ၸဝ်ႈၼႃႈတီႈပလိၵ်ႈ မိူင်းၼၢႆးတင်း တပ်ႉသိုၵ်းၵူၼ်းမိူင်း (SSS) သၢမ်တူဝ် ႁူမ်ႈၵၼ် ၵူတ်ႇထတ်း တီႉၺွပ်းလႆႈ ၸၢႆးၶိူဝ်းသႅင် ၵေႃႉၶႃႈႁႅမ်တၢႆ  ၼၢင်းၽူၺ်းလၢဝ် လုၵ်ႈႁဵၼ်းၸၼ်ႉ(9) ဝဵင်းမိူင်းၼၢႆး ။


ဝၼ်းတီႈ 24/07/2016 ယၢမ်း 14:00 မူင်းပၢႆ ၸဝ်ႈၼႃႈတီႈပလိၵ်ႈ မိူင်းၼၢႆး တင်းၸုမ်းတပ်ႉ သိုၵ်းၵူၼ်းမိူင်း (SSS) သၢမ်တူဝ် ႁူမ်ႈၵၼ် ၵူတ်ႇထတ်း တီႉၺွပ်းလႆႈတူဝ် ၸၢႆးၶိူဝ်းသႅင် ၵေႃႉၾၼ်းၼၢင်းၽူၺ်းလၢဝ် ဢႃယု 14 ပီ ၊ တၢႆထင်တီႈ - တီႈလႆႈမၼ်းၸၢႆး တီႈဝၢၼ်ႈလွႆၶဵဝ် ဢိူင်ႇလွႆၶဵဝ် ၸႄႈဝဵင်းမိူင်းၼၢႆး ၸိုင်ႈတႆး ပွတ်းၸၢၼ်း ။


ၶူးသွၼ် ဢူးၵျေႃႇသေႃးမူဝ်းၸဵင်ႇ (ၶ) သြႃႇၵျေႃႇ လၢတ်ႈဝႃႈ “ တီႉၺွပ်းလႆႈ မိူဝ်ႈဝႃး ဝၢႆးဝၼ်း 2 မူင်း ပၢႆ၊ ႁူဝ်ၶမ်ႈ 6 မူင်းသမ်ႉ သူင်ႇပၼ်တပ်ႉပလိၵ်ႈမိူင်းၼၢႆးယဝ်ႉ ။ ဝၢၼ်ႈလွႆၶဵဝ်ၼႆႉ မီးၾၢႆႇတူၵ်း မိူင်းၼၢႆး ၊ ပွတ်းတၢင်းၾၢႆႇပူၼ်ႉသမ်ႉ မီးတပ်ႉသိုၵ်းၵူၼ်းမိူင်း (SSS) ၸဝ်ႈၸၢႆးထုၼ်း ဢွၼ်ႁူဝ် တူင်ႉၼိုင်ဝႆႉ ယွၼ်ႉၼၼ်ႉ ၸဝ်ႈၼႃႈတီႈပလိၵ်ႈမၢၼ်ႈတင်း တပ်ႉသိုၵ်းၵူၼ်းမိူင်း လႆႈႁူႉငိၼ်းၶၢဝ်ႇသေ ႁူမ်ႈၵၼ် တီႉၺွပ်း ” ဝႃႈၼႆ ။


ပူၼ်ႉမႃး ဝၼ်းတီႈ  14/07/2016 ယၢမ်း 12:45 မူင်း ၼၼ်ႉ လုၵ်ႈႁဵၼ်း ၸၼ်ႉၵဝ်ႈ ႁူင်းႁဵၼ်း ၸၼ်ႉသုင် မၢႆ 1 ဝဵင်းမိူင်းၼၢႆး ၼၢင်းၽူၺ်းလၢဝ် ဢႃယု 14 ပီ ထုၵ်ႇၸၢႆးၶိူဝ်းသႅင် ဢႃယု 16 ဢဝ်လႅဝ်းၽၼ်းၶႃႈႁႅမ်တၢႆ တီႈပွၵ်ႉလွႆဝႄႈ ၸႄႈဝဵင်းမိူင်းၼၢႆး ။ တေႃႈလဵဝ် ၸဝ်ႈၼႃႈတီႈ ပလိၵ်ႈၶဝ် ပိုတ်ႇဢမူ (ၶၻီး) ဢဝ်လိူင်ႈလၢဝ်း ၵဵဝ်ႇၵပ်းၵၢၼ်ၶႃႈႁႅမ်ၵူၼ်းတၢႆဝႆႉၼႆယဝ်ႉ ။


ၸၢႆၶိူဝ်းသႅင် ၵူၼ်းၵေႃႉၶႃႈႁႅမ် ပဵၼ်လုၵ်ႈၸၢႆး ၼၢင်းၵုမ် ဝၢၼ်ႈႁႄႈ မိူင်းၼၢႆး ဢႃယု 16 ပီ ။ ၼၢင်းၽူၺ်းလၢဝ် ၵေႃႉထုၵ်ႇၶႃႈႁႅမ်တၢႆ  ပဵၼ်လုၵ်ႈယိင်း ၸၢႆးယီႈထုၼ်းတင်းၼၢင်းၸၢမ်ႇ ပဵၼ်လၢၼ် လုင်းၼၼ်ႇတီႇ လႄႈ ပႃႈဝၼ်း ယူႇပွၵ်ႉလွႆဝႄႈ ၊ ပဵၼ်လုၵ်ႈႁဵၼ်း ၸၼ်ႉသုင် မၢႆ (1) ၊ မၼ်းၼၢင်းၺႃးၾၼ်း တီႈ ၶေႃႈမိုဝ်းၽၢႆႇၶႂႃ 1 ၵမ်း ၊ ႁူဝ် 2 ၵမ်း ၊ တီႈဢႅဝ် 1 ၵမ်း ၊ တီႈၶႃၾၢႆႇၶႂႃ 1 ၵမ်း ႁူမ်ႈၵၼ် 5 ၵမ်း ၼႆယဝ်ႉ ။