ၸၢႆးမူၼ်း ၽူႈတႅၼ်းသၽႃး ၵူၼ်းမိူင်း ၸႄႈဝဵင်းလၢႆးၶႃႈ တၢင်ႇယွၼ်း တီႈၼႂ်းပၢင်ၵုမ်သၽႃး ၵူၼ်းမိူင်း ၼေႇပျီႇတေႃႇ ႁႂ်ႈႁူင်းယႃ လၢႆးၶႃႈ  လႆႈၽိူမ်ႉထႅမ်ၵူႇၼွၼ်း ၵူၼ်းပဵၼ်၊ ပဵၼ်ႁူင်းယႃ 50 ၵူႇၼွၼ်း ။

ဝၼ်းတီႈ 26/07/2016 ပၢင်ၵုမ်သၽႃး ၵူၼ်းမိူင်း ပွၵ်ႈၵမ်းသွင် တီႈၼေႇပျီႇတေႃႇၼၼ်ႉ ၸၢႆးမူၼ်း ၽူႈတႅၼ်းသၽႃး ၵူၼ်းမိူင်း တၢင်ႇယွၼ်းထိုင် ၼႂ်းပၢင်ၵုမ် ႁႂ်ႈၽိူမ်ႉထႅမ် ၸၼ်ႉၵူႇၼွၼ်းၵူၼ်းပဵၼ် ႁူင်းယႃ ၸႄႈဝဵင်းလၢႆးၶႃႈ ၸိုင်ႈတႆး ပွတ်းၸၢၼ်း ယွၼ်ႉဝႃႈ ၵူၼ်းပဵၼ် ၼႂ်းပိုၼ်ႉတီႈ ၼမ်လိူဝ်မႃး ၵူႇၼွၼ်း တႃႇၵူၼ်းပဵၼ်သမ်ႉ မီး 25 ၵူႇၵူၺ်း ၼႆယဝ်ႉ ။


 ၸၢႆးမူၼ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ လၢတ်ႈဝႃႈ “ ၵူၼ်းပဵၼ်သမ်ႉ ၼမ်မႃး ဝဵင်းၵေႃႈယႂ်ႇမႃး ၵူၼ်းၵေႃႈၵိုၼ်းၶႃႈလႄႈ ႁႂ်ႈၶႂၢၵ်ႈတီႈ လႄႈၶိုၼ်ႈၸၼ်ႉပၼ် ႁူင်းယႃ ၼႂ်းဝဵင်းလၢႆးၶႃႈထႅင်ႈ။ တၢင်းဢိူင်ႇ ဝၢၼ်ႈယိူင်း ၽႃလမ် ပၼ်ႇတၢင်၊ ဢိူင်ႇတၢတ်ႇမွၵ်ႇ ဝၢၼ်ႈလိူဝ်ႇ ဝၢၼ်ႈႁႅင်ႈ ဝၢၼ်ႈထီႇ ဝၢၼ်ႈႁူဝ်တိုဝ်ႉ ႁၢႆးသႅင် ပၢင်သၢင်း ၸိူဝ်းၼႆႉၵေႃႈ ႁႂ်ႈမီးႁွင်ႈယႃပိုၼ်ႉတီႈ” ဝႃႈၼႆ ။


ၻွၵ်ႊတိူဝ်ႊ မိၼ်ႉထူၺ်း  ၽွင်းလူင်ၾၢႆႇပၢႆးလဵၼ်ႈႁႅင်းလႄႈ ပၢႆးယူႇလီ လၢတ်ႈဝႃႈ “ ပီၼႃႈမႃး တေတႄႇလူင်းႁဵတ်းပၼ် မိူၼ် ၶႂၢၵ်ႈႁူင်းယႃ ႁဵတ်းမႂ်ႇ၊ ၽိူမ်ႉထႅမ် ၸၼ်ႉၵူႇၼွၼ်းၵူၼ်းပဵၼ် ၸဵမ်ၸိူဝ်းၼႆႉ၊ ၵူၺ်းၵႃႈ မေႃယႃ တႃႇယူတ်းယႃတႄႉ ၼႂ်းၶၢဝ်းတၢင်း 2-3 လိူၼ်ၼႆႉ တေမႃးႁၢပ်ႇၵိုတ်ႉပုၼ်ႈၽွၼ်းယဝ်ႉ” ဝႃႈၼႆ။
ၵူၺ်းၵႃႈ တီႈႁူင်းယႃလူင် ၼႂ်းၸႄႈဝဵင်းလၢႆးၶႃႈတႄႉ ပီၼႃးမႃး ၸွင်ႇတေတင်ႇယွၼ်းငိုၼ်းသေ ႁဵတ်းပၼ် ၵႂႃႇ ဝႃႈၼႆ ။


တေႃႈလဵဝ် တီႈႁူင်းယႃ ၵူၼ်းမိူင်းၸႄႈဝဵင်းလၢႆးၶႃႈၼႆႉ တိုၵ်ႉပဵၼ်ၸၼ်ႉၵူႇၼွၼ်း 25 ၵူႇ၊ ယွၼ်ႉၼၼ် ယူႇတီႈၽူႈတႅၼ်းလၢႆးၶႃႈ ယိုၼ်ႈယွၼ်း ႁႂ်ႈပဵၼ် ၸၼ်ႉၵူႇၼွၼ်း 50 ၵူႇ၊ ယၢမ်းလဵဝ် ၵူၼ်းၼႂ်းပိုၼ်ႉတီႈ ၵူၼ်းပဵၼ်တၢင်းပဵၼ် ၼမ်လိူဝ်မႃးလႄႈ ႁူင်းယႃၵေႃႈၵႅပ်ႈ၊ ၵူႇၼွၼ်းၵေႃႈဢေႇ၊ မေႃယႃ ၵေႃႈဢေႇ တႃႇယူတ်းယႃၵေႃႈ ပႆႇတဵမ်ထူၼ်ႈၼႆလႄႈ ၸင်ႇလႆႈတၢင်ႇယွၼ်းၵႂႃႇ ဝႃႈၼႆ။