်ၵႂႃႇပႂ်ႉႁပ်ႉတွၼ်ႈ ” ဝႃႈၼႆ ။


ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး မူႇၸႄႈ လႆႈဢဝ်ၵွင်မွင်း တၢင်းၵႃႈၼူၵ်ႉသေ ပႂ်ႉႁပ်ႉတွၼ်ႈ၊ ထႅင်ႈၾၢႆႇၼိုင်ၵေႃႈ ပီႈၼွင်ႉၵူၼ်းမိူင်း ဢွၼ်ၵၼ်ယိပ်းပၢႆႉသေ ႁူမ်ၸူမ်းႁပ်ႉတွၼ်ႈ ၊ တီႈပၢႆႉၼၼ်ႉ တႅမ်ႈဝႆႉဝႃႈ ပေႃႈမႄႈၵူၼ်းမိူင်း မူႇၸႄႈ ႁူမ်ၸူမ်း ႁပ်ႉတွၼ်ႈ မူႇၸုမ်း UNFC  ယူႇဢေႃႈ ဝႃႈၼႆ ။


ဝၼ်းတီႈ 26-29/07/2016 ၼႆႉ ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉၵူႈမူႇၵူႈၸုမ်း ၸိူဝ်းလူင်းလၢႆးမိုဝ်းၵိုတ်းတိုၵ်းတူဝ်ႈမိူင်းလႄႈ ၸုမ်းၸိူဝ်းပႆႇလူင်းတင်းသဵင်ႈ ပႃးၸဵမ် တူဝ်တႅၼ်းပႃႇတီႇၵၢၼ်မိူင်း ၸုမ်းတူင်ႇဝူင်းၵူၼ်း တေႁူမ်ႈၵၼ်ၸတ်းႁဵတ်းပၢင်ၵုမ်လူင် ႁၢင်ႈႁႅၼ်း ဢွၼ်ၼႃႈ ၊ ႁႂ်ႈတူဝ်ႈတၼ်းတႃႇ ပၢင်ၵုမ်လူင် ၸူဝ်ႈပၢၵ်ႇပီ 21 ပၢင်လူင် ဢၼ်တီႈၵိူဝ်းၵုမ် ဝၢၼ်ႈမိူင်း တေႃႇဢွင်ႇသၢၼ်းသုၵျီႇ တေဢွၼ်ႁူဝ်ၸတ်းႁဵတ်း ၊ ပိူဝ်ႈတႃႇႁႃၶေႃႈလႆႈၸႂ်ၸၢဝ်းၶိူဝ်း တင်းလၢႆဝႆႉထႃႈ ဢွၼ်တၢင်း ဝႃႈၼႆ ။